1. Ti mwawiihai wuupuwelela yoororomeliha ya Yehova ya ekumi yoohimala enanivolowelaaya?

 YEHOVA oororomeliha wi yaale anamwiiwelela yoowo anahaala waakhela “ekumi yoohimala.” (Aro. 6:23) Vaavaa nnuupuwelelaahu sa yeeyo Yehova onivanheiye, mweeparipari osivela wahu ntakhara yoowo onnakhala woolipa. Muupuwele ela: Tiithi ahu a wirimu onnanisivela vancipale nave hiyaavoru echu enahaala onimwalanya ni yoowo.

2. Ti mwawiihai yoororomeliha ya ekumi yoohimala enanikhaviheryaaya?

² Yoororomeliha ya Muluku ya ekumi yoohimala ennanikhaviherya ovilela ni makacamiho ahu. Naamwi amwiicani ahu elocaka wi enahaala oniipha, hanihiya omurumeela Yehova. Ntakhara heeni? Nthowa noopacerya, woona wi noosuwela wi wakhala wi nookhwa nri oororomeleya wa Yehova, owo onahaala oniviiha mookhwani nave nnahaala okhalano ewehereryo ya ohikhwa wanaawiili. (Yoh. 5:28, 29; 1 Ako. 15:55-58; Ahe. 2:15) Ntakhara heeni nnaphwanelaahu ororomela wi ti wooweryeya wa hiyo okhalano okumi woohimala? Muthokororye mathowa anacharela.

3. Ntakhara heeni nnanwerya ororomela wi Yehova ookhalano owerya wa onivaha ekumi yoohimala? (Salmu 102:12, 24, 27)

³ Hiyaano ninnasuwela wi Yehova ookhalano owerya wa onivaha ekumi yoohimala nthowa nawi owo Ehime ya okumi nave tawiikhalelaru. (Sal. 36:9) Moone soorepa savakhaani sa Mpiipiliyani sinooniherya wi Yehova tawiikhalelaru. Salmu 90:2, PMM olonce wi Yehova ta “opacerya voopacerya okhala wookhala.” Salmu 102 onnaloca echu yoolikana. (Mwaalakhanye Salmu 102:12, 24, 27, PMM.) Nave mulipa a miririmu Apakuki aahirepa vooloca sa Atiithi ahu a wirimu: “Khoo Apwiya, nyuwaano mwa ookhala wookhala, mwa Muluku  aweela, hamurwa mukhwaru.”—Hap. 1:12, PMM.

4. Apwanne nnaphwanela okhala awuukhuwa wakhala wi ti woovila wa hiyo wiiwexexa eparipari yawi Yehova tawiikhalelaru? Mutharihe.

⁴ Apwanne ti woovila wa nyuwo wiiwexexa eparipari yawi Yehova ta “okhala wookhala”? (Yes. 40:28, PMM) Achu ancipale annoona tho okhala woovila wiiwexexa yeela. Elihu ooloca sa Yehova: “Honawereya osuwela waaca wa miyaakha sawe.” (Yupu 36:26, PMM) Nyenya ohiiwexexa echu yammoori henataphulela wi eyo tahi eparipari. Ntoko yootakiherya, woona wi hinsuwenle mukhalelo maliixo analapaaya, apwanne eyo enataphulela wi maliixo hekhanle? Chiryene hooye! Moolikana, hiyaano akhweya hinrwaru niiwexexa phaama mukhalelo Yehova oreiye awiikhalelaru. Nyenya ela henataphulela wi Muluku tahi a okhala wookhala. Mpatuxa hanapaka ichu mwawiiwanana ni yeeyo nnaweryaahu wiiwexexa naari hooye. (Aro. 11:33-36) Nave owo aahikhala ehaakumve okhala echu vyakala wirimu ni veelaponi yavathi, ophitaanyerya nsuwa ni itheneeri. Yehova oniroromeliha wi owo ‘Topanke elapo yavathi ni owerya wawe.’ Nave owo aahikhala ahaakumve ‘waatelela erimu.’ (Yer. 51:15, PMM; Saw. 17:24) Nthowa taani nikina nnaneeriha ororomela wi ti wooweryeya wa hiyo opuha okumi woohimala?

