1. Elukuluku vakhaani ahaakumve okhwa, tiheeni Yesu aalonceiye wa mulipa aweera soonanara yoowo aari mmakupa awe? (Luka 23:39-43)

 YESU vamoha ni achu apiili aweera soonanara yaawo yaakhomeliwe vamwirini yaahihoolela okhwa wawiicelaxa. (Luka 23:32, 33) Achu oopiili yaale aweera soonanara yaahimuruwana Yesu, woona wi mweeparipari awo hiyaari oomuchara awe. (Mat. 27:44; Mar. 15:32) Nyenya mmoha a yaale aahirukunusa murima awe. Owo aaloca: “Yesu, mukuupuwele vaavaa muneeraanyu mvolowe mu Omwene anyu.” Yesu aahimwaakhula: “Mweeparipari kinnooleela olelo: Onarwa okhala ni miyo Mparataiso.” (Mwaalakhanye Luka 23:39-43.) Hiyaavo yawooniherya yawi mulipa aweera soonanara yoole aheemererya muchaka vooloca sa “Omwene wa wirimu,” yoowo Yesu aalalenryeiye variyari va orummwa awe. Nave Yesu hantonko oloca wi mulopwana ole ahaala ovolowa mu Omwene wa wirimu. (Mat. 4:17) Yesu aamuloca Parataiso a veelaponi yavathi yoowo onoorwa. Ntakhara heeni nnalocaahu yeela?

2. Tiheeni enooniherya wi mulopwana aweera soonanara yoole aacharunwe aari Muyuta?

² Mulipa aweera soonanara yoole aacharunwe mwawooneya aari Muyuta. Mulipa aweera soonanara yoole aahiloca wa mukina: “Weyaano honamoovaru Muluku, vano waakhenlaawe olaka omohamoha?” (Luka 23:40) Ayuta yaamulapela pahiru Muluku mmoha, nyenya achu a mulaponi yaalapela amuluku ancipale. (Muk. 20:2, 3; 1 Ako. 8:5, 6) Waakhanle wi mulopwana ole aweera soonanara haari Muyuta, apwanne ahaala opaka nikoho nawi: “Weyaano honamoovaru muluku?” Opwaha yeeyo, Yesu aarumihiwe, ohiya wa amalapo, nyenya wa “ipucepuche soorimeela sa nloko na Aisarayeli.” (Mat. 15:24) Muluku aahiwooniherya Aisarayeli wi aahaala waaviiha achu ookhwa. Akhweya mulipa aweera soonanara ole aanasuwela vooloca sa yeela, nave ntoko masu awe anooniheryaaya, owo aanaroromela wi Yehova aahaala omviiha Yesu mookhwani wi alamulele mu Omwene wa Muluku. Mwawooneya mulopwana yoole  aanaroromela tho wi Muluku aahaala omviiha mookhwani.

3. Tiheeni akhweya uupuwenleiye mulipa aweera soonanara yoole aacharunwe vaavaa Yesu aalonceiye sa Parataiso? Mutharihe. (Mapacereryo 2:15)

³ Ntoko Muyuta, mulopwana aweera soonanara yoole aacharunwe aahikhalano masuwelelo vooloca sa Atamu ni Eva ni Parataiso yoowo Yehova aamureherenryeiye ntakhara yaawo. Mwawiihiiha mulipa aweera soonanara yoole akhweya aanaroromela wi Parataiso yoowo Yesu aamuloceiye naahaala okhala nipuro nooreeraxa mu elapo yeela yavathi.—Mwaalakhanye Mapacereryo 2:15, PMM.

4. Masu a Yesu wa mmoha a yaale aweera soonanara anaphwanela onceenyerya wuupuwela eheeni?

⁴ Masu a Yesu wa mulipa aweera soonanara yoole anaphwanela onceenyerya wuupuwela vooloca sa mukhalelo okumi Mparataiso onahaalaaya okhala. Hiihaano, nnahaala oohuserya ichu savakhaani vooloca sa Parataiso moorweela wa olamulelo wa murecele wa Mwene Soolomoni. Piipiliya olonce wi Yesu ti mutokweene ompwaha Soolomoni. Hiyaano ninnaweherya wi Yesu onahaala olapa vamoha ni yaawo anahaala olamulela ni yoowo wi yeerihe elapo yavathi okhala parataiso ooreeraxa. (Mat. 12:42) Mweeparipari, “ipucepuche ikina” inaphwanela okhalano nchuno na weera yeeyo Muluku onaavekeiye wi iphwanelele okhalano okumi woohimala mu Parataiso.—Yoh. 10:16.

