1. Teevi eri yootaphulela ya epaau Mpiipiliyani?

 EPAAU yaari yoolya yoochuneyaxa wa achu ancipale mu ilukuluku sa Mpiipiliya. (Map. 14:18; Luka 4:4) Mweeparipari, yaari yoochuneyaxa ophiyerya wi mu ikwaha sincipale Piipiliya onnapharihela “epaau” wi aloce wi yoolya ya achu oothene. (Mat. 6:11) Yesu aahipharihela ipaau mu sootikhiniha sawe piili seiho isuweliwexa. (Mat. 16:9, 10) Ninnaphwanya emoha wa saweereya seiho mu Yohani ekapitulu 6. Vaavaa nnathokororyaahu yaweereya yeela, nnahaala woona mahusiheryo yaawo nnaphwanelaahu opharihela mmahiku ahu.

2. Mu elukuluku taani macikhwi a achu yaachunaaya yoolya?

² Arummwa a Yesu emanle okooka mmuteko woolaleerya, yaanwela mwaaceya vamoha ni Yesu mu ephareya yo Kalileya wi yawerye wiichuuwa. (Mar. 6:7, 30-32; Luka 9:10) Awo yaahiphiya o nipuro nawiipitheya makupa o Petisaita. Nyenya vaavaa achu yiiwalaaya wi Yesu aari weiwo, mwawaakuveya mamilyawu a achu yaahirwa wi emoone. Yesu haawaakhoonce yaawo. Owo mooreera murima aakhalano elukuluku wi aahusihe vooloca sa Omwene ni waapenuxa awiiceliwa. Woona wi waanaxekuwavo, oohuserya yaanakohana mukhalelo yaahaalaya okhalano yoolya ntakhara achu oothene yaale. Akina a yaawo akhweya yaahikhalano yoolya yavakhaani, nyenya ancipale yaaphwanela opwaha wi yathume yoolya. (Mat. 14:15; Yoh. 6:4, 5) Tiheeni Yesu aahaaleiye weera?

 YOOTIKHINIHA YA WAACEERERYA IPAAU

3. Tiheeni Yesu eenreiye ni soothowa sa muloko wa achu? (Moone tho ekaapa.)

³ Yesu aahi wa arummwa awe: “Awo hanaphwanela orowa; yeenyu ene mwaavahe echu ya olya.” (Mat. 14:16) Nla naari nikacamiho nthowa nawi yaakhalavo alopwana awaakhwana 5.000. Ephitaanyeryiwakavo athiyana ni anamwane, akhweya yaakhalavo achu awaakhwana 15.000 yaawo yaachuna olya. (Mat. 14:21) Antreya aaloca: “Vaava ookhalavo mwaammiravo orino ipaau thanu ni asihopa eeli. Nto tiheeni yeela wa achu ancipale?” (Yoh. 6:9) Ipaau saapakiwa ni sevata, wiiliwiili saalyiwa ni achu oohaawa vamoha ni achu akina nave ihopa ikhaani akhweya saari sawuuma ni samaakha. Nyenya yoolya yeeyo mmiravo aareiyeno hiyaahaala waakhwana wa achu oothene, apwanne tahi yeeyo?

