MWEEPARIPARI munnathamalela vancipale samahala soothene Yehova oovanheiyeni, ophitaanyerya otaphuwa muryaanyuno wa othanla mukhalelo munahaalaanyu opharihela samahala seiho. Mwawiiwanana ni Piipiliya, eviinyu tho yoovaha ya Muluku, owo oni: “Yoolya enneeliha murima, nave eviinyu ennahakalaliha okumi.” (Ekl. 10:19; Sal. 104:15) Akhweya mohoona wi achu akina aakhalano nikacamiho ni soowurya soohapaliha. Ohiya yeeyo, mwawiiwanana ni elapo naari sookhovelela, achu aakhalano miyoonelo soohiyana vooloca sa mwaha yoola. Mwawiihiiha, tiheeni enahaala omukhaviherya Mukristu opaka yoolakelela ya miruku vooloca sa soowurya soohapaliha?

Moohipwacha nipuro nnakhalaahuwo naari yookhovelela taani niphwiiwalaahuno, hiyaano nnaphwanela ororomela ikano sa Muluku. Neerano yeeyo, nnahaala okhalano okumi woohakalalihaxa.

Akhweya mohoona wi achu ancipale mweelapo annawurya woopwahererya mu ikwaha sincipale. Akina annasiveliwa owurya soowurya soohapaliha nthowa na mukhalelo aniisoonaaya phaama emanle owurya. Akina annawurya wi emaalihe wuukhuwa ni makacamiho aya. Mmapuro makina, muchu onawerya owurya vancipale onooniwa okhala oolipa ni akuru.

Moohakalaliha, Akristu ananwerya ophwanya ohoolela woosivela mu Mpatuxa aya. Ntoko yootakiherya, Yehova onnaloca sa sookhumelela soowaawa sa owurya woopwahererya. Mu Masiposipo 23:29-35 ninnaalakhanya vooloca sa muchu oohapaliwa ni sookhumelela soowaawa aareiyeno voocharela. a Taniyeli, mutokweene mmoha o Europa, onnuupuwela mukhalelo okumi awe waaryaaya ahaakumve ohuserya sa Yehova ni opharihela ikano sawe, owo oriye: “Miyaano kaanawurya vancipale nave nthowa na yeeyo, kaahipaka soolakelela soonanara. Nto sookhumelela sene hisaari saphaama. Nyenya ophiyerya olelo, vaavaa kinamaalaaka wi kuupuwele ichu seiho, kinnakhala oothanana.”

Ti mwawiihai nneeraahu nipake soolakelela sa miruku vooloca sa soowurya soohapaliha ni osepa makacamiho? Nnaphwanela weemererya wi muupuwelo wa Muluku ohooleleke soolakelela sahu.

Vano hankooni noone yeeyo Piipiliya onaloceiye vooloca sa soowurya soohapaliha ni mathowa anaweeriha achu akina owurya.

Piipiliya hanaloca wi ti yoonanara owurya moophimelela. Mweeparipari, owo olonce wi owurya eviinyu echu yoohakalaliha. Ninnaalakhanya: “Walye yoolyaa moohakalala nave wawurye eviinyu aa ni murima woohakalala.” (Ekl. 9:7) Ikwaha ikina, Yesu aanawurya eviinyu, nave alapeli akina oororomeleya a Yehova yaaneerano tho yeeyo.—Mat. 26:27-29; Luka 7:34; 1 Tim. 5:23.

Nyenya Piipiliya onnooniherya wi wookhalavo ohiyana otokweene variyari va owurya vakhaani ni ohapaliwa. Owo onnaloca mookwakwaleya: “Muhihapaliweke ni eviinyu.” (Aef. 5:18) Owo tho onnaloca wi “oohapaliwa . . . herwa yaakhela Omwene wa Muluku.” (1 Ako. 6:10) Ti yookwakwaleya wi Yehova onniica moomalela owurya moopwahererya ni ohapaliwa. Ohiya pahiru waatakiherya achu anirukurenrye, hiyaano ninnapaka soolakelela mwawiiwanana ni yeeyo enamuhakalaliha Muluku.

Akina anuupuwela wi ananwerya owurya moopwahererya nyenya ehihapaliwaka. Nto eyo ti yawoopihaxa. Piipiliya onnahiya mookwakwaleya wi yoowo ori ‘kapuro a eviinyu’ onanwerya opaka soohesa itokweene ni omuchekela Yehova. (Titu 2:3; Mas. 20:1) Yesu aahilopola wi ‘ohapaliwa’ onanwerya omuhiiha muchu ovolowa mu elapo evyaani ya Muluku. (Luka 21:34-36) Mwawiihiiha, tiheeni enahaala  omukhaviherya Mukristu osepa makacamiho yaawo anatannyiwa ni soowurya soohapaliha?

