1-2. Ntoko yooniheryiwaaya orweela wa yaweereya ya Anxelitu, tiheeni muchu ti muchu a hiyo onaphwaneleiye weera?

APWANNE mphwiiwe ni asitiithi yaawo ari Anamoona a Yehova? Waakhanle wi ti hiiha, muupuwele wi hamuramve onthamwene ni Yehova orweela wa yaawo. Moohipwacha waakhanle wi asitiithi ahu annamurumeela Muluku naari hooye, muchu ti muchu onaphwanela oteka onthamwene awe ni Yehova.

² Muthokororye yaweereya ya munna oniichaniwa Anxelitu. Owo ophwiiwe va echoko ya Anamoona a Yehova. Nyenya, vaavaa aareiye mmiravo, owo haarino onthamwene woolipa ni Muluku. Owo onneemererya: “Kaamurumeela Yehova pahiru nthowa nawi kaachuna opaka yeeyo emusi aka yaapakaaya.” Mwawiihiiha, Anxelitu aahilakelela omaliha elukuluku yincipale aalakhanyaka Masu a Muluku ni wuupuwelela yeeyo aalakhanyeiye, nave aahipacerya ovekela wa Yehova moohihiyererya. Tiheeni aahusenryeiye? Anxelitu ooloca: “Kaahihuserya wi mukhalelo mmoharu wa omwaacamela Tiithi aka oosivela, Yehova, ori omusuwela owo mukhataaka.” Yaweereya ya Anxelitu ennakumiherya makoho ookhweleya: Ohiyana taani orivovo variyari va osuwela ichu vakhaani vooloca sa Yehova ni omusuwela owo phaama? Nave tiheeni nnaphwanelaahu weera wi nimusuwele phaama Yehova?

3. Ohiyana taani orivovo variyari va osuwela ichu vakhaani vooloca sa Yehova ni omusuwela owo phaama?

³ Nnamuupuwela wi noomusuwela Yehova wakhala wi noosuwela nsina nawe naari ichu ikina olonceiye ni opankeiye. Nyenya omusuwela phaama Yehova onnavolowela sincipale. Nnaphwanela omaliha elukuluku yincipale nihuseryaka vooloca sa Yehova ni mikhalelo sawe sootikhiniha. Pahiru voocharela nnanwerya opacerya wiiwexexa yeeyo emweerinhe  oloca ni opaka ichu. Eyo enahaala onikhaviherya osuwela waakhanle wi Yehova onnasiveliwa ni yeeyo nnuupuwelaahu ni nnapakaahu. Nimanle osuwela yeeyo Yehova onachuneiye wi nipake, nnaphwanela opaka ichu mwawiiwanana ni yeeyo nihusenryaahu.

4. Othokororya sootakiherya sa Mpiipiliyani inahaala onikhaviherya hai?

⁴ Achu akina anamuninyemula ntakhara nchuno nahu na omurumeela Yehova, nave anamuniica vancipale vaavaa nnapaceryaahu oya mmithukumano. Nyenya wakhala wi ninnamuroromela Yehova, owo harwa anihiya. Nnahaala opacerya oteka onthamwene ni Muluku yoowo oni ohimaleru. Apwanne nnanwerya chiryene omusuwela phaama Yehova? Aai, chiryene! Sootakiherya sa alopwana oohiphaameya, hiiha ntoko Mose ni Mwene Tavite, sinnooniherya wi ti wooweryeya. Elukuluku nnathokororyaahu yeeyo yaapankaaya, nnahaala waakhula makoho meeli: Yaawenrye hai omusuwela Yehova? Nave tiheeni nneeraahu nihuserye orweela wa sootakiherya saya?

