1-2. (1) Tiheeni enaneeriha xaxaxa omuupuwela oosiveliwaahu okhwile? (2) Tiheeni Yesu aapankeiye ohiyu ahaakumve okhwa?

NAAMWI oosiveliwaahu yaale akhwile khalai, hiyaano ninnawuupuwela. Hiyaano ninnuupuwela vooloca sa yaawo xaxaxa mu nihiku nenlo akhwilaaya.

² Eyaakha ti eyaakha, hiyaano ninnakhala vamoha ni macikhwi orukurerya elapo yaawo anathukumana wi emuupuwelele muchu yoowo nnamusivelaahu—Yesu Kristu. (1 Ped. 1:8) Hiyaano nnahaala othukumana wi nimuupuwelele muchu yoowo ovanhe okumi awe ntoko mukucho wi anoopole wa yoocheka ni okhwa. (Mat. 20:28) Mweeparipari, Yesu onachuna wi oomuchara awe yuupuweleleke okhwa wawe. Ohiyu ahaakumve okhwa, owo aarehererya yoolya yavameekhaaya nave aalamulela: “Erani ela yawupusherya’ka.” *—Luka 22:19, NN.

3. Tiheeni nnahaalaahu othokororya mmwaha yoola?

³ Achu avakhaani yaawo anaphiya va Yawuupuxerya ya okhwa wa Yesu arino ewehereryo ya okhala wirimu. Nyenya ancipale yaawo arino ewehereryo ya okhala veelaponi ya vathi annaphiya tho va yawuupuxerya yeela. Mmwaha yoola, nnahaala othokororya mathowa taani aneeriha makhuuru yaala oomeeli ophiya va Yawuupuxerya ya okhwa wa Yesu eyaakha ti eyaakha. Nnahaala tho othokororya mukhalelo nnaphuraahu orweela wa ophiya va yawuupuxerya yeela. Hankooni nipacerye nthokororyaka mathowa makina ntakhara heeni oothanliwa anaphiyaaya va yawuupuxerya.

4. Ntakhara heeni oothanliwa annalya ephaawu ni owurya eviinyu va Yawuupuxerya?

⁴ Eyaakha ti eyaakha, oothanliwa aakhalano ekari ya ophiya va Yawuupuxerya ni opaka makupa. Ntakhara heeni ti yoophwanelela wa yaawo olya ephaawu ni owurya eviinyu? Wi naakhule nikoho nenla, muthokororye yeeyo yeeren’ye ohiyu wookuchula wa okumi wa Yesu veelaponi yavathi. Amanle Paska, Yesu aapaceryiha yeeyo yaahaala osuweliwa ntoko Yoolya Yoohiyu ya Apwiya. Owo aaviriha ephaawu ni eviinyu wa arummwa awe oororomeleya khumi nammoha nave aaloca wa yaawo wi elye ni owurya. Yesu aahaaleela yaawo vooloca sa malakano meeli, naari wiiwanana—nlakano nivyaani ni nlakano na Omwene. * (Luka 22:19, 20, 28-30) Malakano yaala aheeriha okhala wooweryeya wa arummwa yaale ni achu akina yaawo athanliwe wi yakhale mamwene ni anamukucho wirimu. (Wup. 5:10; 14:1) Pahiru oothanliwa yaawo ahanle, * yaawo anapaka makupa mu malakano yaala meeli, ananwerya olya ephaawu ni owurya eviinyu va Yawuupuxerya.

5. Tiheeni oothanliwa asuwenlaaya vooloca sa ewehereryo yeeyo avahiwaaya?

⁵ Nla nthowa nikina nnaweeriha oothanliwa ophiya va Yawuupuxerya. Okhala waya va Yawuupuxerya yeela ennaavaha ekari wi yuupuwelele vooloca sa ewehereryo aya. Yehova ohaavaha awo ewehereryo yootikhiniha—wi ekhaleno mwiili ohinakhwa nave okumi ohinuuca wirimu, wi elamulele ni Yesu yoowo oviihiwe mookhwani vamoha ni a 144.000 nave opwaha soothene, anahaala weemela vamiithoni va Yehova Muluku. (1 Kor. 15:51-53; 1 Yoh. 3:2) Achu oothanliwa aasuwela wi aawompwa wi ekhaleno ekari ya oya wirimu. Nyenya wi yeemereryiwe oya wirimu, awo anaphwanela okhala oororomeleya ophiyerya okhwa waya. (2 Tim. 4:7, 8) Ela ennaweeriha oothanliwa okhala oohakalala vaavaa anasuwelaaya ewehereryo aya ya wirimu. (Tito 2:13) Hanka vooloca sa “ipucepuche ikina”? (Yoh. 10:16) Mathowa taani makina aneeriha iho ophwanyeya va Yawuupuxerya ya Okhwa wa Yesu?

