Apwanne mohaalakhanya moopwacha irevista sa Mulipeleli sa eyaakha yeela? Vano moone waakhanle wi munahaala owerya waakhula makoho anacharela:

Yootakiherya taani Yehova ovanheiye vooloca sa mukhalelo athiyana anaphwanelaaya okhalihiwaka?

Owo hanaakhaliha athiyana mwa nthalu, nave hanaavaha esisapoxa alopwana waapwaha athiyana. Owo onnaawiriyana nave onnasiveliwa osuwela mukhalelo aniisoonaaya ni sawuukhula saya.—Mulipeleli, 01/2024, ipaax. 15-16.

Nni nimpharihele hai Aefesu 5:7, yoowo oni: “Muhuukeno ichu seiya ni yaawo”?

Murummwa Paulo onnanceenyerya wi hannaphwanela waataana ni achu yaawo anahaala oneeriha ohimwiiwelela Yehova. Ela ennavolowela omaliha elukuluku ni akina moonanaka, nyenya tho ochekulela wa mu interneti.—Mulipeleli, 03/2024, ipaax. 22-23.

Nnaphwanela wiikhapelela mu miyaha taani sawootha?

Hannaphwanela ovareryela michaka sa annihu naari asinthamwene ahu seiho sihirino mathipelo, ni michaka sinarumihiwa ni achu nihaasuwenlaahu ni alipa oomwareya yaawo aniiseera wi aakhalano nchuno na osuwela eparipari.—Mulipeleli, 04/2024, epaax. 12.

Tiheeni nisuwenlaahu ni tiheeni nihisuwenlaahu Vooloca sa mukhalelo Yehova onahaaleiye omuthoriha Mwene Solomoni ni achu yaale ekhwile o Sotoma ni Komora ni yaale ekhwile ni Maahi Mancipale?

Hannasuwela waakhanle wi Yehova ohaathorihela ohivinya mookhwani. Nyenya noosuwela wi Yehova oosuwela ichu soothene nave tho tooreeraxa murima.—Mulipeleli, 05/2024, ipaax. 3-4.

Olekecheya taani nnaphwanelaahu okhalano wa nthowa na Muluku okhala “Mwala’’? (Malam. 32:4)

Nnanwerya waavya nchawelo wa Yehova. Owo toororomeleya, ilukuluku soothene onnaakhwaniherya soororomeliha sawe. Owo ta okhala wookhala, harwa atoroka mikhalelo sawe ni yoolakelela awe.—Mulipeleli, 06/2024, ipaax. 26-28.

Tiheeni enahaala onikhaviherya wiikhoveleliha ni muloko muvyaani?

Muroromele wi Yehova onamookhaviheryaani hiiha ntoko aakhavihenryeiye alapeli awe khalai. Muhilikanyiheke ni muloko anyu wa khalai. Mwiivoliiheryeke mmuteko mmuloko muvyaani nave mwaapake asinthamwene avyaani.—Mulipeleli, 07/2024, ipaax. 26-28.

Mahusiheryo taani anavuwihiwa mmaphwanaphwaniho mararu anaphwanyeya mu Mateyu 25?

Niphwanaphwaniho na ipucepuche ni ipuri ninnavuha ochuneya waya okhala oororomela ni oororomeleya. Niphwanaphwaniho na asimwali oovyaka ni oolosowa ninnathariha wi nnaphwanela okhala oorehereya ni oolipelela. Niphwanaphwaniho na italento ninnooniherya ochuneya waya olapa mwakuru ni mwanthiti.—Mulipeleli, 09/2024, ipaax. 20-24.

Tuuvi waari orakama waya oya osulu wa nipithela na empa ya Muluku yaatekiwe ni Solomoni?

Mu 2 Matharihelo 3:4, soorepa sikina sakhalai sinaloca sa ikoovatu “120,” naari ameetru 53 a orakama. Nyenya mu soorepa sikina soororomeleya sinaloca ikoovatu “20,” naari ameetru 9 a orekama. Yeeyo enooniherya orekama wa exiri ya empa—Mulipeleli, 10/2024, epaax. 31.

Enataphulela eheeni wa murummwa oorumeela okhala ‘mulopwana a muthiyana mmoha’? (1 Tim. 3:12)

Enataphulela wi owo mutheli a muthiyana mmoha nave hanaphwanela opaka mararuwo. Ohiya yeeyoru, hanaphwanela wooniherya opwacha ni nchuno ntakhara muthiyana mukina—Mulipeleli, 11/2024, epaax. 19.

Ntakhara heeni nnanwerya oloca wi Yohani 6:53 hatikithenrye nlamulo ntakhara Mukonelo wa Apwiya?

Yohani 6:53 onnaloca sa ochuneya waya olya mwiili wa Yesu ni owurya nikhami nawe. Yesu aalonce masu yaala mu 32 E.K., o Kalileya, wa Ayuta yaawo nlelo yahaarinono nroromelo. Nyenya, Mukonelo wa Apwiya waatikitheryiwe ovinrevo eyaakha emoha ohoolo waya. Weiwo Yesu aalonce ni yaale owo aahaaleiye olamulela vamoha wirimu.—Mulipeleli, 12/2024, ipaax. 10-11.