1. Osivela wa Muluku onaweerihaani woona hai?

MURUMMWA Yohani oorepa wi, “Muluku ti Osivela.” (1 Yoh. 4:8) Ninnasuwela wi: Muluku topatunxe okumi, nyenya masu yaala avakhaani annanikhaviherya wuupuwela wi osivela onarweela wa yoowo. Yehova onnanisivela! Osivela wawe, onnaneeriha wiisoona okhala ookhapeleleya, oohakalala, ni aweeliwa murima.

2. Mwawiiwanana ni Mateu 22:37-40, taavi ari malamulo meeli matokotoko, nave ntakhara heeni onamukhala woovila wiiwelela nlamulo nanaawiili?

² Akristu, hanathanla waakhanle wi annaphwanela wooniherya osivela naari hooye. Nla nlamulo. (Mwaalakhanye Mateu 22:37-40.) Vaavaa nnapaceryaahu omusuwela phaama Yehova, onamukhala wookhweya wa hiyo, wiiwelela nlamulo noopacerya. Opwaha soothene, Yehova toophaameya; owo onnanikhapelela nave onnanikhaliha mooreera murima. Nyenya onamukhala woovila wa hiyo wiiwelela nlamulo nanaawiili. Ntakhara heeni? Nthowa nawi anna ni arokora ahu—yaawo ari variyari va akhwiihu awaacameleya—toohiphaameya. Mwawiihiiha, mu ilukuluku ikina, awo ananwerya opaka ichu moohithokororya naari moohisivela ntakhara hiyo. Yehova aanasuwela wi naahaala ohoolela makacamiho yaala, mwawiihiiha, owo aahaapharihela achu akina wi yaarepe aliivuru Mpiipiliyani, yaawo arino ikano sooluluwanya wi enihusihe ntakhara heeni nnaphwanelaahu wooniherya osivela wa mukina ni mukhwaawe, ni mukhalelo wa weerano. Mmoha a anamarepa yaawo aari Yohani.—1 Yoh. 3:11, 12.

3. Echu taani Yohani olonceiye ntakhara osivela?

³ Mu soorepa seiha, Yohani ooceenyerya wi Akristu anaphwanela wooniherya osivela. Mweeparipari liivuru a Mpiipiliyani yoowo Yohani omurempeiye onanleela sa okumi wa Yesu, owo oopharihela masu awi “osivela” ni “oosiveliwa” ikwaha sincipale ompwaha liivuru a Mateu, Marko ni Luka. Yohani aarino iyaakha nsana  vaavaa aamurepeiye liivuru awe, ni ikaarata sawe raru. Masu yaala ooveereliwa yaawo Yohani orempeiye annooniherya wi osivela onaphwanela ovolowela echu vyakala yeeyo Mukristu onapakeiye. (1 Yoh. 4:10, 11) Naamwi hiihaa, yaahiviravo elukuluku yincipale wi Yohani asuwele nihusiheryo nenla.

4. Apwanne Yohani ilukuluku soothene aanooniherya osivela wa akina?

⁴ Vaavaa Yohani aareiye mmiravo, tahi wi ilukuluku soothene aanooniherya osivela. Ntoko yootakiherya, mu ekwaha emoha, Yesu ni oohuserya awe yaari va mukwahani ekhumaka o Yerusalemu eyaaka o Samariya. Musamariya mmoha a epooma yeele aahikhooca owaakhela yaawo. Yohani aakhulenle hai? Owo aahiveka wi Yesu iichanihe mooro okhumela wirimu wi oweeyele achu oothene a epooma yeele! (Luka 9:52-56) Mu elukuluku ekina, Yohani hoonihenrye osivela wa arummwa akhwaawe. Mwawooneya Yohani ni munna awe Yakopo yaahaaruma amama aya wi yamveke Yesu wi aavahe murici woochuneya mu Omwene awe. Vaavaa arummwa akina yaasuwenlaaya yeeyo Yakopo ni Yohani yaapankaaya, awo yaahinyeenyeya! (Mat. 20:20, 21, 24) Nyenya naamwi Yohani aapanke soohesa soothene seiha, Yesu aanamusivela.—Yoh. 21:7.

