1. Mwaha wa muthukumano mu 1935 waavolowenle hai mmiravo mmoha?

MMIRAVO mmoha aarino iyaakha 18 aapatisiwe mu eyaakha ya 1926. Asitiithi awe yaari Oohuserya a Piipiliya, yaawo anasuweliwa ntoko Anamoona a Yehova olelo. Awo yaarino anamwane araru aasilopwana, ni eeli aasithiyana yaawo yaahusinhaaya omurumeela Yehova Muluku ni ochariha yootakiherya ya Yesu Kristu. Hiihaa ntoko yeereyaaya ni Oohuserya oothene a Piipiliya, mmiravo yoole oororomeleya a iyaakha 18, aalya ephaawu ni owurya eviinyu va Mukonelo wa Apwiya. Mwawiihiiha, ewehereryo awe ya omwaahiyu yaahitorokeya vaavaa iiwaleiye mwaha “Mucici Muncipale.” Mwaha yoola waaperekhiwe va muthukumano wa muceche mu 1935 ni munna J. F. Rutherford o Washington, D.C., U.S.A. Tiheeni yuupululiwe va muthukumano yoola?

2. Eparipari taani yoohakalaliha yuupululiwe mmwaha wa Munna Rutherford?

² Mmwaha yoola, Munna Rutherford aahaaloca achu yaawo anapaka makupa mu “mucici muncipale” (King James Version), naari “muloko mutokwene,” yoowo onalociwa mu Wupulula 7:9. Ovinyerya mahiku a muculi, ophiyerya elukuluku yeele, Oohuserya a Piipiliya yuupuwela wi muloko mutokweene naari nikhuuru na achu yaawo yaahaala oya wirimu nave yaarino nroromelo na vakhaani moohiyana ni oothanliwa ni munepa waweela. Munna Rutherford aahipharihela Soorepa wi atharihe wi muloko mutokweene hiwaahaala okhala wirimu, nyenya awo ipuchepuche ikina sa Kristu * seiho inahaala ovuluwa mu “yohósha etokotoko”  ni okhala veelaponi yavathi okhala wookhala. (Wup. 7:14) Yesu aahiroromeliha: “Kookhalano ipucepuche ikina tho ihiri mu nikhola nenla. Seiho tho kinnaphwanela ohoolela; inarwa siiwa nsu naka. Vaavaa onarwa okhalavo muhuwo mmoha ni mukukhula mmoha.” (Yoh. 10:16) Achu yaala analikanyihiwa ni ipuchepuche Anamoona oororomeleya a Yehova yaawo arino ewehereryo ya okhala wookhala mu Parataiso veelaponi yavathi. (Mat. 25:31-33, 46) Hankooni noone ti mwawiihai wiiwexexa ovyaani wa iparipari sa Mpiipiliyani waatoronkaaya okumi wa Anamoona a Yehova ancipale, ophitaanyerya munna ole aari mmiravo a iyaakha 18.—Sal. 97:11; Masi. 4:18.

3-4. Va muthukumano wa 1935, macikhwi aachu tiheeni yaasuwenlaaya vooloca sa ewehereryo aya, nave ntakhara heeni?

³ Yaari yoohakalalihaxa va muthukumano yoole vaavaa namaloca aakonheiye achu ariki: “Apwanne ti nyuwaano murino ewehereryo ya okhala veelaponi yavathi okhala wookhala, koovekeeni wi mweemele?” Munna mmoha aari va muthukumano yoole, olonce wi aawoona achu opwaha emeya ya amilyawu 20 yaawo yaari va muthukumano yoole yeemenle. Voocharela Munna Rutherford aaloca ariki: “Moone! Mucici muncipale!” Voocharela alipa oowiriyana oothene yaakhuwela moohakalala. Yaawo yeemenle yaahiiwexexa wi Yehova haathanlile wi yakhale wirimu. Awo yaahiiwexexa wi hiyaathanliwe ni munepa waweela wa Muluku. Mu nihiku noocharela na muthukumano yoole wa muceche Anamoona avyaani awaakhwana 840 yaapatisiwa, nave ancipale a yaawo yaari mu nikhuuru na ipucepuche ikina.

