1-2. (1) Eyaakha yootaphuliwa tiheeni? (Moone ekaaxa “ Eyaakha Yootaphuliwa Yaari Eheeni?”) (2) Hiiha ntoko erempwaaya mu Luka 4:16-18, tiheeni Yesu aalonceiye?

MU ILAPO ikina, achu annapaka marehereryo avameekhaaya a omuupuwelela mwene amwaamulopwana naari amwaamuthiyana vaavaa onamaliheiye iyaakha makhumi mathanu. Ifesta seiho sa eyaakha ya omuupuwelela mwene, sinanwerya omaliha nihiku nanteero, esumana naari opwaha, nyenya ifesta iho sinnamala, nave ohakalala yoowo sinaruuhaaya onnacuwaliwa.

² Nnahaala othokororya eyaakha yootaphuliwa yaphaamasa, opwaha efesta yeeyo yaapakiwa imanle ovira iyaakha makhumi mathanu mu Isarayeli akhalai. Eyaakha Yootaphuliwa yaanaruuha mphurelo wa achu yaawo yuupuwelela. Ntakhara heeni eyaakha eyotho eryaaya yoochuneya wa hiyaano? Ti nthowa nawi Eyaakha Yootaphuliwa ya Aisarayeli ennanuupuserya yoovaha yaphaamaxa ya otaphuliwa woohimala yoowo Yehova onapakeiye hiihaano, otaphuwa yoowo Yesu aalonceiye.—Mwaalakhanye Luka 4:16-18.

3. Hiiha ntoko erempwaaya mu Onamukutxho 25:8-12, Aisarayeli yaaphura hai orweela wa Eyaakha Yootaphuliwa?

³ Nnahaala wiiwexexa phaama yootaphulela ya masu a Yesu vaavaa aalonceiye sa otaphuwa, moorweela wa othokororya Eyaakha Yootaphuliwa yeeyo Muluku aatikithenryeiye wa Aisarayeli. Yehova aahaaleela Aisarayeli: “Miyakha makhumi mathanu, ekhaleke yaweela wa nyuwo. Mulaleyeke otaphuliwa wa achu oothene eelapo, ela Eyaakha Yootaphuliwa. Imaca ni mapuro yaatumihiwe, yaakookeleke asineene akhalai.” (Mwaalakhanye Onamukutxho 25:8-12.) Mmwaha ovirale, noothokororya mukhalelo Aisarayeli yaaphuraaya orweela wa nihiku na Sapata. Vano Aisarayeli yaaphura hai orweela wa Eyaakha Yootaphuliwa? Ntoko yootakiherya, mwaanyiherye wi  Muisarayeli mmoha aahikhalano ivaale sawaaca, ntoko yookhumelela, onnakhinyereryiwa otumiha emaca wi aliveno ivaale. Variyari va Eyaakha Yootaphuliwa, aanakookiheryiwa emaca ele. Mwawiihiiha, mulopwana ‘aanakookiheryiwa emaca awe,’ nave anaawe a muhoolo hiyaayeleela yoohiyeryiwaaya. Mmukhalelo mukina, mulopwana yoowo aakhalano ivaale sawaaca aanamutumiha mwanawe mmoha naari aaniitumiha mukhateiye wi akhale kapuro ni yoolakelela ya oliva ivaale. Variyari va Eyaakha Yootaphuliwa, akapuro yaaphwanela “ekookeleke wa ahimaaya.” Mwawiihiiha haavo aahaala otitelela okhala kapuro ahirino ewehereryo! Marehereryo yaala annooniherya wi Yehova aanaathokororya achu awe!

4-5. Ntakhara heeni Eyaakha Yootaphuliwa eryaaya yoochuneya wa hiyo olelo?

⁴ Tuuvi waari mphurelo mukina wa Eyaakha Yootaphuliwa? Yehova aahithariha: “Apwiya Muluku anyu anamooreelihaani mweelaponi anoovahaayaani wi ekhale yawinyu. Vaavaa hokhalavo mwa nyuwo ohaawa.” (Malam. 15:4) Ela ti yoohiyana ni yeeyo eneereya olelo! Wiiliwiili ninnawoona achu ooreela ekhalaka ooreelaxa, nave achu oohaawa, ekhalaka oohaawaxa!