5. Ewehereryo taani mutheli oopacerya yaaryaayano?

⁵ Ichu soothene siri veelaponi yavathi sirino okumi Yehova opatunxeiye, saanwerya okhwa ohiya achu. Owo aahaavaha pahiru yaawo ewehereryo ya ohikhwa. Nyenya Yehova aahimulopola Atamu: “Kaahi mwiri woosuweliha yaphaama ni yoonanara. Ohilye. Walya onamookhwa chiri.” (Map. 2:17, PMM) Waakhanle wi Atamu ni Eva yaahimwiiwelela Yehova, awo hiyaahaala okhwa. Ti yoophwanelela ophiyerya makuchuwelo awi mu elukuluku aya, Yehova aahaala weemererya wi awo elye yawiima ya “mwiri wookumi.” Ela yaahaala otaphulela wi awo yanwerya ororomela wi yaahaala okhalano “okumi mahiku oothene.” b—Map. 3:22, PMM.

6-7. (1) Echu taani ekina enooniherya wi achu hiyaapatuxiwe wi ekhweeke? (2) Echu taani munachunaanyu waakhwaniherya mparataiso? (Moone eruku.)

⁶ Masiyentista makina aaphwanya sooleeliherya sawi ocoopare ahu onanwerya okhapelela sooleeliherya sincipale nnahuseryaahu  variyari va okumi. Ela ti yootikhinihaxa. Mu 2010 mwaha mmoha wa mu yornaale Mente Sientífica Americana waahiloca wi ocoopare ahu onanwerya okhapelela sooleeliherya sincipale ntoko iwora mamilyawu mararu naari iyaakha 300 sa aprokrama a mu TV. Nave akhweya ocoopare ahu onanwerya okhapelela ichu opwaha vaavaa. Mwawiihiiha, ela enooniherya wi Yehova oopaka ocoopare ahu wi okhapeleleke sooleeliherya soothene nnahuseryaahu pahiru mu iyaakha 70 naari 80.—Sal. 90:10.

⁷ Yehova tho oonivaha nchuno noolipa na otitelela okhalano okumi. Aatharihaka achu, Piipiliya olonce wi Muluku ookuhamo ‘mmurimani mwaya elukuluku yoohimala.’ (Ekl. 3:11, PMM) Nla nthowa nimoha nnaneeriha woonaka okhwa ntoko mwiicani. (1 Ako. 15:26) Wakhala wi ninniiceliwa, apwanne nnamoona omaala nave nnaweherya pahiru okhwa? Hooye. Mwawooneya, ninnaya oxipitale nave nivahiwa murece wi niwaniheno ereca. Mweeparipari ninnapaka soothene siri saweemereryeya wi nsepe okhwa. Nave vaavaa oosiveliwaahu onakhweiye, moohipwacha aari mwaana naari mutokweene, apwanne hannahooxeya mu elukuluku yincipale? (Yoh. 11:32, 33) Nookhalano mavyakelo a ohuserya okhala wookhala ni nchuno noolipa na otitelela okhalano okumi nthowa nawi Mpatuxa ahu oosivela onipanke mmukhalelo yoowo. Mweeparipari, owo onahaala weeriha okhala wooweryeya wa hiyo opuha okumi okhala wookhala. Nyenya aakhalavo tho mathowa makina ananeeriha ororomela wi ti wooweryeya wa hiyo opuha okumi okhala wookhala. Vano hankooni nthokororye ichu seiho Yehova opankeiye khalai ni seiho onapakeiye hiihaano inooniherya wi yookhwela awe yoopacerya hetoroken’ye.

8. Tiheeni Yesaya 55:11 onanihusiheiye vooloca sa yookhwela ya Yehova ntakhara hiyo?

⁸ Naamwi Atamu ni Eva yaachenke nave yaaruuhela anaaya okhwa, Yehova hatoronke muupuwelo awe vooloca sa yookhwela awe. (Mwaalakhanye Yesaya 55:11, PMM.) Yookhwela awe nivano ori waavaha okumi woohimala alapeli awe oororomeleya. Ninnasuwela yeela nthowa na ichu Yehova opankeiye ni olonceiye wi aakhwaniherye yookhwela awe.

