1. Mwaahaala othariha hai emusi ya Yakopo?

YAKOPO, munna a Yesu, aaphwiiwale mu emusi yeeyo yaari yoolipa oomunepani. * Asitiithi awe, Yosefe ni Mariya, yaanamusivela vancipale Yehova nave yaanapaka owetha waya wi emurumeele Yoowo. Yakopo aakhalano mareeliho makina awaaceererya—munnawe a mutokweene aari Mesiya. Yaari ekari yavameekhaaya Yakopo opaka makupa a emusi yeela!

2. Mathowa taani Yakopo aareiyeno a omutikhina munnawe a mutokotoko?

² Yakopo aahikhalano mathowa mancipale a omoona munnawe a mutokotoko. (Mat. 13:55) Ntoko yootakiherya, vaavaa Yesu aareiyeno iyaakha 12, aasuwela phaama Soorepa ophiyerya wi ahusiha o Yerusalemu yaahitikhiniheya vancipale. (Luka 2:46, 47) Akhweya Yakopo aanalapa muteko wa okalipintero ni Yesu. Waakhanle wi tihiiha, owo aahimusuwela phaameene munnawe. Nathan H. Knorr aaloca: “Ninnahuserya sincipale vooloca sa muchu vaavaa nnalapaahu ni yoowo.” * Yakopo tho aanoona mukhalelo ‘Yesu innuweiye, omwiilini ni mwa mahala a Muluku, ni achu.’ (Luka 2:52) Ni nthowa nenla nnanwerya wuupuwela wi Yakopo aakhala mmoha a oomuchara oopacerya a Yesu. Nyenya tahi yeeyo yeeren’ye.

3. Ti mwawiihai Yakopo aakhulenleiye vaavaa Yesu aapacenryeiye muteko awe?

³ Variyari va orummwa wa Yesu veelaponi yavathi, Yakopo haari mmoha a oohuserya awe. (Yoh. 7:3-5) Mweeparipari, Yakopo akhweya aari mmoha a amusi yaawo yuupuwela wi owo “orimusavuwa.” (Mar. 3:21) Nave hiyaavo yawooniherya yawi  Yakopo aari ni amannya, Mariya, vaavaa Yesu aakhweiye vamwirini woohooxiwavo.—Yoh. 19:25-27.

4. Mahusiheryo taani nnahaalaahu othokororya?

⁴ Ohoolo waya, Yakopo aamuroromela Yesu nave aakhala mmoha a atokweene oocicimihiwa mmuloko Weekristu. Mmwaha yoola, nnahaala othokororya mahusiheryo meeli yaawo nnaweryaahu ohuserya orweela wa Yakopo: (1) ntakhara heeni nnaphwanelaahu okhala awiiyeviha nave (2) ti mwawiihai nneeraahu nikhale ahusiha aphaama.

5. Tiheeni Yakopo enreiye vaavaa Yesu iisoonihaleiye wa yoowo amanle ovinya mookhwani?

⁵ Ti liini Yakopo aakhanleiye oomuchara oororomeleya a Yesu? Yesu amanle oviihiwa mookhwani, “aahooneya tho wa Yakopo, vaavaa wa arummwa oothene.” (1 Kor. 15:7) Amanle okumana ni Yesu, Yakopo aakhala mmoha a oohuserya awe. Owo aakhalavo vaavaa arummwa yaaweheryaaya waakhela munepa waweela mu empa yoosulu yo Yerusalemu. (Saw. 1:13, 14) Ohoolo waya, Yakopo aahakalala orumeela ntoko mmoha a Nikhuuru Noolamulela mu nsana noopacerya. (Saw. 15:6, 13-22; Gal. 2:9) Nave elukuluku ekina ehaakumve eyaakha ya 62 E.K., owo aaveereliwa orepa ekaarata wa Akristu oothanliwa. Ekaarata ela ti yamphurelo wa hiyo olelo, moohipwacha waakhanle wi ewehereryo ahu ti ya wirimu naari veelaponi yavathi. (Tiy. 1:1) Mwawiiwanana ni mulipa a miyaha a mu nsana noopacerya awiichaniwa Josephus, Yakopo aahiiphiwa orweela wa nlamulo na Mulipa a Mukucho awiichaniwa Ananiya. Yakopo aatitelela okhala oororomeleya wa Yehova ophiyerya okuchuwa wa muteko awe veelaponi yavathi.

