1. Nuupuwelaka nroromelo na Aparahamu, nikoho taani akhweya nneeraahu niipakele?

 ACHU ancipale ahiiwa elociwaka sa Aparahamu, nyenya esuwenle ichu savakhaani vooloca sa yoowo. Nto hiyaano noosuwela sincipale sa mulopwana yoola onalociwa Mpiipiliyani. Ntoko yootakiherya, noosuwela wi Aparahamu ohiichaniwa “tiithi a oothene yaale arino nroromelo.” (Aro. 4:11) Akhweya nyuwaano munamwiikoha: ‘Apwanne kaanwerya okhalano nroromelo noolipaxa hiihaa ntoko na Aparahamu?’ Aai, eyo ti yooweryeya.

2. Ntakhara heeni ti woochuneya ohuserya yootakiherya ya Aparahamu? (Tiyaku 2:22, 23)

² Mukhalelo mmoha wa owerya okhalano nroromelo noolikana na Aparahamu, ori ohuserya yootakiherya yeeyo owo onihiyenryeiye. Amanle waakhela nlamulo noorweela wa Muluku, Aparahamu aahithaamela o nipuro noorakamela nave mu iyaakha sincipale aakhala mmixakalani nave tho ophiyerya wi owo aari oorehereya omvaha mwanawe oosiveliwa Isaki ntoko mukucho. Soothene seiha sinnooniherya wi Aparahamu aakhalano nroromelo noolipa wa Yehova. Nroromelo na Aparahamu ni miteko sawe saaheeriha wi Muluku amweemererye ni okhala nthamwene awe. (Mwaalakhanye Tiyaku 2:22, 23.) Yehova onachuna wi oothene hiyo, ophitaanyerya tho nyuwaano nikhale asinthamwene awe. Ti nthowa nene owo aamveerenleiye Paulo ni Tiyaku orepa Mpiipiliyani yootakiherya ya Aparahamu. Mmwaha yoola, nnahaala woona yeeyo Aroma ekapitulu 4 ni Tiyaku ekapitulu 2 enanihusihaaya vooloca sa Aparahamu. Mu ikapitulu seiya piili, ninnaalakhanya echu yoochuneyaxa vooloca sa Aparahamu.

3. Eversikulu taani ya Mpiipiliyani Paulo ni Tiyaku etharinhaaya?

 ³ Ooweeli, Paulo ni Tiyaku aathariha masu yaawo enaphwanyeya mu Mapacereryo 15:6, PMM: “[Aparahamu] aahaaroromela Apwiya, vaavaa yaamweera okhala awookololowa murima.” Wa Yehova muchu awookololowa ti yoole oneera yookhwela awe nave onamuhakalaliha yoowo. Ti yoohakalaliha osuwela wi achu oohiphaameya ntoko hiyaano nnanwerya weeriwa awookololowa naari oohikhalano nihoonya ni Muluku! Himwaahaala osiveliwa Yehova aalonce hiihaa vooloca sa nyuwaano? Vano nnahaala woona ntakhara heeni Yehova aamwiichana Aparahamu awookololowa, ni yeeyo nnaphwanelaahu weera wakhala wi ninnachuna weeriwa awookololowa ni Yehova.

4. Tiheeni enaahiiha achu okhala awookololowa?

⁴ Mu ekaarata awe wa Aroma, Paulo ooloca wi achu oothene toocheka. (Aro. 3:23) Vano, onaweryeya hai Muluku owoona achu akina okhala awookololowa nave ehirino nihoonya? Wi aakhaviherye Akristu wiiwexexa makupa ene yaala, Paulo oothariha vooloca sa Aparahamu.

5. Ntakhara heeni Yehova aamwiichana Aparahamu awookololowa? (Aroma 4:2-4)

⁵ Aparahamu aakhala o Kana vaavaa Yehova aalonceiye wi owo aari awookololowa. Ntakhara heeni Yehova aahiloca yeela? Apwanne naari nthowa nawi Aparahamu aanachariha Nlamulo na Mose mmukhalelo woophaameya? Hooye. (Aro. 4:13) Ninnasuwela yeela nthowa nawi Nlamulo na Mose pahiru naavahereryiwe nloko na Isarayeli iyaakha 400 ohoolo waya Muluku amanle oloca wi Aparahamu aari awookololowa. Vano ntakhara heeni Muluku aaloca wi Aparahamu aari muchu awookololowa? Yehova aamooniherya Aparahamu mahala matokweene nave aamwiichana awookololowa nthowa na nroromelo nawe.—Mwaalakhanye Aroma 4:2-4.