⁴ Omanle mwaha yoole, mmiravo a iyaakha 18 yoowo oromoliwe woopaceryani ni akina yaahiya olya ephaawu ni owurya eviinyu va Mukonelo wa Apwiya. Achu ancipale yaahikhalano moonelo woolikana ni wa munna mmoha yoowo aalonce ariki: “Mukonelo wa eyaakha ya 1935 yaari elukuluku yookuchula kaalyilaaka ephaawu ni owurya eviinyu va Mukonelo. Kaahisuwela wi Yehova haapharihenle munepa awe waweela wi akithanle wi kakhaleno ekumi wirimu, ohiya yeeyo, kaarino ewehereryo ya okhala veelaponi yavathi ni weeriha eyo okhala Parataiso.” (Aro. 8:16, 17; 2 Kor. 1:21, 22) Ovinyerya mu elukuluku yeele, nikhuuru na muloko mutokotoko ninnaaceereryeya nave ninnatitelela olapa vamoha ni oothanliwa yaawo ahanle veelaponi yavathi. *

5. Yehova onawoona hai yaale amaanle olya ephaawu ni owurya eviinyu va Mukonelo?

⁵ Yehova onawoona hai yaale ahin’ye olya ephaawu ni owurya eviinyu va Mukonelo evinre eyaakha ya 1935? Nave tiheeni Yehova onuupuweleiye vooloca sa Namoona yoowo opatisiwe olelo yoowo oneemererya wi onnaphwanela olya ephaawu ni owurya eviinyu va mukonelo wa Apwiya nave voocharela iiwexexa wi hathanliwe ni munepa waweela? (1 Kor. 11:28) Akina annalya ephaawu ni owurya eviinyu nthowa nawi annakhwa minikwa vooloca sa ewehereryo aya. Nyenya moororomeleya wakhala wi aheemererya yoohesa aya emaala olya ephaawu ni owurya eviinyu, enatitelela omurumeela Yehova, mweeparipari owo onahaala oweemererya okhala mu nikhuuru na ipuchepuche ikina. Naamwi awo ehilyaaka ephaawu ni owurya eviinyu anahaala ophiyaka va Mukonelo nthowa nawi awo annathamalela yeeyo Yehova ni Yesu apankaaya ntakhara yaawo.

6. Tiheeni Yesu aalamulenleiye ankeelo opaka?

⁶ Nthowa nawi yoohooxa etokotoko ennaacamela  yaamukhala yaphaama wa hiyo othokororya yeeyo Wupulula ekapitulu 7 olonceiye ntakhara Akristu oothanliwa ni muloko mutokweene wa ipucepuche ikina. Yesu ohaalamulela ankeelo otitelela ophara mwakuru echeku ya makupa maxexe ya otoloxa. Ankeelo hanaphwanela ohiya echeku eyo, wi yoope veelaponi ya vathi ophiyerya elukuluku anahaalaaya okwaaxa weeyeriwa eneneeryo, eyo tiwi ophiyerya elukuluku Yehova onahaaleiye olakelela wi awo toororomeleya. (Wup. 7:1-4) Ntoko nchuwelo na ororomeleya waya, oothanliwa a Kristu anahaala okhala mamwene ni alipa a mukucho wirimu vamoha ni yoowo. (Wup. 20:6) Oothene yaale anapaka makupa a emusi ya Muluku wirimu, anahaala ohakalala owoona oothanliwa a 144.000, yaakhelaka nchuwelo naya wirimu.

7. Mwawiiwanana ni Wupulula 7:9, 10, taani Yohani aawoonneiye mu yawoona awe, nave tiheeni yaapakaaya? (Moone eruku ya ekaapa.)

⁷ Amanle oloca sa oothanliwa a 144.000, yaawo anahaala okhala mamwene ni alipa a mukucho, Yohani aahoona echu yoohakalalihaxa “mucici muncipale” yoowo onahaala ovuluwa mu Armaketo. Moohiyana nnikhuuru noopacerya, nikhuuru nanaawiili naari ntokweenexa nave noohaalakhanyeya. (Mwaalakhanye Wupulula 7:9, 10.) Awo yaawanre “ikuwo saweela,” yooniheryaka wi awo yaahititelela “wiisepiha soonanara” inarweela mu elapo yeela ya Satana, nave yaahititelela okhala oororomeleya wa Muluku ni wa Kristu. (Tiy. 1:27) Awo yaanakhuwela moovuwa wi aavuluxiwa wanthowa na yeeyo Yehova ni Yesu, mwaana a epuchepuche ya Muluku apankaaya ntakhara yaawo. Nave tho oothene yaawo, yaapharela mirai sa n’yale, yooniheryaka ohakalala ni weemererya wi Yesu oothanliwa ni Yehova wi akhale Mwene.—Mulikanyihe ni Yohani 12:12, 13.