6. Mikhalelo taani saari soohiyana variyari va Yakopo ni ahooleli a malapelo a mmahiku awe?

⁶Yakopo aari awiiyeviha. Ntakhara heeni nnalocaahu hiihaa? Muthokororye ohiyana orivovo variyari mukhalelo Yakopo aamwaakhulenleiye Yesu ni mukhalelo ahooleli ancipale a malapelo yaakhulenlaaya. Vaavaa Yakopo oonneiye sawooniherya sookwakwaleya wi Yesu aari Mwaana a Muluku, owo mwawiiyeviha aamweemererya. Nyenya tahi yeeyo anamukucho o Yerusalemu yeenraaya. Ntoko yootakiherya, awo hiyaaphwanela ovaanya wi owo aamviiha Lasaro mookhwani. Ohiya osuwenla wi Yesu aarumihiwe ti Yehova, awo yaanachuna omwiipha Yesu ni Lasaro. (Yoh. 11:53; 12:9-11) Vaavaa Yesu aaviihiweiye mookhwani, awo yaaheererya okhuwa yeeyo wa achu. (Mat. 28:11-15) Nthowa nawi ahooleli a malapelo yaari awiirumiha awo yaamukhooca Mesiya.

7. Ntakhara heeni nnaphwanelaahu osepa wiirumiha?

 ⁷Nihusiheryo: Musepe okhala awiirumiha nave mutitelele ohusihiwa ni Yehova. Hiihaa ntoko ereca eneerihaaya murima wa muchu ohilapa phaama, wiirumiha onamuneeriha okhala woovila wiiwelela ohoolela wa Yehova. Afarisi mwawiirumiha yaakhooca sawooniherya sookwakwaleya sawi Yesu aakhalano munepa waweela wa Muluku nave wi owo aari Mwaana a Muluku. (Yoh. 12:37-40) Wiirumiha waya waari woonanaraxa. Woona wi waahaala ovolowela okumi aya woohimala. (Mat. 23:13, 33) Ti woochuneyaxa otitelela weemererya wi Masu a Muluku ni munepa waweela suupe omuchu ahu ni ovolowela muupuwelo ahu ni soolakelela sahu! (Tiy. 3:17) Woona wi Yakopo aari awiiyeviha, owo aaheemererya wi ahusihiwe ni Yehova. Ntoko nnahaalaahu woona, wiiyeviha wawe waamweeriha okhala muhusiha aphaama.

8. Tiheeni enahaala onikhaviherya okhala ahusiha aphaama?

⁸ Yakopo haarino masuwelelo avasulu. Ahooleli a malapelo mmahiku awe moohikhwa minikwa yaamoona owo mmukhalelo mmohamoha yaawoonaaya arummwa Pedro ni Yohani—ntoko “anammawaani ni oohihuserya.” (Saw. 4:13) Nyenya Yakopo aahuserya okhala muhusiha aphaama, ntoko nnoonaahu vaavaa nnamwaalakhanyaahu liivuru yoowo onakuxa nsina nawe. Moolikana ni Yakopo, akhweya hiyaano hinaano masuwelelo avasulu. Naamwiihiiha, nnikhaviheryo na munepa wa Yehova ni ovyakiha onarweela mmarehereryo awe, nnanwerya tho okhala ahusiha aphaama. Vano hankooni noone yeeyo yaamweeriha Yakopo okhala muhusiha aphaama, nave ti mwawiihai nneeraahu nimutakiherye yoowo.

