MWAHA WOOHUSERYA 49
NCIPO 147 Ewehereryo ya Okumi Woohimala
Tiheeni Munaphwanelaanyu Weera wi Mukhale Okhala Wookhala?
“Oothene yoole onamweemererya Mwaana ni omuroromela akhaleno ekumi yoohimala.”—YOH. 6:40.
IPONTU SA VASULU
Ti mwawiihai oothanliwa hiiha ntoko a ipucepuche ikina enaphuraaya orweela wa mukucho wa Yesu Kristu?
1. Ti mwawiihai akina anahaalaaya wiisoona vooloca sa okhalano ekumi okhala wookhala?
ACHU ancipale annathanlela yeeyo analyaaya ni weererya wiivyakiha moohihiyererya wi etitelele okhala akumi. Naamwiihiiha, awo henawehererya okhala ni okumi okhala wookhala. Owehererya yeeyo, onanwerya wooneya ntoko echu yoohiwereya naari yoohichuneya wa nthowa na sookhumelela sawuukhula inarwa nthowa na wuuluvala. Mwawiihiiha, Yesu aahiloca mmukhalelo woophwanelela vooloca sa “ekumi yoohimala,” ntoko enooniheryiwaaya mu Yohani 3:16 ni 5:24.
2. Tiheeni Yohani ekapitulu 6 olonceiye vooloca sa ekumi yoohimala? (Yohani 6:39, 40)
2 Nihiku nimoha, mootikhiniha Yesu aahilyiha muloko mutokotoko wa achu ipaau ni ihopa. a Eyo yaari yootikhiniha, nyenya yeeyo aalonceiye mu nihiku noocharela yaari yootikhinihaxa. Muloko yoowo wa achu, waahimuchara o Kafarnawu, waacamela o Kalileya nave weiwo aahaaleela wi achu ananwerya ovinya mookhwani ni opuha okumi woohimala. (Mwaalakhanye Yohani 6:39, 40.) Mwa yeeyo, nwuupuwele asinthamwene anyu ni oosiveliwa anyu ekhwile. Masu a Yesu annooniherya wi achu ancipale yaawo akhwile, ananwerya ovinya mookhwani nave wi nyuwaano hiiha ntoko oosiveliwa anyu akhwile munanwerya opuha ekumi yoohimala. Mwawiihiiha, masu awaaceererya anaphwanyeya mu Yohani ekapitulu 6 annakhala oovila wiiwexexa wa akina. Hankooni nthokororye moopwacha.
3. Mwawiiwanana ni Yohani 6:51, tiheeni Yesu olonceiye vooloca sa yene?
3 Yesu amanle olyiha mootikhiniha muloko yoole wa achu, awo yaahuupuwelela mukhalelo Yehova aalyinheiye Aisarayeli mutakhwani khalai. Mwawiihiiha, soorepa sinniichana mana ntoko “yoolya ya wirimu.” (Salmu 105:40; Yoh. 6:31) Yesu aahipharihela mana ntoko mathipelo wi ahusihe echu yoochuneyaxa. Naamwi mana yaari yoovaha yootikhiniha ya Muluku, achu oothene yaawo yaalyile aakhwa. (Yoh. 6:49) Moohiyana, Yesu aahiiromola ntoko “epaau yeeparipari enarweela wirimu,” “epaau ya Muluku,” ni “epaau ya ekumi.” (Yoh. 6:32, 33, 35) Yesu aahiloca ohiyana otokweene orivovo wa mana yaale oopacerya ni wa yene mwaneene. Owo ooloca: “Miyaano ka epaau ekumi, yeeyo ekhurunwe wirimu. Wakhala wi muchu oolya epaau yeela, onamukhala okhala wookhala.” (Mwaalakhanye Yohani 6:51.) Ayuta yaale yaahihaleeliheya. Awo hiyaawerya wiiwexexa mukhalelo Yesu aatharinheiye wi owo aari “epaau” yeeyo yaamonre wirimu, nave wi epaau eyo yaari yaphaama opwaha mana yaawo Muluku aavanheiye makholo aya. Yesu aahaaleela wi: “Epaau kinahaalaaka ovaha ti mwiili aka.” Tiheeni aachuneiye oloca? Ti woochuneya wiiwexexa yeeyo owo aachuneiye oloca, nthowa nawi naakhulo ninnooniherya mukhalelo ekumi yoohimala eryaaya yooweryeya wa hiyaano ni wa oosiveliwa ahu akhwile. Hankooni noone yeeyo Yesu aachuneiye oloca.