5. Tiheeni Mose aathanlileiye opaka?

⁵ Mose aahithanla omurumeela Muluku. Elukuluku aareiyeno iyaakha makhumi masese, Mose aahithanla okhala vamoha ni achu a Muluku, Ahepri, opwaha osuweliwa ntoko “mwaana a mwaana mwaamuthiyana a mwene.” (Ahe. 11:24) Mose aahikhooca murici woovuwa. Elukuluku Mose aakhavihenryeiye Aisarayeli, owo aahisuwela wi Farawo aahaala onyeenyeya vancipale. Farawo aari mwene ooweryaxa, nave Ayikuputu yuupuwela wi aari muluku. Ela yaahooniherya wi Mose aahikhalano nroromelo noolipa. Mose aahimuroromela Yehova. Nroromelo nenla naari nthowa nookhweleya neerinhe wi Mose akhaleno onthamwene ni Yehova yoowo waakhanle okumi awe woothene.—Masi. 3:5.

6. Tiheeni nnahuseryaahu orweela wa yootakiherya ya Mose?

⁶ Tinivi nri nihusiheryo wa hiyo? Hiiha ntoko Mose, oothene ahu nookhalano yoolakelela ya opaka: Apwanne nnahaala othanla omurumeela Muluku ni okhala vamoha ni achu awe? Nnaphwanela wiilipiserya wi nimurumeele Muluku, nave nnahaala wiiciwa ni yaale ahimusuwenle Yehova. Nyenya wakhala wi ninnamuroromela Tiithi ahu awirimu, nnahaala ororomela wi onahaala onikhaviherya.

7-8. Tiheeni Mose aatitelenleiye ohuserya?

⁷ Mose aahititelela ohuserya vooloca sa makhalelo a Yehova ni opaka yookhwela awe. Ntoko yootakiherya, elukuluku Mose aavekiweiye wi aahoolele nloko na Aisarayeli okhuma o Yikuputu, owo aahiyeleela nroromelo nave mwawuuluulela aahiloca ni Yehova wi haahaala owerya. Naakhulo na Muluku naahooniherya wi aahikhalano niphwanya, eyo tiwi, aahiiwexexa moonelo wa Mose nave aahimukhaviherya. (Muk. 4:10-16) Ntoko yookhumelela, Mose aahiwerya omuleela Farawo muchaka woothoriha wakuru. Voocharela Mose aahimoona Yehova apharihelaka owerya Wawe vaavaa aavulunseiye Aisarayeli nyenya amutolosa Farawo vamoha ni akhoco awe mu Eniya Yooxeerya.—Muk. 14:26-31; Sal. 136:15.

⁸ Mose amanle waahoolela Aisarayeli okhuma o Yikuputu, awo yaaniikhupanyerya mwawuuluulela. Naamwiihiiha, Mose aahoona ophiyerya mweeryo taani Yehova aareiye oovilela ni achu yaawo aawooponleiye wookapuroni. (Sal. 78:40-43) Mose aahoona wiiyeviha woopwaha wa Yehova vaavaa Owo ahaatolonseiye Aisarayeli, Mose amanle omveka wi aheereno.—Muk. 32:9-14.

9. Mwawiiwanana ni Ahebri 11:27, onthamwene wa Mose ni Yehova waari wa mukhalelo taani?

 ⁹ Emanle woopoliwa, onthamwene wa Mose ni Yehova waari woolipa ntoko wi aanamoona Tiithi awe awirimu. (Mwaalakhanye Ahebri 11:27.) Yooniheryaka ophiyerya mweeryo taani onthamwene yaaryaayano, Piipiliya oni: “Apwiya yaaloca ni Moose ethoyi ni ethoyi, ntoko muchu onaloceiye ni nthamwene awe.”—Muk. 33:11.

10. Wi nimusuwele phaama Yehova, tiheeni nnaphwanelaahu weera?

¹⁰ Tinivi nri nihusiheryo wa hiyo? Wi nimusuwele phaama Yehova, tahi nnaphwanela pahiru ohuserya mikhalelo sawe, nyenyatho nnaphwanela opaka yookhwelaawe. Olelo yookhwela ya Yehova tiyawi “evulushiwe achu oothene, ephiyerye osuwela yeeparipari.” (1 Tim. 2:3, 4) Mukhalelo mmoha nnapakaahu yookhwela ya Muluku ori moorweela wa waahusiha akina vooloca sa Yehova.

