Yaweereya enaphwanyeya mu Malamulo 22:25-27 tahi wi erino yoolakelela ya wooniherya wi mulopwana ookhalano mulacu, nthowa nawi owo ooniwa wi ookhalano mulacu. Yoolakelela ya Nlamulo nla ori wooniherya wi muthiyana haarino mulacu. Moone masu ookhaviherya.

Iversikulu soopacerya inaloca sa mulopwana yoowo aapaka ocapaheya “mmawaani” ni mwali aakameliwe. Mu weerano hiiha, mulopwana aanakhalano mulacu wa oraruwa, woona wi muthiyana ooniwa wi ootheliwa. Vano hanka vooloca sa muthiyana? “Mwali yoole heewunle.” Waakhanle wi oheerano, akina yaahaala omwiiwa nave yammwaakiha. Nyenya owo heewunle. Mmukhalelo yoola, owo aaheemererya opaka mararuwo, mwawiihiiha oopiili yaahaala othorihiwa.—Malam. 22:23, 24.

Voocharela Nlamulo ninnaloca mukhalelo woohiyana: “Nto oomwi amphwanya mwali yoola otakhwani, amphara weiwo, araruwano, akhwe mulopwana yoola meekheiye. Ohimoonihe ekoyi mwali yoole, ntakhara haanono nthowa nookhwa. Yeeyo emweerenle eri ntoko muchu omphanre mulopwana mukhweiye, amwiipha. Tiwi, mwali yoole ophwanyiwe ohimakiwewo, nari eewunle, haarivo oomwaakiha.”—Malam. 22:25-27.

Mmukhalelo yoola, mulipa oothoriha aanamweemererya muthiyana. Mwawiihai? Eyo yeemereryiwa wi “nari eewunle, haarivo oomwaakiha.” Mwawiihiiha owo haapanke mararuwo. Nyenya mulopwana, aanakhalano mulacu wa oraruwa nthowa nawi “amphara . . . araruwano,” mwali aakameliwe.

Nyenya, naamwi nlamulo naaloca wi muthiyana haarino mulacu, yaweereya enathariha wi mulopwana aanakhalano mulacu wa ohiphela ni oraruwa. Nnaphwanela ororomela wi muthoriha aaphwanela ‘waavyaavya phaama mwaheene’ nave aphiyerye makuchuwelo mwawiiwanana ni malakiheryo ookwakwaleya yaawo Muluku uuluulenleiye mu ikwaha sincipale.—Malam. 13:14; 17:4; Muk. 20:14.