1. Nni niwerye hai omaliha elukuluku ni Yehova?

HIYAANO ninnasiveliwa omaliha elukuluku ni achu yaawo nnaasivelaahu. Ntoko yootakiherya, mulopwana ni muthiyana anasivelana, annasiveliwa omaliha elukuluku vamoha. Amiravo annasiveliwa omaliha elukuluku ni asinthamwene aya. Nave oothene ahu ninnasiveliwa omaliha elukuluku ni anna a mmulokoni. Nyenya opwaha soothene, hiyaano ninnasiveliwa omaliha elukuluku ni Muluku ahu. Nneerano hai yeela? Moorweela wa ovekela wa yoowo, omwaalakhanya Piipiliya ni wuupuwelela soororomeliha ni mikhalelo sawe saphaama. Apwanne hamuneemererya wi elukuluku nnamalihaahu ni Yehova ti yasisapoxa?—Sal. 139:17.

2. Ntakhara heeni tahi wookhweya omaliha elukuluku ni Yehova?

² Eparipari wi ninnasiveliwa omaliha elukuluku ni Yehova, nyenya weerano yeela tahi wookhweya. Hiyaano ninnakhala ooweiwa nave ti nthowa nene oryaaya woovila ophwanya elukuluku ntakhara miteko soomunepani. Miteko, mirici sa veechokoni ni ikina inanwerya omaliha elukuluku ahu. Mwa yeeyo nnawerya woona wi hinaano elukuluku ya ovekela, ohuserya ni wuupuwelela.

3. Muraakho taani mukina onamaliha elukuluku ahu?

³ Nnaphwanela tho okhalano ekaasoope ni muraakho mukina. Nnanwerya okhala ooweiwa ni ichu seiho sihiri soonanara ophiyerya wi nihinakhalano elukuluku ya omwaacamela Yehova. Muupuwele vooloca sa mathatelo. Oothene ninnachuna wiichuuwa ni othata. Nyenya naamwi mathatelo nnathanlaahu eri aphaama, naanamaliha elukuluku yincipale ni yaawo, nnanwerya okhalano elukuluku vakhaani ntakhara miteko soomunepani. Mwawiihiiha, nnaphwanela wuupuwela wi mathatelo tahi oochuneyaxa.—Masi. 25:27; 1 Tim. 4:8.

4. Tiheeni nnahaalaahu othokororya mmwaha yoola?

 ⁴ Mmwaha yoola, nnahaala othokororya ntakhara heeni nnaphwanelaahu olakelela yeeyo eri yoochuneyaxa mu okumi ahu. Nave tho nnahaala othokororya ti mwawiihai nneeraahu nipharihele phaama elukuluku yeeyo nnamalihaahu ni Yehova nave ntakhara heeni ti yaphaama weerano yeeyo.

5. Ti mwawiihai yoorepa ya Éfeso 5:15-17 eneeraaya emukhaviherye mmiravo othanla mukhalelo waphaama wa opharihela okumi awe?

⁵Muthanle mukhalelo waphaama wa opharihela ekumi. Wiiliwiili amiravo annuukhuwa vooloca sa mukhalelo anahaalaaya opharihela phaama okumi aya. Moohiyana, mapurusore aya naari amusi yaawo ahiri Anamoona a Yehova akhweya annaaceenyerya awo ovolowa mu isikola sa vasulu wi ephwanye muteko onaya waalivaka phaama. Mwawooneya, eyo yaahaala omaliha elukuluku aya yincipale. Nyenya, asitiithi ni asinthamwene a mmulokoni, akhweya annaaceenyerya amiravo opharihela okumi aya mmuteko wa Yehova. Tiheeni enahaala omukhaviherya mmiravo onamusivela Yehova opaka yoolakelela yaphaama? Owo onanwerya omwaalakhanya Éfeso 5:15-17. (Mwaalakhanye.) Voocharela, owo onanwerya wuupuwelela makoho ala: ‘Teevi eri “yookhwela ya Apwiya” Yehova? Yoothanla taani enahaala omuhakalaliha yoowo? Yoolakelela taani enahaala okikhaviherya opharihela phaama elukuluku aka?’ Ntoko eloncaaya yoorepa ya Éfeso, “mahiku ari oonanara” nave elapo yeela enalamuleliwa ni Satana enahaala omala moohilekela. Mwa yeeyo, yaahaala okhala yamiruku opharihela ekumi ahu mmukhalelo onamuhakalaliha Yehova.

