APWANNE nyuwaano munoona wi mwa muchu oothamalela? Nla nikoho muchu ti muchu a hiyo onaphwaneleiye othokororya. Piipiliya aahilaiherya wi mmahiku ahu, achu ancipale yaamukhala “oohithamala.” (2 Tim. 3:2) Akhweya nyuwaano mohaasuwela achu yaawo anaweherya wi akina epakeke ichu ntakhara yaawo naari yaavaheke ichu. Eyo enakhala ntoko wi awo hanaphwanela othamalela ichu seiyo anaakhelaaya. Akhweya munneemererya wi himwaahaala osiveliwa okhala ni achu ntoko yaawo.

Moohiyana, alapeli a Yehova annaleeliwa wi: “Muthamaleke.” Nnaphwanela ‘mu soothesene, othamalelaka.’ (Kol. 3:15; 1 Tes. 5:18) Mweeparipari, wooniherya munepa woothamalela ti yaphaama wa hiyo. Aakhalavo mathowa mancipale anooniherya okhweleya waya weerano yeeyo.

Nthowa noochuneya nnaneeriha okhala oothamalela tiyawi eyo enneeriha wi nikhaleno muupuwelo waphaama. Vaavaa muchu onooniheryeiye othamalela, tiyawooneya wi onnakhala phaama nave muchu othamaleliwe onnakhalatho oohakalala. Ntakhara heeni othamalela onnakumiherya miphurelo seiya miili? Muupuwela ela: Vaavaa muchu onachuneiye opaka echu ntakhara nyuwo, hamuneemererya wi eyo enooniherya wi onnoocicimihaani? Owo onnoopwachaani. Woona mukhalelo yoowo weereyaka ennoohakalalihaani. Nnanwerya wuupuwela wi ti yeeyo yeeren’ye ni Rute. Powasi ahooniherya ompwacha. Rute aahitepa ohakalala osuwela wi muchu mukina aanamuthokororya.—Rut. 2:10-13.

Omuthamalela Muluku echu yavameekhaaya ni yoophwanelela. Moohikhwa minikwa, akhweya ilukuluku ikina munnuupuwelela soovaha soomunepani ni soomwiilini seiyo Muluku ovaherenryeiye nave nlelo onatiteleleiye ovahererya. (Malam. 8:17, 18; Saw. 14:17) Wuupuwelela mahala a Mpatuxa anyu enahaala oceenyerya omuthamalela wanyu ni olipiha nroromelo nanyu vooloca sa ophiyerya mweeryo taani onoosiveleiyeeni ni onoopwacheiyeeni.—1 Yoh. 4:9.

Nnaphwanela wuupuwelela seiyo Yehova onanivaheiye nave nimuthamalele ntakhara oreera wawe murima. (Sal. 100:4, 5) Wooniherya othamalela ennaakhaviherya achu okhala oohakalala.

Nthowa nikina nneeriha wi othamalela okhale woochuneya wa nyuwo ti nawi onthamwene anyu onnakhala woolipa. Oothene ninnachuna othamaleliwa. Vaavaa munamuthamalelaanyu muchu ni murima woothene nthowa na meerelo awe a oreera wawe murima, oopiili anyu munnalipiha onthamwene. (Aro. 16:3, 4) Mwawaaceererya, achu oothamalela annakhala ooreheryeya waakhaviherya akina. Awo annoona oreera murima anooniheryiwaaya nave annaceenyeryeya okhala oreera murima wa akina. Chiryene, waakhaviherya akina onnaruuha ohakalala. Ela enalikana ni yeeyo Yesu olonceiye: “Wookhalavo ohakalala wawaaca mu ovaha opwaha mu waakhela.”—Saw. 20:35, TNM.

Roperto Emmons muhooleli a Universitate o Kaliforniya onahuserya mukhalelo wa othamalela, ooloca: “Wi nikhale achu oothamalela nnaphwanela wiiwexexa wi ninnaroromelana. Elukuluku ekina ninnavaha, nave elukuluku ekina ninnaakhela.” Wi ntitelele okhala navetho okhalano ekumi yoohakalala, ninnachuna nikhaviheryo na akina mmikhalelo mincipale. Ntoko yootakiherya, awo ananwerya onivaha yoolya naari nikhaviheryo na murece. (1 Kor. 12:21) Mwawooneya muchu oothamalela onnathamalela yeeyo akina anampakelaaya. Waakhanle hiiha, apwanne moheeriha ela okhala yookhovelela anyu wooniherya othamalela wa yeeyo akina anapakaaya ntakhara nyuwo?

