Murummwa Paulo aahimurepela nthamwene awe Timotiyu yoowo aari mutokweene a muloko: “Miyo kinnoolamulela vamiithoni va Muluku, va Kristu Yesu ni va ankeelo oothanliwa, wi okhapelele ichu seiha kiloncaaka ohithanlenle, nave oheereno mwa nthalu.”—1 Tim. 5:21.

Woopaceryani, nnahaala woona sa taani ahiri ankeelo yaawo aromoliwe. Awo, tahi a 144.000. Vaavaa Paulo aamurepenleiye Timotiyu sa ovinya mookhwani wa Akristu oothanliwa ntakhara okumi wiirimu, nlelo wiiso ohipacenrye. Arummwa vamoha ni oothanliwa akina hiyaawaakumve okhala soopatuxiwa soomunepani, mwawiihiiha awo hiyaari “ankeelo oothanliwa”.—1 Ako. 15:50-54; 1 Ate. 4:13-17; 1 Yoh. 3:2.

Ohiya yeeyoru, “ankeelo oothanliwa” tahi ankeelo yaawo yaari oomwareya mu elukuluku ya Maahi Mancipale. Ankeelo yaala yaari mmakupa a Satana, ekhala masololo nave ekhala amwiicani a Yesu. (Map. 6:2; Luka 8:30, 31; 2 Pet. 2:4) Omwaahiyu, awo anahaala owaleliwa mu nlici nawiixa mu iyaakha masana khumi nave voocharela, anahaala otoloxiwa vamoha ni Satana.—Yuta 6; Wup. 20:1-3, 10.

Mwawiihiiha, “ankeelo oothanliwa” yaawo Paulo aaromonleiye, tiyaawo analapa vamoha ni “[Yehova] ni Yesu kristu” wiirimu, nave tho tiyaawo analociwa mu eversikulu yeela.

Aakhalawo ankeelo oororomeleya macikhwi macikhweene. (Ahe. 12:22, 23) Ti yawooneya wi Yehova hanaavaha ankeelo oothene murici mmohamoha. (Wup. 14:17, 18) Ntoko yootakiherya, mu ekwaha emoha Yehova aahimuthanla munkeelo mmoha wi aatoloxe anakhoco a Asiriya awaakhwana 185.000. (2 Mam. 19:35) Ankeelo ancipale annathanliwa wi ‘epholemo mu Omwene wa [Yesu] ichu soothene inakwaculiha vamoha ni oothene aweera sootakhala.’ (Mat. 13:39-41) Akhweya akina aakhalano murici wa “waathukumanya oothanliwa ntakhara okumi” wiirimu. (Mat. 24:31) Nave akina annathanliwa wi ‘enikhapeleleke mu iphiro sahu soothene.’—Sal. 91:11; Mat. 18:10; mulikanyihe ni Mateyu 4:11; Luka 22:43.

“Ankeelo oothanliwa” analociwa mu 1 Timotiyu 5:21 akhweya yaari ankeelo yaawo yaavahiwe murici wa okhaviherya ni okhapelela miloko. Mu eversiikulu yeela, Paulo aahaavaha atokweene ikano vooloca sa mukhalelo yaaphwanelaaya okhapelelaka muloko nave muloko waaphwanela waakhalihaka awo mwa ncicimiho. Voocharela, atokweene anaphwanela okhapelelaka mirici saya ehooniheryaka “nthalu” nave hanaphwanela opaka soolakelela ehuupuwelenle. Echu yoochuneyaxa enaweeriha atokweene ochariha ekano yooveereliwa ya Paulo tiyawi awo aneerano “variyari va Muluku, Yesu kristu ni ankeelo.” Mwawiihiiha, tiyawooneya wi ankeelo akina annavahiwa murici wa okhapelelaka miloko, awo annaakhapelela achu a Muluku, annavareryela muteko woolaleerya nave annamuleela Yehova vooloca sa yeeyo yoonnaaya.—Mat. 18:10; Wup. 14:6.