6. Ntakhara heeni ipucepuche ikina sinnaphwanyeya va Yawuupuxerya eyaakha ti eyaakha?

⁶ Ipucepuche ikina sinnaphiya va Yawuupuxerya, ohiya wi elye ephaawu naari owurya eviinyu, nyenya iho sinnahakalala okhala vaava. Mu 1938, yaale arino ewehereryo ya okhala veelaponi yavathi, yaawompwa mu ekwaha yoopacerya wi ephiye va Yawuupuxerya. Mulipeleli 1 a Marsu a 1938 a Enkelesi, aaloca: “Yaahaala okhala yaphaama wa [ipucepuche ikina] ophwanyeya va muthukumano ni woona yeeyo eneereya. . . . Eyo yaaphwanela okhala elukuluku yoohakalaliha wa yaawotho.” Hiihaa ntoko muchu oowompwa onahakalaleiye ophiya va efesta ya othela, ipucepuche ikina sinnahakalala ophwanyeya va Yawuupuxerya.

7. Opwaha soothene, tiheeni eneeriha ipucepuche ikina owiriyana mwaha wa Yawuupuxerya?

⁷ Ipucepuche ikina sinnahakalalela ewehereryo aya. Awo annawiriyana mwaha va Yawuupuxerya, opwaha soothene awo anatikitheryeya wa yeeyo Kristu ni a 144.000 anahaalaaya weera wa achu oororomeleya variyari va olamulelo wa iyaakha 1.000. Mu olamulelo wa Yesu Kristu, yaale anahaala olamulela wirimu anahaala weeriha elapo okhala parataiso nave anahaala waakhaviherya  achu awiiwelela okhala oophaameya. Ti yoohakalaliha wa achu macikhwi ophwanyeya va Yawuupuxerya wi yuupuwelele sooloherya sa Mpiipiliyani seiyo inahala waakhwanela omwaahiyu, ntoko seiyo inaphwanyeya mu Isaiya 35:5, 6; 65:21-23; ni Wupulula 21:3, 4. Moorweela wa wiisaanyiherya eri vamoha ni oosiveliwaaya mu elapo evyaani, awo annalipiha ewehereryo aya ya omwaahiyu nave annalakelela ohihiya omurumeela Yehova.—Mat. 24:13; Gal. 6:9.

8. Mathowa taani makina aneeriha ipucepuche ikina ophwanyeya va Yawuupuxerya?

⁸ Muthokororye mathowa makina aneeriha ipucepuche ikina ophwanyeya va Yawuupuxerya. Awo annachuna wooniherya osivela waya ni waakhaviherya oothanliwa. Masu a Muluku yaaloherya wi oothanliwa ni yaale arino ewehereryo ya okhala veelaponi yavathi yaahaala olapaka vamoha. Mwawiihai? Hankooni nthokororye sootakiherya savakhaani.

9. Ti mwawiihai yooloherya ya Zakariya 8:23 enooniheryaaya wi ipucepuche ikina sinnaakhaviherya oothanliwa?

⁹ Mwaalakhanye Zakariya 8:23. Yooloherya yeela yaphaama ennooniherya mukhalelo ipucepuche ikina inawoonaaya anna ni arokora aya oothanliwa. Nsu nawi “muYuuta” ni “nyuwo” nnaloca nikhuuru nimoha—oothanliwa ari veelaponi. (Aro. 2:28, 29) “Achu khumi a ilocelo soothene a maloko oohiyanahiyana” anaahiwa ipucepuche ikina. Awo ‘annamwaakeelela,’ naari wi, annaakhaviherya moororomeleya anna oothanliwa emurumeelaka vamoha Yehova. Ti nthowa nene awo anakhalaaya awiirehererya wi ephwanyeye mu ohiyu va Yawuupuxerya ya Okhwa wa Yesu, yaakhaviheryaka ni murima aya woothene oothanliwa.

10. Ti mwawiihai Yehova onaakhwaniheryeiye yooloherya ya Ezekiyeli 37:15-19, 24, 25?

¹⁰ Mwaalakhanye Ezekiyeli 37:15-19, 24, 25. Yehova onnaakhwaniherya yooloherya yeela eerihaka wi oothanliwa ni ipucepuche ikina elapake vamoha mwawiiwanana. Yooloherya ennaloca sa ikopo piili. Yaale arino ewehereryo ya okhala wirimu ari ntoko ekopo ya “Yuuta” (nihimo nenlo Yehova aathanleiyemo mamwene) nave yaale arino ewehereryo ya okhala veelaponi yavathi ari ntoko ekopo ya “Efarayimu.” * Yehova aahaala ophitaanya makhuuru yaala meeli wi ekhale “ekopo emoha.” Eyo enataphulela wi makhuuru yaala meeli annarumeela vamoha emwiiwelelaka Mwene aya Yesu Kristu. Yawooniherya ya yeela ti yawi iyaakha soothene oothanliwa ni ipucepuche ikina annakhala vamoha va Yawuupuxerya, ohiya ntoko makhuuru meeli oovalaanyiwa, nyenya ntoko “muhuwo mmoha ni mukukhula mmoha.”—Yoh. 10:16.