EPAAU EKUMI NI MWIILI AWE
4. Ntakhara heeni akina yaakhala oonyeenyeya ni yeeyo Yesu aalonceiye?
4 Akina a yaawo yaanwiriyanne Yesu, yaahinyeenyeya vaavaa owo aalonceiye vooloca sa ovaha ‘mwiili awe wanthowa na ikumi sa achu.’ Akhweya awo yuupuwela wi owo chiryene aachuna wi awo ekhuure mwiili awe ene woomuchu. (Yoh. 6:52) Nyenya, moone echu yeeyo Yesu aalonceiye yaawaatikhininhe vancipale, owo aaloca: “Mwaahikhuura mwiili wa Mwaana a muchu ni owurya nikhami nawe, nyuwo himwaano okumi mwa nyuwo meekhiinyu.”—Yoh. 6:53.
5. Ntakhara heeni nnanwerya ororomela wi Yesu haachuna oloca wi achu yaaphwanela owurya nikhami nawe?
5 Mmahiku a Nowa, Muluku aahaahiiha achu olyaaka nikhami. (Map. 9:3, 4) Yehova aahuuluulela ohiiha yoola mu nlamulo nawe wa Aisarayeli. Muchu yoowo aahaala olya nikhami na mwaaxinama vyakala ‘aaphwanela wiiphiwa.’ (Onam. 7:27,TNM moone enoota.) Yesu aahiceenyerya Nlamulo nenla. (Mat. 5:17-19) Mwawiihiiha, ti yoohiwehereryeya wi Yesu aceenyerya nikhuuru na Ayuta okhura mwiili awe ni owurya nikhami nawe mmukhalelo wa wooneya. Ni masu yaala ootikhiniha, Yesu aachuna waahusiha achu yaale mukhalelo wa ophwanya okumi, “ekumi yoohimala.”—Yoh 6:54.
6. Mmukhalelo taani nnahaalaahu wiiwexexa masu a Yesu vooloca sa olya mwiili ni owurya nikhami nawe?
6 Toovi waari moonelo wa Yesu? Mweeparipari, Yesu aaloca mooxiphela ntoko aalonceiye ni muthiyana mmoha o Samariya ariki: “Yoole oni awurye maahi kineeraaka kimvahe, nthanana hinrwa nimuuma, nto maahi yaawo kineeraka kimvahe anamuthatuwa mwa yoowo okhala naacuucu a maahi anakhuma wi evahe ekumi yoohimala.” (Yoh 4:7, 14) b Yesu haaloca wi muthiyana o Samariya ahaala ophwanya ekumi yoohimala pahiru wakhala wi oowurya maahi mmukhalelo wawooneya. Mmukhalelo mmohamoha, owo haaloca wa nikhuuru nenle na o Kafarnawu wi yaahaala ophwanya okumi wakhala wi aakhuura mwiili awe ni owurya nikhami nawe mmukhalelo wa wooneya.