5. Tiheeni nnahaalaahu othokororya mmwaha yoola?

⁵ Mmwaha yoola, nnahaala othokororya yootakiherya ya Yohani ni ichu ikina seiho orempeiye vooloca sa osivela. Vaavaa nnathokororyaahu mwaha yoola, nnahaala woona mukhalelo nneeraahu nooniherye osivela wa anna ni arokora ahu. Nnahaala tho ohuserya echu yoochuneya mmukhalelo muru wa echoko oneeraaya wooniherye osivela ntakhara echoko awe.

6. Ti mwawiihai Yehova oonihenryeiye osivela wawe ntakhara hiyo?

⁶ Akhweya nnamuupuwela wi wooniherya osivela ntakhara achu pahiru ori okhalano moonelo waphaama naari oloca ichu saphaama ntakhara yaawo. Nyenya osivela wi okhale weeparipari, owo onaphwanela wooniheryiwa mu saweera. (Mulikanyihe ni Tiyako 2:17, 26.) Ntoko yootakiherya, Yehova onnanisivela. (1 Yoh. 4:19) Nave Yehova onnooniherya osivela yoowo orweela mmasu ooreera yaawo arempwale Mpiipiliyani. (Sal. 25:10; Aro. 8:38, 39) Mwawiihiiha, ninnalekecheya wi Muluku onnanisivela ohiya pahiru orweela mwa yeeyo onaloceiye, nyenya tho orweela mwa yeeyo onapakeiye. Yohani oorepa: “Muluku ohooniha okhwela wawe mwa hiyo, mwawiihiihaa: aamuruma mwanawe mmoharu veelaponi ya vathi wi hiyo nikhaleno okumi mwa yoowo.” (1 Yoh. 4:9) Yehova aaheemererya wi Mwanawe mmoharu ahooxeye ni okhwa ntakhara hiyo. (Yoh. 3:16) Apwanne nookhalano minikwa wi Yehova onnanisivela?

7. Tiheeni Yesu opankeiye wi ooniherye osivela wawe ntakhara hiyo?

 ⁷ Yesu aahaaroromeliha oohuserya awe wi owo aanaasivela yaawo. (Yoh. 13:1; 15:15) Owo aahooniherya osivela wawe wawiiseela ntakhara yaawo nave tho ntakhara hiyo ohiya pahiru orweela mwa yeeyo aalonceiye nyenya tho orweela mwa yeeyo opankeiye. Yesu ooloca: “Haavo orino osivela woopwaha ola: Muchu oleva okumi awe wa nthowa na asinthamwene awe.” (Yoh. 15:13) Vaavaa nnuupuwelaahu vooloca sa mukhalelo Yehova ni Yesu anansivelaaya, eyo enanivolowela hai?

8. Echu taani 1 Yohani 3:18 olonceiye yeeyo nnaphwanelaahu weera?

⁸ Ninnooniherya wi ninnamusivela Yehova ni Yesu moorweela wa owiiwelela yaawo. (Yoh. 14:15; 1 Yoh. 5:3) Nave tho Yesu mwaneene, oonilamulela wi nisivelaneke mukina ni mukhwaawe. (Yoh. 13:34, 35) Hinnaphwanela wooniherya osivela wa anna ni arokora ahu pahiru orweela mwa yeeyo nnalocaahu, nyenya tho nnaphwanela wooniherya osivela orweela mwa yeeyo nnapakaahu. (Mwaalakhanye 1 Yohani 3:18.) Ichu taani ikina nnaphwanelaahu opaka wi nooniherye wi ninnaasivela yaawo?