9. Tiheeni Muluku ororomelinheiye? (Taniyeli 12:2, 13)

⁹ Yehova oororomeliha waaviiha yaale ekhwile ni waavaha yaawo ekari ya opuha okumi okhala wookhala. (Saw. 24:15; Titu 1:1, 2) Mulopwana oororomeleya Yupu aalekecheya wi Yehova aanachuna chiryene waaviiha yaale yaakhwile. (Yupu 14:14, 15) Mulipa a miririmu Taniyeli aanasuwela wi achu yaanwerya oviihiwa ni ekari ya opuha okumi okhala wookhala. (Sal. 37:29; mwaalakhanye Taniyeli 12:2, 13, PMM.) Ayuta a mmahiku a Yesu yaanasuwela tho wi Yehova aanwerya waavaha alapeli awe oororomeleya “ekumi yoohimala.” (Luka 10:25; 18:18) Yesu mwawuuluulela aanaloca sa yoororomeliha yeela, nave owo aahiviihiwa mookhwani ni Atiithi awe.—Mat. 19:29; 22:31, 32; Luka 18:30; Yoh. 11:25.

10. Tiheeni oviihiwa mookhwani wakhalai onooniheryaaya? (Moone eruku.)

¹⁰ Yehova Namavaha a Okumi nave ookhalano owerya wa waaviiha mookhwani achu akhwile. Owo aahimvaha owerya mulipa a miririmu Eliya wi amviihe mwaana a naamukweli Oosarefa. (1 Mam. 17:21-23) Ohoolo waya, nnikhaviheryo na Muluku, mulipa a miririmu Eliseu aahimviiha mookhwani mwaana a muthiyana mmoha Ooshunami. (2 Mam. 4:18-20, 34-37) Oviihiwa mookhwani wa achu yaale ni wa achu akina, yawooniherya yawi Yehova ookhalano owerya wa waaviiha mookhwani achu. Vaavaa aareiye veelaponi yavathi, Yesu aahooniherya wi Tiithi awe aahimvaha owerya yoowo. (Yoh. 11:23-25, 43, 44) Hiihava Yesu ori wirimu nave oovahiwa “owerya woothene wirimu ni veelaponi yavathi.” Chiryene, owo onanwerya waakhwaniherya yoororomeliha yawi “oothene ari mmahiyeni anuupuweliwa” anahaala oviihiwa wi yaakhele ekumi ni ewehereryo ya wiikhalelaru.—Mat. 28:18; Yoh. 5:25-29.

11. Ti mwawiihai woopola oneerihaaya okhala wooweryeya wa hiyo opuha okumi okhala wookhala?

¹¹ Ntakhara heeni Yehova eemerenryeiye wi Mwanawe oosiveliwa ahoolele okhwa wawiicelaxa? Yesu oovaha naakhulo vaavaa aalonceiye: “Muluku aatepa osivela elapo ophiyerya omvaha Mwanawe ooyariwa meekheiye, wi oothene yoole onamuroromela ahitoloxiwe, nto akhaleno ekumi yoohimala.” (Yoh. 3:16) Moorweela wa omvaha Mwanawe wi anoopole wa soocheka sahu, Muluku oheeriha okhala wooweryeya wa hiyo waakhela ekumi yoohimala. (Mat. 20:28) Murummwa Paulo oothariha ochuneya wa nikupa nenla wa yookhwela ya Muluku vaavaa aarempeiye: “Woona wi okhwa oruule mwa muchu mmoha, ovinya mookhwani wa alipa ookhwa onarwa tho moorweela wa muchu mmoha. Tiwi hiihaa ntoko mwa Atamu oothene anakhwaaya, hiiha tho mwa Kristu oothene enarwa yaakhela okumi.”—1 Ako. 15:21, 22.

12. Ti mwawiihai Yehova onahaaleiye waakhwaniherya yookhwela awe ntakhara hiyo?

¹² Yesu aahaahusiha oomuchara awe wi evekeleke ntakhara orwa wa Omwene wa Muluku nave wi yookhwela ya Muluku ntakhara  elapo yavathi yeereye. (Mat. 6:9, 10) Nikupa nimoha na yookhwela ya Muluku ori wi achu epuhe okumi okhala wookhala veelaponi yavathi. Wi aakhwaniherye yeela, Yehova oomuthanla Mwanawe ntoko Mwene a Omwene Woomesiya. Muluku onnaathukumanya achu awaakhwana 144.000 wi yalape ni Yesu mu waakhwaniherya yookhwela Awe.—Wup. 5:9, 10.

