1. Tiheeni mulopwana onaphwaneleiye weera wi akhale Mukristu awiichwelavo?

 MWENE Tavite aahimvaha ekano mwanawe Solomoni ariki: “Wiilipihe okhale mulopwana.” (1 Mam. 2:1-3, PMM) Ekano yeela ti yoochuneya wa alopwana oothene yaawo anachuna okhala Akristu awiichwelavo. Mwa yeeyo, awo anaphwanela ohuserya wiiwelela malamulo a Muluku ni opharihela malakiheryo oothene a Mpiipiliyani mu mikhalelo soothene sa okumi aya. (Luka 2:52) Ntakhara heeni ti woochuneya wi anna ari amiravo okhala Akristu awiichwelavo?

2-3. Ntakhara heeni ti woochuneya wi munna ori mmiravo akhale Mukristu awiichwelavo?

² Mulopwana Eekristu ookhalano mirici mincipale soochuneyaxa mu echoko awe ni mmulokoni. Nyuwaano, ntoko mmiravo, moohikhwa minikwa mohuupuwela vooloca sa mirici seiyo munahaalaanyu okhalano omwaahiyu. Akhweya nyuwaano mookhalano yoolakelela ya ovolowa mmuteko wa elukuluku yoothene, okhala murummwa oorumeela, voocharela okhala mutokweene. Naari munnachuna othela nave mukhaleno anamwane. (Aef. 6:4; 1 Tim. 3:1) Wi mwaakhwaniherye phaama mirici seiya, munaphwanela okhala Mukristu awiichwelavo. b

³ Tiheeni enahaala wookhaviheryaani okhala Mukristu awiichwelavo? Aakhalavo mavyakelo oochuneya yaawo munaphwanelaanyu winnuwiha. Vano tiheeni munaphwanelaanyu weera hiihava wi omwaahiyu nwerye waakhwaniherya phaama murici vyakala muneeraanyu mukhaleno?

4. Ti woowi munahaalaanyu ophwanyawo sootakiherya saphaama wi muchare? (Moone tho eruku.)

⁴ Muthanle sootakiherya saphaama wi mucharihe. Mpiipiliyani soosareyamo sootakiherya saphaama seiyo amiravo anaphwanelaaya ochariha. Sootakiherya seiyo sa Mpiipiliyani ti sa alopwana  yaawo yaamusivela Yehova nave yaawenrye waakhwaniherya mirici saya mincipale mu okhapelela muloko wa Muluku. Nyuwaano tho munanwerya ophwanya sootakiherya saphaama variyari va Akristu akina awiichwelavo aveemusini vanyu naari mmulokoni. (Ahe. 13:7) Nave ophiyerya wi mookhalano yootakiherya yoophaameya ya Yesu Kristu. (1 Pet. 2:21) Vaavaa munahuseryaanyu moopwacha sootakiherya seiyo, muupuwele vooloca sa mikhalelo saphaama yoonihenryaaya. (Ahe. 12:1, 2) Voocharela, moone mukhalelo muneeraanyu mwaatakiherye alopwana yaawo.

5. Ti mwawiihai nyuwaano munahaalaanyu winnuwiha mavyakelo awuupuwela, nave ntakhara heeni eyo ti yoochuneyaxa? (Salmu 119:9)