9. Osivela waamuceenyenrye Yohani weera eheeni?

⁹ Yohani anwerya okhalaka ni apapa awe ni waavyavyaka ikhorowa empakaka nakoso a ototha ihopa yoowo emusi awe yaampakaaya. Nyenya ohiya yeeyo, Yohani aahipharihela okumi awe woothene aakhaviheryaka akina ohuserya eparipari vooloca sa Yehova ni Yesu. Muteko yoowo Yohani aathanlileiye hiwaari wookhweya. Yohani aahihooseya ni wiikariwa, nave waacamela omakuchuwelo wa nsana noopacerya, vaavaa owo aareiye awuuluvala, aahiwaleliwa mukalaposo. (Saw. 3:1; 4:1-3; 5:18; Wup. 1:9) Ophiyerya wi vaavaa aawaleliweiye mukariposo nthowa na olaleerya sa Yesu, Yohani aahooniherya wi owo aanaasivela akina. Ntoko yootakiherya, vaavaa Yohani aareiye mu evilivili yo Patimo, owo aahirepa yawuupulula yeeyo aakhenleiye nave aarumihela mmilokoni wi anna ni arokora esuwele “seiyo inahaala weereya voohilekela.” (Wup. 1:1) Voocharela, woonaru Yohani amanle otaphuliwa mu evilivili yo Patimo, Yohani aahirepa muchaka yoowo onaloca sa okumi wa Yesu ni muteko awe. Owo tho aahirepa ikaarata raru ni yoolakelela ya waalipiha anna ni arokora awe. Muni mmutakiherye hai Yohani nthowa na wiiveleela wawe ni murima woothene?

10. Muni mooniherye hai wi munnaasivela achu?

¹⁰ Nyuwo munahaala wooniherya wi munnaasivela achu moorweela wa mukhalelo muthanlilaanyu opharihela okumi anyu. Elapo ya Satana yaahaala osiveliwa owoonaani mmalihaka elukuluku ni ikuru mpakaka ichu ntakhara nyuwo mukhatiinyu, mweereryaka waavyavya ikhorowa ni okhala oovuwa. Moohiyana, Akristu orukurerya elapo yoothene annamaliha elukuluku yincipale ophiyerya anaweryelaayavo elaleeryaka michaka saphaama ni waakhaviherya achu omwaacamela Yehova. Ophiyerya wi akina annawerya olaleerya ni ohusiha mu elukuluku yoothene.

11. Ti mwawiihai alaleeryi ancipale oororomeleya anooniheryaaya wi annamusivela Yehova ni anna ni arokora aya?

¹¹ Akristu oororomeleya ancipale annalapa miteko sa mulaponi elukuluku yincipale wi yiikhaviherye vamoha ni emusi aya. Naamwi hiihaa, alaleeryi yaala oororomeleya annakhaviherya marehereryo a Muluku mmukhalelo vyakala anaweryelaayavo. Ntoko yootakiherya, akina annawerya okhaviherya vaavaa enakhumelelaaya epahu ya maphacuwelo, akina annawerya olapa mmuteko wa oteka, nave anna ni arokora oothene annaveleela sookhalano saya wi ekhaviherye muteko wa elapo yoothene. Awo anneerano ichu soothene seiha nthowa nawi annamusivela Muluku ni akina. Esumana ti esumana ninnooniherya wi ninnaasivela anna ni arokora ahu moorweela wa ophiya mmithukumano ni  opaka makupa mmithukumano seiho. Naamwi nri oovelavela, ninniilipiserya ophiya mmithukumano. Nave tho naamwi nri awuukhuwa, ninnawerya ovaha maakhulo. Nave tho naamwi nrino makacamiho ahu, ninnawerya waalipiha akina mithukumano ihaakumve opacerya naari imanle. (Ahe. 10:24, 25) Ninnathamalela vancipale muteko yoowo anna ni arokora ahu anapakaaya!

12. Mmikhalelo taani mikina Yohani oonihenryeiye osivela wa anna ni arokora awe?

¹² Yohani aahooniherya osivela wa anna ni arokora awe ohiya pahiru moorweela wa waathamalela nyenya tho orweela mwa waavaha ekano. Ntoko yootakiherya, mu ikaarata sawe Yohani aahaathamalela anna ni arokora awe ntakhara nroromelo ni miteko saya saphaama, nyenya owo tho aahaavaha ekano yooluluwanya vooloca sa yoocheka. (1 Yoh. 1:8–2:1, 13, 14) Moolikana, nnaphwanela waathamalela anna ni arokora ahu ntakhara ichu saphaama seiho anapakaaya. Nyenya wakhala wi muchu onnannuwiha mikhalelo, naari sookhovelela soonanara nnaphwanela wooniherya osivela wa yoowo moorweela wa omuleela mwa mavyakelo echu onaphwaneleiye weera. Onnachuneya olipa murima wi nimvahe nthamwene ahu ekano, nyenya Piipiliya onaloca wi asinthamwene eeparipari annookololana.—Masi. 27:17.

