1. Nikacamiho taani noovila Tavite aahoolenleiye?

TAVITE aari mulipa oochawa nthowa nawi ookhala aachuna omwiipha yoowo. Sawuli, mwene oowerya Aisarayeli, aalakelela omwiipha. Vaavaa Tavite aachuneiye yoolya, owo aaheemela epooma yo Nobi, weiwo mwawiiyeviha aavenkeiye wi avahiwe ipaau thanu. (1 Sam. 21:1, 3) Voocharela, owo ni alopwana awe yaachawela okhukuni. (1 Sam. 22:1) Ntakhara heeni Tavite aareiye mmukhalelo yoola?

2. Ichu taani soonanara Sawuli aapankeiye? (1 Samuwele 23:16, 17)

² Sawuli aapacerya omukhalela nrima Tavite nthowa nawi achu ancipale yaanasiveliwa ni yoowo ni omucicimiha nthowa nawi aavootha mu ikhoco sincipale. Sawuli tho aasuwela wi Yehova aamukhooca yoowo nthowa nawi haamwiiwelenle, nave wi Yehova aamuthanla Tavite wi akhale mwene oocharela. (Mwaalakhanye 1 Samuwele 23:16, 17.) Nyenya Sawuli iiha nlelo ari mwene o Isarayeli, aakhalano anakhoco ancipale ni achu ancipale yaawo yaamukhaviherya, mwawiihiiha Tavite aaphwanela ochawa. Apwanne Sawuli uupuwela wi aahaala omuhiiha Muluku omweera Tavite ntoko mwene? (Isa. 55:11) Piipiliya hanaloca, nyenya nnaphwanela ororomela echu emoha: Sawuli iihela va yawoopiha. Oothene yaale aneererya owana ni Muluku hanavootha!

3. Ti mwawiihai Tavite isooneiye moohipwacha makacamiho aahooleleiye?

³ Tavite aari muchu awiiyeviha. Owo haathanlile wi akhale mwene o Isarayeli. Yehova taamuthanlile owo wi akhale mwene. (1 Sam. 16:1, 12, 13) Sawuli aanamwiica vancipale Tavite. Nyenya Tavite haamuruwanne Yehova nthowa na okhala va yawoopiha; naari haakacaminhe nthowa na okhalano yoolya  vakhaani ni okhala mmakhukuni. Moohiyana, waari mu nikhuku nenla aarempeiyemo macipo ooreera oomvuwihano Muluku ophitaanyerya masu a yoorepa ya mwaha ahu: “Yaawo anawaavya Apwiya echu yaphaama herwa yaathowa.”—Sal. 34:10.

4. Makoho taani nnahaalaahu othokororya, nave ntakhara heeni awo toochuneya?

⁴ Olelo alapeli ancipale a Yehova ilukuluku ikina hanakhalano yoolya yawaakhwanela naari ichu ikina seiyo enachunaaya wi ekhale. * Ela yoheereya wa alapeli ancipale a Yehova, xaxaxa mu elukuluku yeela ya epahu yeela ya koronaviru. Nave ichu sinahaala otitelela okhala soovila vaavaa nnaacamelaahu “ekoi etokotoko.” (Mat. 24:21, BNM) Ni yeela mmuupuweloni, hankooni naakhule makoho maxexe: Mmukhalelo taani Tavite ‘ahaathoyiweiye echu yaphaama?’ Ntakhara heeni nnaphwanelaahu ohuserya okhala awaakhwaneliwa? Ntakhara heeni nnaphwanelaahu ororomela wi Yehova onahaala onikhapelela? Nave ti mwawiihai nneeraahu niireherye hiihaano ntakhara omwaahiyu?

5-6. Ti mwawiihai Salumu 23:1-6 onanikhaviheryeiye wiiwexexa yeeyo Tavite aatharinheiye vaavaa aalonceiye wi alapeli a Muluku “echu yaphaama herwa yaathowa?”

