Apwanne mohaalakhanya moopwacha irevista sa Mulipeleli sa eyaakha yeela? Vano moone waakhanle wi munahaala owerya waakhula makoho anacharela:

Tiheeni enavolowela “otoroka mukhalelo anyu wa wuupuwela”? (Aro. 12:2)

Eyo enaphitaanyerya ohiya pahiru oreeriha okumi ahu ni saweera sikina saphaama. Nnaphwanela waalikhela omuchu ahu wampuwa ni opaka matorokelo wi nimuhakalalihe Yehova.—Mulipeleli, 01/2023, ipaax. 8-9.

Ti mwawiihai nnahaalaahu wooniherya ophimelela vaavaa nnavareryaahu saweereya sa elapo?

Ni mathowa aphaama, ninnachuna woona mukhalelo saweereya sahiihaano sa elapo nthowa nawi sinnaakhwaniherya sooloherya sa Mpiipiliyani. Ohiya weererya waaceererya ichu seiho saahaala otannya okawanyeya variyari vahu, ochekula wahu onaphwanela otikitheryeya mu sooleeliherya sinarweela mmarehereryo a Yehova. (1 Ako. 1:10)—Mulipeleli, 02/2023, epaax. 16.

Mmukhalelo taani opatiso wa Yesu onahiyanaaya ni wa oomuchara awe?

Hiwaari woochuneya oveleela okumi awe wa Yehova woona wi owo aayariwe mu nloko nenlo niiveleenle wa Muluku. Owo haaphwanela ocharuwa ntakhara soocheka naari omveka Muluku wi eelihe yawuupuxerya-ya-murima awe, woona wi aari oophaameya, naari wi muchu aahirino yoocheka.—Mulipeleli, 03/2023, epaax. 5.

Muni mwaakhaviherye hai akina ovahererya maakhulo mmithukumano?

Nnanwerya ovahererya maakhulo ookhuveya, hiihaa achu akina tho anahaala okhalano ekari ya ovaha maakhulo. Ohiya yeeyoru, mweererye ohiloca ipontu soothene mu elukuluku emohamoha. Wakhala wi moovahererya maakhulo mulocaka soothene iri va iparakrafo, hehala echu wi akina evahe maakhulo.—Mulipeleli, 04/2023, epaax. 23.

“Mphiro Waweela” yoowo onalociwa mu Yesaya 35:8 tiheeni?

Mphiro yoowo woosiphela waathoonyerya mukwaha yoowo Ayuta yaahaalaaya opaka ekhumaka o Papulu eyaaka o Yerusalemu. Eyo enataphulela eheeni mmahiku ahu? Mu iyaakha masana masaneene ehaakumve eyaakha ya 1919 yaahuuliwa ephiro yeeyo yaavolowela otaphulela, wimprimiira ni miteko mikina. Achu a Muluku anneeca mu “Mphiro Waweela” enaahoolela mu parataiso oomunepani, yoowo onaahoolela mu mareeliho a Omwene.—Mulipeleli, 05/2023, ipaax. 15-19.

Masiposipo ekapitulu 9 enanilopola vooloca sa athiyana taani eeli?

Liivuru a Masiposipo onnaloca sa “muthiyana ori mulolo” yoowo onapaka nwopelo onakeriha “wookhwani,” nave onnamuloca “Muthiyana a miruku nave nwopelo awe onnakeriha mu “ephiro ya masuwelelo” ni ekumi. (Mas. 9:1, 6, 13, 18)—Mulipeleli, 06/2023, ipaax. 22-24.

Ti mwawiihai Yehova oonihenryeiye wi tawiiyeviha vaavaa aamukhaliheiye Loti?

Yehova aahimuleela Loti wi achawele mmukuma wa miyaako. Nyenya Loti aahimveka Yehova wi achawele o Sowari, nave Yehova aheemererya yooveka awe.—Mulipeleli, 07/23, epaax. 21.

Tiheeni muthiyana otheliwe onaphwaneleiye weera wakhala wi iyawe onnoona epwitikiri?

Muthiyana onaphwanela wuupuwela wi haano mathowa. Owo onaphwanela otikitheryeya mu onthamwene awe ni Yehova, ni wuupuwelela sootakiherya sa Mpiipiliyani sa athiyana akina yaawo yaari awuukhuwaxa, nyenya ehakararyiwa ni yoowo. Owo onanwerya omukhaviherya iyawe osepa mikhalelo seiho saahaala omweeriha iyawe ochuna woona epwitikiri.— Mulipeleli, 08/2023, ipaax. 14-17.

Vaavaa muchu onavaanyiheiye soororomela sahu, ti mwawiihai miruku sineeraaya sinikhaviherye okhala oomaaleleya?

Nnanwerya woona nikoho nlo naari nikacamiho ntoko ekari ya osuwela yeeyo muchu owo onuupuweleiye vooloca sa mwaha yoowo. Neerano yeeyo, nnahaala owerya waakhula mooreera murima.— Mulipeleli, 09/2023, epaax. 17.

Tiheeni Mariya onanihusiheiye vooloca sa waavya nikhaviheryo?

Vaavaa aasuwenleiye wi aahaala okhala maayi a Mesiya, owo aahaavya nikhaviheryo na akina. Munkeelo vamoha ni Elisapeti yaahimulipiha Mariya epharihelaka Soorepa. Hiyaano tho nnanwerya waakhela ikuru nnachunaahu nnikhaviheryo na anna ni arokora.—Mulipeleli, 10/2023, epaax. 15.

Ti mwawiihai akhweya Yehova onaakhuleiye mavekelo ahu?

Owo oororomeliha owiriyana mavekelo ahu nave onnathokororya mukhalelo mavekelo ahu eniiwananaaya ni yookhwela awe. (Yer. 29:12) Yehova onanwerya waakhula mavekelo oolikana mmikhalelo soohiyana, nyenya owo ilukuluku soothene onahaala onikhaviherya.—Mulipeleli, 11/2023, ipaax. 21-22.

Aroma 5:2 onnaloca sa “ewehereryo,” vano ntakhara heeni mu eversikulu 4 onaloceiye wanaawiili sa “ewehereryo”?

Vaavaa muchu oniiweiye michaka saphaama, owo onanwerya okhalano ewehereryo ya okhala wookhala mparataiso veelaponi yeela yavathi. Nto vaavaa onahooleleiye makacamiho, awerya ovilela yaawo ni woona wi ookhalano weemereryiwa wa Yehova, ewehereryo yeeyo ennakhala yoolipaxa nave ennakhala yavameekhaaya.—Mulipeleli, 12/2023, ipaax. 12-13