13. Tiheeni nihinaphwanelaahu opaka?

¹³ Ilukuluku ikina, ninnooniherya osivela ntakhara anna ni arokora ahu moorweela wa yeeyo nihinaphwanelaahu opaka. Ntoko yootakiherya, hinnaphwanela waakuvela onyeenyeya wa nthowa na yeeyo aloncaaya. Muupuwele vooloca sa nikacamiho nenlo neeren’ye waacamela omakuchuwelo wa okumi wa Yesu veelaponi yavathi. Owo aahaaleela oohuserya awe wi yaariki ephwanye okumi woohimala, awo yaaphwanela okhuura mwiili awe ni owurya nikhami nawe. (Yoh. 6:53-57) Masu yaala, yaari oohoma murima ophiyerya wi ancipale a oohuserya awe yaahimuhiya yoowo—nyenya ohiya asinthamwene awe awaacameleya ophitaanyerya Yohani. Moororomeleya awo yaahititelela okhala ni yoowo. Awo hiyiiwexenxe yeeyo Yesu aalonceiye, nave tho woonaru awo yaahitikhiniheya ni yeeyo. Naamwiihiiha, asinthamwene oororomeleya a Yesu hiyuupuwenle wi yeeyo Yesu aalonceiye yaari yoonanara ni onyeenyeya ntakhara yeeyo. Ohiya yeeyo, awo yaahimuroromela yoowo, esuwelaka wi owo aanaloca eparipari. (Yoh. 6:60, 66-69) Ti woochuneyaxa ohaakuvela onyeenyeya wa nthowa na yeeyo asinthamwene ahu aloncaaya! Moohiyana, nnaphwanela oweemererya wi etharihe echu yaachunaaya oloca.—Masi. 18:13; Ekle. 7:9.

14. Ntakhara heeni hinnaphwanela owiica anna ni arokora ahu?

 ¹⁴ Yohani oonilopola tho wi hinnaphwanela owiica anna naari arokora ahu. Wakhala wi hiniiwelenle ekano yeela, Satana onahaala onivolowela. (1 Yoh. 2:11; 3:15) Ela yaaheereya ni akina omakuchuwelo wa nsana noopacerya E.K. Satana aanapaka soothene ophiyerya aawereleiyevo wi unnuwihe wiicana ni okawanyeya variyari va achu a Muluku. Elukuluku Yohani aarepeiye ikaarata sawe yiiha achu akina yaawo yaapaka ichu moolikana ni Satana eri mmulokoni. Ntoko Yootakiherya, Tiyotrefe aaneeriha wi muloko mukina okhale wookawanyeya. (3 Yoh. 9, 10) Owo haacicimiha alipa aweeceeca yaale yeemelela nikhuuru noolamulela. Ophiyerya wi owo aaneererya owiikara mmulokoni achu yaawo yaawaakhela anna ahaasiveleiye. Iwo waari wiirumiha! Nlelo Satana onneererya waakawanya achu a Muluku. Hinnaphwanela owiica annihu ni ohiya waakhaviherya yaawo.

15. Muru wa echoko tiheeni onaphwanelaaya wuupuwela?

¹⁵ Mukhalelo mmoha muru wa echoko onooniheryaaya wi onnasivela echoko awe ori moorweela wa ovahererya soothowa soomwiilini. (1 Tim. 5:8) Nyenya owo onaphwanela wuupuwela wi, echu yoochuneyaxa wa yoowo ori okhaviherya echoko awe okhalano onthamwene waphaama ni Yehova. (Mat. 5:3) Moone yootakiherya yeeyo Yesu otikithenryeiye wa miru sa ichoko. Mwawiiwanana ni Muchaka wa Yohani, vaavaa Yesu aakhweiye vamwirini, nlelo owo aanuupuwelela sa emusi awe. Yohani eemenle vamoha ni amannya Yesu, Mariya, mu nipuro nenlo iiphiwevo. Naamwi oona wiicela otokotoko, Yesu aahimveka Yohani wi amukhapelele Mariya. (Yoh. 19:26, 27) Yesu aahikhalano asinna ni arokora awe yaawo yaahaala omukhapelelaka Mariya ni omvaha seiho saamuthowa, nyenya enooneya wi haavovo mmoha a yaawo aari oohuserya a Yesu. Mwawiihiiha, Yesu aachuna ororomela wi Mariya aahaala okhapeleliwa ni soothowa soomwiilini nave tho soomunepani.

