1. Tiheeni nnaphwanelaahu opaka wi nikhale Akristu awiichwelavo?

 NINNAKHALA ootikhiniheya woona wi mu elukuluku vakhaani mwaana onnakhala mutokweene. Nave eyo yeereya, enakhala ntoko wi yeeren’ye mukhataaya ni mwawaakuveya. Nyenya wunnuwa mmukhalelo woomunepani ti woohiyana. b (1 Ako. 13:11; Ahe. 6:1) Wi muchu akhaleno onthamwene woolipa ni Yehova, owo onaphwanela wiilipixerya. Ohiya yeeyoru, owo tho onamuchuna nikhaviheryo na munepa waweela wi awerye okhalano mikhalelo saphaama, wunnuwiha mavyakelo ni wiirehererya ntakhara mirici sa omwaahiyu.—Mas. 1:5.

2. Tiheeni nnahuseryaahu mu Mapacereryo 1:27, nave tiheeni nnahaalaahu othokororya mmwaha yoola?

² Yehova aapatunxe achu wi ekhale mulopwana ni muthiyana. (Mwaalakhanye Mapacereryo 1:27.) Ti yawooneya wi alopwana ni athiyana toohiyana mwiili nyenya tho awo toohiyana mmikhalelo mikina. Ntoko yootakiherya, Yehova ohaapaka alopwana ni athiyana ni mirici soohiyanahiyana, nave ohaavaha mmoha ti mmoha mavyakelo yaawo anaakhaviherya waakhwaniherya mirici saya. (Map. 2:18) Mmwaha yoola, nnahaala woona mukhalelo namwali onahaaleiye okhala Mukristu awiichwelavo. Mwaha onacharela onahaala othokororya yeeyo anna ari amiravo anaphwanelaaya weera.

3-4. Ti woowi asimwali anahaalaaya ophwanyawo sootakiherya saphaama wi echarihe? (Moone tho eruku.)

³ Piipiliya annaaloca athiyana ancipale ootikhiniha yaawo yaamusivela  Yehova ni yaamulapela yoowo. (Moone mwaha “Tiheeni Nnaweryaahu Ohuserya ni Athiyana Anaromoliwa Mpiipiliya?”, mu jw.org, a Ekunya) Ntoko yoorepa ya mwaha yoola enooniheryaaya, awo yaari “oophimelela” ni “oororomeleya mu ichu soothene.” Mmahiku ahu yaala, mmiloko sookhalamo sootakiherya sa arokora awiichwelavo seiyo asimwali anaphwanelaaya otakiherya.

⁴ Asimwali, munoona hai waavya yootakiherya ya murokora awiichwelavo ni weererya ohuserya vooloca sa yoowo? Mvarerye mikhalelo saphaama owo oreiyeno, nave voocharela muupuwele mukhalelo muneeraanyu mutakiherye mikhalelo seiyo. Mu iparakrafo inacharela, nnahaala woona mikhalelo miraru soochuneya seiyo murokora onaphwaneleiye okhalano wi akhale Mukristu awiichwelavo.

5. Ntakhara heeni wiiyeviha ti woochuneya wi murokora ori mwali akhale awiichwelavo omunepani?

⁵ Wiiyeviha mukhalelo mmoha woochuneyaxa Mukristu awiichwelavo onaphwaneleiye okhalano. Wakhala wi murokora tawiiyeviha, owo onahaala okhalano onthamwene woolipa ni Yehova nave onahaala okhala awaacameleya wa akina. (Tiy. 4:6) Ntoko yootakiherya, muthiyana yoowo onamusivela Yehova nave ori awiiyeviha onnathanla wiiwelela ohoolela yoowo Yehova otikithenryeiye. (1 Ako. 11:3) Ohoolela yoowo onnathariha taani Yehova omuthanlileiye wi akhapeleleke miloko ni ichoko. c

6. Tiheeni asimwali anahuseryaaya ni wiiyeviha wa Repeka?

⁶ Muthokororye yootakiherya ya Repeka. Owo aari muthiyana oosuwela ni oolipa murima nave aanasuwela elukuluku ni mukhalelo wa weeravo echu. (Map. 24:58; 27:5-17) Naamwiihiiha owo aari a ncicimiho ni awiiwelela. (Map. 24:17, 18, 65) Wakhala wi nyuwaano, hiihaa ntoko Repeka, mwawiiyeviha munnaakhaviherya yaale Yehova aathanlileiye, munahaala okhala yootakiherya yaphaama wa echoko anyu ni mmulokoni.