SAWEEREYA PIILI SOOHIYANA
7. Tiheeni akina analocaaya vooloca sa masu a Yesu anaphwanyeya mu Yohani 6:53?
7 Achu akina a malapelo annaloca wi masu a Yesu anaphwanyeya mu Yohani 6:53 vooloca sa okhuura mwiili awe ni owuurya nikhami nawe, ennavaha yootakiherya ya yawuupuxerya ya okhwa wa Apwiya nthowa nawi mu yaweereya yeela aahipharihela masu oolikana vakhaani. (Mat. 26:26-28) Awo annaloca wi oothene yaale anaphwanyeya va Mukonelo wa Apwiya anaphwanela olya epaau ni owurya evinyu yeeyo enavirihiwa wa achu oothene. Apwanne ela eparipari? Ti woochuneya otholathola ni wiiwexexa naakhulo nenla, woona wi iyaakha soothene amilyawu a achu orukuryerya elapo annathukumana ni hiyaano mu yaweereya yeela. Nnahaala woona ohiyana orivovo variyari va yeeyo enalociwa mu Yohani 6:53 ni yeeyo Yesu aalonceiye va Mukonelo wa Apwiya.
8. Ohiyana taani orivovo variyari va saweereya seiha piili? (Moone tho iruku.)
8 Nnahaala woona saweereya piili soohiyana. Yoopacerya, ti liini nave ti woowi Yesu aalonceiyewo masu anaphanyeya mu Yohani 6:53-56? Owo aalonce masu yaala o Kalileya mu eyaakha ya 32 E.K. Eyo yeeren’ye variyari va eyaakha emoha ahaakumve otikitherya Mukonelo wa Apwiya o Yerusalemu. Yanaawiili, masu awe yaala yaaya wawani? Owo aaloca masu yaala wa achu yaawo yaatikithereya mu yoolya ya Yesu ohiya ohuserya vooloca sa Yehova naari Omwene wa Muluku. (Yoh. 6:26) Mweeparipari, vaavaa Yesu aaloceiye echu yeeyo awo yoonaaya wi ti yoovila wiiwexexa, awo yaanayeleela nroromelo mwa yoowo. Ophiyerya tho oohuserya awe akina yaahihiya omuchara. (Yoh. 6:14, 36, 42, 60, 64, 66) Mulikanyihe yaweereya yeela ni yeeyo yeeren’ye variyari va eyaakha emoha ohoolo waya mu eyaakha ya 33 E.K., vaavaa Yesu aapacerinheiye Mukonelo wa Apwiya. Mu elukuluku yeele, arummwa awe 11 oororomeleya yaari ni yoowo, naamwi yahiiwexexaka moomalela soothene seiho aahusiheiye. Naamwi hiiha, moohiyana ni achu ancipale yaawo yaari o Kalileya arummwa awe oororomeleya yaari oolekecheya wi Yesu aari Mwaana a Muluku yoowo aaruule wiirimu. (Mat. 16:16) Owo aahaathamalela: “Nyenya ti nyuwo mwaari ni miyo mu ohooxiwa waka.” (Luka 22:28) Ohiyana yoola, onnooniherya wi mu Yohani 6:53, Yesu heererya othariha yeeyo yaahaala weereyaka va Mukonelo wa Apwiya. Nnasuwela hai yeela?
Yohani ekapitulu 6 onnathariha yeeyo Yesu aalonceiye mu nikhuuru na Ayuta o Kalileya (omoono woothiyana). Eyaakha emoha ohoolo waya, owo aahiloca wa nikhuuru nikhaani na arummwa awe oororomeleya o Yerusalemu (omoono woolopwana) (Moone eparakrafu 8)
MASU A YESU ANATAPHULELA EHEENI WA NYUWAANO?
9. Masu Yesu aalonceiye vooloca sa Mukonelo wa Apwiya anaphariheleya wa nikhuuru taani?
9 Variyari va Mukonelo wa Apwiya, Yesu aahaavaha epaau ehirino yooruruvaliha arummwa awe nave aahaaleela wi eneemelela mwiili awe. Voocharela, aahaavaha eviinyu nave aloca wi eneemelela “nikhami na waataana.” (Mar. 14:22-25; Luka 22:20; 1 Ako. 11:24) Yeeyo owo olonceiye vooloca sa waataana echu yoochuneyaxa. Waataana wa hiihaano oneereya mu “empa ya Isarayeli [oomunepani]” yeeyo enahaala okhala “mu Omwene wa Muluku,” ohiya wa achu oothene. (Ahe. 8:6, 10; 9:15) Arummwa hiyaawiiwexenxe yeela mu elukuluku yeele, nyenya yaahaala othanliwa ni munepa waweela ni okerihiwa mu waataana ovyaani wi yakhaleno nipuro ni Yesu wirimu.—Yoh. 14:2, 3.