11. Elukuluku nnaahusihaahu akina vooloca sa Yehova, nnamusuwela hai phaama Yehova?

¹¹ Vaavaa nnaahusihaahu akina vooloca sa Yehova hiyaano ninnawerya omusuwela phaama. Ntoko yootakiherya, ninnoona sawooniherya sookwakwaleya sa oreera murima wa Yehova ntakhara achu vaavaa onanihooleleiye wa yaawo arino murima waphaama. (Yoh. 6:44; Saw. 13:48) Ninnoona owerya wa Masu a Muluku vaavaa nnawoonaahu oohuserya ahu a Piipiliya ehiyaka sookhovelela soonanara nave epaceryaka onwara muchu ahiihaano. (Kol. 3:9, 10) Ninnoona sawooniherya sa ovilela wa Muluku vaavaa onaavaheiye ikari sawaaca achu ancipale mu ekulucu ahu wi ehuserye vooloca sa yoowo nave evulusiwe.—Aro. 10:13-15.

12. Ntoko yooniheryiwaaya mu Mukwaha 33:13, tiheeni Mose aavenkeiye, nave ntakhara heeni?

¹² Mose aanavaha esisapo onthamwene awe ni Yehova. Naamwi aapanke miteko sootikhiniha mu nsina na Muluku, Mose moocicimiha aahiveka wi eemereryiwe omusuwela phaama Yehova. (Mwaalakhanye Mukwaha 33:13.) Mose aarino iyaakha makhumi mathanu namararu elukuluku aapankeiye yooveka yeela, nyenya owo aahisuwela wi nlelo aahikhalano sincipale wi ahuserye vooloca sa Tiithi awe oosivela awirimu.

13. Tuuvi ori mukhalelo mmoha nneeraahu nooniherye wi ninnavaha esisapo onthamwene ahu ni Muluku?

¹³ Tinivi nri nihusiheryo wa hiyo? Moohipwacha waaca wa elukuluku nnamurumeelaahu Yehova, hinnaphwanela wuupuwela wi onthamwene ahu ni yoowo wookhwaanela. Mukhalelo mmoha wookhweleya nneeraahu nooniherye wi ninnavaha esisapo onthamwene ahu ni Muluku ori oloca ni yoowo mu nivekelo.

14. Ntakhara heeni nivekelo nryaaya yoohulela ya ohuserya sincipale vooloca sa Muluku?

¹⁴ Wakhala wi munnachuna okhala nthamwene awaacameleya ni muchu, munaphwanela olocaka ni yoowo moohihiyererya. Mwawiihiiha mmwaacamele Muluku moorweela wa ovekela moohihiyererya, muhoove omuleela muupuwelo ni moonelo anyu. (Éfe. 6:18) Krista, yoowo onakhala o Turkiya, ooloca: “Osivela ni nroromelo naka mwa Yehova saanannuwa elukuluku yoothene kaamuleelaaka muupuwelo aka mu nivekelo, nave voocharela kaanoona wi aanakikhaviherya. Woona mukhalelo Yehova onaakhuleiye mavekelo aka, ennakikhaviherya omoona Yehova ntoko Tiithi ni Nthamwene.”

15. Mmukhalelo taani Yehova aamulonceiye Mwene Tavite?

¹⁵ Mwene Tavite aayariwe mu nloko nenlo niiveleenle wa Yehova Muluku. Nyenya  Tavite aahipaka sincipale opwaha ochariha sookhovelela sa malapelo a amusi awe. Owo aahiteka onthamwene awe ni Muluku, nave Yehova aanamusivela vancipale. Yehova aahimuloca Tavite ntoko “muchu a vamurimani [Vawe].” (Saw. 13:22) Tavite aawenrye hai omwaacamela Yehova?