⁵ Munnuwihe nave ‘mukhapelele . . . mavyakelo anyu awuupuwela.’ (Mas. 3:21) Mulopwana orino mavyakelo awuupuwela hanapaka ichu mwawaakuveya, nyenya onnuupuwela moopwacha ahaakumve olakelela echu onahaaleiye weera. Mwa yeeyo, mwiilipixerye wi munnuwihe ni okhapelela mavyakelo yaala. Ntakhara heeni? Nthowa nawi elapo yoosareya ni achu yaawo anachariha pahiru miruku saya naari soolakelela saya. (Mas. 7:7; 29:11) Ohiya yeeyoru, televisau, ifilme, interneti, ni makhuuru a ochekulela aakhalano ovolowela otokweene wa nyuwo nave inanwerya ovolowela mukhalelo anyu wa wuupuwela ni weera ichu. Mwawiihiiha, ti mwawiihai nyuwaano munahaalaanyu winnuwiha mavyakelo anyu awuupuwela? Mpacerye muhuseryaka malakiheryo a Mpiipiliyani nave muupuwele ntakhara heeni awo eryaaya aphaama wa nyuwo. Voocharela, mpharihele malakiheryo yaawo vaavaa munapakaanyu soolakelela seiho sinahaala omuhakalaliha Yehova. (Mwaalakhanye Salmu 119:9.) Vaavaa munahaalaanyu winnuwiha mukhalelo yoola woochuneya wa opharihela malakiheryo a Mpiipiliyani wi mpake soolakelela sanyu, nyuwaano munahaala oya vahoolo mu ephiro ya okhala Mukristu awiichwelavo. (Mas. 2:11, 12; Ahe. 5:14) Vano moone ti mwawiihai mavyakelo awuupuwela anahaalaaya wookhaviheryaani mu mikhalelo miili: (1) mukhalelo munaakhalihaanyu arokora (2) vaavaa munapakaanyu soolakelela vooloca sa mukhalelo anyu wa owara ni wiirehererya.

6. Ti mwawiihai mavyakelo awuupuwela anahaalaaya omukhaviherya mmiravo wooniherya ncicimiho wa arokora?

⁶ Mavyakelo awuupuwela anahaala wookhaviheryaani wooniherya ncicimiho wa athiyana. Hiyaavo yoonanara wakhala wi munna ookhalano nchuno na omusuwela phaama murokora. Mmiravo ohinapaka echu mwawiiwanana ni  soochuna sa mwiili awe ni onuupuwela ahaakumve opaka soolakelela, harwa apaka echu yaahaala omweeriha murokora wuupuwela wi owo onnamuchuna, nave ahireherenʼye wi amuthele. (1 Tim. 5:1, 2) Wakhala wi onnamuurya murokora, owo onahaala okhapelela meecelo awe aphaama ni a murokora nave harwa akhala meekheiye ni yoowo ahirivo muchu mukina anaavareryela.—1 Ako. 6:18.

7. Ti mwawiihai mavyakelo awuupuwela onahaalaaya omukhaviherya mmiravo opaka soothanla vooloca sa yoowara ni wiireeriha?

⁷ Mukhalelo mukina mmiravo onooniheryeiye wi onnuupuwela phaama ahaakumve opaka yoolakelela ori vooloca sa mukhalelo wa owara ni orehererya miihi. Mukhalelo wa owara wa mutano, wiiliwiili onavuwihiwa ni achu ahinamucicimiha Yehova naari arino mukhalelo wa okumi woothanyeya. Mukhalelo wa wuupuwela woothanyeya wa achu yaawo onnooneya moorweela wa owara soowara sa waapharaxa naari ehinahiya mookwakwaleya waakhanle wi yoowara eyo ti ya mulopwana naari muthiyana. Vaavaa onathanleiye yoowara, mmiravo yoowo oneererya okhala Mukristu awiichwelavo onaphwanela ohooleliwaka ni malakiheryo a Mpiipiliyani ni ochariha sootakiherya saphaama sa Akristu mmulokoni. Owo onanwerya wiikoha: ‘Apwanne soothanla saka sinnooniherya wi ka muchu amiruku nave wi kinnathokororya miyoonelo sa akina? Apwanne mukhalelo kinawaraaka ni orehererya miihi enneeriha wi akina enakoona ntoko mulapeli a Yehova?’ (1 Ako. 10:31-33; Titu 2:6) Mmiravo onuupuwela phaama mmiyaha seiho, onahaala ocicimihiwaka ohiya pahiru mmuloko nyenya tho ni Tiithi awe a wirimu, Yehova.