4. Tiheeni nnahuseryaahu mu Yohani 6:11-13? (Moone tho iruku.)

⁴ Yesu aachuna wooniherya owaakhela aleco, mwa yeeyo, aahaaveka wi oothene ekiraathi mmakhuuru vamunyepuni. (Mar. 6:39, 40; mwaalakhanye Yohani 6:11-13.) Ninnaalakhanya wi Yesu aahivekela wa Atiithi awe ntakhara ipaau ni ihopa. Yaari yoophwanelela omuthamalela Muluku, yoowo mweeparipari ori Ehime ya yoolya. Ti woochuneya vancipale ochariha yootakiherya ya Yesu ovekelaka nihaakumve olya, nrivo mukhatiihu naari ni akina. Mwawiihiiha, Yesu aahilamulela wi ekaiwe yoolya, nave achu yaalya ni evona. Ophiyerya tho wi saahala ikina, seiho Yesu aachuneiye wi sihirihiwe. Mwa yeeyo, Yesu aahiloca wa oohuserya awe wi ethukumanye seiho saahanle wi ilyiwe mu elukuluku ekina. Yesu aanapharihela ichu seiho aareiyeno mwa miruku, ela yootakiherya yaphaama  wa hiyaano. Waakhanle wi nyuwaano mwa tiithi, munanwerya opharihela yaweereya yeela wi mwaahusiheno anamwane anyu ntakhara heeni oryaaya woochuneya ovekela ehaakumve olya, okhala oowaakhela aleco, ni amahala wa ichu seiho aryaayano hiiha ntoko Yesu eenreiye.

5. Tiheeni achu yaachunaaya emanle woona ichu sootikhiniha Yesu aapankeiye nihiku nenle, nyenya owo aakhulenle hai?

⁵ Muloko wa achu waahitikhiniheya ni mukhalelo wa ohusiha wa Yesu ni sootikhiniha sawe. Esuwelaka wi Mose aahiloca wi Muluku aahaala omurumiha mulipa a miririmu, akhweya yaahuupuwela: ‘Apwanne mulipa a miririmu owo ti Yesu?’. (Malam. 18:15-18) Waakhanle wi tihiiha, yaahaala okhala ntoko wi owo aahaala okhala mulamuleli ootikhiniha, akhweya oowerya ovahererya yoolya wa nloko noothene na Isarayeli. Mawiihiiha, muloko waahala vakhaani ‘omphara [Yesu] ni yoolakelela ya omweera mwene.’ (Yoh. 6:14, 15) Waakhanle wi Yesu aaheemererya wi eyo yeereye, owo aahaala opakaka makupa a epolitika ya Ayuta, yaawo yaalamuleliwa ni Aroma. Apwanne owo aaheemererya? Hooye. Piipiliya onaloca wi owo “aapwahavo akookela omwaako meekheiye.” Nyenya moohipwacha okhinyererya wa akina owo hiivoliihenrye mu epoliitika. Tiheeni nnahuseryaahu?

6. Ti mwawiihai nnahaalahu wooniherya wi nnachuna ochariha yootakiherya ya Yesu? (Moone tho eruku.)

⁶ Eparipari wi achu herwa eniveka opaka yootikhiniha ya yoolya, waapenuxa areca naari okhala mwene aya. Nyenya, enanwerya weererya onlekecha wi niivoliiherye mu namuthanle  naari wooniherya okhaviherya wa muchu yoowo awo anoonaaya wi onahaala okhala mulamuleli aphaama. Mwawiihiiha, yootakiherya ya Yesu ti yookwakwaleya. Owo aakhooca wiivoliiherya mmakupa a epoliitika ophiyerya tho ohoolo waya owo aaloca wi: “Omwene aka honapaka makupa a elapo yeela.” (Yoh. 17:14; 18:36) Ntoko Akristu, nnaphwanela wuupuwelaka hiiha ntoko Yesu ni ochariha yootakiherya awe. Ninnakhaviherya, ninneerela onamoona nave ninnavekela ntakhara Omwene yoowo. (Mat. 6:10) Sookhalavo sincipale nnaphwanelaahu ohuserya vooloca sa yootikhiniha ya Yesu ya waaceererya ipaau.