16. Tiheeni Tavite aahusenryeiye vooloca sa Yehova orweela wa soopatusiwa?

¹⁶ Tavite aahihuserya vooloca sa Yehova orweela wa soopatusiwa. Vaavaa aareiye mmiravo, owo anamaliha elukuluku yawaaca akukhulaka muhuwo wa atiithi awe. Akhweya, mu elukuluku yeeyo, owo aahipacerya wuupuwelela ichu Yehova opatunseiye. Ntoko yootakiherya, vaavaa aaweheiye wirimu ohiyu, Tavite hoona pahiru waaca wa itheneeri nyenya aanaweryatho waanyiherya mikhalelo sa Yoowo ampatunse. Tavite aahiceenyeryeya orepa: “Erimu enalaleerya ncicimiho na Muluku, enalokoha muteko wa matata awe.” (Sal. 19:1, 2) Nave elukuluku Tavite uupuweleiye mukhalelo wootikiniha achu apakiwaaya, owo aanawerya woona osuwela wa Yehova mu ichu soothene seiha. (Sal. 139:14) Vaavaa Tavite uupuweleleiye ichu soothene Yehova opatunseiye, owo aaniisoona okhala mukhaani iilikanyihaka ni Muluku a ikuru Soothene.—Sal. 139:6.

17. Tiheeni nneeraahu nihuserye wakhala wi ninnuupuwelela soopatusiwa?

¹⁷ Tinivi nri nihusiheryo wa hiyo? Mwaavye okhalano nchuno wa soopatusiwa sa Muluku. Muhihakalale pahiru nthowa na okhalavo elapo yaphaama yeeyo epakiwe ni Yehova. Mwiivahe elukuluku wi mvarerye soopatusiwa nave musiveliwe ni seiyo. Nihiku ti nihiku, muupuwele echu munaphwanelaanyu ohuserya vooloca sa Yehova ni soopatusiwa seiyo soorukurenryeeni, ntoko miri, asinama, naari achu. Mwawiihiiha, mahiku oothene a okumi anyu anahaala osareya ni soohuserya vooloca sa Tiithi anyu oosivela. (Aro. 1:20) Nave munahaala woona wi, moovira wa elukuluku, omusivela wanyu Yehova onahaala oolipa.

18. Mwawiiwanana ni Salumu 18, tiheeni Tavite aasuwenleiye?

¹⁸ Tavite aahisuwela wi Yehova aanamukhaviherya. Ntoko yootakiherya, vaavaa aakhapelenleiye muhuwo wa atiithi awe ntakhara ohiphela wa mwaco ni uursu, Tavite aahisuwela wi aawenrye pahiru owiipha asinama yaale a mutakhwani nnikhaviheryo na Yehova. Vaavaa aawenryeiye omvootha nakhoco oovaruwa Koliyati, Tavite aahisuwela mookwakwaleya wi Yehova aanamukhaviherya. (1 Sam. 17:37) Nave vaavaa aakophonleiye wa mwene anrima Sawuli, Tavite aahisuwela wi Yehova taamooponle. (Sal. 18, masu oohulela) Waakhanle wi Tavite muchu awiirumiha, owo aahaala wiivuwihaka mukhateiye ntakhara saweereya seiya. Nyenya aari muchu awiiyeviha nave aanasuwela nikhaviheryo na Yehova mu ekumi awe.—Sal. 138:6.

