1-3. Mikhalelo taani inahaala oneeriha winla?

TEEVI yaari ekwaha yookuchula nyuwaano mwinlalaanyu? Ikwaha ikina, hiyaano ninnanla nthowa na ohakalala, nyenya ikwaha sincipale, ninnanla nthowa na ohooxeya. Ntoko yootakiherya, hiyaano ninnanla nthowa na omuyeleela oosiveliwa ahu mookhwani. Laura, murokora mmoha o Estatu Unitu, oorepa: “Ikwaha ikina, kaanahooxeya nthowa na okhwa wa mwanaka enakhala ntoko wi hiyaavo yaahaala okihakararya. Mu elukuluku yeele, kaanoona wi murimaaka waanatepa wiicela kihinawerya wiiwexexa ntakhara heeni kaatitelelaaka okhala mukumi.” *

² Hiyaano tho nnanwerya winla moorweela wa mathowa makina. Hiromi, piyoneera mmoha o Xapau, ooloca: “Ikwaha ikina, kinnatepa oceecheya nthowa nawi achu hanakhalano nchuno na ohuserya vooloca sa Piipiliya. Vakina vaya, kinnavekela wa Yehova kinlaka kimvekaka nikhaviheryo wi kimphwanye muchu onachuna omuhuserya Piipiliya.”

³ Apwanne nyuwaano ikwaha ikina mohintoko wiisoona ntoko Hiromi naari Laura? Ancipale a hiyo nohintoko wiisoona mmukhalelo ntoko yoola. (1 Ped. 5:9) Hiyaano ninnachuna ‘omurumeela Yehova ni ohakalala.’ Nyenya ikwaha ikina, nnanwerya omurumeela yene ninlaka nthowa na omuyeleela oosiveliwa ahu mookhwani, oceecheya naari mikhalelo ineeha ororomeleya wahu wa Muluku. (Sal. 6:6; 100:2) Tiheeni enahaala onikhaviherya ohoolela mikhalelo seiya soothene?

4. Tiheeni nnahaalaahu othokororya mmwaha yoola?

⁴ Yootakiherya ya Yesu enanwerya onikhaviherya. Yesu tho aahoolela mikhalelo soovila seiho saamweeriha owo winla. (Yoh. 11:35; Luka 19:41; 22:44; Ahe. 5:7) Nnahaala ohuserya vooloca sa ikwaha ikina seiho inlaleiye nave noone tiheeni nnahuseryaahu vooloca sa Yehova ni Yesu orweela wa yeeyo. Nnahaala woona  tho yeeyo enahaala onikhaviherya ovilela ni mikhalelo seiho sinaneeriha winla.

5. Tiheeni munahuseryaanyu vooloca sa Yesu orweela wa yaweereya enaphwanyeya mu Yohani 11:32-36?

⁵ Mu eyaakha ya 32 E.K., Yesu aamuyeleela nthamwene awe oosiveliwa mookhwani. Lasaro aahiiceliwa nave aakhwa. (Yoh. 11:3, 14) Lasaro aakhalano arokora awe eeli, Mariya ni Marta nave Yesu aanasivela vancipale emusi yeele. Athiyana yaala eeli yaathananaxa nthowa na omuyeleela munnaya. Lasaro amanle okhwa, Yesu aaya o Petaniya, weiwo Mariya ni Marta yaakhalaayawo. Vaavaa Marta aasuwenleiye wi Yesu aaphiya, owo aachimaka wi akumane ni yoowo. Mwaanyiherye oothanana yoowo aareiyeno vaavaa aalonceiye: “Apwiya, mwákhanleke wino munnaka hakákhwile.” (Yoh. 11:21, NN) Nave voocharela vaavaa Yesu aamoonneiye Mariya ni akina yinlaka, owo “áhinla.”—Mwaalakhanye Yohani 11:32-36.

6. Ntakhara heeni Yesu aahinla?

⁶ Ntakhara heeni Yesu aahinla elukuluku yeele? Liivuru Estudo Perspicaz das Escrituras onnavaha naakhulo: “Okhwa wa nthamwene awe Lasaro, ni othanana wa arokora a Lasaro waamweeriha Yesu okhala ‘awuukhuwaxa mpuwa mwawe, ni othanana.’” * Akhweya Yesu aahuupuwela mukhalelo nthamwene awe Lasaro aahooxen’yeiye ni ereca yeele ni mukhalelo owo iisoonneiye vaavaa aasuwenleiye wi aahaala okhwa. Nave mweeparipari, omoona Marta ni Mariya eri oosooseyaxa mmukhalelo yoole nthowa na okhwa wa munnaya waamweeriha Yesu winla. Waakhanle wi moomuyeleela nthamwene anyu naari muchu a veemusini mookhwani, mweeparipari nyuwaano munnawerya wiiwexexa mukhalelo Yesu oonneiye. Vano hankooni nthokororye mahusiheryo mararu nnahuseryaahu mu yaweereya yeela.