6. Yoothanla taani Mariya aapankeiye, nave ntakhara heeni eyo yaari yoothanla yaphaama?

⁶Mutikitherye soolakelela saphaama. Vakina vaya, wi nipharihele elukuluku ahu mmukhalelo waphaama, onahaala ochuneya othanla echu emoha wa miteko miili seiho sihiri soonanara. Ntoko yootakiherya, nkuupuwelani yeeyo yeeren’ye vaavaa Yesu aamuxekunryeiye Marta ni Mariya. Mweeparipari, Marta aari oohakalala omwaakhela Yesu ntoko muleco awe nave aanachuna orehererya yoolya yawaaca ni yaphaama. Mweelukuluku ene yeele murokora awe awiichaniwa Mariya, aakiraathi vakhiviru va Yesu nave aanawiriyana yeeyo owo aahusiheiye. Yeeyo Marta eenreiye hiyaari yoonanara, nyenya Yesu aaloca wi Mariya ‘aathanla makupa aphaamaxa.’ (Luka 10:38-42) Moovira wa elukuluku, Mariya akhweya aacuwala yeeyo yaalyilaaya nihiku nenle. Nyenya mweeparipari, owo hintonko ocuwala yeeyo aahusenryeiye ni Yesu. Wa Mariya, elukuluku yeeyo aamalinheiye ni Yesu yaari yasisapoxa. Hiyaano tho ninnavaha esisapo etokweene elukuluku yeeyo nnamalihaahu ni Yehova. Nni nipharihele hai elukuluku yeeyo mmukhalelo waphaama?

7. Ntakhara heeni oryaaya woochuneyaxa ovekela, ohuserya ni wuupuwelela?

⁷Muhicuwale wi ovekela, ohuserya ni wuupuwelela sinnapaka makupa a malapelo ahu. Vaavaa nnavekelaahu, hiyaano nnaloca ni Tiithi ahu a wirimu, yoowo onanisivela vancipale. (Sal. 5:7) Vaavaa nnamuhuseryaahu Piipiliya, hiyaano ninnaphiyerya “omusuwela Muluku,” yoowo ori ehime ya miruku. (Masi. 2:1-5) Vaavaa nnuupuwelelaahu, ninnoona mikhalelo saphaama sa Yehova ni soolaiherya sawe saphaama ntakhara omwaahiyu. Mweeparipari, ola mukhalelo waphaamaxa wa opharihela  elukuluku ahu. Woona wi ninnatepa oweiwa, mmukhalelo taani nneeraahu nipharihele elukuluku ahu?

8. Ti mwawiihai Yesu aapharihenleiye elukuluku awe ari otakhwani, nave tiheeni nnahuseryaahuvo?

⁸Wakhala wooweryeya, mwaavye nipuro noomaaleleya. Muupuwele yootakiherya ya Yesu. Ahaakumve opacerya muteko awe woolaleerya, Yesu aamaliha mahiku 40 otakhwani. (Luka 4:1, 2) Mu nipuro nenle noomaaleleya, Yesu aanwerya ovekela wa Yehova ni wuupuwelela vooloca sa yookhwela ya Atiithi awe wa yoowo. Chiryene weerano yeeyo, yaamukhaviherya Yesu okhala oorehereya wa saweeha aahaaleiye ohoolela moohilekela. Tiheeni munahuseryaanyu orweela wa yootakiherya ya Yesu? Waakhanle wi owannyu wohaaciwawo onanwerya okhala woovila ophwanya nipuro noomaaleleya. Mwa yeeyo, akhweya onamukhala waphaama oya nipuro nikina. Ti yeeyo murokora mmoha awiichaniwa Julie oneereiye aakhwelaka ovekela wa Yehova. Owo ni aiyawe anakhala mu empa ekhaani enaamwaalukaariwa o Fransa, nave ti woovila wa Julie okhala mukhateiye ahaakanyeren’ye. Owo onnathariha: “Ti nthowa nene mahiku oothene kinayaaka weecelela mapuro ooreera. Mmapuro yaawo, kinnawerya okhala meekhaaka ni oloca chiryene ni Yehova kihaakanyeriwe.”

