Mwawooneya hooye. Musaserya haalonce wi wakhala wi Eva olya yawiima ya mwiri waakhwatiihiwe, aahaala okhalaka ntoko wi ookhwa, aniiha ahikhwile. Owo haalonce wi makupa makina oohooneya a Eva (yeeyo olelo akina aniichanaaya munepa ohinakhwa) yaahaala otitelela okhala mu nipuro nikina. Alocaka orweela wa enowa, Satana aahiloca ni Eva: “Nari! Nyuwo hamukhwaru.” Ni masu yaala, owo aachuna oloca wi, wakhala wi Eva oolya yawiima ya mwiri yoole, aahaala otitelela okhala nave aamukhalano okumi waphaamasa— ahihooleliwaka ni Muluku.—Map. 2:17; 3:3-5.

Nyenya waakhanle wi nihusiheryo na munepa ohinakhwa, ntoko nnahusihiwaaya olelo, hinipacenrye mu Eteni, vano nipacenrye liini? Hannasuwela mookwakwaleya. Echu nnasuwelaahu tiyawi malapelo oothene atheru yaahitoloxiwa ni Maahi Mancipale mmahiku a Nowa. Miruku soothene sa malapelo atheru hisaakophonle mu Maahi Mancipale. Pahiru alapeli eeparipari a Muluku yaahikophola: Nowa ni echoko awe.

Mwawiihiiha, nihusiheryo na munepa ohinakhwa akhweya nipacenrye evinre Maahi Mancipale. Vaavaa Muluku aatoronkeiye malocelo o Papeli nave achu emwaramwaseya “veelaponi yoothene ya vathi”, akhweya awo yaahipwaha ni muupuwelo wawi achu aakhalano munepa ohinakhwa. (Map. 11:8, 9) Nyenya moohipwacha ti liini nipacenryaaya nihusiheryo nenla natheru, hinaano minikwa wi “tiithi a wootha”, Satana, Musaserya, tonahoolela nave onnahakalala vaavaa onooneiye yawootha yeela emwaramwaseyaka mu elapo yoothene.—Yoh. 8:44.