7. Ti mwawiihai asimwali aneeraaya emutakiherye Ester ni okhala oophimelela?

⁷ Ophimelela mukhalelo mmoha Akristu oothene awiichwelavo anaphwanelaaya okhalano. Piipiliya onaloca wi ‘oophimelela aakhalano  miruku.’ (Mas. 11:2, TNM) Ester aari oophimelela ni mulapeli oororomeleya a Yehova. Nave nthowa na okhala oophimelela, owo hiirumiha vaavaa aareiye mwaara a mwene. Owo aahiwiriyana ekano ya pirimu awe Mortekai nave aahichariha. (Ester 2:10, 20, 22) Nyuwaano tho munanwerya wooniherya ophimelela, hiihaa ntoko Ester, wakhala wi munnaavya ikano saphaama ni opharihela mookumini mwanyu.—Titu 2:3-5.

8. Mwawiiwanana ni 1 Timotiyu 2:9, 10, ophimelela oni omukhaviherye hai murokora opaka soolakelela saphaama vooloca sa mawarelo ni wiirehererya?

⁸ Ester tho aahooniherya ophimelela mmukhalelo mukina. Owo aari “mwali ooreera ni oophwaneliwa”; naamwiihiiha, heerenrye wiiruuhela ncicimiho mwaneene. (Ester 2:7, 15) Ti mwawiihai murokora onahaaleiye ochariha yootakiherya ya Ester? Mukhalelo mmoha ori moorweela wa opharihela muteko yeeyo enaphwanyeya mu 1 Timotiyu 2:9, 10. (Mwaalakhanye.) Mu yoorepa yeela, murummwa Paulo olonce wi arokora anaphwanela owaraka moophimelela ni makhalelo oocicimiheya. Masu a Ekiriki aphariheliwe va, annooniherya wi ilukuluku soothene muthiyana aaphwanela owaraka mmukhalelo woophwanelela ni wooniherya opwacha ni miyoonelo sa akina. Hiyaano ninniirumiha vancipale ni arokora yaawo anapharihela ekano yeela ni anawara mmukhalelo woophimelela!

9. Tiheeni nnahuseryaahu ni yootakiherya ya Apikayeli?

⁹ Miruku mukhalelo mukina yoowo ori woochuneyaxa wa Akristu awiichwelavo. Nyenya miruku tiheeni? Ari mavyakelo a owerya ohiyaniha yeeyo eri yaphaama wa yooheseya nave voocharela othanla yeeyo eri yaphaama. Moone yootakiherya ya Apikayeli. Aiyawe yaahipaka yoolakelela yoonanaraxa yeeyo yaahenle va yawoopiha oothene yaakhala ni yaalapa ni yaawo. Nyenya Apikayeli aaheeravo echu mwawaakuveya. Mwawaakuveya, owo aahisuwela echu yaphaama ya weera, nave nthowa na yeeyo, aahivuluxa ikumi sa ancipale. (1 Sam. 25:14-23, 32-35) Miruku inanwerya onikhaviherya osuwela elukuluku ya oloca ni ya omaala. Nave tho sinnanikhaviherya wooniherya opwacha wa akina, nihivolowenle ikumi saya.—1 Ate. 4:11.

10-11. Ohuserya waalakhanya ni orepa eni yookhaviheryeeni hai nyuwo ni akina? (Moone tho eruku.)