11. Ti mwawiihai “ipucepuche” inalociwa mu Mateu 25:31-36, 40 inaakhaviheryaaya anna a Kristu?

¹¹ Mwaalakhanye Mateu 25:31-36, 40. “Ipucepuche” mu niphwanaphwaniho nenla achu eekhaikhai yaawo anakhala mu elukuluku yookuchula nave arino ewehereryo ya okhala veelaponi yavathi, Yesu tho aawiichana yaawo ntoko ipucepuche ikina. Ipucepuche seiya sookhalano murici wa waakhaviherya Akristu oothanliwa yaawo nlelo ari veelaponi. Iho sinneerano yeela xaxaxa moorweela wa opaka makupa mmuteko mutokweene wa olaleerya ni waapaka oohuserya a maloko oothene.—Mat. 24:14; 28:19, 20.

12-13. Mikhalelo taani mikina ipucepuche ikina inaakhaviheryaaya anna a Kristu?

¹² Eyaakha eri yoothene, ehaakumve Yawuupuxerya enneereya echu yavameekhaaya; Ipucepuche  ikina sinnaakhaviherya Akristu oothanliwa moorweela wa olapa mmukipici wa olaleerya wa elapo yoothene. Yoolakelela ya mukipici yoola ori waakhaviherya achu yaawo arino nchuno wi ephwanyeye va Yawuupuxerya. (Moone ekaaxa “ Apwanne Munniirehererya Ntakhara Yawuupuxerya ya Okhwa wa Yesu.”) Ipucepuche ikina tho sinnakhaviherya orehererya yawuupuxerya mmilokoni mwaya naamwi ahirimo oothanliwa mmuloko aya. Ekari etokweene wa yaawo waakhaviherya asinna a Kristu mmikhalelo seiya. Ipucepuche ikina sinnasuwela wi wa Yesu nikhaviheryo nri noothene nnaavahaahu oothanliwa ori ntoko wi nnamvaha yene.—Mat. 25:37-40.

¹³ Mathowa taani makina wa oothene ahu, moohipwacha ewehereryo ahu ananeeriha ophwanyeya va Yawuupuxerya?

14. Ti mwawiihai Yehova ni Yesu yoonihenryaaya osivela wa hiyo?

¹⁴Ophwanyeya va Yawuupuxerya mukhalelo mmoha wa othamalela osivela yoowo Yehova ni Yesu oonihenryaaya wa hiyo. Yehova oohooniherya wi onnanisivela mmikhalelo soohiyanahiyana, nyenya mmoha wa seiyo ti wavameekhaaya. Moosivela Yehova aamurumiha Mwanawe oosiveliwa wi aahooseye ntakhara hiyo. (Yoh. 3:16) Ohiya yeeyo, hiyaano tho ninnamuthamalela Yesu. Haavo aamukhinyerenrye Yesu ovaha okumi awe wa hiyo, nyenya eenreno yeeyo nthowa na onisivela. (Yoh. 15:13) Hiyaano hinni niwerye okookiherya osivela yoowo Yehova ni Yesu yoonihenryaaya wa hiyo. Nyenya nnanwerya wooniherya wi ninnathamalela moorweela wa mukhalelelo nnapharihelaahu okumi ahu nihiku ti nihiku. (Kol. 3:15) Nave ti nthowa nene nnaphiyaahu va yawuupuxerya. Moorweela wa weerano yeela ninnuupuwelela osivela yoowo yoonihenryaaya wa hiyo navetho ninnooniherya osivela yoowo nryaahuno wa yaawo.

15. Ntakhara heeni woopola ti woochuneya wa oothanliwa ni ipucepuche ikina?

¹⁵Hiyaano ninnathamalela vancipale woopola. (Mat. 20:28) Wa oothanliwa, woopola ti woochuneyaxa woona wi onneeriha okhala wooweryeya okhalano ewehereryo ya okhala wirimu. Nthowa na okhalano nroromelo mu mukucho wa Yesu, oothanliwa anneeriwa awookololowa ni Yehova nave ntoko anamwane awe oothanliwa. (Aro. 5:1; 8:15-17, 23) Woopola ti woochuneya tho wa ipucepuche ikina. Nthowa na ororomela mukucho wa woopola wa Yesu, awo ananwerya okhala aweemereryeya vamiithoni va Yehova, okhalano ekari ya omurumeela yoowo mmukhalelo oneemereryeiye ni okhalano ewehereryo ya woopowa mu “yohósha etokotoko.” (Wup. 7:13-15, NN) Mwawiihiiha, moohipwacha ewehereryo anyu yaari ya okhala wirimu naari ya okhala veelaponi yavathi, munanwerya wooniherya wi woopola ti woochuneyaxa wa nyuwaano moorweela wa ophiya va Yawuupuxerya iyaakha soothene.