⁵ Ntoko Akristu, hannahooleliwa ni Nlamulo na Mose. Eyo enataphulela wi tahi woochuneya ochariha mareheryo yaawo a Eyaakha Yootaphuliwa vooloca sa otaphuliwa wookapuro, oleveleliwa ivaale, ni okookela mu elapo aya. (Aro. 7:4; 10:4; Éfe. 2:15) Naamwiihiiha, nookhalano nthowa na opwacha Eyaakha Yootaphuliwa. Ntakhara heeni? Nthowa nawi nnanwerya opuha otaphuwa, yoowo onanuupuserya marehereryo yaawo Yehova aapankeiye wa Aisarayeli.

6. Nnachuna otaphuliwa wa eheeni?

⁶ Oothene ahu ninnachuna otaphuliwa nthowa nawi na akapuro a yoocheka, yoowo ori mukhalelo wootakhala wa okapuro. Ntoko yookhumelela ya okhala oocheka, ninnuuluvala, wiiceliwa, ni okhwa. Ancipale annoona yeela vaavaa aniivareryaaya va eweheryo naari anayaaya wa totore elukuluku aniiceliwaaya. Ninnakhala tho ooceecheya vaavaa nnapakaahu soocheka. Murummwa Paulo aaheemererya wi ‘aahiphariwa ni nlamulo na ocheka nenlo naari  mmwiilini mwawe.’ Owo aahaaceererya: “Ii, ka muchu ootakhaliwa! Taani anii akoopole wa mwiili ola wookhwa?”—Aro. 7:23, 24.

7. Tiheeni Yesaya aalohenryeiye vooloca sa otaphuliwa?

⁷ Moohakalaliha, Muluku oorehererya mukhalelo mmoha wi noopowe, naari otaphuwa wa yoocheka. Yesu ti mmoha yoowo eerinhe otaphuliwa okhale wooweryeya. Opwaha iyaakha masana mathanu napiili Yesu ahaakumve orwa veelaponi yavathi, mulipa a miririmu Yesaya aahiloherya otaphuliwa otokotoko wa muhoolo. Otaphuliwa yoowo waahaala okhala waphaamaxa opwaha yoole waakhwaanenle variyari va Eyaakha Yootaphuliwa ya Aisarayeli. Yesaya aahirepa: “Munepa wa Apwiya, Apwiya ori mwa miyo vawi Apwiya aakithanla, ekimiinela makhurwa, wi kilaleerye michaka ya phaama wa oohaawa. Aakiruma owaapeela oosoosiwa murima, olokoha . . . woopoliwa wa oophariwa.” (Isa. 61:1) Yooloherya yeela enaphariheleyaaya wawani?

8. Yooloherya ya Yesaya vooloca sa otaphuliwa epharihelen’ye wawani?

⁸ Yooloherya yeela vooloca sa otaphuliwa yaapacenrye waakhwanela vaavaa Yesu aapacenryeiye muteko awe woolaleerya. Elukuluku aakeleiye o Sinakooka mu epooma o Nasareti, Yesu aahaalakhanya masu ene yaawo a mulipa miririmu Yesaya wa Ayuta yaawo yaathukumanne weiwe. Yesu aahipharihela masu yaale wa yoowo mwaneene: “Munepa wa Apwiya ori mwa miyo vawi Apwiya aakithanla, ekimiinela makhurwa, wi kilaleerye michaka yaphaama wa oohaawa. Aakiruma olokoha sa otaphuliwa wa oomakiwa ohuliwa miitho wa achu oohoona, ni otaphuliwa wa achu ari mookapuroni. Aakiruma olokoha mwaakha wa mahala a Apwiya.” (Luka 4:16-19) Yesu aakhwanihenrye hai yooloherya yeela?

9. Achu ancipale mu elukuluku ya Yesu yaachuna otaphuwa wa mukhalelo taani?

⁹ Mmahiku a Yesu, achu yaahipacerya waakhela woopoliwa yoowo Yesaya aalohenryeiye ni yoowo Yesu aalakhannyeiye. Nnanwerya weemererya yeela woona wi Yesu aahilokoha: “Olelo, yookhwaanela yoorepa yeeyo mmanlaanyu wiiwa.” (Luka 4:21) Ancipale yaawo yiiwale yeeyo Yesu aalakhanyeiye akhweya yuupuwela wi yaahaala otaphuliwa orweela wa olamulelo wo Roma. Akhweya awo yuupuwela hiiha ntoko alopwana eeli yaawo yaalonce eriki: “Hiyo, naanamuwehererya wi yoowo tii awoopole aIsarayeli.” (Luka 24:13, 21) Nyenya moosuwela wi Yesu haaceenyenrye oomuchara awe omwaryeela olamulelo woohoosa wo Roma. Ohiya yeeyo, Yesu aahaahusiha  oliva “wa Kaisara ichu sa Kaisara.” (Mat. 22:21) Vano Yesu aaruuhale hai otaphuwa mu elukuluku yeele?