8. Tiheeni mmiravo onaphwaneleiye weera wi akhale munna oororomeleya?

⁸ Mukhale oororomeleya. Mmiravo ori oororomeleya onnathokororya phaama mirici sawe soothene. (Luka 16:10) Muupuwele yootakiherya yoophaameya ya Yesu. Yesu hintonko okhala khamiteko naari muchu ooporora. Ohiya yeeyo, owo aahaakhwaniherya mirici Yehova amvaheiye, naamwi waari woovila weerano yeeyo. Owo aanaasivela achu, xaxaxa oohuserya awe, nave aari ooreheryeya ovaha okumi awe ntakhara yaawo. (Yoh. 13:1) Munanwerya omutakiherya Yesu moorweela wa olapa mwakuru wi mwaakhwaniherye murici vyakala munavahiwaanyu. Wakhala wi hamusuwenle phaama mukhalelo wa weerano, mukhale awiiyeviha nave mveke nikhaviheryo na anna amavyakelo. Muhaakhwaneliwe ni opaka pahiru ichu savakhaani soochuneya. (Aro. 12:11) Ohiya yeeyo, mwaakhwaniheryeke mirici sanyu, ntoko munamweerela “Yehova, ohiya achu.” (Ako. 3:23) Eparipari wi nyuwaano tahi mwa muchu oophaameya, mwawiihiiha mukhale oophimelela nave tho mweemererye yoohesa vyakala muneeraanyu mpake.—Mas. 11:2.

9. Ntakhara heeni mmiravo onaphwaneleiye wunnuwiha mavyakelo oophara muteko?

⁹ Wi mukhale Mukristu awiichwelavo, onnachuneya wunnuwiha mavyakelo avakhaani oophara muteko. Mavyakelo yaawo anahaala wookhaviheryaani waakhwaniherya mirici mmulokoni, ophwanya muteko onahaala woovakulelaani ni othokororya soothowa sa echoko anyu ni okhalano onthamwene waphaama ni akina. Nthokororye makina a mavyakelo yaawo.

10-11. Ti mwawiihai mmiravo onaphureiye mwaneene ni muloko wakhala wi oosuwela waalakhanya ni orepa phaama? (Salmu 1:1-3) (Moone tho eruku.)

 ¹⁰ Muhuserye waalakhanya ni orepa phaama. Piipiliya onnaloca wi waalakhanya Masu a Muluku ni wuupuwelela ennamukhaviherya mulopwana okhala oohakalala ni okhumelela phaama mu soothene onapakeiye. (Mwaalakhanye Salmu 1:1-3.) Omwaalakhanya Piipiliya mahiku oothene onahaala wookhaviheryaani osuwela phaama muupuwelo wa Yehova, nave eyo enahaala wookhaviheryaani wuupuwela phaama, waalikhela ichu moopwacha ni opharihela ikano sa Mpiipiliyani. (Mas. 1:3, 4) Mulopwana onasuwela opaka ichu seiha onnaphariheliwa vancipale mmulokoni. Ntakhara heeni?

¹¹ Muloko onnaachuna anna yaawo ari ahusiha aphaama wi evaheke ohoolela ni ikano inathipeleya Mpiipiliyani. (Titu 1:9) Wakhala wi moosuwela waalakhanya ni orepa phaama, munanwerya orehererya miyaha saphaama ni maakhulo anahaala olipiha nroromelo na anna. Nyuwaano tho munanwerya orepela ichu soochuneya vaavaa munahuseryaanyu naari vaavaa munawiriyanaanyu mwaha mmithukumano sa muloko, sa ekulucu naari sa miceche. Ichu seiho munarepelaanyu sinahaala wookhaviheryaani olipiha nroromelo nanyu ni waalipiha akina.

12. Tiheeni enahaala wookhaviheryaani osuwela ochekula phaama ni akina?

¹² Musuwele ochekulela phaama ni akina. Mukristu onaphwanela osuwela ochekula phaama ni akina. Mulopwana onasuwela ochekula phaama onnawiriyana moomaaleleya nave onnawerya wiiwexexa muupuwelo ni miyoonelo sa akina. (Mas. 20:5) Owo tho onanwerya wiiwexexa ovuwa wa nsu naya, mukhalelo wa ethoi ni malocelo aya. Nyuwaano hamuwerya ohuserya soothene iha wakhala wi hamunamaliha elukuluku ni akina. Wakhala wi munachekula ni achu mpharihelaka ikhankoonya, ntoko murumihelanaka emaili naari michaka, eyo enahaala ovukula mavyakelo anyu a ochekula ni akina moonanaka. Mwawiihiiha, mwaavyeke ikari sa ochekula ni achu akina moonanaka.—2 Yoh. 12.