¹⁰ Murokora onaphwanela wunnuwiha mavyakelo oophara muteko. Ichu ikina sa seiha inanwerya ohuseryiwa ovinyerya woonamwaneni nave inanwerya okhaviherya mu okumi woothene. Moone sootakiherya savakhaani.

¹¹ Muhuserye waalakhanya ni orepa phaama. Mmapuro makina, achu anuupuwela wi osuwela waalakhanya ni orepa tahi woochuneya wa muthiyana. Nyenya ala mavyakelo oochuneyaxa wa Akristu oothene. d (1 Tim. 4:13) Mwawiihiiha, muheemererye wi echu vyakala ewaakanyeryeeni  ohuserya waalakhanya ni orepa phaama. Tisivi sinahaala okhala sookhumelela sene? Onahaala okhala wookhweyaxa wa nyuwo ophwanya muteko ni otitelela olapa. Nave tho munahaala okhala oohuserya a Piipiliya aphaama ni owerya waahusiha achu akina. Nyenya opwaha soothene, munahaala oweryaka omwaalakhanya Piipiliya ni wuupuwelela yeeyo erempwe mwemmo, nave hiihaa munahaala omwaacamela vancipale Yehova.—Yos. 1:8; 1 Tim. 4:15.

12. Tiheeni munahaalaanyu ohuserya mu Masiposipo 31:26?

¹² Musuwele ochekulela phaama ni achu. Ti woochuneya wi Mukristu anawerya ochekula phaama ni achu akina. Nave mmukhalelo yoola, murummwa Yakopo oovaha ekano ela: “Muchu ti muchu onaphwanela okhala awaakuvela owiriyana, nyenya oohaakuvela oloca.” (Tiy. 1:19) Vaavaa nyuwaano munaawiriyanaanyu moopwacha akina, munnooniherya wi mookhalano niphwanya naari “osivela woonna.” (1 Pet. 3:8) Wakhala wi himwiiwexenxe yeeyo akina aloncaaya, naari mukhalelo aniisoonaaya, mpake makoho oophwanelela. Voocharela, mwaavye elukuluku wi muupuwelele muhaakumve otitelela oloca. (Mas. 15:28) Mwiikohe: ‘Apwanne yeeyo kinayaaka oloca ti yeeparipari nave enahaala waalipiha akina? Apwanne enahaala wooniherya ncicimiho ni oreera murima?’ Mweererye ohuserya ni arokora yaawo anawiriyana moopwacha nave analoca mooreera murima. (Mwaalakhanye Masiposipo 31:26.) Moone moomaaleleya mukhalelo awo analocaaya. Owerya oloca phaama ni achu onahaala wookhaviheryaani okhalano asinthamwene aphaama ni otitelela okhala a murecele ni akina.

13. Muni muhuserye hai okhapelela miteko sa vaate? (Moone tho eruku.)

¹³ Muhuserye okhapelela echoko anyu. Mmakupa mancipale athiyana tanakhapelelaa miteko sa vaate. Akhweya amama anyu naari murokora anyu ananwerya wookhaviheryaani weerano yeeyo. Murokora awiichaniwa Sinti ooloca: “Echu emoha yaphaamaxa yeeyo amamaaka yenraaya wa miyaano waari okihusiha wi muteko wakuru onnavaha ohakalala. Ohuserya waapeya, opupucha, osona ni othuma yoolya soheeriha ekumi aka okhala yookhweya nave yookikhaviherya opaka sincipale mmuteko wa Yehova. Amama aka tho yaahikihusiha owaakhela aleco, nave wa nthowa na yeeyo, kaahaasuwela anna ni arokora aphaamaxa yaawo yaavanhe yootakiherya wa miyaano.” (Mas. 31:15, 21, 22) Muthiyana a miteko, oowaakhela aleco ni onakhapelela miteko sa vaate, nreeliho wa echoko awe nave nreeliho wa muloko.—Mas. 31:13, 17, 27; Saw. 16:15.

