1. Ntakhara heeni Aparahamu aanwerya olekecheya wi aahaala okhalano mwaana?

 YEHOVA aahimuroromeliha nthamwene awe Aparahamu wi owo aahaala omvaha mwaana ni wi maloko oothene a veelaponi yaahaala waakhela mareeliho orweela wa yoowo. (Map. 15:5; 22:18) Aparahamu aahikhalano nroromelo noolipa wa Muluku, wanthowa na yeela, owo aahilekecheya moomalela wi Muluku aahaala waakhwaniha yoororomeliha awe. Nyenya Aparahamu aarino iyaakha 100 nave Sara 90, nlelo mutheli yoola oororomeleya hiyaawaarino mwaana. (Map. 21:1-7) Moohipwacha yeeyo, Piipiliya oni : “Moorweela wa ewehereryo, [Aparahamu] aaroromela wi aahaala okhala tiithi a maloko mancipale mwawiiwanana ni yeeyo Muluku aalonceiye.” (Aro. 4:18) Nave nyuwaano mohoona wi yeeyo Aparahamu aaweheryeiye yoheereya chiri. Owo aahikhala tiithi a mwaana yoowo aanweheryeiye, Isaki. Nyenya ntakhara heeni Aparahamu aanaroromela wi Yehova aahaala waakhwaniherya yoororomeliha awe?

2. Ntakhara heeni Aparahamu aalekecheya wi yoororomeliha ya Yehova yaahaala waakhwanela?

² Aparahamu aahimusuwela phaameene Yehova, wanthowa na yeeyo “aalekecheya wi yeele Muluku aaroromelinheiye” yaahaala waakhwanela. (Aro. 4:21) Yehova aahimweemererya Aparahamu nave aahimweera awookololowa wanthowa na nroromelo nawe. (Tiy. 2:23) Ntoko enooniheryiwaaya mu Aroma 4:18, nroromelo ni ewehereryo na Aparahamu saaneeca vamoha. Vano nnahaala othokororya yeeyo murummwa Paulo olonceiye vooloca sa ewehereryo ntoko etharihiwaaya mu Aroma ekapitulu 5.

3. Tiheeni Paulo olonceiye vooloca sa ewehereryo?

 ³ Paulo oothariha mathowa ananlekecha wi “ewehereryo henanlamwiha.” (Aro. 5:5) Owo tho onnanikhaviherya wiiwexexa mukhalelo ewehereryo ahu enahaalaaya okhala yoolipaxa. Hiyaano nnahaala waalikhela yeeyo nnaalakhanyaahu mu Aroma 5:1-5, nave vaavaa nneeraahuno yeela, muupuwele ti mwawiihai eweheryeryo anyu enamviraaya ekhalaka yoolipa moovira wa elukuluku. Yeeyo Paulo orempeiye wa Aroma enanwerya wookhaviheryaani woona mikhalelo sa olipiha nroromelo nanyu olelo. Woopaceryani, nnahaala woona yootikhiniha emoha ya ewehereryo, yeeyo murummwa Paulo olonceiye wi henahaala onlamwiha.

4. Tiheeni ethokororyiwe mu Aroma 5:1, 2?

⁴ Mwaalakhanye Aroma 5:1, 2. Paulo aahirepa masu yaala ntakhara muloko wo Roma. Anna ni arokora a muloko yoowo yaahihuserya vooloca sa Yehova ni Yesu, yunnuwiha nroromelo nave ekhala Akristu. Mwawiihiiha, Muluku ‘aahiweera awookololowa wanthowa na nroromelo’ nave aahaathanla ni munepa waweela. Awo yaanwerya owehererya waakhela mareeliho ni okhala oohakalala ni olekecheya wi eyo yaahaala weereya chiri.

5. Ewehereryo taani oothanliwa aryaayano?

⁵ Voocharela, Paulo aahaarepela Akristu o Efeso vooloca sa ewehereryo yeeyo awo yaakhenlaaya. Ewehereryo yeela enaphitaanyerya waakhela “yoohiyeryiwa wa aweela murima.” (Aef. 1:18) Nave vaavaa aarepenleiye Akolose, Paulo aahooniherya ti woowi Akristu oothanliwa yaahaalaaya waakhela nchuwelo naya. Paulo aahiichana eyo wi “ewehereryo ekhapeleliwe ntakhara nyuwo wirimu.” (Ako. 1:4, 5) Mwawiihiiha, ewehereryo ya alipa oothanliwa ti yawi awo anahaala oviihiwa ntakhara okumi wirimu, weiwo anahaala olamulelaka ni Kristu.—1 Ate. 4:13-17; Wup. 20:6.