⁵ Tiheeni Tavite aachuneiye othariha vaavaa aalonceiye wi alapeli a Yehova “echu yaphaama herwa yaathowa?” Nnanwerya wiiwexexa moorweela wa othokororya masu oolikana anaphwanyeya mu Salumu 23. (Mwaalakhanye Salumu 23:1-6.) Tavite aampacenrye salumu yoola ni masu ala: “Apwiya ti mukukhula aka, nkithowiwaru.” Masu oocharela a salumu yoola, Tavite onnathariha ichu seiho siri soochuneyaxa ntoko ichu saphaama seiho Yehova aavanheiye nthowa nawi aamweemererya Yehova okhala Mukukhula awe. Yehova anamuhoolela owo “mmiphito yooreera,” nave moororomeleya Owo aanamukhaviherya Tavite mu ilukuluku saphaama ni soonanara. Tavite aanasuwela wi naamwi aari “o nikuwani na munyepu” wa Yehova aahaala ohoolelaka makacamiho.  Ilukuluku ikina, owo aaniisoona okhala ooceecheya enakhala ntoko wi onavira “veeri va miyaako mwa woopiha” nave owo aahaala okhalano amwiicani awe. Nyenya woona wi Yehova aari mukukhula awe Tavite haahaala ‘woova yoonanara.’

⁶ Mwawiihiiha nookhalano naakhulo na nikoho nahu: Mukhalelo taani Tavite ‘ahaathoyiweiye echu yaphaama?’ Owo aakhalano ichu soothene aachuneiye wi atitelele omwaacamela Yehova. Ohakalala wawe hiwaarweela wa ichu soomwiilini. Tavite aanahakalala ni yeeyo Yehova amvaheiye. Echu yoochuneyaxa wa yoowo yaari yawi Yehova aanamureeliha ni omukhapelela.

7. Mwawiiwanana ni Luka 21:20-24, makacamiho taani Akristu a mu nsana noopacerya yaakhala o Yuteya yaahoolenlaaya?

⁷ Moorweela wa masu a Tavite ninnawerya woona mukhalelo oryaaya woochuneya okhalano moonelo woophwanelela vooloca sa ichu soomwiilini. Hiyaano nnanwerya ohakalala ni ichu vyakala seiho nryaahuno nyenya hannaphwanela weeriha iho okhala soochuneyaxa mu okumi ahu. Ela yaari eparipari yoochuneya yeeyo Akristu akina a mu nsana noopacerya yaakhala o Yuteya yaaphwanelaaya wiiwexexa. (Mwaalakhanye Luka 21:20-24.) Yesu aahaalopola awo wi elukuluku yaahaala ophiya vaavaa epooma o Yerusalemu yaahaalaaya ‘oriciwa ti anakhoco.’ Vaavaa ela yaahaalaaya weereya, awo yaaphwanela ‘ochawela o miyaakoni.’ Waakhanle wi awo aahiya epooma, yaahaala otitelela okhala, nyenya yaaphwanela ohiya ichu sincipale muculi. Mu iyaakha sa muculi, Mulipeleli aaloca: “Awo yaahiya imaca ni ipa saya, ehikunxeru mano sookhalano saya. Eroromelaka naakiho nnikhaviheryo na Yehova, yaakuha malapelo awe ohoolo wa soothene sooneya ntoko wi saari soochuneya.”

8. Nihusiheryo taani noochuneya nnaweryaahu ohuserya orweela wa yeeyo yeeren’ye ni Akristu a mu nsana noopacerya yaawo yaakhala o Yuteya?

