Nihiku nimoha, murokora mmoha o Nova Selantiya aahoona exilema mu jw.org, yeeyo erino muru, “Muthokororyaneke Mukina ni Mukhwaawe” (ya Ekunya). Exilema yeela ennathariha wi Yehova tahi wi pahiru orino niphwanya wa akina, nyenya owo onneeravo echu wi aakhaviherye. (Yes. 63:7-9) Voocharela, murokora ole aahilakelela ochariha yeeyo aahusenryeiye ni waavya ekari ya omooniherya niphwanya muchu. Ohoolo waya mu nihiku nenle, owo aaya o musika nave aahimphwanya muthiyana oohaawa yoowo aakona muxerexere wa mphiro. Murokora aahilakelela othuma yoolya wi amvahe muthiyana yoole, nave owo aahaakhela. Vaavaa murokora amvahereryeiye yoolya, aahipharihela ekari wi amulaleerye apharihelaka etrataatu Makacamiho Anahaala Omala?

Muthiyana ole aahinla vancipale. Owo aahimutharihela wi asitiithi awe yaari Anamoona a Yehova nave aaphwiiwale mu eparipari, nyenya owo haakele vahoolo omunepani. Nto hiihaanoru, owo aanavekela wa Yehova avekaka nikhaviheryo wi akookele wa yoowo. Murokora ahu aahimvaha muthiyana yoole Piipiliya nave evaanela wi epacerye omuhuserya Piipiliya. a

Hiihaa ntoko Yehova, hiyaano tho nnanwerya wooniherya niphwanya wa achu oothene, ophitaanyerya amusi vamoha ni anna ni arokora mmulokoni. Ohiya yeeyoru, nnanwerya waavya ikari wi nooniherye niphwanya nlocaka sa Yehova ni akina.