“YOOTAPHULELA YA IPAAU”

7. Tiheeni Yesu ni arummwa awe yeenraaya? (Yohani 6:16-20)

⁷ Yesu amanle waalyiha achu, aahaaleela arummwa awe ovinyawo o nipuro nenle wi ekookele o Kafarnawu, nave aahipwahawo ayaaka o mwaako asepaka otitelela wa achu wi emweere mwene. (Mwaalakhanye Yohani 6:16-20.) Vaavaa arummwa yeecaaya ni mwaaceya, aakhumelela mwaacikinye, atannyaka echeku ni machumuca awuupa. Nyenya Yesu aahiya wa yaawo eecaka vasulu va maahi. Nave aahinwopa tho Petru wi eece vasulu va maahi. (Mat. 14:22-31) Vaavaa Yesu aavolonweiye mmwaaceyani, echeku yaamaala. Oohuserya yaahitikhiniheya nave eloca: “Chiryene, nyuwaano mwa Mwaana a Muluku.” a (Mat. 14:33) Naamwiihiiha, awo hiyaawoonne wiiwanana variyari va yootikhiniha yeela ni yeeyo yeeren’ye muculi ni muloko wa achu. Marku onnaaceererya: “[Arummwa] yaatepa otikhina, woona wi hiyiiwexenxe yootaphulela ya ipaau; mirima saya saawaleya ehiniiwexexa.” (Mar. 6:50-52) Arummwa hiyaawiiwexenxe wi Yehova aahimvaha Yesu owerya wa opaka sincipale ohiya pahiru ovahererya ipaau. Voocharela, Yesu aahiloca wanaawiili vooloca sa yootikhiniha ya epaau nave oonihusiha nihusiheryo nikina.

8-9. Ntakhara heeni muloko wa achu waamwaavyaaya Yesu? (Yohani 6:26, 27)

⁸ Muloko yoowo Yesu aalyinheiye waatikitheryen’ye mu waakhwaniherya soothowa saya ni soochunachuna saya soomwiilini. Mwawiihai? Nihiku noocharela, yaahoona wi Yesu ni arummwa awe yaahipwahavo. Mwawiihiiha, muloko waahaawela amwaaceya akina yaawo yaaya o Tiperiyate, nave muloko waahilapuwa oya makupa o Kafarnawu wi yamphwanye Yesu. (Yoh. 6:22-24) Apwanne awo yeenreno yeeyo ni yoolakelela wi yiiwe wanaawiili vooloca sa Omwene? Hooye. Awo yuupuwela xaxaxa othoiwa waya woomwiilini wa ipaau. Nnasuwela hai?

⁹ Moone tiheeni yeeren’ye vaavaa muloko waamphwannyaaya Yesu waacamela o Kafarnawu. Yesu aahiloca wa yaawo wi yaanamwaavya nthowa nawi yaachuna olya. Owo aahisuwela wi awo ‘yaalya ipaau nave evona’ ni “yoolya yeeyo enuuca”. Ohiya yeeyo owo aahaaceenyerya wi elapeke ohiya ntakhara yoolya yeeyo enuuca, nyenya nthowa na “yoolya yeeyo enatitelela okhala ophiyerya wookumini woohimala.” (Mwaalakhanye Yohani 6:26, 27.) Yesu aahiloca wi Atiithi awe yaahaala ovahererya yoolya yeeyo. Vaavaa achu yiiwalaaya wi yookhalawo yoolya yaahaala waavaha ekumi yoohimala awo akhweya yaahikhala ootikhiniheyaxa! Mano yoolya taani yaahaala weera hiiha, nave ti mwawiihai alipa oowiriyana a Yesu yaahaalaaya waakhela?

10. Tuuvi waari “muteko wa Muluku” muloko waaphwanelaaya ohuserya?

¹⁰ Ayuta yaala yaachuna osuwela tiheeni yaaphwanelaaya weera wi ephwanye yoolya yeeyo. Awo enanwerya wuupuwelaka “miteko” sa Nlamulo na Mose. Mwawiihiiha, Yesu aaloca: “Muteko wa Muluku tuula: Omuroromela yoole omurummeiye.” (Yoh. 6:28, 29) Ti woochuneya okhalano nroromelo mwa Yesu wi muchu  “akhaleno ekumi yoohimala.” Mweeparipari, Yesu aahiloca sa yeela. (Yoh. 3:16-18, 36) Nave voocharela Yesu aahiloca sincipale vooloca sa mukhalelo nnahaalaahu ophwanya ekumi yoohimala.—Yohani 17:3.