6. Tiheeni munna mmoha oothanliwa olonceiye vooloca sa ewehereryo awe?

⁶ Akristu oothanliwa annatepa ovaha esisapo ewehereryo yeela. Mmoha a anna yaawo oothanliwa, munna Frederick Franz, mu ekwaha emoha aahiloca mukhalelo iisooneiye:  “Eweheryeryo ahu ti yeeparipari nave enahaala waakhwanela wa mmoha ti mmoha a 144.000 wa muhuwo mukhaani, mmukhalelo yoowo ohinaanyiheryiwa.” Mu 1991 amanle omurumeela Muluku moororomeleya mu iyaakha sincipale, munna Franz aahiloca: “[Hiyaano] hinaayelenle mmuupuweloni esisapo ya eweheryeryo yeela. . . . Hiyaano ninnahakalala vaavaa nnatitelelaahu owehererya yeela. Ti echu nnaphwanelaahu owehererya, naamwi siviraka iyaakha macikhwi macikhweene. Miyaano kinnavaha esisapo eweheryeryo ahu opwaha khalai.”

7-8. Ewehereryo taani alapeli ancipale a Yehova aryaayano? (Aroma 8:20, 21)

⁷ Ancipale anamulapa Yehova olelo arino eweheryeryo yoohiyana. Eweheryeryo ene emohamoha yeeyo Aparahamu aareiyeno khalai, okhalano ekumi yoohimala vathi va olamulelo wa Omwene wa Muluku. (Ahe. 11:8-10, 13) Paulo oorepa vooloca sa ewehereryo yeela yootikhiniha. (Mwaalahanye Aroma 8:20, 21.) Vaavaa mwaapacenryaanyu ohuserya soororomeliha sa Mpiipiliyani sa omwaahiyu, teevi yoosivenleeni vancipale? Apwanne yaari yoororomeliha yawi omwaahiyu mwaahaala otaphuwa wa yoocheka ni okhala oophaameya? Apwanne mwaahikhala oohakalala voosuwela wi munahaala owoona wanawiili oosiveliwaanyu akhwile mparataiso veelaponi? Hisaavo minikwa wi ichu soothene saphaama sinnaniwehererya.

⁸ Moohipwacha waakhanle wi ewehereryo ahu ori waakhela okumi woohimala wirimu naari veelaponi yavathi, oothene ahu nookhalano mathowa mancipale a ohakalala. Ewehereryo yeela yootikhiniha enanwerya nlelo okhala yoolipaxa. Paulo oothariha mukhalelo eyo eneeraaya yeereye. Yeeyo owo orempeiye enahaala onikhaviherya ororomela wi ewehereryo ahu enahaala waakhwanela.

9-10. Ntoko enooniheryiwaaya ni yootakiherya ya Paulo, tiheeni Akristu anaphwanelaaya oweherya? (Aroma 5:3) (Moone tho iruku.)

⁹ Mwaalakhanye Aroma 5:3. Paulo ooloca wi soohooxa nnakumanaahuno inanwerya olipiha ewehereryo ahu. Akhweya eyo enanwerya ontikhiniha. Mweeparipari, oomuchara a Yesu ananwerya ohoolela soohooxa. Moone yootakiherya  ya Paulo. Owo aahiloca ni Akristu o Tesalonika ariki: “Vaavaa naaryaahu vamoha ni nyuwo, naanooleelaani woosiilo ene wi naahaala weeteteyano soohooxa, nave ti yeela eneereya.” (1 Ate. 3:4) Nave wa Akorintu Paulo aarepa: “Anna, hinnachuna wi nyuwaano muhisuwele sa ohooxeya yoowo nikumannaahuno . . . Naahooseya vancipale opwaha ikuru sahu, ophiyerya wi naanoova oyeleela ikumi sahu.”—2 Ako. 1:8; 11:23-27.

¹⁰ Olelo tho, oothene ahu, ninnaweherya ohoolela soohooxa sa mukhalelo vyakala. (2 Tim. 3:12) Hanka nyuwaano? Apwanne moohoolela wiikariwa wanthowa na omuroromela Yesu? Apwanne asinthamwene anyu naari amusi anyu annawaakaahaani? Akhweya awo ahookhalihaani moonanara. Naari tho akhweya nyuwaano moohoolela makacamiho omutekoni wanthowa na okhala oororomeleya. (Ahe. 13:18) Ophiyerya wi akhweya nyuwaano moohoolela wiikariwa ni alamuleli wanthowa na muteko anyu woolaleerya. Moohipwacha yoohooxa taani nnahoolelaahu, Paulo ooloca wi nnaphwanela ohakalala. Ntakhara heeni?