13. Echu taani ekina mmiravo onaphwaneleiye ohuserya? (1 Timotiyu 5:8) (Moone tho eruku.)

¹³ Muhuserye wiivakulela meekhiinyu. Munna awiichwelavo onaphwanela osuwela wiikhapelela mukhateiye ni achu a veechokoni vawe. (Mwaalakhanye 1 Timotiyu 5:8.) Mmapuro makina, amiravo ananwerya ohuserya muteko ni asitiithi aya naari mmusi aya mukina. Nave tho mmapuro makina, amiravo ananwerya ohuserya muteko eryeene oxikola. Moohipwacha mukhalelo ene, ti waphaama ohuserya ichu seiyo sinahaala wookhaviheryaani ophwanya muteko. (Saw. 18:2, 3; 20:34; Aef. 4:28) Mwaavye okhalano mukhalelo wa muchu onalapa moowetha nave ohinahiyererya yeeyo opacenryeiye. Wakhala wi moheerano yeeyo, onanwerya okhala wookhweyaxa owerya ni otitelela okhala va muteko. Mikhalelo  ni mavyakelo yaawo nthokoronryaahu mu iparakrafu sa muculi ti soochuneya tho wi Mukristu aakhwaniherye mirici mikina seiyo owo onahaaleiye okhalano omwaahiyu. Hankooni nthokororye mirici mikina sa seiyo.

14. Ti mwawiihai mmiravo onahaaleiye wiirehererya wi arumeele mmuteko wa elukuluku yoothene?

¹⁴ Muteko wa elukuluku yoothene. Anna ancipale awiichwelavo epacenrye muteko wa elukuluku yoothene nlelo eri amiravo. Okhala piyoneero onanwerya omukhaviherya mmiravo ohuserya mukhalelo wa waakhaliha achu a mukhalelo woothene. Nave tho mukhalelo wa opharihela ikhorowa seiyo onaphwanyeiye ni ohinananariha mwaapure mwaapure. (Afi. 4:11-13) Mukhalelo mmoha waphaama wa opacerya muteko wa elukuluku yoothene ori okhala piyoneero ookhaviherya. Anna ancipale aarumeela ntoko mapiyoneero ookhaviherya mu elukuluku yincipale, nave eyo yohaakhaviherya okhala oorehereya wi ekhale mapiyoneero a elukuluku yoothene. Muteko wa opiyoneero onanwerya ohula ikari sa milako mikina mmuteko wa elukuluku yoothene, ntoko yootakiherya, orumeela mmuteko wa oteka naari okhala Petelita.

15-16. Tiheeni enahaala omukhaviherya mmiravo okhala murummwa oorumeela naari mutokweene?

¹⁵ Murummwa oorumeela naari mutokweene. Munna ori oothene mmulokoni onnaphwanela okhalano yoolakelela ya ophwanelela wi aarumeele anna ni arokora ntoko mutokweene a muloko. Piipiliya olonce wi alopwana yaawo aniilipixerya wi ephwanelele murici yoola, anniilipixerya ntakhara “muteko waphaama.” (1 Tim. 3:1) Ahaakumve orumeela ntoko mutokweene, munna onaphwanela toko ophwanelela wi arumeele ntoko murummwa oorumeela. Arummwa oorumeela annaakhaviherya atokweene waakhapelela anna mmulokoni mmikhalelo soohiyanahiyana. Nave atokweene hiiha tho ntoko arummwa oorumeela, alapeli awiiyeviha yaawo analapa ntakhara anna ni arokora nave tho alaleeryi amvai. Anna eri amiravo ananwerya ophwanelela ni ovahiwa murici ntoko murummwa oorumeela naamwi erino iyaakha variyari va 17 ophiyerya 19. Nave murummwa oorumeela oophwanelela phaama onanwerya othanliwa wi arumeele ntoko mutokweene naamwi arino pahiru iyaakha 20.

¹⁶ Tiheeni munaphwanelaanyu weera wi mukhale murummwa oorumeela naari mutokweene? Piipiliya pahiru onavahererya elista ya mikhalelo soomunepani seiho munaphwanelaanyu okhalano. Mwawiihiiha, mikhalelo soothene seiya saphaama, inathipeleya Mpiipiliyani ni mu omusivela wanyu Yehova, echoko anyu, ni muloko. (1 Tim. 3:1-13; Titu 1:6-9; 1 Pet. 5:2, 3) Mpake owetha wanyu wi mwiiwexexe yeeyo enavolowela mukhalelo ti mukhalelo. Ohiya yeeyoru, mvekele mvekaka nikhaviheryo na Yehova wi nwerye winnuwiha mikhalelo seiyo. c

17. Ti mwawiihai mmiravo onuupuwelela othela onahaaleiye okhala mulopwana othenle aphaama ni muru wa echoko? (Moone tho eruku.)