9. Mmukhalelo taani Yakopo aahusiheiye?

⁹Yakopo haapharihela masu oovila naari haathariha mmukhalelo woovila wiiwexexa. Wanthowa nenla, vaavaa Yakopo aahusiheiye, achu yaanasuwela echu yeeyo yaaphwanelaaya weera ni mmukhalelo wa weera. Ntoko yootakiherya, moone mukhalelo wookhweya Yakopo ohusinheiye wi Akristu anaphwanela ohoolela ohookololowa ehikhanle oowali. Owo oorepa: “Muvarerye wi hiyo nnaweera ooreeriwa yaawo avilenle. Mohiiwa ovilela wawe Yoopu, muhoona tho yeeyo Muluku aachuneiye  okhwaaniherya, ntakhara Apwiya tawaaca ikharari ni mahala.” (Tiy. 5:11) Yakopo aahusiha apharihelaka Soorepa. Mmukhalelo yoola, owo aanapharihela Masu a Muluku wi aakhaviherye achu wiiwexexa wi ilukuluku soothene Yehova onnaareeliha oothene yaale ari oororomeleya wa Yoowo hiihaa ntoko Yupu. Yakopo aapharihela masu ookhweya nave aanathariha ichu mmukhalelo wookhweya wiiwexexa. Mwawiihiiha, owo hiivaha ncicimiho mukhateiye, nyenya amvaha Yehova.

10. Mmukhalelo taani nneeraahu nimutakiherye Yakopo vaavaa nnaahusihaahu akina vooloca sa Yehova?

¹⁰Nihusiheryo: Muhusihe mmukhalelo wookhweya nave mumpharihele Piipiliya. Vaavaa nnamuhusihaahu muchu Piipiliya, yoolakelela ahu henaphwanela okhala omooniherya mukhalelo nsuwenlaahu, nyenya mukhalelo Yehova osuwenleiye niwi owo onnanisivela. (Aro. 11:33) Nnanwerya weerano yeela wakhala wi ilukuluku soothene ninnampharihela Piipiliya vaavaa nnahusihaahu. Ntoko yootakiherya, ohiya waaleela oohuserya a Piipiliya yeeyo naahaalaahu weera mu nipuro naya, yaahaala okhala yaphaama waakhaviherya yaawo othokororya sootakiherya ikina sa Mpiipiliyani wi yiiwexexe tiheeni Yehova onuupuweleiye ni onooneiye vooloca sa mwaha. Mmukhalelo yoola, awo anahaala ohuserya wi ti woochuneya omuhakalaliha Yehova, ohiya hiyaano.

11. Oceecheya taani Akristu akina yaaryaayano nave miruku taani Yakopo aavanheiye? (Tiyako 5:13-15)

¹¹Yakopo aari oophimelela. Vaavaa nnaalakhanyaahu ekaarata ya Yakopo, ennakhala yawooneya wi owo aanasuwela phaama okotakota wa anna ni arokora. Mwa yeeyo, owo aahaavaha ohoolela wookwakwaleya vooloca sa yeeyo awo yaaphwanelaaya opaka. Ntoko yootakiherya, Akristu akina yaanalekela vakhaani opharihela miruku mikina. (Tiy. 1:22) Akina yaathokororyaxa yaale yaari ooreela. (Tiy. 2:1-3) Nave akina yaahikhalano nikacamiho na ovareryela nlumi naya. (Tiy. 3:8-10) Awo yaari makacamiho matokweene, nyenya Yakopo aanasuwela wi anna yaala yaahaala otoroka. Owo aahaavaha miruku anna yaala mmukhalelo woosivela, nyenya ahihin’ye othariha nikacamiho nene. Ohiya yeeyo, owo aahaaceenyerya anna yaala wi yaavye nikhaviheryo na atokweene wi ewerye opaka matorokelo yaala.—Mwaalakhanye Tiyako 5:13-15.