11. Ntakhara heeni nnaphwanelaahu olakelela ovilela ni nikacamiho vyakala?

¹¹ Hiyaano nnawerya ohakalala vaavaa nnahoolelaahu soohooxa nthowa nawi eyo ennanikhaviherya wunnuwiha mukhalelo ahu woochuneya. Ntoko Aroma 5:3 onaloceiye: “Yoohooxa ennaruuha ovilela.” Akristu oothene anahaala ohoolela yoohooxa, mwawiihiiha, oothene anaphwanela okhala oovilela. Nnaphwanela olakelela ovilela moohipwacha yoohooxa nnahoolelaahu. Moorweela wa weerano yeela nnahaala woona waakhwanela wa ewehereryo ahu. Hiyaano hinnachuna okhala ntoko yaale Yesu aareiyeno mmuupuweloni mwawe vaavaa aaloceiye sa mmiso yoowo waamorenle va malukuni wahaarivo echaya yincipale. Woopaceryani, achu yaawo anneemererya eparipari moohakalala. Nyenya, vaavaa ‘sinaphiyaaya soohooxa, naari wiikariwa,’ awo annakwaculeya mwawaakuveya ni oyeleela nroromelo naya. (Mat. 13:5, 6, 20, 21) Eparipari wi ohooxeya ni waakaahiwa naari ohoolela nikacamiho honanihakalaliha, nyenya okhalano ovilela woohikota onnaniruuhela mareeliho matokweene. Mmukhalelo taani?

12. Nnaphura hai vaavaa nnavilelaahu soohooxa?

¹² Tiyaku ooloca wi ovilela moohipwacha soohooxa onanwerya onruuhela miphurelo. Owo oorepa: “Muhiye wi ovilela waakhwanihe muteko aya, wi mukhale awaakhwanela ni aweela mmikhalelo soothene, ehikhanlevo echu enoohalelaani.” (Tiy. 1:2-4) Tiyaku olonce wi ovilela wahu wookhalano yoolakelela. Yoolakelela taani yeeyo? Ovilela wahu onanwerya onikhaviherya okhalano opixa murima wawaaca, nroromelo ntokweene ni omuroromela vancipale Yehova. Nyenya ovilela wahu onanwerya oniruuhela mphurelo mukina woochuneya.

13-14. Tiheeni eneereya vaavaa nnavilelaahu nave ni yookhumelela taani? (Aroma 5:4)

¹³ Mwaalakhanye Aroma 5:4. Paulo olonce wi ovilela onnaruuha “mukhalelo wa weemereryiwa.” Ela enataphulela wi vaavaa munavilelaanyu munneemereryiwa ni Yehova. Eyo henataphulela wi vaavaa munahoolelaanyu soohooxa naari makacamiho makina Yehova onnahakalala ni yeeyo. Yehova onaweemereryaani nyuwaano, ohiya makacamiho. Ovilela wanyu tonaruuha mukhalelo wa weemereryiwa. Ala mareeliho ootikhiniha!—Sal. 5:12.

¹⁴ Muupuwele wi Aparahamu aahivilela moohipwacha saweeha nave Yehova aahihakalala vancipale nthowa na yeeyo. Yehova aahimoona ntoko nthamwene nave aahimweera awookololowa. (Map. 15:6; Aro. 4:13, 22) Emohamoha enanwerya weereya ni hiyaano. Weemereryiwa yoowo nnaakhelaahu wa Yehova honarweela wa ichu seiho nnaweryaahu opaka mmuteko wa Yehova, naari mano mmirici sahu. Yehova onaneemererya nthowa nawi ninnavilela moororomeleya. Nave moohipwacha iyaakha sahu, mikhalelo  sahu naari mavyakelo, oothene ahu nnanwerya ovilela. Apwanne mu elukuluku yeela munnavilela nikacamiho vyakala? Waakhanle wi aai, muupuwele wi munnamweeriha Yehova okhala oohakalala. Vaavaa nnasuwelaahu wi nookhalano weemereryiwa ni Yehova, ewehereryo yeeyo nryaahuno wi owo onahaala waakhwaniherya soothene ororomelinheiye ennakhala yoolipa.

15. Tiheeni Paulo olonceiye mu Aroma 5:4, nave nikoho taani nnakhumelela?

¹⁵ Hiihaa ntoko Paulo olonceiye, hiyaano ninnaakhela weemereryiwa wa Yehova vaavaa nnatitelelaahu okhala oororomeleya wa yoowo ni ovilela soohooxa. Moone mukhalelo Paulo otitelenleiye oloca mu ekaarata awe wa Aroma: “Mukhalelo wa weemereryiwa, onnaruuha ewehereryo, nave ewehereryo henanlamwiha.” (Aro. 5:4, 5) Ela enanwerya okhala ntoko yawaakanyerya. Ntakhara heeni? Mwawiiwanana ni yeeyo erempwe mu Aroma 5:2, Paulo olonce wi Akristu o Roma yakhalano ewehereryo ya waakhela “ncicimiho noorweela wa Muluku.” Ti nthowa nene muchu onaphwaneleiye wiikoha:‘Waakhanle wi Akristu yaale yaakhalano ewehereryo yoolipa, ntakhara heeni Paulo ayaaka oloca wanawiili vooloca sa ewehereryo?’