14. Tiheeni muhusenryaanyu ni yootakiherya ya Kristal nave echu taani munaphwanelaanyu otikitheryeyano?

¹⁴ Muhuserye wiikhapelela mukhatiinyu. Mukristu ori oothene awiichwelavo onaphwanela ohuserya weerano yeeyo. (Afi. 4:11) Murokora oniichaniwa Kristal ooloca: “Asitiithi aka yaakikhaviherya othanla ekursu ya elukuluku vakhaani yeeyo yaahaala okihusiha ichu soophwanelela. Apapa aka yaahikiceenyerya okhalano mahusiheryo a opaka ikonta, nave eyo yookikhaviherya vancipale.” Ohiya pahiru ohuserya mavyakelo oochuneya yaawo yaahaala wookhaviheryaani  ophwanya muteko, mweererye tho ohuserya opharihela ikhorowa sanyu mwa miruku. (Mas. 31:16, 18) Mweererye otikitheryeya mu soolakelela sanyu soomunepani moorweela wa ohipaka ivaale soohiphwanelela, mmukhalelo yoola, munahaala otitelela okhalano okumi wookhweya ni okhala oohakalala.—1 Tim. 6:8.

15-16. Arokora ari aciye eni yaakhaviherye hai akina? (Marku 10:29, 30)

¹⁵ Wunnuwiha mikhalelo soomunepani ni ohuserya mavyakelo oophwanelela enamookhaviheryaani wiirehererya ntakhara mikhalelo sa omwaahiyu mu okumi anyu. Moone sootakiherya sa vakhaani sa ichu seiyo munaphwanelaanyu othanla wi mpake.

¹⁶ Nyuwaano munanwerya olakelela otitelela okhala muciye mu elukuluku yincipale. Yesu olonce wi athiyana akina yaahaala othanla ohitheliwa, naamwi mmapuro yaawo achu anavahaaya esisapo yincipale otheliwa. (Mat. 19:10-12) Akina annalakelela okhala aciye ni mathowa makina. Nyenya nyuwaano munanwerya ororomela wi Yehova ni Yesu annamvaha esisapo yoowo ori muciye. Orukurerya elapo, arokora ari aciye mareeliho matokweene mmulokoni. Wanthowa na okhala oosivela ni waapwacha akina, awo annakhala arokora ni asimaayi oomunepani wa ancipale mmulokoni.—Mwaalakhanye Marku 10:29, 30; 1 Tim. 5:2.

17. Arokora ari asimwali eni yiirehererye hai hiihaano wi evolowe mmuteko wa elukuluku yoothene?

¹⁷ Nyuwaano munanwerya ovolowa mmuteko wa elukuluku yoothene. Muteko muncipale woolaleerya orukurerya elapo yoothene onapakiwa ni arokora. (Sal. 68:11) Apwanne mwanwerya opaka marehereryo wi mvolowe mmuteko wa elukuluku yoothene? Nyuwaano munanwerya okhala piyoneera, awiivelela ntakhara muteko wa oteka naari okhala Petelita. Mvekele vooloca sa yoolakelela anyu. Muloce ni yaale awenrye waakhwaniherya yoolakelela emohamoha nave voocharela mweererye woona mukhalelo muneeraanyu mweereno emohamoha. Voocharela, mpake marehereryo yaawo anahaala wookhaviheryaani waakhwaniherya yoolakelela anyu. Munanwerya ororomela wi ovolowa mmuteko wa elukuluku yoothene onahaala ohula ikari sincipale sootikhiniha ntakhara nyuwaano mmuteko wa Yehova.