19. Tiheeni nnahuseryaahu orweela wa yootakiherya ya Tavite?

¹⁹ Tinivi nri nihusiheryo wa hiyo? Honaakhwana pahiru oveka wi Yehova anikhaviherye. Navetho nnaphwanela wiiwexexa ti liini nave ti mwawiihai onanikhaviheryeiye. Nakhala awiiyeviha nave nsuwela okotakota wahu, nnahaala wiiwexexa wi Yehova onnanikhaviherya opaka yeeyo nahaahaalaahu owerya opaka meekhihu. Nave vaavaa eyo eneereyaaya, onthamwene ahu ni Yehova onnakhala woolipa. Isaki, munna yoowo onakhala o Fixi nave onamurumeela Yehova mu iyaakha sincipale, oowerya woona wi ela eparipari. Owo onnathariha: “Kaawehaka muculi, kinnawerya woona mukhalelo Yehova okikhavihenryeiye ovinyerya vaavaa kaapacenryaaka omuhuserya Piipiliya ophiyerya  olelo. Yookhumela ya yeeyo ti yawi owo ookhala eeparipari wa miyaano.”

20. Tiheeni nnahuseryaahu orweela wa onthamwene wa Tavite ni Yehova?

²⁰ Tavite aahitakiherya mikhalelo sa Yehova. Yehova onipanke ni mukhalelo wa otakiherya mikhalelo sawe. (Map. 1:26) Wakhala wi noohuserya sincipale vooloca sa mikhalelo sa Yehova, onahaala okhala wookhweya omutakiherya. Tavite aahimusuwela phaama Tiithi awe awirimu, mwawiihiiha, owo aanawerya omutakiherya Muluku vaavaa aakhaliheiye akina. Moone yootakiherya emoha. Tavite aahimuchekela Yehova vaavaa aapankeiye mararuwo ni Patesepa nave eeriha wi iyawe akhwe. (2 Sam. 11:1-4, 15) Nyenya Yehova aahilakelela ommorela ikharari. Ntakhara heeni? Ntakhara Tavite aanaamorela tho achu ikharari. Woona wi aahikhalano onthamwene woolipa ni Yehova, Tavite aahikhala mwene yoowo aasiveliwa ni Aisarayeli, nave wiiliwiili Yehova aahimpharihela ntoko yootakiherya ya mamwene makina o Isarayeli.—1 Mam. 15:11; 2 Mam. 14:1-3.

21. Mwawiiwanana ni Éfeso 4:24 ni 5:1, tuuvi ori mphurelo wa ‘omutakiherya Muluku.’?

²¹ Tinivi nri nihusiheryo wa hiyo? Nnaphwanela ‘omutakiherya Muluku.’ Elukuluku nnamutakiheryaahu Muluku, ninnaphura nave ninnahuserya sincipale vooloca sa yoowo. Vaavaa nnatakiheryaahu mikhalelo sa Muluku, ninnooniheryatho wi na anaawe.—Mwaalakhanye Éfeso 4:24; 5:1.

22-23. Tiheeni enahaala weereya wakhala wi ninnapharihela yeeyo nihusenryaahu vooloca sa Yehova?

²² Ntoko nonnaahu, Yehova ohiisooneiha wa hiyo moorweela wa soopatusiwa ni Masu awe Piipiliya. Liivuru yoola mmoha oosareya ni sootakiherya sa akapuro oororomeleya a Muluku yaawo nneeraahu naatakiherye, hiiha ntoko Mose ni Tavite. Yehova oopaka makupa awe. Hiyaano nnaphwanela opaka makupa ahu wi nihuserye sincipale vooloca sa yoowo.

²³ Hanirwa nimaala ohuserya vooloca sa Yehova. (Ekle. 3:11) Echu yookhweleya tahi waaca wa ichu nihusenryaahu vooloca sa yoowo, nyenya yeeyo nnapakaahu ni yeeyo nsuwenlaahu. Wakhala wi ninnapharihela yeeyo nihusenryaahu nave neererya omutakiherya Tiithi ahu oosivela, owo onahaala otitelela onaacamela. (Tiy. 4:8) Orweela wa Masu awe, onnaniroromeliha wi harwa aahiya yaale anamwaavya.