⁸ Nihusiheryo taani nnahuseryaahu orweela wa yeeyo yeeren’ye ni Akristu a mu nsana noopacerya yaawo yaakhala o Yuteya? Mulipeleli mmoha ooloca wi: “Omwaahiyu, hiyaano nnahaala ohoolela saweeha seiho sinahaala wooniherya mukhalelo ichu soomwiilini siryaaya soochuneya wa hiyaano. Apwanne iho ichu soochuneya, naari echu yoochuneya ori ovuluxiwa nthowa na okhala ororomeleya wa Muluku? Vaavaa makuchuwelo anaacamelaaya, hiyaano nnahaala ovilela ni makacamiho ni opaka owetha wahu. Mwawiihiiha, ti woochuneya okhala ntoko Akristu yaale a mu nsana noopacerya yaawo yaakhumme o Yuteya.” *

9. Ti mwawiihai ekano ya Paulo wa Aheepiri enoolipihaayani?

⁹ Munnawerya waanyiherya mukhalelo waaryaaya woovila wa Akristu yaale ohiya ichu saya ni opacerya mukhalelo mukina wa okumi mu nipuro nikina? Awo yaanachuna nroromelo wi eroromele wi Yehova aahaala waakhaviherya ophwanya ichu seiho awo yaachunaaya. Nyenya ela ti yeeyo yaahaala waakhaviherya yaawo. Mu iyaakha thanu Aroma ehaakumve omurukurerya Yerusalemu, Paulo aavahererya ekano wa Aheepiri: “Muhikhale oosivela ikhorowa, mukhwaaneliweke ni seiyo muryaanyuno. Tiwi, mwaneene ooloca, ariki: Nkirwa koohiya, nari woonyanyala mano. Hiihaa, nuuminhe murima, nloceke: Apwiya tanakikhaviherya, nkoovaru echu. Muchu anii akeereleni?” (Ahe. 13:5, 6) Yaari yookhweya wa yaale yaapharihenle ekano ya Paulo, wi ekhale awaakhwaneliwa mu nipuro nivyaani yaaraayawo. Awo yaanaroromela wi Yehova aahaala waakhapelela mu ichu seiho saathowa.  Masu a Paulo annaniroromeliha wi hiyaano tho nnanwerya ororomela wi Yehova onahaala ovahererya soothowa sahu.

10. “Yoovitheya” taani Paulo onileenleiye?

¹⁰ Paulo aahimvaha ekano yoolikana Timóteo, nave tho ekano yeela ennaphariheleya wa hiyaano. Owo oorepa: “Nakhalano soolya ni soowara, nihakalaleke ni seiyo.” (1 Tim. 6:8) Apwanne ela enataphulela wi hannaphwanela opuha yoolya yoosiva, okhalano empa yaphaama, naari othuma soowara ivyaani? Ela tahi yeeyo Paulo aaloceiye. Paulo aaloca wi hiyaano nnaphwanela ohakalalaka ni echu vyakala yoomwiilini nryaahuno. (Fil. 4:12, TNM) Ela yaari “yoovitheya” ya Paulo. Muhakhu ahu woochuneyaxa onthamwene ahu ni Muluku, ohiya echu vyakala yoomwiilini yeeyo nryaahuno.—Hab. 3:17, 18.

11. Nihusiheryo taani vooloca sa waakhwaneliwa nnahuseryaahu orweela wa masu a Mose wa Aisarayeli?

¹¹ Onanwerya okhalavo ohiyana variyari va moonelo ahu ni wa Yehova wa yeeyo nnachunaahu. Muthokororye yeeyo Mose aaleenleiye Aisarayeli emanle omaliha iyaakha 40 mutakhwani: “Apwiya Muluku aa ahooreliha ni muteko woothene wa matataa nave aawoona weeca waa mu ntakhwa nenle ntokotoko. Miyaakha makhumi masheshe ari ni weyo, hothowiweru echu.” (Malam. 2:7) Variyari va iyaakha seihe 40, Yehova aahaavahererya Aisarayeli mana wi elye. Yehova aaheeriha wi soowara saya sihaahuwe. Mwawiihiiha, awo yaahititelela owara soowara seiho yaakhummaayano o Yikuputu. (Malam. 8:3, 4) Naamwi akina yoonaka ichu seiho ohikhala  echweenevo, Mose aahiwuupuxerya Aisarayeli wi awo yaakhalano ichu seiho yaachunaaya. Yehova onahaala osiveliwa wakhala wi ninnahuserya okhala awaakhwaneliwa. Owo onachuna wi nthamaleleke ichu seiho onanivaheiye naamwi siri sa vakhaani ni wiiwexexa wi iho samahala sinarweela wa yoowo.