6. Mmukhalelo taani Yehova onamweereiye awookololowa mulipa oocheka?

⁶ Paulo oothariha wi vaavaa muchu onakhaleiyeno nroromelo wa Muluku, “owo onamweeriwa awookololowa wanthowa na nroromelo nawe.” (Aro. 4:5) Paulo oothariha tho mwawaaceererya: “Moolikana, Tavite aaloca tho sa ohakalala wa muchu yoowo Muluku onamweereiye awookololowa moohipwacha miteko sawe: ‘Oohakalala taale aleveleliwe soonanara saya, nave ixipihiwa soocheka saya; oohakalala muchu yoowo Yehova oneereiye ahimweere oocheka.’” (Aro. 4:6-8; Sal. 32:1, 2) Muluku onnalevelela soocheka sa yaale arino nroromelo mwa yoowo. Owo onnalevelela moomalela nave hanuupuwelela soohesa sa muchu yoowo. Wa yene, muchu yoola tawookololowa nave haano nihoonya wa nthowa na nroromelo nawe.

7. Ntakhara heeni nnanwerya oloca wi alapeli akhalai a Muluku yaari awookololowa?

⁷ Eparipari wi Aparahamu, Tavite ni alapeli akina oororomeleya a Yehova yaahiichaniwa awookololowa, naamwiihiiha, awo yaahititelela okhala oohiphaameya ni oocheka. Nyenya nthowa na nroromelo yaaryaayano,Yehova aanawoona ntoko hiyaarino nihoonya, xaxaxa aawaalikanyihaka ni yaale yahaamulapela. (Aef. 2:12) Mu ekaarata awe wa Aroma, Paulo oothariha wi nnaphwanela okhalano nroromelo wakhala wi ninnachuna okhala nthamwene a Muluku. Mwawiihiiha, hiiha ntoko Aparahamu ni Tavite, wakhala wi nookhalano nroromelo mwa Yehova nnanwerya tho okhala asinthamwene awe.

8-9. Miyoonelo taani sooheseya irivovo moorweela wa soorepa sa Paulo ni Tiyaku, nave ntakhara heeni?

⁸ Mu iyaakha sincipale, ahooleli a malapelo annavaanyihana vooloca sa yeeyo eri yoochuneyaxa: Waakhanle wi nroromelo naari miteko. Akina anahusiha wi wakhala wi muchu onnachuna ovuluxiwa, owo onaphwanela omweemererya  Yesu Kristu. Nyuwaano mohintoko wiiwa akina elocaka wi: “Mmweemererye Yesu nave nyuwaano munamvuluxiwa.” Ophiyerya tho wi malapelo mancipale ennapharihela masu a Paulo: ‘Muluku onnamweera awookololowa moohipwacha miteko sawe.’ (Aro. 4:6) Mmukhalelo mukina, akina ennaloca wi “nyuwaano munanwerya ovuluxiwa” wakhala wi munnaxekurya mapuro yaawo anooniwa okhala aweela ni ikerexa naari opaka ichu saphaama. Akhweya awo ennathariha masu enaphwanyeya mu Tiyaku 2:24: “Muchu oneeriwa awookololowa moorweela wa miteko, ohiya ni nroromelo pahi.”

⁹ Wanthowa na miyoonelo seiha soohiyana, alipa oomuhuserya Piipiliya akina aaphiyerya makuchuwelo awi Paulo ni Tiyaku hiyiiwanana vaavaa yaalocaaya sa nroromelo ni miteko. Mwawiiwanana ni alipa a malapelo akina, Paulo eemererya wi muchu onaphwanela okhalano nroromelo wi amuhakalalihe Muluku, nave Tiyaku eemererya wi muchu onaphwanela okhalano miteko, achuna omuhakalaliha Muluku. Mulipa oohuserya mmoha ooloca wi: “Tiyaku hiiwexexa ntakhara heeni Paulo aalonceiye wi muchu aaphwanela okhalano nroromelo wakhala wi onnachuna okhala awookololowa, nave mweeparipari Tiyaku heemererya othariha wa Paulo.” Nto yeeyo Tiyaku ni Paulo yaarempaaya yaaveereliwe ti Yehova. (2 Tim. 3:16) Mwawiihiiha, onnaphwanela okhalavo othariha vooloca sa ohiyana orivovo wa yeeyo Paulo ni Tiyaku aloncaaya. Mwawiihiiha, masu makina a ikaarata sa Paulo ni Tiyaku sinahaala onikhaviherya wiiwexexa phaama mwaha yoola.