5. Munoona wi okumi onahaala okhala mmukhalelo taani Mparataiso?

⁵ Tiheeni enoorweelaani mmuupuweloni vaavaa munuupuwelaanyu vooloca sa okumi Mparataiso? Akhweya munnaanyiherya nipuro nooreeraxa ntoko emaca ya Eteni. (Map. 2:7-9) Nyuwaano akhweya munnuupuwela yooloherya ya Mikeya wa achu a Muluku wi awo anahaala okiraathiki “mmoha ni mmoha . . .  vathi va muurushi wa mukuukhu awe ni wa miri onavaha eviinyu.” (Mik. 4:3, 4, PMM) Akhweya munnuupuwela tho iversikulu sa Mpiipiliyani seiho sinaloca wi onahaala okhalavo yoolya yincipale. (Sal. 72:16; Yes. 65:21, 22) Akhweya munniisaanyiherya muri va nipuro nooreeraxa, mukiranthe va meesa esaren’yevo yoolya yoosiva. Akhweya tho nyuwaano munniisaanyiherya moonaka wunkhela waphaamaxa wa miri ni wa ithutu. Nave mwawooneya mwiiwaka okhuwela wa ohakalala wa amusi ni asinthamwene anyu—ophitaanyerya wa yaale anahaala oviihiwa mookhwani—epuhaka onthamwene waphaama wa mukina ni mukhwaawe. Soothene iha tahi waanyiherya pahi. Moohikhwa minikwa, nnaphwanela ororomela wi ichu soothene iha sinahaala weereya veelaponi yeela yavathi. Ohiya yeeyoru, okumi Mparataiso onahaala tho ophitaanyerya muteko woohakalaliha.

6. Tiheeni nnahaalaahu opaka Mparataiso? (Moone eruku.)

⁶ Yehova onipatunxe wi nisiveliweke ni muteko ahu. (Ekl. 2:24) Hiyaano nnahaala okhala ooweiwa variyari va Iyaakha Masanaru Khumi  wa Olamulelo wa Kristu. Yaale anahaala okophola mu yoohooxa etokotoko, ni amilyawu a achu anahaala oviihiwa mookhwani, anahaala ochuna soowara, soolya, nnipuro nookhalavo. Wi ivahereryiwe ichu seiha, onahaala ochuneya ophara muteko mutokweene. Hiihaa ntoko Atamu ni Eva yaaleeliwaaya wi erehererye elapo yavathi, hiyaano tho nnahaala okhala oohakalala ophara muteko wi neerihe elapo yavathi okhala Parataiso. Mwaanyiherye mukhalelo nnahaalaahu okhala oohakalala waahusiha amilyawu aachu anahaala oviihiwa mookhwani yaawo arino masuwelelo vakhaani vooloca sa Yehova ni yookhwela awe ni waakhaviherya oororomeleya yaawo yaakhanle elukuluku Yesu ahaakumve orwa veelaponi yavathi wi ehuserye sincipale!

7. Tiheeni nnaphwanelaahu ororomela, nave ntakhara heeni?

⁷ Hiyaano nnaphwanela ororomela wi okumi mu Parataiso onoorwa onahaala okhala wa murecele, waphaama ni wooreheryeya. Ntakhara heeni? Nthowa nawi Yehova oonooniherya yootakiherya vooloca sa mukhalelo okumi onahaalaaya okhala Mparataiso vathi va olamulelo wa Mwanawe. Nnahaala woona yeela mu yaweereya ya olamulelo wa Mwene Soolomoni.

8. Ti mwawiihai masu anaphwanyeya mu Salmu 37:10, 11, 29 yaakhwanenlaaya Mwene Tavite amanle orepa? (Moone “Makoho a Alipa Waalakhanya” mu erevista yeela.)