16. Mirici taani mitokweene Yohani aareiyeno?

¹⁶ Yohani aanakhapelela mirici mincipale. Ntoko mmoha a arummwa, owo aaphwanela okhala a mvai mmuteko woolaleerya. Woonaru Yohani aahithela, mwawiihiiha, owo aaphwanela okhala oophimelela vaavaa aavahereryeiye soothowa soomwiilini sa emusi awe ni soothowa soomunepani. (1 Kor. 9:5) Miru sa ichoko olelo tiheeni inaphwanelaaya ohuseryavo?

17. Ntakhara heeni ti woochuneyaxa muru wa echoko okhapelela emusi awe ni soothowa soomunepani?

 ¹⁷ Munna yoowo ori muru wa echoko onanwerya okhalano mirici mincipale soochuneya. Ntoko yootakiherya, owo onaphwanela olapa mwakuru vaavaa onakhaleiye omutekoni wawe wi amuhakalalihe Yehova. (Éfe. 6:5, 6; Tito 2:9, 10) Nave tho owo onanwerya okhalano mirici mikina mmulokoni, ntoko okukhula ni ohoolela mmuteko woolaleerya. Mu elukuluku emohamoha, ti woochuneya tho wa yoowo omuhuserya Piipiliya vamoha ni mwaariye naari anaawe. Mwaariye ni anaawe anahaala othamalela wiilipiserya wawe waakhaviherya awo okhalano okumi waphaama, okhala oohakalala, ni waakhaviherya otitelela okhala asinthamwene a Yehova.—Éfe. 5:28, 29; 6:4.

18. Echu taani Yohani aaroromenleiye?

¹⁸ Yohani aahikhalano okumi mu iyaakha sincipale, nave tho aahikhalano saweereya sincipale soohakalaliha. Owo tho aahihoolela makacamiho mancipale yaawo yaahaala oceecheiha nroromelo nawe. Nyenya Yohani, ilukuluku soothene aaniilipixerya ophiyerya aawereleiyevo wi acharihe malamulo a Yesu ophitaanyerya nlamulo na waasivela anna ni arokora awe. Ntoko yookhumelela, Yohani aahiroromela wi Yehova ni Yesu yaanamusivela nave tho wi yaahaala omvaha ikuru seiho aachuneiye wi avoothe nikacamiho vyakala. (Yoh. 14:15-17; 15:10; 1 Yoh. 4:16) Satana ni elapo awe hiyaawenrye ommaaliha Yohani wi ahooniherye osivela wa anna ni arokora awe, ni wooniherya osivela iwo orweela wa ichu aaloceiye ni aapakeiye.

19. Tiheeni 1 Yohani 4:7 onanceenyeryeiye weera, nave ntakhara heeni?

¹⁹ Moolikana ni Yohani, nnakhala mu elapo yeeyo enalamuleliwa ni Satana muluku awiica a elapo yeela. (1 Yoh. 3:1, 10) Naamwi eereryaka onimaaliha waasivela anna ni arokora ahu, Satana hani awerye weerano yeeyo waahiimukhala wi noomweemererya weerano yeeyo. Nikhale oolakelela waasivela anna ni arokora ahu, ni wooniherya osivela iwo moorweela mwa yeeyo nnalocaahu ni yeeyo nnapakaahu. Vaavaa nnooniheryaahu osivela yoola nnamukhala aweeliwa murima nthowa na opaka makupa mu emusi ya Yehova, nave nnamukhalano ohakalala weeparipari.—Mwaalakhanye 1 Yohani 4:7.