10. “Miteko” taani Paulo aaloceiye? (Aroma 3:21, 28) (Moone tho eruku.)

¹⁰ “Miteko” taani Paulo aaloceiye sinaphwanyeya mu Aroma 3 ni 4? Owo aaloca xaxaxa sa “miteko inavekeya mu nlamulo” na Mose nenlo naavahereryiwe va mwaako Sinai. (Mwaalakhanye Aroma 3:21, 28.) Enooneya wi mu elukuluku ya Paulo, Ayuta akina yaari Akristu yaanahoolela nikacamiho na weemererya wi  Nlamulo na Mose ni miteko seiho saavekiwa saahivireliwa. Ti nthowa nene Paulo aapharihenleiye yootakiherya ya Aparahamu, wi ooniherye wi wooniwa okhala awookololowa ni Yehova honarweela mu “miteko inavekeya mu nlamulo,” nyenya onarweela mu okhalano nroromelo. Eyo ennanihakalaliha vancipale nthowa nawi ennanihusiha wi nakhalano nroromelo mwa Muluku ni mwa Yesu, nnanwerya okhalano weemereryiwa wa Muluku nave nnahaala weeriwa awookololowa.

11. “Miteko” sa mukhalelo taani Tiyaku aaloceiye?

¹¹ Mmakupa makina, “miteko” seiyo Tiyaku olonceiye mu ekapitulu 2 tahi “miteko inavekeya mu nlamulo,” seiyo Paulo olonceiye. Tiyaku aaloca sa miteko, naari saweera seiyo Akristu anaphwanelaaya opaka nihiku ti nihiku. Ti miteko seiyo inooniherya waakhanle wi Mukristu ookhalano nroromelo neeparipari naari hooye. Moone sootakiherya piili Tiyaku opharihenleiye.

12. Ti mwawiihai Tiyaku otharinheiye wiiwanana orivovo variyari va nroromelo ni miteko? (Moone tho eruku.)

¹² Mu yootakiherya yoopacerya, Tiyaku aalonce wi Akristu yaaphwanela waakhalihaka oothene mmukhalelo mmohamoha. Owo aahiloca niphwanaphwaniho vooloca sa mulopwana aamukhalinhe phaama mulipa ooreela, nave amukhaliha moonanara mulipa oohaawa. Tiyaku aahithariha vooloca sa mulopwana yoole aaloca wi ookhalano nroromelo, nyenya yeeyo eereiye hisiiwanana ni seiyo aaloceiye. (Tiy. 2:1-5, 9) Mu yootakiherya yanaawiili, Tiyaku aaloca sa ‘munna naari murokora yoowo othaaleliwe naari ohirino yoolya yawaakhwanela ntakhara nihiku,’ nyenya muchu haneeravo echu wi amukhaviherye. Naamwi owo alocaka wi ookhalano nroromelo, saweera sawe sinnooniherya wi haanono nroromelo. Eri ntoko Tiyaku orempeiye wi “nroromelo pahi, nihirino miteko, ti nookhwa nene.”—Tiy. 2:14-17.

13. Yootakiherya taani Tiyaku opharihenleiye wi ooniherye wi ninnaphwanela okhalano nroromelo ni miteko saphaama? (Tiyaku 2:25, 26)

 ¹³ Tiyaku oomuloca Rahapi ntoko yootakiherya yaphaama ya muchu yoowo orino nroromelo nave oonihenrye nenlo mmiteko. (Mwaalakhanye Tiyaku 2:25, 26.) Rahapi aaniiwa elociwaka sa Yehova nave aanasuwela wi owo aanaakhaviherya Aisarayeli. (Yos. 2:9-11) Voocharela, owo aahooniherya nroromelo nawe mwa miteko, moorweela wa waakhapelela anamahocela apiili a Aisarayeli yaawo ekumi aya yaari va yawoopiha. Wanthowa nenla, muthiyana yoola oohiphaameya nave aahiri Muisarayeli, aahiichaniwa awookololowa hiihaa ntoko Aparahamu iichaniweiye awookololowa. Yootakiherya ya Rahapi ennanihusiha wi nroromelo nahu nnaphwanela okhaviheryiwaka ni miteko.