10. Yesu aahunle ephiro ya otaphuwa orweela wa eheeni?

¹⁰ Mwaana a Muluku aarweenle waakhaviherya achu ophwanya otaphuwa, mmikhalelo miili. Woopacerya, Yesu aahihula ephiro ya otaphuwa orweela wa mahusiheryo oowoka a ahooleli a malapelo. Ayuta ancipale mu elukuluku yeele yaanakhinyereryiwa ochariha sookhovelela ni soororomela sooheseya sa achu. (Mat. 5:31-37; 15:1-11) Achu yaawo yaaloca wi yaakhaviherya akina omurumeela Muluku hiyaamurumeela Muluku moophwanelela, mwawiihiiha awo yaari ntoko wi toohoona. Moorweela wa omukhooca Mesiya ni eparipari aahusiheiye, awo yaahititelela okhala mu epiiphi ni mu yoocheka. (Yoh. 9:1, 14-16, 35-41) Orweela mwa mahusiheryo awe awookololowa ni yootakiherya awe yaphaama, Yesu aahaasuweliha awiichacala otaphuwa woomunepani.—Mar. 1:22; 2:23–3:5.

11. Mukhalelo taani wanawiili Yesu aavaherenryeiye otaphuwa?

¹¹ Wanaawiili, Yesu aaheeriha okhala wooweryeya wa achu ancipale otaphuwa wa okapuro wa yoocheka aramvaaya. Mmathipelo a mukucho wa Yesu, Muluku aanwerya olevelela soocheka sa yaale arino nroromelo mwa yawoopola nave anooniherya nroromelo moorweela wa ichu anapakaaya. (Ahe. 10:12-18) Yesu ooloca: “Mwaana ootaphulaani, chiri munamutaphuwa.” (Yoh. 8:36) Otaphuwa owo waari waphaamaxa opwaha yoowo Muisarayeli aahaaleiye waakhela mu Eyaakha Yootaphuliwa! Ntoko yootakiherya, mulopwana yoowo aakhala ootaphuwa mu Eyaakha Yootaphuliwa aanakhala tho kapuro wanawiili, nave voocharela aanakhwa. Nyenya otaphuwa yoowo Yesu ovanheiye horwa omala.

12. Taani yaari oopacerya ophura otaphuwa yoowo Yesu aalokonheiye?

¹² Mu nihiku na Pentekoste mu 33 E.K., Yehova aahaathanla ni munepa waweela arummwa vamoha ni alopwana ni athiyana akina oororomeleya. Yehova aahiwiichana awo ntoko anaawe nave muhoolo mwaya yaahaala oviihiwa wi eye wirimu yalamulele ni Yesu. (Aro. 8:2, 15-17) Ala yaari oopacerya ophura otaphuwa yoowo Yesu aalokonheiye mu sinakooka o Nasareti. Alopwana ni athiyana yaala hiyaari tho mookapuroni wa mahusiheryo oowoka ni sookhovelela saya seiyo saahaarino mathipelo a Mpiipiliyani. Muluku aawoonatho okhala ootaphuwa wa yoocheka yeeyo enahoolela wookhwani. Eyaakha Yootaphuliwa yoosiphela yeeyo yaapacenrye ni othanliwa  wa oomuchara a Kristu mu 33 E.K. enahaala omala omakuchuwelo wa Miyakha Masanaru Khumi sa olamulelo wa Yesu. Ichu taani saphaama sinahaala weereya hiihaano ni omakuchuwelo wa Miyakha Masanaru Khumi sa olamulelo wa Yesu?

13-14. Ohiya pahiru Akristu oothanliwa ni munepa waweela, taani anawerya waakhela otaphuwa yoowo Yesu aalokonheiye?