 ¹⁷ Mulopwana othenle ni muru wa echoko. Mwawiiwanana ni masu a Yesu, Akristu akina awiichwelavo annathanla otitelela okhala aciye. (Mat. 19:12) Nyenya wakhala wi muthanlile othela, munahaala okhalano mirici sawaaceererya ntoko mulopwana othenle ni muru wa echoko. (1 Ako. 11:3) Yehova onachuna wi mulopwana othenle amukhapeleleke mwaariye mmukhalelo woomwiilini, wa mmuupuweloni ni woomunepani. (Aef. 5:28, 29) Mikhalelo soothene ni mavyakelo yaawo nthokoronryaahu mmwaha yoola, ntoko okhalano mavyakelo awuupuwela, waacicimiha athiyana, okhala oororomeleya, inahaala wookhaviheryaani okhala mulopwana othenle aphaama. Mmukhalelo yoola, munahaala okhala ooreheryeyaxa wi mukhale mulipa oothela ni muru wa echoko aphaama.

18. Ti mwawiihai mmiravo oneereiye iirehererye wi akhale tiithi?

¹⁸ Tiithi. Mmanle othela, akhweya munanwerya okhala tiithi. Tiheeni munahaalaanyu ohuserya orweela wa Yehova vooloca sa okhala tiithi aphaama? Ichu sincipale. (Aef. 6:4) Yehova huuliwa muru oloca wa Mwanawe, Yesu, wi aanamusivela nave aanamweemererya yoowo. (Mat. 3:17) Wakhala wi munahaala okhala tiithi, muhicuwale waaroromeliha aniinyu wi munnaasivela. Nave ilukuluku soothene mmuthamaleleke mwaninyu wakhala wi oopaka ichu saphaama. Asitiithi yaawo anachariha yootakiherya ya Yehova annaakhaviherya tho anaaya okhala Akristu awiichwelavo. Nyuwaano munanwerya wiirehererya hiihaano wi mukhale tiithi aphaama moorweela wa waapwacha achu aveemusini vanyu, anna a mmulokoni nave tho waaleela mukhalelo munaasivelaanyu ni wi munniirumiha ni yaawo. (Yoh. 15:9) Ichu seiya sinahaala wookhaviheryaani omwaahiyu, vaavaa muneeraanyu mukhale mulopwana othenle naari tiithi. Ophiyerya elukuluku yeeyo, munanwerya ororomela wi mwa asisapoxa wa Yehova nave mwa nikhaviheryo ntokweene wa emusi anyu hiihaa ntoko mmulokoni.

19-20. Tiheeni enahaala waakhaviherya anna ari amiravo okhala Akristu awiichwelavo? (Moone eruku ya ekaapa.)

¹⁹ Anna muri amiravo, ti woochuneya wiilipixerya wi mukhale Akristu awiichwelavo. Nyuwaano munaphwanela ochariha sootakiherya saphaama, winnuwiha mavyakelo awuupuwela, okhala oororomeleya, ohuserya ophara miteko wi mwiivakulele ni wiirehererya ntakhara mirici sa omwaahiyu.

²⁰ Akhweya ikwaha ikina munahaala okhala awuukhuwa vaavaa munuupuwelaanyu miteko soothene siri ohoolo wanyu. Nyenya munahaala owerya. Muupuwele wi Yehova ori ooreheryeya wi ookhaviheryeeni. (Yes. 41:10, 13) Ti yawooneya wi, anna ni arokora a mmulokoni anahaala wookhaviheryaani tho. Vaavaa munakhalaanyu munna awiichwelavo, ekumi anyu enahaala okhala yoohakalaliha vancipale. Hiyaano ninnoosivelaani vancipale amiravo! Munanwerya ororomela wi Yehova onahaala wooreelihaani vancipale wakhala wi munniilipixerya wi mukhale Mukristu awiichwelavo.—Mas. 22:4.