⁸ Mwene Tavite aahiveereliwa orepa vooloca sa mukhalelo okumi waahaalaaya okhala vaavaa omwaahiyu mwene a miruku ni oororomeleya aahaaleiye olamulelaka. (Mwaalakhanye Salmu 37:10, 11, 29, PMM.) Hiyaano wiiliwiili ninnamwaalakhanya Salmu 37:11 vaavaa nnalocaahu ni akina vooloca sa Parataiso onoorwa. Ela chiryene eparipari woona wi Yesu aaloca yoorepa yeela va Mwaha awe wa Vamwaakoni, athoonyeryaka wi eyo enahaala waakhwanela omwaahiyu. (Mat. 5:5) Nyenya masu a Tavite yaahooniherya tho mukhalelo okumi waahaalaaya okhala mmahiku a Mwene Soolomoni. Vaavaa Soolomoni aalamuleleiye Aisarayeli, achu a Muluku yaanapuha murecele ni ichu saphaama mu elapo yeeyo yaavaha “mukaka ni enuwi.” Muluku aaloca: “Mwakiiwelela, mucharihaka ikano saka . . . , Kinarwa kivaha elapo anyu murecele wi nyuwo mukoneke muhitutushiwe.” (Onam. 20:24; 26:3, 6, PMM) Soororomeliha seiha saahikhala seeparipari variyari va olamulelo wa Soolomoni. (1 Math. 22:9;  29:26-28) Nave Yehova aahiroromeliha wi achu oonanara yaawo anaalapela amuluku atheru “herwa-ekhala.” (Sal. 37:10, NN) Mwawiihiiha, masu anaphwanyeya mu Salmu 37:10, 11, 29 yaahaakhwanela khalai nave anahaala waakhwanela tho omwaahiyu.

9. Tiheeni mwene amwaamuthiyana o Sapa olonceiye vooloca sa olamulelo wa Mwene Soolomoni?

⁹ Mwene amwaamuthiyana o Sapa aahiiwa vooloca sa murecele ni ichu saphaama seiho nloko na Aisarayeli naapuhaaya vaavaa Soolomoni aalamuleleiye. Owo aahipaka mukwaha woorekama ayaaka o Yerusalemu wi oone mukhateiye mukhalelo ichu saakhanlaaya. (1 Mam. 10:1) Amanle ovareryela olamulelo wa Soolomoni, owo aaloca: “Sa yeeyo kiiwaaka nari eriyari mano henaphiyerya. . . . Ooreeriwa ti alopwana anyu, ooreeriwa ti anamuteko anyu anakhala mahiku oothene vamiithoni vanyu, enawiriyana miruku anyu!” (1 Mam. 10:6-8, PMM) Nyenya mukhalelo ichu saakhanlaaya vathi va olamulelo wa Soolomoni pahiru yawooniherya ya yeeyo Yehova onahaaleiye oweerela achu vathi va olamulelo wa Mwanawe, Yesu.

10. Mmikhalelo taani Yesu oreiye mutokweene ompwaha Soolomoni?

¹⁰ Yesu mutokweene ompwaha Soolomoni mmikhalelo soothene. Soolomoni aari muchu oohiphaameya yoowo aapaka soocheka itokweene mwawooneya seiho saaruuhela achu a Muluku makacamiho. Nyenya Yesu, Mulamuleli oophaameya yoowo ohintonko opaka ichu soonanara. (Luka 1:32; Ahe. 4:14, 15) Yesu aahititelela okhala oororomeleya wa Muluku moohipwacha saweeha soovila seiho Satana aamuruuheleiye. Kristu ohooniherya wi harwa acheka naari opaka echu yeeyo enahaala waahooxa achu awe oororomeleya. Owo Mulamuleli aphaamaxa nnaphwanelaahu okhalano.

11. Taani anahaala omukhaviherya Yesu mu olamulela?

¹¹ Yesu onahaala okhala vamoha ni oothanliwa 144.000 yaawo anahaala olapa ni yoowo wi yaakhapelele achu ni okhwaaniherya yookhwela ya Yehova ntakhara elapo yavathi. (Wup. 14:1-3) Vaavaa yaaryaaya veelaponi yavathi awo yaanavilela ni makacamiho vamoha ni saweeha, mwawiihiiha awo anahaala owiiwexexaka phaama achu yaawo anahaala okhalaka veelaponi yavathi. Tiheeni alamuleli yaala anahaalaaya weera?

12. Muteko taani Yehova onahaaleiye waavaha oothanliwa 144.000?

¹² Yesu ni alamuleli awe aakhalano muteko muncipale wi epake ompwaha Soolomoni. Mwene Soolomoni aakhapelela pahiru amilyawu a achu yaawo yaakhala o Yerusalemu. Nyenya, yaale anahaala olamulelaka mu Omwene wa Muluku anahaala waakhaviherya macikhwi macikhweene a achu yaawo anahaala okhalaka veelaponi yoothene yavathi. Mweeparipari, Yehova ohaavaha oothanliwa 144.000 ekari etokweene!