12. Nni ntitelele hai akhalano moonelo woophwanelela vaavaa nnaakhaviheryaahu oohuserya ahu a Piipiliya?

¹²Nihusiheryo: Mukhale oophimelela nave muhiyeleele ewehereryo. Nnaphwanela okhala oophimelela nave nsuwele wi oohuserya ahu ancipale aakhalano makacamiho a opharihela miruku sa Mpiipiliyani. (Tiy. 4:1-4) Enanwerya oviravo elukuluku yincipale wi akina ewerye ohiya sookhovelela soonanara nave epacerye wunnuwiha mikhalelo Seekristu. Hiihaa ntoko Yakopo, nnaphwanela okhala ooluluwanya ni oohuserya ahu ni waaleela yeeyo awo anaphwanelaaya otoroka. Nnaphwanela tho okhalano moonelo woophwanelela nroromelaka wi Yehova onahaala waaruuha achu awiiyeviha wa yene ni waavaha ikuru seiho anachunaaya wi epake matorokelo mookumini.—Tiy. 4:10.

13. Tiheeni Yakopo aaroromeleiye mwawiiwanana ni yeeyo nnaalakhanyaahu mu Tiyako 3:2?

¹³Yakopo hiisoona wi toochuneyaxa waapwaha akina. Yakopo hiisoona okhala oochuneyaxa waapwaha Akristu akina nthowa nawi aari munna a Yesu naari wi aakhalano mirici mincipale. Owo aahiwiichana Akristu aakhweiye ntoko “asinnaka oosiveliwa.” (Tiy. 1:16, 19; 2:5) Owo hintonko wiisoona wi aari oophaameya. Moohiyana, owo aahiiphitaanyeravo vaavaa aalonceiye masu ala: “Ninnakwaculiwa  oothene mu sincipale.”—Mwaalakhanye Tiyako 3:2.

14. Ntakhara heeni eryaaya yoochuneya waaleela oohuserya ahu wi hiyaano tho ninnahesa?

¹⁴Nihusiheryo: Muupuwele wi oothene ahu naachu oohiphaameya. Hannaphwanela wiisoona wi naachu oochuneyaxa waapwaha oohuserya ahu. Ntakhara heeni? Wakhala wi ninnaweeriha oohuserya ahu wuupuwela wi hannahesa, awo anahaala okhala ooceecheya woona wi anahaala wuupuwela wi hewerya weera yeeyo Muluku onaavekeiye. Nyenya nnanwerya waakhaviherya oohuserya ahu omurumeela Yehova wakhala wi noheera ela: Neemererye wi ilukuluku soothene tahi wookhweya opharihela malakiheryo a Mpiipiliyani ni waatharihela mukhalelo Yehova onikhavihenryeiye opaka matorokelo mookumini.

15. Ti mwawiihai mwaahaalaanyu othariha maphwanaphwaniho yaawo Yakopo aapharihenleiye? (Tiyako 3:2-6, 10-12)

¹⁵Yakopo aanapharihela maphwanaphwaniho wi atannye murima achu. Moohikhwa minikwa, Yakopo aahikhalano nikhaviheryo na munepa waweela, nyenya ti yawooneya wi owo aahusenrye vancipale ni maphwanaphwaniho a munnawe a mutokotoko, Yesu. Maphwanaphwaniho yaawo Yakopo aapharihenleiye mu ekaarata yaari ookhweya nave mahusiheryo aya yaari awiiwexexeya.—Mwaalakhanye Tiyako 3:2-6, 10-12.

16. Tiheeni eneereya vaavaa nnapharihelaahu maphwanaphwaniho oophwanelela?

¹⁶Nihusiheryo: Mpharihele maphwanaphwaniho ootannya murima. Vaavaa munapharihelaanyu maphwanaphwaniho oophwanelela, munanwerya omukhaviherya muchu waanyiherya yeeyo munahusihaanyu. Haavo aathariha phaama maphwanaphwaniho ompwaha Yesu, nave Yakopo aachariha yootakiherya awe. Hankooni nthokororye niphwanaphwaniho nimoha na Yakopo nave noone ntakhara heeni nryaaya noophwanelela.