9. Naamwi aakhala ooweiwa, ti mwawiihai Yesu oonihenryeiye wi aanavaha esisapo onthamwene awe ni Yehova?

⁹ Yesu aari ooweiwaxa. Variyari va orummwa awe veelaponi yavathi, muloko wa achu waanamuchara mapuro oothene weiwo owo aayeiyewo, nave yaanachuna okhala ni yoowo. Ekwaha emoha, “achu oothene a epooma yeele yaathukumana vamulako” wi emoone yoowo. Naamwiihiiha, Yesu aanaavya elukuluku wi avekele wa Yehova. Ohaakumve oxavo, owo aanaya “otakhwani” wi akhalewo mukhateiye ni Tiithi awe.—Mar. 1:32-35.

10-11. Ekano taani Yesu aavanheiye arummwa awe enaphwanyeya mu Mateu 26:40, 41, nyenya tiheeni yeeren’ye?

¹⁰ Ohiyu wookuchula ahaakumve okhwa, omakiseryo wa muteko awe, Yesu tho aahaavya nipuro noomaaleleya wi avekele ni wuupuwelela. Owo aaya onipuro niichaniwa Ketsemani. (Mat. 26:36) Mu ohiyu yoole, Yesu aahaavaha oohuserya awe ekano yoochuneyaxa vooloca sa nivekelo.

¹¹ Muupuwele yeeyo yeeren’ye ohiyu yoole. Vaavaa Yesu ni oohuserya awe yaaphin’yaaya o emaca yo Ketsemani, waari ohiyu eriyari. Voocharela, Yesu aaloca wa arummwa awe: ‘Muwehereryeke,’ nave aaya ovekela. (Mat. 26:37-39) Vaavaa Yesu aavekeleiye, arummwa yaarupa. Vaavaa Yesu aakonkeiye nave aaphwanya erikimurupa, owo aaloca wanaawiili  wa arummwa awe: “Muwehereryeke nave nvekeleke.” (Mwaalakhanye Mateu 26:40, 41.) Yesu aanasuwela wi awo yaari oovelavela ni oothanana vancipale. Yesu aari awiiwexexa, asuwelaka wi “mwiili ti wooceecheya.” Vano tiheeni yeeren’ye? Yesu aaya ovekela ikwaha piili, nave vaavaa aakonkeiye aahaaphwanya arummwa erupaka.—Mat. 26:42-45.

12. Tiheeni nnaphwanelaahu weera vaavaa nniisoonaahu wi nri ookoma mmuupuweloni naari oovelavelaxa wi nivekele?

¹²Muthanle elukuluku yoophwanelela. Ikwaha ikina, nnanwerya okoma mmuupuweloni naari oovelavelaxa wi nivekele. Mohintoko wiisoona hiiha? Nyuwaano hamuri mukhatiinyu. Tiheeni munaphwanelaanyu weera? Achu akina yaakhovelenle ovekela elukuluku vakhaani ehaakumve okona, ahoona okhala waphaama ovekela woosiilo ene, vaavaa ahiryaaya oovelavela. Akina ahiiwexexa wi mukhalelo yoowo anakhalaaya erikimvekela onnaakhaviherya, ntoko yootakiherya, erimukiraathi naari erimukokhora. Vano hanka wakhala wi nyuwaano munniisoona okhala awuukhuwaxa naari ooceecheya vancipale wi mvekele? Mmuleele Yehova mukhalelo muniisoonaanyu. Muroromele wi Tiithi ahu oosivela onahaala wiiwexexa.—Sal. 139:4.