13. Murici taani wasisapo yaale anahaala olamulela ni Yesu aryaayano?

¹³ Hiihaa ntoko Yesu, oothanliwa 144.000 anahaala orumeela ntoko mamwene ni anamukucho. (Wup. 5:10) Vaavaa Aisarayeli yiiwelelaaya Nlamulo na Mose, woopaceryani anamukucho yaanaakhaviherya achu wi etitelele okhalano onthamwene wawaacameleya ni Yehova ni okhalano okumi waphaama. Nlamulo naari “murusi wa ichu saphaama saahaala orwa,” mwawiihiiha ti woophwanelela okhalano makuchuwelo awi yaale anahaala olamulela ni Yesu anahaala waakhaviherya achu a Muluku otitelela okhalano okumi waphaama ni onthamwene wawaacameleya ni Yehova. (Ahe. 10:1) Hiyaano nnaphwanela oweherya wi noone mukhalelo mamwene ni anamukucho yaala anahaalaaya weeraka ichu wi yaakhaviherye yaale anahaala olamuleliwa ni Omwene wa Muluku veelaponi yavathi. Moohipwacha marehereryo Yehova onahaaleiye opaka, nnaphwanela ororomela wi Mparataiso onoorwa, yaale anahaala okhalaka veelaponi yavathi anahaala waakhelaka ohoolela yoowo awo anachunaaya.—Wup. 21:3, 4.

14. Wiiwanana taani orivovo variyari wa “ipucepuche ikina” ni anna a Kristu?

¹⁴ Yesu aahiloca wi yaale anahaala olamulela ni yoowo ari ntoko “muhuwo mukhaani.” (Luka 12:32) Owo tho aahiloca nikhuuru nanaawiili, nenlo owo iichanneiye ntoko “ipucepuche ikina.” Makhuuru oomeeli ala ari muhuwo mmoha. (Yoh. 10:16) Makhuuru yaala oomeeli analapa vamoha, nave anahaala otitelela weerano yeeyo wi yeerihe elapo yavathi okhala Parataiso. Mwawiihiiha, yaale anapaka makupa a “muhuwo mukhaani” anaya okhalaka wirimu nave yaale anapaka makupa a “ipucepuche ikina” anahaala okhalano ewehereryo ya opuha okumi veelaponi yavathi okhala wookhala. Nyenya sookhalavo ichu seiho “ipucepuche ikina” sinaphwanelaaya weera hiihaano wi siphwanelele okhala Mparataiso.

15. (1) Ti mwawiihai “ipucepuche ikina” inalapaaya ni anna a Kristu? (2) Muni nwerye hai ochariha yootakiherya ya munna yoowo ori mu efarmaasiya? (Moone eruku.)

¹⁵ Mulipa aweera soonanara yoole aacharunwe, aakhwile ahaakumve okhalano ekari ya wooniherya othamalela wawe wa yeeyo Kristu eenreiye ntakhara yoowo. Moohiyana, hiyaano a “ipucepuche ikina” nookhalano ikari sincipale hiihaano wi nooniherye othamalela wahu wa Yesu. Mwawiihiiha, ninnooniherya osivela ntakhara yoowo moorweela wa mukhalelo nnaakhalihaahu asinnawe oothanliwa ni munepa waweela. Yesu aahiloca wi owo onahaala othoriha ipucepuche mwawiiwanana ni mukhalelo awo anaakhalihaaya asinnawe. (Mat. 25:31-40) Hiyaano nnanwerya waakhaviherya anna a Kristu moorweela wa olaleerya mwamvai ni ophara muteko wa waapaka oohuserya. (Mat. 18-20) Mwawiihiiha, hiyaano ninnachuna opharihela phaama yoohuserya ya Piipiliya nnikhaviheryo nenlo nnavahereryiwaahu orweela wa liivuru Mpuhe Okumi Okhala Wookhala! Waakhanle wi hampaceryinhe yoohuserya ya Piipiliya ni muchu, nyuwaano munanwerya opaka yoolakelela ya ompharihela liivuru yoola wi mvahe yoohuserya ya Piipiliya wa achu yaawo munahaalaanyu waaphwanya.