18. Ntakhara heeni murokora onaphwaneleiye omuthanla phaama iyawe? (Moone tho eruku.)

¹⁸ Akhweya munanwerya othanla otheliwa. Mikhalelo soothene ni mavyakelo nonnaahu ophiyerya vaava inanwerya wookhaviheryaani okhala muthiyana ootheliwa aphaama. Ti yawooneya wi, waakhanle wi munnuupuwela otheliwa, oothene  munaphwanela omuthanla phaama iyanyu. Mweeparipari, ela yoolakelela etokweenexa munahaalaanyu opaka mookumini. Muhicuwale wi munahaala wiiwelelaka soolakelela sa mulopwana yoowo mmuthanlilaanyu wi akhale iyanyu. (Aro. 7:2; Aef. 5:23, 33) Mwawiihiiha mwiikohe: ‘Apwanne owo Mukristu awiichwelavo? Owo onnakuha ichu soomunepani mu nipuro noopacerya? Onnapaka soolakelela mwa miruku? Onneemererya soohesa sawe? Onnaacicimiha athiyana? Apwanne ookhalano owerya wa okikhapelela mmakupa oomunepani, omwiilini ni mmuupuweloni? Onnawerya ohoolela mirici sawe? Ntoko yootakiherya, mirici taani oreiyeno nave onakhapelela hai?’ (Luka 16:10; 1 Tim. 5:8) Eparipari wi, waakhanle wi nyuwaano munachuna omphwanya munna aphaama, munaphwanela wiirehererya wi mukhale mwaara aphaama.

19. Ntakhara heeni muteko wa ‘mukhaviheryi’ ti woocicimiheya?

¹⁹ Piipiliya onaloca wi muthiyana aphaama ‘mukhaviheryi’ wa iyawe nave ‘tomphwanelela’. (Map. 2:18, PMM) Apwanne ela enataphulela wi muthiyana ootheliwa haano esisapo wa iyawe? Hooye! Ti yoohiyana ni yeeyo. Okhala mukhaviheryi ncicimiho nthowa nawi ikwaha sincipale Piipiliya onnamuloca Yehova ntoko ‘mukhaviheryi.’ (Sal. 54:4; Ahe. 13:6) Muthiyana ootheliwa onnakhala mukhaviheryi eeparipari wa iyawe vaavaa onakhaviheryeiye soolakelela sa aiyawe ni weeriha wi soothene aiyawe alakelenlaaya ikhumelele phaama. Nave moorweela wa omusivela Yehova, owo onnapaka yeeyo onaweryeiye wi aakhaviherye akina woona mikhalelo saphaama sa aiyawe. (Mas. 31:11, 12; 1 Tim. 3:11) Munanwerya wiirehererya wi mukhale muthiyana aphaama ootheliwa mulipihaka osivela wanyu wa Yehova nave mwaakhaviheryaka akina mu echoko anyu naari mmulokoni.

20. Ovolowela taani maayi onakhaleiyeno?

²⁰ Munanwerya okhala maayi. Mmanle opaka othela, nyuwaano ni aiyanyu munanwerya okhalano anamwane. (Sal. 127:3) Nyenya ti yoochuneya othokororya yeeyo eri yoochuneya wi mukhale maayi aphaama. Mikhalelo ni mavyakelo nonnaahu ophiyerya vaava sinanwerya wookhaviheryaani okhala muthiyana ootheliwa ni maayi aphaama. Wakhala wi mwa muchu oosivela, ooreera murima ni oopixa murima, echoko anyu enahaala okhala yoohakalala nave anamwane anyu anahaala wiisoona okhala ookhapeleleya ni oosiveliwa.—Mas. 24:3.

21. Nnoona hai vooloca sa arokora ahu nave ntakhara heeni? (Moone eruku ya ekaapa.)

²¹ Arokora oosiveliwa, hiyaano ninnoosivelaani vancipale nthowa na soothene munapakaanyu ntakhara Yehova ni achu awe. (Ahe. 6:10) Nyuwaano munniilipixerya wi mukhaleno mikhalelo soomunepani ni wunnuwiha mavyakelo oochuneya, ni wiirehererya ntakhara miteko soomwaahiyu. Mwa yeela, munneeriha okumi anyu okhala woohakalaliha nave munnapaka phaama wa oothene yaawo oorukurenryeeni. Muroromele wi nyuwaano mwa muchu asisapo wa marehereryo a Yehova!