Nthowa nikina nneeriha wunnuwiha othamalela, ti yawi okhala muchu oothamalela enahaala wookhaviheryaani otikitheryeya mu ichu soophwanelela ohiya sooheseya. Mmukhalelo mukina, muupuwelo anyu onalapa ntoko eseefa. Muupuwelo owo onanweerihaani otikitheryeya mu mikhalelo saphaama ohiya mu mikhalelo soohiphwanelela. Vaavaa munathamalelaanyu, munneererya woona ichu soophwanelela ohiya woonaka ichu soonanara pahiru. Elukuluku munatepaanyu oothamalela, munahaala woonaka ichu sincipale saphaama, seiyo sinahaala oweerihaani okhala oothamalela moopwaha. Wakhala wi munnatikitheryeya mu ichu seiyo munaphwanelaanyu othamalela, eyo enamookhaviheryaani opaka yeeyo murummwa Paulo aalonceiye: “Hakalalani mwa Apwiya mahiku oothene.”—Fil. 4:4.

Okhala muchu oothamalela enamookhaviheryaani osepa wuupuwela mmukhalelo woonanara. Onamukhala woovila othamalela eniiha mu elukuluku emohamoha muchu ari anrima, ooximwa, ni oowali. Achu oothamalela annasepa tho okhala awiithukumanyerya. Awo annathamalela yeeyo aryaayano ohiya weererya waaceererya.—Fil. 4:12.

Ntoko Mukristu, moosuwela wi Satana aahaala osiveliwa mwaari ooximwa ni awuukhuwa nthowa na makacamiho munahoolelaanyu mmahiku yaala ookuchula. Owo aahaala osiveliwa waakhanle wi mookhalano muupuwelo woonanara ni ohihakalala ni echu vyakala. Waakhanle wi mwa muchu a mukhalelo yoola, waamukhala woovila wa achu woowiriyanaani vaavaa munalaleeryaanyu michaka saphaama. Othamalela oneeca vamoha ni yawiima ya munepa waweela. Ntoko yootakiherya, ninnakhala oohakalala nthowa nawi ninnoona ichu saphaama seiyo Muluku onivanheiye nave nookhalano nroromelo mwa seiyo oniroromelinheiye muhoolo.—Gal. 5:22, 23.

Woona wi mwa mmoha aachu a Yehova, akhweya munneemererya yeeyo elociwe mmwaha yoola vooloca sa othamalela. Naamwiihiiha, moosuwela wi tahi wookhweya othamalela ilukuluku soothene ni okhalano moonelo woophwanelela. Nto muheemererye wi ela yooceecheiheeni. Munanwerya wunnuwiha ni otitela okhalano moonelo woothamalela. Mwawiihai? Nihiku ti nihiku mmaliheke elukuluku muupuwelaka mikhalelo mikina sa okumi anyu seiho sinahaala oweerihaani othamalela. Vaavaa munapakaanyu yeeyo, munahaala wunnuwiha moonelo anyu wa othamalela. Eyo enahaala oweerihaani okhala oohakalalaxa waapwaha yaale anatikitheryeya mu makacamiho a mweekumini. Muupuwele vooloca sa ichu saphaama Muluku ni akina apankaaya seiyo soolipinheeni, navetho siweerinheeni okhala oohakalala. Akhweya munaphwanela orepelaka ichu seiyo. Murepele ichu piili naari raru seiyo sinaweerihaani othamalela mu nihiku nenle.

Akina yaawo ahusenrye mwaha vooloca sa othamalela ahoona wi “vaavaa muchu onaathamaleleiye akina moohihiyererya, eyo ennatoroka mukhalelo ocoopare ahu onalapaaya, nave ennakhala yookhweya wa hiyo okhala phaama mookumini mwahu.” Muchu oothamalela toohakalala. Muupuweleke ichu soothene saphaama mwaakhenlaanyu, muhakalaleke ni saweereya saphaama sookhumelenleeni, nave ilukuluku soothene muthamaleleke! Opwaha yeeyo, ohiya wuupuwelela wi nyuwaano munaphwanela weereliwa ichu saphaama, “muthamaleeni [Yehova] vawi taphaama!” Chiryene, “mu soothesene, muthamaleke.”—1 Math. 16:34; 1 Tes. 5:18.