8. Tiheeni Wupulula 7:11, 12, onanleeleiye vooloca sa emusi ya Yehova ya wirimu?

⁸ Mwaalakhanye Wupulula 7:11, 12. Tiheeni yeeren’ye ni emusi ya Yehova ya wirimu vaavaa yonnaaya muloko mutokotoko? Yohani aahoona emusi ya wirimu ya Yehova esaren’ye ohakalala otokotoko, vaavaa yaawoonnaaya achu a muloko mutokotoko emucicimihaka Muluku. Emusi ya Yehova ya wirimu enahaala ohakalala woona waakhwanela wa yawoona yeela, vaavaa muloko mutokotoko onahaalaaya woopowa mu yoohooxa etokotoko.

9. Mwawiiwanana ni Wupulula 7:13-15, tiheeni muloko mutokotoko onapakaaya hiihaano?

⁹ Mwaalakhanye Wupulula 7:13-15. Yohani aaloca wi achu a muloko mutokotoko “yávasa sowara saya, yíséliha mu nikhamini na Mwana épuchepuche.” Ela enataphulela wi awo aakhalano yawuupuserya-ya-murima yaphaama ni wookololowa nave tho wi Yehova onnahakalala ni yaawo. (Isa. 1:18) Awo Akristu awiiveleela, ni oopatisiwa yaawo anooniherya nroromelo noolipa mwa mukucho wa woopola wa Kristu nave arino onthamwene wawaacameleya ni Yehova. (Yoh. 3:36; 1 Ped. 3:21) Ti nthowa nene Muluku onahakalaleiye ni yaawo “nave annamulapa yoowo ohiyu ni othana” veelaponi yavathi. Hiihaano, awo tamvai nave annapaka sincipale mmuteko woolaleerya sa Omwene ni waapaka oohuserya, nthowa nawi Omwene wa Muluku echu yoochuneyaxa mookumini mwaya.—Mat. 6:33; 24:14; 28:19, 20.

10. Echu taani muloko mutokotoko onaroromelaaya, nave yoororomeliha taani anahaalaaya woona yaakhwanelaka?

¹⁰ Muloko mutokotoko yoowo onahaala woopowa mu yoohooxa etokotoko onnaroromela wi Muluku onahaala otitelela okhapelela yoowo, nthowa nawi Muluku ‘onamukhala ni yaawo.’ Yoororomeliha yeeyo ipucepuche ikina inaweheryaaya woona yaakhwanelaka ti ela: “[Muluku] onamvuta miithori oothene wiithoni waya. Horwa tho okhalawo okhwa, nari wunla, nari ikucho, nari wiicela.”—Wup. 21:3, 4.

11-12. (1) Hiihaa ntoko yooniheryiwaaya mu Wupulula 7:16, 17, mareeliho taani muloko mutokotoko onaweheryaaya? (2) Tiheeni a ipucepuche ikina anapakaaya va Mukonelo, nave ntakhara heeni?

 ¹¹ Mwaalakhanye Wupulula 7:16, 17. Olelo, achu ancipale a Yehova annahoolela etala nthowa nawi haano ikhorowa sawaakhwanela wi ethume yoolya anachunaaya naari nthowa na sookhumelela sa makacamiho anatannyiwa ni alamuleli naari ikhoco. Akina annawaleliwa mukariposo nthowa na nroromelo naya. Naamwi hiihaa, achu a muloko mutokotoko annahakalala nthowa na osuwela wi emanle ovuluwa mu otoloxa ntakhara elapo ela yoonanara, ilukuluku soothene awo anahaala okhalakano yoolya yincipale, yoomwiilini ni yoomunepani. Vaavaa Yehova onahaaleiye otoloxa elapo yeela yoonanara ya Satana, onahaala ororomela wi ookhapelela muloko mutokotoko wa owali awe yoowo onalikanyihiwa ni “nikupeche ni oviha.” Yamala yoohooxa etokotoko Yesu onahaala waahoolela yaale eni ekhale veelaponi mu “maahi a ookumi [woohimala].” Pahiru muupuwele wi: Muloko mutokotoko wookhalano ewehereryo yoohakalalihaxa. Apilyawu aachu yaawo eni ekhaleno okumi, herwa tho ekhwa!—Yoh. 11:26.