13. Mmukhalelo taani ikhankoonya inaweryaaya onaakanyerya vaavaa nnamalihaahu elukuluku ni Yehova?

¹³Mwaahuseryaka, mukhaleno ephoole ni sawaakanyerya. Nivekelo tahi mukhalelo mmoha pahi wa olipiha onthamwene ahu ni Yehova. Nnanwerya weerano yeeyo moorweela wa omuhuserya Piipiliya ni ophwanyeya mmithukumano. Tiheeni nyuwaano munaphwanelaanyu weera wi mphure phaama elukuluku yeeyo mukhapelenlaanyu ntakhara miteko seiha? Mwiikohe: ‘Tiheeni enakaakanyerya vaavaa kinakhalaaka mmithukumano ni vaavaa kineereryaaka ohuserya?’ Echu eni ewerye owaakanyeryani ori olikaareliwa, waakhela emaili, michaka mu telefoni naari ekhankoonya ekina. Ikhankoonya seiha ti soochuneya, nave achu ancipale aakhalano. Alipa ootholathola akina ahoona wi okhalano telefone vakhiviru onanwerya onaakanyerya. Purusore onahuserya muupuwelo olonce wi “muchu hanawerya okhala ootikitheryeya ni echu oneereiye,” enakhala ntoko wi “muupuwelo onakhala nipuro nikina.” Ohaakumve opacerya muthukumano wa ekulucu ni wa muceche, wiiliwiili ennapakiwa yoolokoha wi  nrehererye ikhankoonya sahu wi ihiwaakanyerye akina. Apwanne mwanwerya weerano emohamoha wi ikhankoonya sanyu ihiwaakanyeryeeni vaavaa munamalihaanyu elukuluku ni Yehova?

14. Mwawiiwanana ni Filipi 4:6, 7, ti mwawiihai Yehova onahaaleiye onikhaviherya okhala ootikitheryeya?

¹⁴Mveke nikhaviheryo wa Yehova wi muhaakanyeryeye. Ikwaha ikina, nnanwerya wuupuwelaka ichu ikina vaavaa nnahuseryaahu naari nri mmithukumanoni. Wakhala wi ela enneereya ni nyuwaano, mveke nikhaviheryo wa Yehova. Eparipari wi onamukhala woovila okhala ootikitheryeya mu ichu soomunepani wakhala wi nri awuukhuwaxa. Nyenya weerano yeeyo echu yoochuneyaxa. Mwawiihiiha, mvekele mvekaka murecele wa Muluku, yoowo onahaala okhapelela ohiya pahiru murima anyu, nyenya tho “muupuwelo anyu.”—Mwaalakhanye Filipi 4:6, 7.

15. Ntakhara heeni eraaya yaphaama omaliha elukuluku ni Yehova?

¹⁵ Ti yaphaama wiivaha elukuluku wi niloce ni Yehova, onwiriyana yoowo ni wuupuwelela vooloca sa yoowo. Ntakhara heeni? Yoopacerya, ntakhara wi munahaala opaka soolakelela saphaama. Piipiliya onnaroromeliha wi “oneeca ni achu a miruku onamukhala namiruku.” (Masi. 13:20, BNM) Mwawiihiiha, wakhala wi munnamaliha elukuluku ni Yehova, yoowo ori amirukuxa waapwaha oothene, mweeparipari munahaala okhala amiruku. Nyuwaano munahaala wiiwexexaka phaama mukhalelo wa opaka soolakelela seiho inahaala omuhakalaliha ohiya inahaala omuhiciha.

16. Mmukhalelo taani omaliha elukuluku ni Yehova onanikhaviheryaaya okhala ahusiha aphaama?

¹⁶ Yanaawiili, nyuwaano munamukhala muhusiha aphaama. Yoolakelela ahu yoochuneyaxa vaavaa nnamuhuseryaahu Piipiliya ni muchu, ori omukhaviherya omusivela Yehova. Vaavaa nnamalihaahu elukuluku yincipale ni Tiithi ahu a wirimu, omusivela wahu yoowo onnaaceereryeya. Mwawiihiiha, onnakhala wookhweya omukhaviherya oohuserya ahu omusivela tho Yehova. Ti yeeyo yeeren’ye ni Yesu. Mmukhalelo woosivela, Yesu aanaloca sa Atiithi awe ophiyerya wi oohuserya awe yaahiceenyeryeya omusivela Yehova.—Yoh. 17:25, 26.