12. Tiheeni enooniherya wi Tavite aanamuroromela Yehova, ohiya wiiroromela mukhateiye?

¹² Tavite aanasuwela wi Yehova toororomeleya nave onnaakhapelela yaawo anamusivela Yoowo. Naamwi okumi awe waari va yawoopiha vaavaa aamurepeiye Salumu 34, nroromelo na Tavite wa Yehova naari noolipa ophiyerya wi aalekecheya wi ‘munkeelo a Apwiya’ aari ‘voorukurerya’ vawe. (Sal. 34:7) Akhweya Tavite aamulikanyiha munkeelo a Yehova ntoko nakhoco yoowo onarica nipuro na anakhoco, ilukuluku soothene aawehereryaka amwiicani. Tavite aari mukhoco oolipa murima nave Yehova aamuroromeliha wi owo aahaala okhala mwene, nyenya owo haaroromenle mavyakelo awe a omvonya mpilima naari haapharihenle nlema wi iisaakihe wa amwiicani awe. (1 Sam. 16:13; 24:12) Tavite aanamuroromela Muluku, aroromelaka wi munkeelo a Yehova ‘onnawaakiha yaawo anamoova Yoowo.’ Mweeparipari, hiyaano hinnaweherya okhapelela wootikhiniha olelo. Nyenya ninnasuwela wi oothene yaale anamuroromela Yehova naamwi ekhwile hiihaano anahaala waakhela okumi woohimala.

13. Vaavaa Koki a Makoki onahaaleiye onihiphela, ntakhara heeni onahaala wooneya ntoko wi hinaano naakiho, nyenya ntakhara heeni nihinaphwanelaahu woova? (Moone eruku va ekaapa.)

¹³ Moohilekela, ororomela wahu mavyakelo a okhapelela wa Yehova onahaala weehiwa. Vaavaa Koki a Makoki, wiiwanana wa maloko, onahaalaaya waahiphela achu a Muluku, nnahaala wuupuwela wi awo anahaala oniipha. Nnaphwanela olekecheya wi Yehova onanwerya ni onahaala onivuluxa. Wa maloko, nnahaala wooneyaka ntoko ipucepuche sihirino naakiho. (Ezek. 38:10-12) Hiyaano hinni nikhaleno akapuchi, nave hinni nikhale oorehereya ntakhara owana. Maloko anahaala wuupuwela wi onahaala okhala wookhweya onitoloxa. Awo heni esuwele wi ankeelo a Yehova ari oorehereya wi enaakihe. Nyenya hiyaano noosuwela yeela nthowa nawi nookhalano nroromelo. Ntakhara heeni maloko ahinahaalaaya osuwela yeela? Awo haanono nroromelo mwa Muluku. Awo anahaala otikhiniheya owoona anakhoco a wirimu ewanihaka ntakhara hiyo!—Wup. 19:11, 14, 15.

14. Tiheeni nnaphwanelaahu weera hiihaano wi niirehererye ntakhara omwaahiyu?

¹⁴ Nni niwerye hai wiirehererya hiihaano ntakhara omwaahiyu? Echu yoopacerya wa soothene, hannaphwanela wuupuwelaka wi ichu soomwiilini ti soochuneyaxa, nthowa nawi nihiku nimoha iho sinahaala ocakanela. Ti woochuneya okhala oohakalala ni yeeyo nryaahuno, nave tho nnaphwanela ohakalala vancipale woona wi nookhalano onthamwene ni Yehova. Wakhala wi noomusuwela phaama Muluku ahu, nnahaala olekecheya moomalela wi owo onahaala onikhapelela vaavaa Koki ni Makoki onahaaleiye onihiphela.