¹² A ipucepuche ikina aakhalano ewehereryo yoohakalaliha yeeyo enaweeriha omuthamalela Yehova ni Yesu! Yehova haathanlile wi yakhale wirimu, nyenya tahi wi toohichuneya naari haanono esisapo wa Yehova. Makhuuru oomeeli, oothanliwa ni munepa waweela ni a ipucepuche ikina ananwerya omucicimiha Muluku ni Kristu. Mukhalelo mmoha wa weerano yeeyo ori moorweela wa ophiya va Mukonelo wa Apwiya.

13-14. Ntakhara heeni oothanliwa ni a ipucepuche ikina anaphiyaaya va mukonelo?

¹³ Mu iyaakha sa hiihaanoru, achu ancipale yaawo anaphiya va Mukonelo, avakhaani a yaawo tanalya ephaawu ni owurya eviinyu. Mmiloko mincipale orukurerya elapo hiyaamomo anna naari arokora analya ephaawu ni owurya eviinyu. Ancipale a yaawo anaphiya va Mukonelo arino ewehereryo ya okhala veelaponi yavathi. Vano ntakhara heeni anaphiyaaya va Mukonelo wa Apwiya ahu? Awo annaphiya va Mukonelo hiihaa ntoko aneeraaya achu yaale anaphiya va othela wa nthamwene aya. Asinthamwene annaphiya va othela wi yooniherye wi annaasivela ni waakhaviherya alipa oothela. Moolikana, a ipucepuche ikina annaphiya va Mukonelo wi yooniherye osivela ni omukhaviherya Kristu vamoha ni oothanliwa  ni munepa waweela. A ipucepuche ikina annaphiya va Mukonelo wi yooniherye othamalela ntakhara mukucho wa Yesu yoowo weerinhe wi okhale wooweryeya okhalano okumi woohimala veelaponi yavathi.

¹⁴ Nthowa nikina noochuneya nnaweeriha a ipucepuche ikina ophiya va Mukonelo, ti nawi aniiwelela nlamulo na Yesu. Vaavaa Yesu aapaceryinheiye Mukonelo wa Apwiya vamoha ni arummwa awe, owo aahaaleela ariki: “Mweerekeno yeela mukuupuwelaka miyo.” (1 Kor. 11:23-26) Mwawiihiiha, a ipucepuche ikina annatitelela ophiya va Mukonelo wa Apwiya hiihaa ntoko aneeraaya oothanliwa ni munepa waweela yaawo ahanle veelaponi yavathi. Nave tho a ipucepuche ikina annaawopa akina wi ekhale vamoha va Mukonelo.

15. Tiheeni nnaphwanelaahu weera wi nimucicimihe Muluku ni Kristu va Mukonelo?

¹⁵ Va Mukonelo, ninnakhalano ekari ya omucicimiha Muluku ni Kristu moorweela wa macipo ni ovekela. Mwaha onahaala operekhiwa eyaakha yeela oni “Muthamalele Yeeyo Muluku ni Kristu Apankaaya wa Nyuwaano!” Mwaha ola onahaala wunnuwiha othamalela wahu ntakhara Yehova ni Kristu. Vaavaa ephaawu ni eviinyu inahaalaaya ovirihiwa nnahaala wuupuwelelaka seiyo inataphulelaaya—mwiili nnikhami na Yesu. Nnahaala wuupuwelaka wi Yehova aahimweemererya Mwanawe wi akhwe ntakhara hiyo wi niwerye okhalano okumi. (Mat. 20:28) Mmoha ti mmoha a hiyo yoowo onamusivela Tiithi ahu a wirimu vamoha ni Mwanawe onahaala ochuna ophiya va Mukonelo.