10. Ohiyana taani orivovo wa yeeyo Yesu aalonceiye variyari va Mukonelo wa Apwiya ni yeeyo aalonceiye nnikhuuru na achu o Kalileya? (Moone tho eruku.)
10 Moone wi variyari va Mukonelo wa Apwiya, Yesu aatikitheryen’ye mu “muhuwo mukhaani.” Nikhuuru nenla nikhaani naapacenrye ni arummwa awe oororomeleya yaawo aareeiyeno vamoha mu esaala. (Luka 12:32) Yaaweheryeya wi awo ni akina yaawo yaahaala okhala mu nikhuuru nenle elye ineneeryo piili seihe—epaau ni eviinyu. Ti yaawo anahaala waakhela nipuro wirimu ni Yesu. Yeeyo owo aalonceiye ni arummwa awe mu elukuluku yeela, ti yoohiyana ni yeeyo owo aalonceiye nnikhuuru na achu o Kalileya, weiwo aalonceiyewo ichu sincipale. Masu yaala annaphariheleya wa achu ancipale.
Yaale analya epaau ni owurya eviinyu nikhuuru nikhaani, nyenya “oothene” ananwerya okhalano nroromelo mwa Yesu ni okhalano ekumi yoohimala (Moone eparakrafu 10)
11. Tiheeni Yesu aalonceiye o Kalileya yeeyo enooniherya wi owo haaloca sa nikhuuru nawaalakhanyeya?
11 Vaavaa Yesu aareiye o Kalileya mu eyaakha ya 32 E.K., achu ancipale yaawo Yesu aalonceiyeno pahiru yaachuna yoolya awe. Nyenya Yesu aaheererya waakhaviherya wiiwexexa wi yookhalavo echu yoochuneyaxa opwaha yoolya. Owo aahiwooniherya yoovaha yeeyo yaahaala oweeriha okhalano okumi woohimala. Nave Yesu aahaaleela wi yaale akhwile yaanwerya ovinya mookhwani mu nihiku nookuchula nave voocharela ekhalano ekumi okhala wookhala. Owo haaloca sa oothanliwa yaawo eri awaalakhanyeya hiiha ntoko eenreiye voocharela variyari va Mukonelo wa Apwiya. Moohiyana ni yeeyo, o Kalileya owo aatikitheryen’ye mu mareeliho yaawo yaahaala okhala wa achu oothene. Mweeparipari, owo aaloca: “Wakhala wi muchu oolya epaau yeela, onamukhala okhala wookhala . . . Epaau kinahaalaaka ovaha ti mwiili aka wanthowa na ikumi sa achu.”—Yoh. 6:51. c
12. Tiheeni eri yoochuneya wi nikhaleno ekumi yoohimala yeeyo Yesu aalonceiye?
12 Yesu haalonce wa Ayuta o Kalileya wi mareeliho yaala yaahaala orwa wa achu oothene yaale yaakhanle naari yaahaala oyaariwa. Pahiru yaale ‘analya epaau,’ ni yaale arino nroromelo mwa Yesu, anahaala oreelihiwa. Ancipale yaawo aniiseera wi Akristu anapharihela nsina nawe, anuupuwela wi anahaala ovuluxiwa wakhala wi “annamuroromela [Yesu]” ni omoona ntoko mvuluxa aya. (Yoh. 6:29, Versão Rei Jaime) Mwawiihiiha, akina a munikhuuru na achu yaawo woopaceryani yaamweemerya Yesu yaahimuhiya omuchara. Ntakhara heeni?