Yaamukhala yawoopiha weemererya wi yookhovelela ya nipuro niphwiiwalaahuwo ovolowele moonelo ahu vooloca sa owurya soowurya soohapaliha. Ntoko Akristu, ninnachuna weera ichu inamuhakalaliha Yehova ophiyerya mmiyaha ntoko yoolya ni yoowurya. Weerano yeeyo ennooniherya miruku. Piipiliya onnanuupuxerya: “Naari mulyaaka naari muwuryaka naari mweeraka echu ekina eri yoothene, mweerekeno soothene wi mmucicimihe Muluku.” (1 Ako. 10:31) Muupuwele makoho ni malakiheryo a Mpiipiliyani anacharela:

Apwanne kinawurya wi akina esiveliweke ni miyaano? Mukwaha 23:2, PMM oni: “Ohinaweerela achu waaca wi waachare.” Yehova aahaalopola Aisarayeli wi ehaatakiheryeke achu yaawo yaahaamuhakalaliha yoowo. Ekano yeela ennaphariheleya tho wa hiyo olelo. Wakhala wi nooheemererya wi moonelo wa akina vooloca sa soowurya soohapaliha onivolowele, nnahaala okhala ocai wa Yehova ni malakiheryo awe.—Aro. 12:2.

Apwanne kinawurya soowurya soohapaliha wi kooniherye wi ka muchu oolipa? Mu sookhovelela ikina, owurya soowurya soohapaliha vancipale ti wawunlaana nave tho ti waweemereryeya. (1 Pet. 4:3) Nyenya moone ekano ya miruku nnaphwanyaahu mu 1 Akorintu 16:13: “Mukhale oovinya, mutitelele wiithipela mu nroromelo, mukhale oolipa murima, mukhale akuru.” Apwanne yoowurya yoohapaliha enanwerya omukhaviherya muchu okhala oolipa? Chiryene hooye. Ohiya yeeyo, soowurya soohapaliha sinanwerya omweeriha muchu ohiwerya wuupuwela mwa miruku nave tho ohipaka soolakelela saphaama. Soowurya soohapaliha, ohiya okhala eneneeryo yawi mwa muchu oolipa, enakhala eneneeryo yawi mwa muchu ooceecheya. Yesaya 28:7 olonce wi achu yaawo anahapaliwa anahaala ohooxeya.

Ikuru seeparipari sinarweela wa Yehova nave sinavolowela ‘otitelela ovinya ni olipa mu nroromelo.’ (Sal. 18:32) Hiyaano nnanwerya weerano yeeyo moorweela wa okhalano ekaasoope ni opakaka soolakelela seiho sinahaala okhapelela onthamwene ahu ni Yehova. Yesu aahooniherya ikuru seiha vaavaa aareiye veelaponi yavathi nave achu ancipale yaanamucicimiha nthowa nawi owo aari oolipa murima ni oolakelela weera yeeyo yaari yaphaama.

Apwanne kinawurya wi kihikhale awuukhuwa ni makacamiho aka? Mulipa oomurepa salmu,  aaveereliwa orepa masu ala: “Saancaaya sawuukhula mpuwa mwaka, [nyuwaano Yehova] mwaakihakalaliha.” (Sal. 94:19, PMM) Vano, mwakhala awuukhuwa nnikacamiho vyakala, mmuroromele Yehova, ohiya owurya. Mukhalelo waphaama wa weerano yeeyo, ori moorweela wa opaka mavekelo moohihiyererya. Ancipale ahaavya tho nikhaviheryo na munna awiichwelavo mmulokoni nave eyo yooweeriha okhumelela phaama. Mweeparipari, owurya ni yoolakelela ya ovootha makacamiho onanwerya omweeriha muchu oyeleela ikuru sa weerano yeeyo eri yaphaama. (Ose. 4:11) Taniyeli, yoowo olociwe woopaceryani, ooloca: “Miyaano kaanahooxeya nthowa na wuukhuwa ni wiiphwanyerya mathowa, nave kaanawurya wi kivoothe nikacamiho nenlo. Nyenya makacamiho aka yaahaaceereryeya nave kaahaayeleela asinthamwene aka nave hinkiicicimiha miyo mukhataaka.” Vano tiheeni emukhaviherye Taniyeli? “Kaahiiwexexa wi kaaphwanela okhalano Yehova mmakupa aka, ohiya soowurya. Voocharela, kaahiwerya ovootha makacamiho aka.” Eparipari ti yawi Yehova ilukuluku soothene ori ooreheryeya wi anikhaviherye, naamwi okhalaka wi makacamiho ahu hemala.—Afi. 4:6, 7; 1 Pet. 5:7.

