MU ELAPO yeeyo oriwo Musewu wa Piipiliya, o Yerusalemu, nookhalawo nluku nenlo nrino yoorempwa yeeyo yaarempwe variyari va iyaakha 600 ni 700, ahaakumve Kristu. Nluku nlo naaphwanyiwe niwaliweno mahiye waacamela o Heporoni, o Yerusalemu. Nave yaarempwavo masu awi “Hakafi mwaana amwaamulopwana a Hakave, tawuulumeliwa ni Yave Sabaot.” Yoorempwa yeela enooniherya hai wi yeeyo Piipiliya onaloceiye eparipari? Ela enooniherya wi nsina na Muluku, Yehova, nenlo naarempwa YHWH mmarepelo a Ehepiri yakhalai, naanasuweliwa phaama nave naanaphariheliwa nihiku ti nihiku mu ilukuluku sakhalai. Mweeparipari soorepa seiho sinaphwanyeya mu makhuku yaawo yaavithiwamo achu ookhwa, sinnooniherya wi achu yaawo yaapharihela makhuku, ntoko mapuro oothukumanamo naari waavithamo alipa ookhwa, wiiliwiili yaanarepamo nsina na Muluku navetho yaanarepamo masina aya ophitaanyerya marepeliwo a nsina na Muluku va ixiri.

Alocaka sa soorempwa seiya, Totor Rachel Nabulsi a Esikola yavasulu o Xorxiya, oriye: “Mu soorempwa seiha nsina YHWH, noophariheliwa ikwaha sincipale nave ela ennanihusiha ichu sincipale. . . . Soorempwa seiha sinnooniherya ophiyerya mweeryo taani nsina YHWH naaryaaya noochuneya mookumini wa Aisarayeli ni Ayuta.” Ela enniiwanana ni yeeyo Piipiliya olonceiye woona wi nsina na Muluku nenlo naarempwa YHWH mu Ehepiri, ninnaphwanyeya ikwaha sincipale Mpiipiliyani. Wiiliwiili mu masina aachu, naanaphitaanyeryiwa nsina na Muluku.

Masu awi “Yave Sabaot,” yaawo yaarempwale va nlukuni, anataphulela “Yehova a anakhoco.” Mwawiihiiha, enooneya wi mu ilukuluku sakhalai achu yaanapharihela nsina na Muluku navetho masu awi “Yehova a anakhoco.” Elatho enniiwanana ni yeeyo Piipiliya onaloceiye woona wi Piipiliya onnapharihela masu awi “Yehova a anakhoco” mu ikwaha 283 mu Soorepa sa Ehepiri xaxaxa mu liivuru a Isaiya Yeremiya ni Zakariya.