16. Nthowa taani nikina nryaahuno na ophiya va Yawuupuxerya?

¹⁶ Nthowa nikina na ophiya va Yawuupuxerya ti nawi nnachuna omwiiwelela Yesu. Oothene ninnachuna wiiwelela nlamulo nenlo Yesu aavanheiye, moohipwacha ewehereryo ahu. Mu ohiyu ahaakumve okhwa Yesu aahi: “Mweerekeno yeela mukuupuwelaka miyo.”—1 Kor. 11:23, 24.

17. Mmukhalelo taani Yawuupuxerya ya Okhwa wa Yesu enanikhaviheryaaya omwaacamela Yehova?

¹⁷Hiyaano ninnamwaacamela Yehova. (Tiy. 4:8) Ntoko nonnaahu, Yawuupuxerya ya  Okhwa wa Yesu elukuluku yoophwanelela ya wuupuwelela ewehereryo yeeyo Yehova onivanheiye ni wuupuwelela osivela yoowo oonihenryeiye wa hiyaano. (Yer. 29:11; 1 Yoh. 4:8-10) Nave vaavaa nneeraahuno yeela, osivela wahu ntakhara Yehova onnakhala woolipa nave ninnamwaacamela yoowo.—Aro. 8:38, 39.

18. Wuupuwelela yootakiherya ya Yesu enahaala onikhaviherya olakelela weera eheeni?

¹⁸Hiyaano ninnalakelela ochariha yootakiherya ya Yesu. (1 Ped. 2:21) Wi nrehererye murima ahu ehaakumve Yawuupuxerya, ninnakhalano waalakhanyiwa wa Piipiliya vooloca sa mahiku ookuchula a Yesu veelaponi yavathi. Ohiyu wa Yawuupuxerya, mwaha onaperekhiwa onnanikhaviherya wuupuwelela mukhalelo Yesu oonihenryeiye osivela ntakhara hiyaano. (Éfe. 5:2; 1 Yoh. 3:16) Vaavaa nnaalakhanyaahu ni wuupuwelela vooloca sa okumi wa Yesu, ninnakhala oolakelela “wetxa ntoko yowo entxeiye.”—1 Yoh. 2:6, BNM.

19. Nni niwerye hai otitelela mu osivela wa Muluku?

¹⁹Ninnalakelela otitelela okhala asinthamwene a Yehova. (Yuda 20, 21) Onthamwene ahu ni Yehova onahaala otitelela okhala woolipa waakhala wi ninnamwiiwelela yoowo, ninnapaka owetha wahu wi neelihe nsina nawe ni ohakalaliha murima awe. (Masi. 27:11; Mat. 6:9; 1 Yoh. 5:3) Ophiya va Yawuupuxerya ya Okhwa wa Yesu ennanikhaviherya okhala oolakelela otitelela okhala mmukhalelo yoowo onamuhakalaliha Yehova, enakhala ntoko wi nnaloca nriki: ‘Pwiya aka kinachuna otitelela woorumeelakaani okhala wookhala!’

20. Mathowa taani aphaama nryaahuno a ophwanyeya va Yawuupuxerya ya Okhwa wa Yesu?

²⁰ Moohipwacha ewehereryo ahu yaari ya okhala wirimu naari veelaponi yavathi okhala wookhala, oothene nookhalano mathowa oophwanelela a ophwanyeya va Yawuupuxerya ya Okhwa wa Yesu. Nla nihiku nenlo nnuupuwelelaaahu okhwa wa muchu yoowo nnamusivelaahu vancipale, Yesu Kristu. Opwaha soothene, ninnuupuwelela mukhalelo mutokweene wa osivela—osivela yoowo Yehova oonihenryeiye wa hiyo moorweela wa omvaha Mwanawe ntoko mukucho. Eyaakha yeela, yawuupuxerya enahaala okhala ohiyu wa Naneethanu 15 a Apirili a 2022. Hiyaano ninnamusivela vancipale Yehova ni Yesu, mwa yeeyo, hiyaavo eri yoochuneyaxa opwaha ophwanyeya va Yawuupuxerya ya Okhwa wa Yesu.