16. Tiheeni nnaphwanelaahu weera hiihaano wi niirehererye ntakhara Omwene wa Muluku?

¹⁶ Hiyaano hannaphwanela onweherya Parataiso wi nikhale muchu a mukhalelo yoowo Yehova onaachuneiye. Nnaphwanela opaka owetha wahu hiihaano wi nikhale oororomeleya mmalocelo ni mu saweera sahu ni okhala oophimelela mookumini  mwahu. Nave nnaphwanela okhala oororomeleya wa Yehova, wa oothelana ahu vamoha ni wa Akristu akhwiihu. Wakhala wi ninnamwiiwelela Yehova mu elapo yeela yoonanara, onahaala okhala wookhweya omwiiwelela owo Mparataiso. Nnaphwanela tho wunnuwiha mavyakelo ni mikhalelo seiho sinahaala wooniherya wi nri ooreheryeya okhala mwemmo. Moone mwaha “Apwanne Mooreheryeya wi ‘Mwaakhele Elapo Yavathi’?” onaphwanyeya mu erevista yeela.

17. Apwanne nnaphwanela wiisoonaka okhala ooceecheya nthowa na soocheka sahu sakhalai? Mutharihe.

¹⁷ Hiyaano tho nnaphwanela wiilipixerya wi nihiye wiiphwanyerya mathowa vooloca sa soocheka itokweene nipankaahu khalai. Mweeparipari, hiyaano hannaphwanela woonaka mukucho wa woopola ntoko ekari ya ‘otitelela ocheka moolakelela.’ (Ahe. 10:26-31) Nyenya nnaphwanela ororomela wi wakhala wi noocharuwa mweeparipari wa soocheka itokweene seiho nipankaahu, naavya nikhaviheryo na Yehova vamoha ni wa atokweene a mmulokoni, nave ntoroka mukhalelo ahu, owo onahaala onikhurumuwela moomalela. (Yes. 55:7; Saw. 3:19) Muupuwele masu a Yesu wa Afarisi: “Nkirweenle owiichana achu awookololowa, nyenya alipa oocheka.” (Mat. 9:13) Mukucho wa woopola wookhalano owerya wa oxipiha soocheka sahu soothene.

18. Tiheeni munahaalaanyu osiveliwa oloca ni mulipa aweera soonanara yoole aari mmakupa a Yesu?

¹⁸ Apwanne munniisaanyiherya muri Mparataiso, muchekulaka ni mulipa aweera soonanara yoole aalonce ni Yesu? Moohikhwa minikwa, ooweeli anyu munahaala wooniherya othamalela wanyu mukucho wa Yesu. Nyuwaano munahaala osiveliwa vancipale omveka owo wi oothariheleeni vooloca sa yeeyo yeeren’ye variyari va iwora sookuchula sa okumi wa Yesu veelaponi yavathi ni mukhalelo iisonneiye vaavaa Yesu eemerenryeiye yooveka awe. Vakina vaya, owo akhweya onahaala osiveliwa wookohaani mukhalelo okumi waaryaaya variyari va mahiku ookuchula a elapo ya Satana. Ohuserya Masu a Muluku ni achu ntoko mulopwana yoola enahaala okhala ekari yavameekhaaya!—Aef. 4:22-24.

19. Ntakhara heeni okumi Mparataiso ohinahaalaaya okhala woovila? (Moone eruku ya ekaapa.)

¹⁹ Okumi Mparataiso horwa okhala woovila. Ilukuluku soothene enahaala okhalakavo achu yaawo nnahaalaahu ochunaka waasuwela ni muteko woohakalaliha wi nipake. Opwaha soothene, mahiku oothene nnahaala osiveliwaka omusuwela phaama Tiithi ahu a wirimu ni opuhaka ichu seiho owo onahaaleiye onivahereryaka. Ilukuluku soothene sinahaala okhalakavo ichu wi nihuserye vooloca sa yoowo nave nnahaala osiveliwaka vancipale ohuserya vooloca sa soopatuxiwa sawe. Moovira wa elukuluku, onthamwene ahu ni Muluku onahaala okhala woolipa. Hiyaano ninnamuthamalela vancipale Yehova ni Yesu nthowa na onivaha yoororomeliha yeela yawi nnahaala okhala Mparataiso okhala wookhala!