Waakhanle wi ikwaha ikina munnawurya, munaphwanela ovarerya ni opaka matorokelo vooloca sa mukhalelo munaphwanelaanyu owurya ni elukuluku ene. Munanwerya wiikoha: ‘Apwanne ookhalavo muchu a veemusini naari nthamwene awaacameleya oonihenrye wuukhuwa vooloca sa mukhalelo aka wa owurya?’ Wakhala wi aai, eyo eneneeryo yawi nyuwaano munnannuwiha eviisiyu naari nikacamiho nenlo muhiniiwexexaanyu. ‘Apwanne kinnawuryaxa opwaha khalai?’ Muchu ori mmukhalelo yoola, akhweya haakumve wunnuwiha yookhovelela, nyenya moovira wa elukuluku onanwerya okhalano yookhovelela ya owurya moopwahererya. ‘Apwanne kinnawerya okhala kihirino yoowurya yoohapaliha mmahiku vakhaani naari mancipale?’ Wakhala wi munnoona okhala woovila, akhweya yoowurya yoohapaliha eviisiyu anyu. Mmukhalelo yoola, akhweya onamukhala woochuneya waavya nikhaviheryo noophara muteko wi mvoothe nikacamiho nenlo.

Nthowa na woona makacamiho anakhumelela mu owurya moopwahererya, achu akina aalakelela ohiwurya. Akina akhweya hanawurya yoowurya yoohapaliha nthowa nawi hanasiveliwano. Nnahaala wooniherya osivela moorweela wa ocicimiha yoolakelela  ya mmoha ti mmoha moorweela wa ohimukohakoha munnihu.

Akhweya nyuwaano moolakelela wi yaamukhala ya miruku otikitherya mphimo vooloca sa ti liini munaphwanelaanyu owurya. Naari akhweya munanwerya ovareryela mukhalelo munawuryaanyu, akhweya ekwaha emoha va esumana naari vakhaani variyari va yoolya. Akina aalakelela othanla yoowurya taani anayaaya owuryaka. Ntoko yootakiherya, owurya pahiru eviinyu naari servexa moophimelela, nyenya ohiya owurya soowurya soolipa naari opwexeeherya soowurya. Wakhala wi mootikitherya miphimo seiha, onamukhala wookhweya ochariha vaavaa munayaanyu owurya. Mukristu awiichwelavo onatikitherya miphimo seiha, hanaphwanela okhala awuuliwa muru wa nthowa na yeeyo akina anahaalaaya wuupuwela.

Ti woochuneya tho othokororya yeeyo akina anuupuwelaaya. Aroma 14:21 oni: “Ti yaphaama ohikhuura emece, ohiwurya eviinyu, naari weera echu ekina yaahaala omukwaculiha munnaa.” Muni mpharihele hai ekano yeela? Moorweela wa wooniherya osivela wa onna. Wakhala wi moosuwela wi ookhala munna onahaala akwaculeya vaavaa onawooneiyeeni muwuryaka yoowurya yoohapaliha, apwanne hokhala yoosivela osepa owurya wi mmuthokororye munninyu? Mmukhalelo yoola, munnooniherya wuukhuwa ni ocicimiha miyoonelo sa akina, mwaavyaka miphurelo saya ohiya sawinyu.—1 Ako. 10:24.

Ohiya yeeyoru, akhweya kuvernu ootikitherya malamulo vooloca sa soowurya soohapaliha, nave ti yawooneya wi Mukristu onahaala wiiwelela malamulo yaawo. Malamulo yaawo annatikitherya iyaakha seiho muchu onaphwaneleiye opacerya owurya soowurya soohapaliha naari nnawatiiha weeciha naari opharihela maakina muchu amanle owurya.—Aro. 13:1-5.

Yehova oonivaha samahala sootikhiniha, nimoha na seiho ori otaphuwa wa olakelela mukhalelo nnahaalaahu opharihela samahala seiho. Eyo enaphitaanyerya yeeyo nnahaalaahu olya ni owurya. Moohikhwa minikwa, ninnathamalela vancipale otaphuwa yoola wa othanla, nave nnachuna wooniherya othamalela yoola moorweela wa opaka soolakelela inamuhakalaliha Yehova.