15. Ichu taani seeren’ye ni Tavite vaavaa aareiye mmiravo seiho saamuhusinhe wi Yehova ilukuluku soothene aahaala omukhaviherya?

¹⁵ Muthokororye echu ekina yaamukhavihenrye Tavite nave yeeyo enahaala owerya onikhaviherya wi niirehererye ntakhara makacamiho. Tavite ooloca: “Nkalawihani, nave onani wi Apwiya taphaama. Ooreeriwa muchu  yoowo onaaroromela yaawo!” (Sal. 34:8) Masu yaala annathariha ntakhara heeni Tavite aanasuwela wi owo aaphwanela ororomela nikhaviheryo na Yehova. Tavite ilukuluku soothene aanamuroromela Yehova, nave hantonko wuuliheya muru yoowo. Vaavaa owo aareiye mmiravo, Tavite aahiwana ni Mfilisti oorakama Koliyati nave aahiloca wa nakhoco yoola akuru: “Olelo vaava, Apwiya anamukinnyererya weyo mmatatani mwaka.” (1 Sam. 17:46) Voocharela, vaavaa Tavite aamurumeleiye Sawuli, Sawuli aaheererya ilukuluku sincipale omwiipha Tavite. Nyenya “Apwiya yaari ni” Tavite. (1 Sam. 18:12) Nthowa nawi Tavite aahoona nikhaviheryo na Yehova khalai, owo aanasuwela wi Yehova chiryene aahaala omukhaviherya mmakacamiho awe.

16. Mmikhalelo taani soophara muteko nneeraahu ‘nlawihe’ oreera murima wa Yehova?

¹⁶ Wakhala wi ninnaroromela chiryene ohoolela wa Yehova hiihaano, nnahaala olekecheya wi owo onahaala onivuluxa omwaahiyu. Nnaphwanela okhalano nroromelo ni opaka yoolakelela ya omuroromela Yehova wi naaveke apatarau ahu elukuluku ya wiichuuwa wi niweryeke ophiya mmithukumano sa ekulucu naari sa muceche naari waaveka wi evukule elukuluku ya muteko wi niweryeke ophwanyeya mmithukumano soothene sa muloko ni omalihaka elukuluku yincipale mmuteko woolaleerya. Naanyiherye wi patarawu ahu ookhooca yooveka nave n’yeleela muteko ahu. Apwanne ninnaroromela wi Yehova harwa anihiya naari onnyanyala nave wi owo ilukuluku soothene onahaala ovahererya soothowa sahu? (Ahe. 13:5) Ancipale yaawo ari mmuteko wa elukuluku yoothene ananwerya othariha saweereya sinooniherya mukhalelo Yehova aakhavihenryeiye vaavaa awo yaachunaaya nikhaviheryo nawe. Yehova toororomeleya.

17. Teevi eri yoorepa ya eyaakha ya 2022, nave ntakhara heeni eyo ti yoophwanelela?

¹⁷ Yehova ori mmakupa ahu, hinaano mathowa a woova yeeyo enahaala weereya omwaahiyu. Muluku ahu harwa anihiya, wakhala wi nootitelela okuha Omwene awe mu nipuro noopacerya mu okumi ahu. Wi enuupuxerye ochuneya waya wiirehererya hiihaano ntakhara mahiku ookacamiha anoorwa ni ororomela wi Yehova harwa anihiya, Nikhuuru Noolamulela noothanla yoorepa ya Salumu 34:10 ntoko yoorepa ahu ya eyaakha ya 2022: “Yaawo anawaavya Apwiya echu yaphaama herwa yaathowa.”