14. Ntakhara heeni nnanwerya oloca wi Paulo ni Tiyaku hiyavuhana mu ichu yaalocaaya?

¹⁴ Mwawiihiiha, Paulo ni Tiyaku pahiru yaathariha wiiwanana orivovo variyari va nroromelo ni miteko, nyenya mmikhalelo soohiyana. Paulo aaloca wa Akristu yaawo yaari Ayuta wi awo hiyaahaala weemereryiwa ni Yehova pahiru waakhanle wi anapaka miteko inavekeya mu Nlamulo na Mose. Tiyaku aaloca wi Akristu oothene anaphwanela wooniherya nroromelo naya moorweela mwa weera ichu saphaama wa achu akina.

15. Mmikhalelo taani nneeraahu nooniherye nroromelo moorweela mwa miteko? (Moone tho eruku.)

¹⁵ Yehova haaloca wi, wakhala wi ninnachuna weeriwa awookololowa nnaphwanela weera yeeyo ene Aparahamu eenreiye. Mweeparipari, sookhalavo mikhalelo mincipale sa wooniherya wi nookhalano nroromelo moorweela wa miteko sahu. Hiyaano nnanwerya owaakhela phaama avyaani mmulokoni, waakhaviherya anna yaawo anahoolela makacamiho ni opaka yeeyo eri yaphaama wa oothene aveemusini vahu,  ichu soothene seiha ti seiyo Yehova oneemereryeiye ni onareeliheiye. (Aro. 15:7; 1 Tim. 5:4, 8; 1 Yoh. 3:18) Mukhalelo mmoha woochuneyaxa wa wooniherya nroromelo nahu ori olaleerya mwamvai michaka saphaama wa akina. (1 Tim. 4:16) Oothene ahu nnanwerya wooniherya moorweela wa saweera sahu wi nookhalano nroromelo wi soororomeliha sa Yehova ti seeparipari nave wi soothene owo onapakeiye ti samphurelo wa hiyo. Wakhala wi noheerano ichu seiha, nnanwerya olekecheya wi Muluku onahaala oneera awookololowa nave nnahaala okhala asinthamwene awe.

16. Ewehereryo taani Aparahamu aareiyeno yeeyo emukhavihenrye okhalano nroromelo?

¹⁶ Aroma ekapitulu 4 onnaloca sa nihusiheryo nikina nnaphwanelaahu ohuserya ni Aparahamu: Ochuneya waya wa ewehereryo. Yehova aahiroromeliha wi moorweela wa Aparahamu “maloko mancipale” yaahaala oreelihiwa. Mwaanyiherye ohakalala wa Aparahamu vaavaa iiwaleiye yeela! (Map. 12:3; 15:5; 17:4, PMM; Aro. 4:17) Nyenya elukuluku yaanavira, Aparahamu iiha arino iyaakha 100 nave amwaariye Sara 90, nlelo awo yiiso ehaakumve okhalano mwaana. Mmoonelo wa achu, yaakhala wi ti yoohiweryeya Aparahamu ni Sara okhalano mwaana. Nave ela yaari yaweeha wa Aparahamu. “Moorweela wa ewehereryo, owo aaroromela wi aahaala okhala tiithi a maloko mancipale.” (Aro. 4:18, 19) Wookuchulani, mwaana aaweheryiwa, aahiyariwa. Aparahamu aahikhala tiithi a Isaki.—Aro. 4:20-22.

17. Nnasuwela hai wi nnanwerya weeriwa awookololowa ni Muluku ni okhala nthamwene awe?

¹⁷ Ntoko noonnaahu, nnanwerya okhalano weemereryiwa wa Yehova nave wooniwa okhala awookololowa ni yoowo hiihaa ntoko Aparahamu. Mweeparipari, Paulo aacicimiherya yeela vaavaa aalonceiye ariki: “Masu ‘owo aaheeriwa,’ hiyaarepeliwe pahiru wanthowa [na Aparahamu], awo tho nrepeliwe yeehu. Hiyo tho nnahaala weeriwa awookololowa woona wi ninnamweemererya Yoowo omviihale Yesu Apwiya ahu mwa alipa ookhwa.” (Aro. 4:23, 24) Hiihaa ntoko Aparahamu, hiyaano nnaphwanela okhalano nroromelo, miteko ni ewehereryo. Paulo onnatitelela oloca sa ewehereryo ahu mu Aroma ekapitulu 5, nave ti yeeyo nnahaalaahu woona mmwaha onacharela.