16. Mmukhalelo taani oothanliwa ni munepa waweela ni a ipucepuche ikina aryaaya oolikana?

¹⁶ Mmikhalelo mikina oothanliwa ni munepa waweela ni a ipucepuche ikina toolikana. Yehova hanasiveliwa nnikhuuru nimoha opwaha nikina. Ninnasuwela yeeyo nthowa nawi esisapo olimveiye ntakhara oothanliwa ni a ipucepuche ikina ti yoolikana, okumi wa Mwanawe. Ohiyana orivovo variyari va makhuuru oomeeli ti wawi arino ewehereryo yoohiyana. Makhuuru oomeeli yaala anaphwanela otitelela okhala oororomeleya wa Muluku ni wa Kristu. (Sal. 31:23) Nave muupuwele, munepa waweela wa Muluku onanwerya ophara muteko mmukhalelo woolikana ntakhara hiyo. Eyo enataphulela wi onnaphara muteko wa mmoha ti mmoha a hiyo mwawiiwanana ni mikhalelo sahu moohipwacha waakhanle wi toothanliwa ni munepa waweela naari a ipucepuche ikina.

17. Oothanliwa yaale ahanle veelaponi ewehereryo taani aryaayano?

¹⁷ Akristu Oothanliwa hanayariwa erino ewehereryo ya oya wirimu. Muluku tonaavaha ewehereryo yeela. Awo annuupuwela sa ewehereryo aya, annavekela vooloca sa yeeyo, nave anawehererya waakhela nchuwelo naya wirimu. Ophiyerya wi awo hanawerya waanyiherya mmukhalelo taani mwiili aya woomunepani onahaalaaya  okhala. (Fil. 3:20, 21; 1 Yoh. 3:2) Awo annaweherya omoona Yehova, Yesu, ankeelo ni oothanliwa akina. Awo anahaala okhala vamoha ni yaawo mu Omwene wa Muluku.

18. Ewehereryo taani a ipucepuche ikina aryaayano?

¹⁸ A ipucepuche ikina annawehererya okhala veelaponi okhala wookhala. (Ekle. 3:11) Ela ti yeeyo achu oothene anakhwelaaya, awo annawehererya elukuluku yeeyo elapo enahaalaaya okhala Parataiso. Awo annawehererya elukuluku yeeyo anahaalaaya oteka ipa, waala miri, ni waaphuwa anamwane arino ekumi yoophaameya. (Isa. 65:21-23) Awo annawehererya weeca mmapuro oohiyanahiyana veelaponi yavathi—yoonaka miyaako, matakhwa, iphareya—ni ohuserya sincipale vooloca sa soopatuxiwa sa Yehova. Echu enaahakalaliha opwaha soothene, osuwela wi onthamwene aya ni Yehova onahaala otitelela okhala woolipa.

19. Ekari taani Mukonelo onanivahaaya mmoha ti mmoha a hiyo, nave eyaakha yeela, Mukonelo onahaala weereya liini?

¹⁹ Yehova ohaavaha alapeli awe oororomeleya ewehereryo yoohakalaliha muhoolo. (Yer. 29:11) Yawuupuxerya ya okhwa wa Kristu, ennaavaha ekari wa mmoha ti mmoha a hiyo ya omucicimiha Muluku ni Kristu ntakhara yeeyo apankaaya wa hiyo wi nipuhe okumi woohimala. Mukonelo muthukumano woochuneya yoowo Akristu eeparipari anakhalaayano eyaaka ti eyaakha. Owo onahaala weereya Nawoorowa, 27 a Marsu a 2021, nsuwa nimanle oneela. Ancipale ari mu ilapo seiyo anakhalaaya ootaphuwa ophwanyeya va muthukumano woochuneya. Ancipale anahaala ophiya va Mukonelo moohiphwacha wiiciwa. Akina anahaala ohoolela nikacamiho na opaka Mukonelo eniiha eri mukariposo. Mweeparipari Yehova, Yesu, ni emusi ya Muluku ya wirimu enahaala ovareryelaka. Mwawiihiiha, muchu ti muchu, muloko, nikhuuru, nnamukhalano Mukonelo waphaama!