13. Tiheeni Yehova onapakeiye olelo, nave tiheeni munaphwanelaanyu weera?

¹³ Hiihava Yehova onnathukumanya “muloko mutokweene” wa achu. Owo onnaavyakiha wi ekhale vathi va olamulelo wa Omwene awe. (Wup. 7:9, 10; Tiy. 2:8) Naamwi achu ancipale olelo eri ookawanyeya nthowa na wiicana ni ikhoco, yaawo ari a “muloko mutokweene” annapaka owetha waya wi eviihevo wiica vyakala mmurimani mwaya. Awo annooniherya mu saweera saya wi annahana malema aya ikhala ihipa soolimano. (Mik. 4:3) Ohiya opaka makupa mu ikhoco seiho sinawiipha achu ancipale, awo annaakhaviherya achu ophwanya “ekumi yeeparipari” moorweela wa waahusiha eparipari vooloca sa Muluku ni yookhwela awe. (1 Tim. 6:19) Amusi ananwerya owiica yaawo naari ananwerya oyeleela ikhorowa nthowa na okhaviherya Omwene wa Muluku, nyenya Yehova onnaakhaviherya okhalano ichu anachunaaya. (Mat. 6:25, 30-33; Luka 18:29, 30) Iparipari seiho sinnaniroromeliha wi Omwene  wa Muluku ti weeparipari nave wi onahaala otitelela waakhwaniherya yookhwela ya Yehova.

14-15. Ti mwawiihai yoororomeliha ya Yehova ya omaliha okhwa okhala wookhala eneeraaya yaakhwanele?

¹⁴ Yesu vano Mwene a Omwene wa Muluku nave owo onahaala waakhwaniherya soororomeliha soothene Yehova onivanheiye. (2 Ako. 1:20) Ovinyerya mu 1914, Yesu onnaavootha amwiicani awe. (Sal. 110:1, 2) Owo ni alamuleli akhwaawe moohilekela anahaala ovootha moomalela nave anahaala waatoloxa achu ootakhala.—Wup. 6:2.

¹⁵ Variyari va Olamulelo wa Iyaakha Masanaru Khumi, Yesu onahaala waaviiha achu ookhwa nave onahaala waakhaviherya oothene yaale anamwiiwelela Yehova wi ekhale oophaameya. Emanle yaweeha yookuchula, yaale Yehova onahaaleiye waathoriha ntoko eekhaikhai ‘anahaala waakhela elapo yavathi, yiikhalelaru mummo okhala wookhala.’ (Sal. 37:10, 11, 29, NN) Moohakalaliha, ‘mwiicani ookuchula, okhwa onahaala omalihiwa.’—1 Ako. 15:26.

16. Nthowa taani noopacerya nnanceenyerya omurumeela Yehova?

¹⁶ Ntoko nonnaahu, ewehereryo ahu ya okhala wookhala enathipeleya mu Masu a Muluku. Ewehereryo yeela enanwerya onikhaviherya otitelela okhala oororomeleya variyari va mahiku yaala ookuchula ni oovila. Nyenya wi nimuhakalalihe Yehova, opwaha soothene hiyaano nnaphwanela ochuna opuha okumi okhala wookhala. Nthowa noopacerya nnaneeriha otitelela okhala oororomeleya wa Yehova ni Yesu ori wi ninnaasivela vancipale yaawo. (2 Ako. 5:14, 15) Osivela yoowo onnanceenyerya waatakiherya yaawo ni okawana ni akina ewehereryo nryaahuno. (Aro. 10:13-15) Vaavaa nnahuseryaahu okhala a niphwanya ni amahala, ninnakhala achu a mukhalelo yoowo Yehova onaachuneiye ntoko asinthamwene awe okhala wookhala.—Ahe. 13:16.

17. Murici taani mmoha ti mmoha a hiyo oreiyeno? (Mateyu 7:13, 14)

¹⁷ Apwanne nnahaala okhala variyari va achu yaawo anahaala waakhela ekumi yoohimala? Yehova oonivaha ekari yeeyo. Ela elukuluku ya othanla ephiro yeeyo enahoolela wookumini. (Mwaalakhanye Mateyu 7:13, 14.) Ti mwawiihai okumi oneeraaya okhale vaavaa nneeraahu naakhele ekumi yoohimala? Nnahaala othokororya naakhulo na nikoho nenla mmwaha onacharela.