17. Ti mwawiihai nivekelo ni yoohuserya ya muchu mukhateiye enalipihaaya nroromelo nahu?

¹⁷ Yaneeraru, nroromelo nanyu nnamukhala noolipa. Muupuwele yeeyo eneereya vaavaa munamvekaanyu Yehova ohoolela, nihakararyo nnikhaviheryo. Ikwaha soothene Yehova onaakhuleiye mavekelo anyu, nroromelo nanyu nnamukhala noolipa. (1 Yoh. 5:15)  Echu ekina enahaala wookhaviheryaani olipiha nroromelo nanyu, eri yoohuserya ya muchu mukhateiye. Muupuwele wi “nroromelo nnarwa voowiriyana michaka.” (Aro. 10:17) Vaavaa nnamuhuseryaahu Piipiliya, enakhala ntoko wi nnanwiriyana Yehova. Nyenya wi nroromelo nahu nikhale noolipa, honaakhwana pahiru ohuserya vooloca sa Yehova. Echu taani ekina nnaphwanelaahu weera?

18. Ti mwawiihai Salumu 77 onooniheryeiye ochuneya waya wuupuwelela?

¹⁸ Nnaphwanela wuupuwelelaka yeeyo nnahuseryaahu. Muupuwele yeeyo yeeren’ye ni mulipa oomurepa Salumu 77. Owo aari oothanana ntakhara wi oona wi yene ni Aisarayeli yaahikhoociwa ni Yehova. Mulipa oomurepa salumu aari awuukhuwaxa ophiyerya ahinawerya orupa. (Iversikulu 2-8) Vano tiheeni owo enreiye? Owo aaloca wa Yehova: “Kinnaanyiherya muteko anyu woothene, ni waanyiheryaru seiyo nyuwo mwenraanyu.” (Eversikulu 12) Ti yawooneya wi mulipa oomurepa salumu aanasuwela yeeyo Yehova eenreiye wa achu awe khalai. Naamwi hiihaa, owo aakhala awuukhuwa nave iikoha: “Akhweya Muluku oocuwala omoriwa ikharari? Nari onanariwa wawe, woowalela mahala awe?” (Eversikulu 9) Voocharela mulipa oomurepa salumu aahuupuwelela miteko sa Yehova ni mukhalelo owo oonihenryeiye ikharari vamoha nniphwanya wa achu awe khalai. (Eversikulu 11) Teevi yaari yookhumelela ene? Mulipa oomurepa salumu aalekecheya wi Yehova harwa aahiya achu awe. (Eversikulu 15) Mmukhalelo mmohamoha, wakhala wi nyuwaano munnuupuwela yeeyo Yehova enreiye wa achu awe vamoha ni nyuwaano, nroromelo nanyu nnahaala okhala noolipa.

19. Mphurelo taani mukina nnakhalaahuno vaavaa nnamalihaahu elukuluku ni Yehova?

¹⁹ Yaneexexe ni yoochuneyaxa, omusivela wanyu Yehova onahaala waaceereryeya. Opwaha mukhalelo ori woothene, ti osivela onahaala wooceenyeryaani omwiiwelela Yehova, wiilipixerya wi mmuhakalalihe yoowo, nave ovilela variyari va nikacamiho vyakala. (Mat. 22:37-39; 1 Kor. 13:4, 7; 1 Yoh. 5:3) Nave hiyaavo eri yasisapoxa opwaha osivela wahu ntakhara Yehova ni onthamwene ahu ni yoowo!—Sal. 63:1-8.

20. Tiheeni mulakelenlaanyu wi mpharihele phaama elukuluku anyu ni Yehova?

²⁰ Muhirwe mucuwale wi ovekela, ohuserya ni wuupuwelela sinnapaka makupa a malapelo ahu. Hiihaa ntoko Yesu, mwaavye nipuro noomaaleleya wi mmalihe elukuluku ni Yehova. Musepe sawaakanyerya. Nave mveke nikhaviheryo na Yehova wi mukhale ootikitheryeya vaavaa munapharaanyu miteko soomunepani. Wakhala wi munnapharihela elukuluku anyu mmukhalelo waphaama hiihaano, Yehova onahaala wooreelihaani ni okumi woohimala mu elapo evyaani ya Muluku.—Mar. 4:24.