¹³ Mmahiku ahu, amilyawu aachu awiiveleela orweela wa maloko oothene anapaka makupa a “ipucepuche ikina.” (Yoh. 10:16) Awo hathanliwe ni Muluku wi elamulele ni Yesu. Opwaha yeeyo, awo aakhalano ewehereryo enathipeleya Mpiipiliya ya okhala wookhala veelaponi yavathi. Apwanne ti yeeyo munaweheryaanyu?

¹⁴ Naamwi hiihaano munanwerya opuha ichu saphaama seiyo oothanliwa aryaayano. Woona wi mookhalano nroromelo mu mukucho wa woopola wa Yesu, munanwerya omveka Yehova nikhurumuwelo na soocheka sanyu. Eyo enneeriha weemereryiwa ni Muluku ni okhalano yawuupuserya-ya-murima yaphaama vamiithoni vawe. (Éfe. 1:7; Wup. 7:14, 15) Muupuwele mareeliho muryaanyuno woona wi mootaphuwa orweela wa mahusiheryo atheru. Yesu aaloca: “Munarwa musuwela eparipari nave eparipari eyo enamootaphulaani.” (Yoh. 8:32) Nri oohakalalaxa okhalano otaphuwa ntoko yoola!

15. Otaphuwa taani ni mareeliho nnaweheryaahu muhoolo?

 ¹⁵ Nyuwo munaphwanela oweherya otaphuwa otokotoko yoowo onoorwa. Moohilekela, Yesu onahaala otoloxa malapelo oowoka ni alamuleli oohoosa. Muluku onahaala okhapelela “mucici muncipale” yoowo onamulapela, nave voocharela onahaala weemererya wi mucichi owo opuhe mareeliho mu parataiso veelaponi yavathi. (Wup. 7:9, 14) Achu ancipale anahaala oviihiwa nave anamukhalano ekari ya woopoliwa wa ovolowela wa yoocheka ya Atamu.—Saw. 24:15.

16. Otaphuwa taani woohakalalihaxa achu anahaalaaya waakhwela muhoolo?

¹⁶ Variyari va Olamulelo wa Iyaakha Masanaru Khumi, Yesu ni yaale anahaala olamulela vamoha ni yene anahaala waakhaviherya achu ancipale okhalano okumi woophaameya ni onthamwene woophaameya ni Muluku. Elukuluku yeeyo ya orehereryiwa ichu enahaala okhala ntoko Eyaakha Yootaphuliwa mu Isarayeli. Eyo enahaala otaphulela wi oothene yaale anamurumeela Yehova anamukhala oophaameya moomalela nave herwa echeka.

17. Tiheeni Isaiya 65:21-23 olohenryeiye vooloca sa achu a Muluku? (Moone eruku ya ekaapa.)

¹⁷ Isaiya 65:21-23 onnathariha mukhalelo ekumi eneeraaya ekhale muhoolo. (Mwaalakhanye.) Hinni nikhale ooporora nihipakaka echu. Ohiya yeeyo, Piipiliya onnooniherya wi achu a Muluku mu elukuluku yeeyo anahaala opakaka sincipale, elapaka muteko woohakalaliha. Omakuchuwelo wa elukuluku yeeyo, nnahaala ororomela wi “sopatusiwa seihotho inarwa sopoliwa mukapuroni wa eyutxe, wi sakhele onethi mwa ovuwa wa ana a Muluku.”—Aro. 8:21, BNM.

18. Ntakhara heeni ninnaphwanela weemererya wi nnamukhalano ohakalala muhoolo?

¹⁸ Mu ilukuluku sakhalai, Muluku aahipaka marehereryo a Sapata wa achu awe, mwawiihiiha awo yaanakhalano wiichuwa mu miteko saya nave yaanathokororya miyaha soomunepani. Variyari va Miyakha Masanaru Khumi sa olamulelo wa Kristu nnahaala opakaka miteko soomunepani wi nimulapele Muluku. Omulapela Muluku ti woochuneyaxa wi nikhaleno ohakalala, nave mu elapo evyaani nnahaala okhalano elukuluku ya weerano yeela. Achu oothene oororomeleya anahaala okhala oohakalala variyari va Olamulelo wa Kristu wa Iyaakha Masanaru Khumi nthowa nawi nnamukhalano muteko waweeliha murima nave oothene ahu nnahaala omulapelaka pahiru Muluku.