17. Ntakhara heeni niphwanaphwaniho nnaphwanyeya mu Tiyako 1:22-25 ti noophwanelela?

¹⁷ Mwaalakhanye Tiyako 1:22-25. Niphwanaphwaniho nenla Yakopo opharihenleiye na eweheryo ninnaphariheleya vancipale ni mathowa oohiyanahiyana. Yoopacerya, Yakopo aahikhalano mmuupuweloni yeeyo aachuneiye ohusiha. Nniphwanaphwaniho nenla, owo aachuna ohusiha wi Masu a Muluku yaariki epake matorokelo mu okumi ahu, nnaphwanela opaka sincipale ohiya pahiru omwaalakhanya Piipiliya, nnaphwanela opharihela muteko  yeeyo nnahuseryaahu. Yakopo aapharihela niphwanaphwaniho na echu yeeyo achu yaasuwenlaaya—eweheryo. Nave tinivi naari nihusiheryo na niphwanaphwaniho nenla? Hiwi okhale woophwanelela muchu wiiweha va eweheryo, oona wi aakhala makupa anaphwanela orehereryiwa nave aheeravo echu. Moolikana, tahi yoophwanelela waalakhanya Masu a Muluku, moona wi munnachuna opaka matorokelo mu okumi anyu, nyenya muheeravo echu.

18. Iponto taani raru nnaphwanelaahu wuupuwela wi niwerye opaka maphwanaphwaniho oophwanelela?

¹⁸ Nni nimutakiherye hai Yakopo vooloca sa opharihela maphwanaphwaniho aphaama? Nnanwerya opaka ichu raru: (1) Muthanle niphwanaphwaniho nnahaala okhala nookhweya wa oohuserya anyu wiiwexexa yeeyo munahusihaanyu. (2) Mpake maphwanaphwaniho ni ichu seiho achu asuwenlaaya phaama. (3) Mooniherye mookwakwaleya yeeyo niphwanaphwaniho nnachunaaya ohusiha. Nyenya waakhala wi munnoona okhala woovila opaka maphwanaphwaniho oophwanelela, muye mu Índice das Publicações da Torre de Vigia. Muye va “Ilustrações,” munanwerya ophwanyamo sootakiherya sincipale munaphwanelaanyu opharihela. Nyenya muupuwele wi maphwanaphwaniho ari ntoko mikrofoni—vaavaa muchu onaloceleiye mmikrofoni nsu nawe ninniiweyaxa wa akina. Maphwanaphwaniho tho annooniherya mahusiheryo yaawo nnachunaahu ohusiha, mwa yeeyo, nnaphwanela okhalano ekaasoope wi niphariheleke maphwanaphwaniho pahiru mu iponto soochuneya. Mweeparipari, hiyaano nnachuna okhala ahusiha aphaama, ohiya wiiruuhela ncicimiho mukhatiihu, nyenya wi naakhaviherye achu ancipale wakhala wooweryeya opaka makupa a emusi yoohakalala ya Yehova.

19. Ti mwawiihai nneeraahu nooniherye wi ninnavaha esisapo emusi ahu yoomunepani?

¹⁹ Eparipari wi haavo a hiyaano orino ekari yeeyo Yakopo aaryeiyeno—wunnuwa ni munnawe a mutokotoko oophaameya. Nto nookhalano ekari ya omurumeela Yehova vamoha ni emusi ahu yoomunepani, anna ni arokora ahu Eekristu. Ninnavaha esisapo emusi yeela moorweela wa waacicimiha anna vaavaa nnathukumanaahu, nnamalihaahu elukuluku ni yaawo, nnahuseryaahu ni yaawo, ni vaavaa nnalaleeryaahu vamoha ni yaawo. Wakhala wi ninniilipixerya ochariha vakhivirukhiviru yootakiherya Yakopo onihiyenryeiye, nnahaala omvaha ncicimiho Yehova nave nnahaala waakhaviherya achu yaawo arino murima waphaama ohuserya eparipari.