13. Tiheeni eri yoochuneya wi muchu akhale oohuserya eeparipari a Yesu?
13 Achu ancipale a munikhuuru nenle yaamuchara Yesu pahiru nthowa nawi owo aahaavaha yoolya. Awo yaatikitheryeya mu openuxiwa mootikhiniha, yoolya ni mahusiheryo yaawo yiiwanana ni soochuna saya. Mwawiihiiha, Yesu aahooniherya wi waahaala ochuneya sincipale wa oohuserya awe eeparipari. Owo haarwiile veelaponi yavathi pahiru wi ahakalalihe soochuna soomwiilini sa achu. Awo yaaphwanela weemererya nwopelo awe wi ‘eye wa yoowo’ yeemereryaka soothene owo aahusiheiye.—Yoh. 5:40; 6:44.
14. Tiheeni nnaphwanelaahu weera wi niphure orweela wa mwiili nnikhami na Yesu?
14 Yesu aahiceenyerya nikhuuru nenle ochuneya waya okhalano nroromelo. Mwawiihai? Mu owerya wa woopola wa mwiili nnikhami nawe, moovira wa elukuluku, aahaala oveleela mukucho. Nroromelo nenlo naari noochuneya wa Ayuta, nave nlelo ti noochuneya mmahiku ahu. (Yoh. 6:40) Aai, wi niwerye ophura mwiili nnikhami na Yesu ntoko etharihiwaaya mu Yohani 6:53, nnaphwanela okhalano nroromelo mu woopola. Mareeliho yaala tooweryeya wa achu ancipale oohaalakhanyeya.—Aef. 1:7.
15-16. Ichu taani soochuneya nihusenryaahu mu Yohani ekapitulu 6?
15 Yoorepa ya Mpiipiliyani mu Yohani ekapitulu 6 yookhalano esisapo etokweene wa hiyaano ni wa oosiveliwa ahu ekhwile. Ela ennanihusiha wi Yesu onnatepa waapwacha achu. Vaavaa aaryeiye o Kalileya, owo aanaapenuxa awiiceliwa, aanaahusiha achu vooloca sa Omwene nave tho aanaavaha yoolya vaavaa awo yaachunaaya. (Luka 9:11; Yoh. 6:2, 11, 12) Echu yoochuneyaxa owo aahusinheiye yaari wi owo ti “epaau ya ekumi.”—Yoh. 6:35, 48.
16 Yaale aalonceiye ntoko “ipucepuche ikina” hanalya nave hanaphwanela olya epaau ni owurya eviinyu va Mukonelo wa Apwiya wa vayaakhani. (Yoh. 10:16) Nyenya, awo ennaphura orweela wa mwiili nnikhami na Yesu Kristu. Awo anneerano yeela moorweela wa wooniherya nroromelo mmukucho wa woopola wa Yesu, ni wa ichu sootikhiniha seiho sinahaala okhala sooweryeya nthowa na yoowo. (Yoh. 6:53) Moohiyana, yaawo analya epaau ni owurya eviinyu annooniherya wi annapaka makupa a waataana wahiihaano nave aakhalano ewehereryo ya Olamulela wirimu. Mwawiihiiha, moohipwacha waakhanle wi na oothanliwa naari a ipucepche ikina, masu ari mu Yohani ekapitulu 6 ti amphurelo wa hiyaano. Ela ennanihusiha wi oothene ahu nnaphwanela okhalano nroromelo noolipa mu woopola wi nikhaleno ekumi okhala wookhala.
NCIPO 150 Mmwaasye Muluku wi Mvuluxiwe
a Yohani 6:5-35 oothokororyiwa mmwaha ovirale.
b Maahi yaawo Yesu olonceiye eneemelela soovaha sa Yehova ntakhara okumi woohimala.
c Yohani ekapitulu 6 onnapharihela masu yaawo anataphuleliwa ntoko “yoole” ni “oothene” vooloca sa yaale anahaala okhalano ekumi okhala wookhala.—Yoh. 6:35, 40, 47, 54, 56-58.