11. Ti mwawiihai Ayuta yoonihenryaaya wi pahiru yaachuna waakhwaniherya soochuna saya soomwiilini? (Salmu 78:24, 25)

¹¹ Ayuta yaala hiyaaweemerenrye mahusiheryo a Yesu vooloca sa “muteko wa Muluku” muvyaani. Awo yaahimukoha: “Eneneeryo taani muneeraanyu mpake, wi noone nave niweemereryeeni?” (Yoh. 6:30) Voocharela, yaahiloca wi achu mu elukuluku ya Mose mootikhiniha yaahaakhela mana wi elye, yeeyo yaari yoolya aya ya nihiku ti nihiku. (Neh. 9:15; mwaalakhanye Salmu 78:24, 25.) Ti yawooneya wi awo, yuupuwela pahiru okhalano yoolya yawooneya. Nave voocharela vaavaa Yesu aalonceiye sa “epaau yeeparipari enarweela wirimu,” yeeyo moohiyana ni mana yaahaala waavaha ekumi yoohimala, awo hiyaamukonheru echu yeeyo owo aachuneiye oloca. (Yoh. 6:32) Awo yaatikithenrye soothowa saya soomwiilini ophiyerya wi ekhooca iparipari soomunepani seiho Yesu eerenryeiye okawana ni yaawo. Tiheeni nnahuseryaahu ni yaweereya yeela?

TIHEENI ENAPHWANELA OKHALA YOOCHUNEYAXA WA HIYAANO?

12. Echu taani Yesu oonihenryeiye yeeyo eri yoochuneyaxa?

¹² Nookhalavo nihusiheryo noochuneyaxa wa hiyaano mu Yohani ekapitulu 6. Omwiiwelela Muluku ni okhalano onthamwene wawaacameleya ni yoowo eyo teri yoochuneyaxa wa hiyaano. Muupuwele wi Yesu aaheerano yeeyo vaavaa aakhoonceiye yaweeha ya Satana. (Mat. 4:3, 4) Nave va mwaha awe wa vamwaakoni, owo aahiceenyerya ochuneya waya okhalano soothowa soomunepani wa mmoha ti mmoha. (Mat. 5:3) Mwawiihiiha, nnanwerya wiikoha: ‘Mukhalelo aka wa okumi kinnooniherya wi kinnavaha esisapo mu waakhwaniherya soothowa saka soomunepani ohiya waakhwaniherya soochuna saka soomwiilini?’

13. (1) Ntakhara heeni nnaphwanelaahu othamalelaka yoolya? (2) Ephoole taani nnaphwanelaahu okhalano? (1 Akorintu 10:6, 7, 11)

¹³ Ti woophwanelela ovekela wa nthowa na soothowa sahu soomwiilini ni ochuna waakhwaniherya seiho. (Luka 11:3) Muteko wakuru onnaneeriha “olya, owurya” ni onnanivaha ohakalala nave eyo “enarweela mmatani mwa Muluku eeparipari.” (Ekl. 2:24; 8:15; Tiy. 1:17) Nyenya nnaphwanela okhalano ephoole wi niheemererye wi ichu soomwiilini sikhale soochuneyaxa mu okumi ahu. Murummwa Paulo aahithariha yeeyo vaavaa aarepenleiye Akristu yaawo yaakhala omakuchuwelo wa mukhalelo wa ichu wa Ayuta. Owo aahiloca saweereya sakhalai sa Aisarayeli, ophitaanyerya yeeyo yeeren’ye waacamela omwaako Siyoni. Owo aahaalopola Akristu ‘wi ehichuneke ichu soopahula, ntoko [Aisarayeli] yaachunaaya.’ (Mwaalakhanye 1 Akorintu 10:6, 7, 11.) Aisarayeli yaaheemererya wi nchuno naya na yoolya ntatuxeye ophiyerya wi soovaha sootikhiniha sa Yehova okhala “ichu soopahula.” (Nam. 11:4-6, 31-34) Nave ni mwaasaana a emope a ooru, awo yaanalya, owurya ni ohakalala. (Muk. 32:4-6) Paulo aahiloca sootakiherya seiya wi aalopole Akristu yaawo yaakhala waacamela eyaakha ya 70 E.K. vaava Yerusalemu ni empa awe saatoloxiwaaya. Hiihaano nnakhala omakuchuwelo wa mukhalelo yoola wa ichu, mwawiihiiha ninneerano phaama vaavaa nnapharihelaahu phaama olopola wa Paulo.