16. Mmukhalelo taani eweheryeryo yeeyo nnakhalaahuno enaweryaaya waaceereryeya? (Moone tho iruku.)

¹⁶ Hiyaano nnawerya wiiwexexa masu a Paulo moorweela wa otitelela okhalano mmuupuweloni wi ewehereryo ti echu yeeyo enawerya waaceereryeya naari ovukuwa. Ntoko yootakiherya, nyuwaano munnuupuwela ekwaha anyu yoopacerya mwiiwalaanyu sa yoororomeliha yootikhiniha ya Omwene mu yoohuserya anyu ya Piipiliya? Mu elukuluku yeele, akhweya nyuwaano mwaanuupuwela wi opuha okumi okhala wookhala mparataiso veelaponi yavathi tahi yeeparipari. Nyenya mmanle ohuserya sincipale vooloca sa Yehova ni soororomeliha sa Mpiipiliyani, mwaahilekecheya wi ewehereryo anyu yaahaala waakhwanela.

17. Mmukhalelo taani ewehereryo anyu enatitelelaaya wunnuwa mmanle opatisiwa?

¹⁷ Naamwi mmanle wiiveleela ni opatisiwa,  munahaala otitelela osuwela sincipale vooloca sa Yehova nave osivela wanyu onahaala otitelela wunnuwa, mwawiihiiha, ewehereryo anyu tho enahaala otitelela wunnuwa. (Ahe. 5:13–6:1) Nyuwaano munahaala olawiha yeeyo Aroma 5:2-4 onaloceiye. Akhweya nyuwaano moohoolela makacamiho mancipale, nyenya mootitelela ovilela ni okhala aweemereryiwa ni Yehova. Nave musuwelaka wi Yehova onnoosivelaani, vano mookhalano mathowa mancipale a ororomela ichu seiho ororomelinheiye. Ewehereryo anyu yootepa olipa opwaha vaavaa mwaapacenryaanyu omuhuserya Piipiliya. Vano, ewehereryo yeela ti yeeparipari wa nyuwaano nave yookhalano yootaphulela yavameekhaaya wa nyuwaano. Eyo ennavolowela makupa oothene a okumi anyu etorokaka mukhalelo munaakhalihaanyu achu a veemusini vanyu, mukhalelo munapakaanyu soolakelela ni mukhalelo munapharihelaanyu elukuluku anyu.

18. Yoororomeliha taani Yehova onanivaheiye?

¹⁸ Paulo nlelo onnatitelela oloca sa echu yaphaamaxa vooloca sa ewehereryo ahu nimanle weemereryiwa ni Yehova. Owo ooniroromeliha wi ewehereryo ahu enahaala waakhwanela chiryene. Ntakhara heeni nnawerya olekecheya ni yeela? Paulo aahirepa yoororomeliha ela wa Akristu : “Ewehereryo henanlamwiha; woona wi osivela wa Muluku woomiineliwa mmurimani mwahu moorweela wa munepa waweela, yoowo nivahiwaahu.” (Aro. 5:5) Nookhalano mathowa oothene a weemererya ewehereryo Yehova onivanheiye; ela ewehereryo ahu.

19. Olekecheya taani nnaphwanelaahu okhalano vooloca sa ewehereryo ahu?

¹⁹ Mwaavye elukuluku wi muupuwele yoororomeliha ya Yehova wa Aparahamu ni mmukhalelo Muluku aamweemerenryeiye yoowo ni akhala nthamwene Awe. Ewehereryo ya Aparahamu hiyaari ya siiyo. Piipiliya oni: “Aparahamu amanle wooniherya opixa murima, aahaakhela yoororomeliha yeela.” (Ahe. 6:15; 11:9, 18; Aro. 4:20-22) Aparahamu haalamwihen’yeruu. Nyuwaano tho mwatitelela okhala oororomeleya himulamwiheya. Ewehereryo anyu enahaala oreelihiwa. Ewehereryo anyu ti yeeparipari, echu enahaala oweerihaani okhala oohakalala ohiya woolamwihaani! (Aro. 12:12) Paulo oorepa: “Muluku yoowo onavaha ewehereryo oosareiheeni ni ohakalala woothene ni murecele moorweela wa omuroromela wanyu, wi mukhaleno mwawaaca ewehereryo anyu moorweela wa owerya wa munepa waweela.”—Aro. 15:13.