14. Vooloca sa yoolya, tiheeni nnaweheryaahu mu elapo evyaani?

¹⁴ Vaavaa aaloceiye sa “yoolya ahu ntakhara nihiku nenla,” Yesu aahithoonya elukuluku yeeyo yookhwela ya Muluku yaahaalaaya waakhwanela “ntoko wirimu, hiihaa tho vathi va.” (Mat. 6:9-11) Ni yeeyo tiheeni enoorweelaani mmuupuweloni? Piipiliya onnaloca yookhwela ya Muluku ntakhara elapo ya vathi enaphitaanyerya  yoolya yaphaama. Mwawiiwanana ni Yesaya 25:6-8, enamukhalavo yoolya yincipale yaphaama wi nipuhe Omwene wa Yehova. Nave Salmu 72:16 oni: “Enamukhalavo yoolya yincipale veelaponi yavathi; nave vasulu va miyaako inamusareyavo soolya.” Apwanne nyuwaano munnachunaxa waapeya yoolya yeeyo enoosivelaani vancipale nave tho ohuserya waapeya echu muhintonkaanyu waapeya? Nyuwaano tho munanwerya waala miri sanyu ni opuha sawiima sene. (Yes. 65:21, 22) Nave nyuwo hamukhala mukhatiinyu.

15. Echu taani yaawo anahaala oviihiwa mookhwani anahaalaaya ohuserya? (Yoh. 6:35)

¹⁵ Mwaalakhanye Yohani 6:35. Nwuupuwele wanaawiili achu yaale yaalyile ipaau ni ihopa seiho Yesu aavaherenryeiye. Mu ovinya mookhwani onoorwa, nyuwaano munanwerya waasuwela akina a yaawo. Naamwi muculi yahimuroromenle, awo ananwerya oviihiwa. (Yoh. 5:28, 29) Achu yaawo, anahaala ohuserya yootaphulela ya masu a Yesu awi: “Miyaano ka epaau ya ekumi. Yoole onarwa wa miyo harwa avoliwa etala.” Awo anahaala ochuna winnuwiha nroromelo mu mukucho wa woopola wa Yesu, nroromelo nawi owo aavaha okumi awe ntakhara yaawo. Mu elukuluku yeeyo, enamukhalavo marehereryo a waahusiha yaawo enahaala oviihiwa mookhwani vamoha ni anamwane oothene yaawo anahaala oyariwa. Mweeparipari enahaala okhala yoohakalaliha opaka makupa mu marehereryo yaala a ohusiha! Weerano yeeyo enamukhala yoosivaxa opwaha olya epaau yawooneya. Aai, ichu soomunepani sinahaala okhala ichu soochuneyaxa.

16. Tiheeni nnahaalaahu othokororya mmwaha onacharela?

¹⁶ Nnahaala othokororya makupa a yaweereya ya Yohani ekapitulu 6, nyenya Yesu aakhalano ichu sincipale sa ohusiha vooloca sa “ekumi yoohimala.” Wa Ayuta yaawo Yesu aalonceiyeno yaaphwanela owiriyana moomaaleleya yeeyo Yesu aaloceiye, nave hiyaano tho nnaphwanela weerano emohamoha. Mmwaha onacharela nnahaala otitelela omuthokororya Yohani ekapitulu 6.