7. Tiheeni nnahuseryaahu vooloca sa Yehova orweela wa winla wa Yesu ntakhara asinthamwene awe?

⁷Yehova onniiwexexa mukhalelo muniisoonaanyu. Piipiliya onnaloca wi Yesu “yawooniherya ya okhala wawe” wa Yehova. (Ahe. 1:3)  Mwawiihiiha, vaavaa Yesu inlaleiye, nnanwerya ororomela tho wi Atiithi awe yaari oothanana. (Yoh. 14:9) Waakhanle wi munnavilela ni osooseya nthowa na omuyeleela oosiveliwa anyu mookhwani, musuwele wi tahi wi pahiru Yehova onoona wiiwexexa moonelo anyu nyenya owo tho onnathanana vamoha ni nyuwaano. Owo onnachuna vancipale wookhapelelaani ni ovukula wuukhuwa otokweene munoonaanyu.—Sal. 34:18; 147:3.

8. Ntakhara heeni ninnaphwanela ororomela wi Yesu onahaala waaviiha mookhwani yaale akhwile?

⁸Yesu onnachuna waaviiha oosiveliwa anyu mookhwani. Elukuluku vakhaani ahaakumve winla, Yesu aamuroromeliha Marta wi Lasaro ‘aahaala ovinya tho’ nave Marta aanasuwela wi Yesu aaloca eparipari. (Yoh. 11:23-27, NN) Marta aari kapuro oororomeleya a Yehova, mwa yeeyo, owo chiryene aanasuwela wi alipa a miririmo Eliya ni Eliseu yaahaaviiha mookhwani achu khalai. (1 Mam. 17:17-24; 2 Mam. 4:32-37) Nave tho owo aahiiwa vooloca sa achu yaawo Yesu aaviihaleiye mookhwani. (Luka 7:11-15; 8:41, 42, 49-56) Nyuwaano tho munanwerya okhalano nroromelo nimohamoha Marta aareiyeno. Munahaala owoona wanawiili amusi ni asinthamwene anyu yaawo akhwile. Vaavaa Yesu inlaleiye aahakararyaka asinthamwene awe oosiveliwa yawooniherya yawi owo onnachuna vancipale waaviiha mookhwani achu yaawo akhwile!

9. Hiihaa ntoko Yesu nni naakhaviherye hai yaale yaayeleenle oosiveliwa aya mookhwani? Mvahe yootakiherya.

⁹Nyuwaano munanwerya waakhaviherya yaawo yaayeleenle oosiveliwa aya. Yesu aahinla vamoha ni Marta ni Mariya, nyenya tho owo aawiriyana yeeyo awo yaachunaaya oloca nave aaloca masu oohakararya wa yaawo. Hiyaano tho nnanwerya ochariha yootakiherya ya Yesu. Dan, mutokweene mmoha onakhala o Australiya, ooloca: “Miyaano kaanachuna nikhaviheryo ntokweene kimanle omuyeleela mwaaraka mookhwani. Nave atheli ancipale yaari oorehereya okiwiriyana elukuluku eri yoothene moohipwacha waari othana naari ohiyu. Awo yaanakihiya wi kiloce mukhalelo kiisoonaaka nave tahi wi pahiru awo yoona omaala vaavaa kaapaceryaaka winla. Mwawaaceererya, awo yaanakivaha nikhaviheryo noophara muteko. Yaanakhalavo mahiku makina kaahiweryaaka weera echu, nyenya awo yaanarapiha ekaaro aka, okithumela ichu nave tho ophiyerya waapeya. Nave ilukuluku soothene yaanavekela vamoha ni miyo. Awo yaahooniherya wi yaari asinthamwene eeparipari nave wi yaari anna oorehereya okikhaviherya mu ‘elukuluku ya wuukhuwa.’”—Masi. 17:17.

10. Tiheeni yeere’ye vaavaa Yesu aaphin’yeiye o Yerusalemu nihiku na 9 a Nisani?

¹⁰ Nihiku na 9 a Nisani a 33 E.K., Yesu aaya o Yerusalemu. Vaavaa aacameleiye epooma, achu ancipale yaathukumana wi emwaakhele yoowo. Awo yaanaatelela soowara saya mumphiro yoowo Yesu aavireiyemo; achu yaala yaamukhaliha Yesu ntoko Mwene aya. Mweeparipari nihiku nenle naari noohakalaliha. (Mwaalakhanye Luka 19:36-40.) Ti nthowa nene oohuserya yaahaleelihen’yaaya vaavaa Yesu aavolonweiye mu epooma: “Aacamenleiye o Yerusalemu, [Yesu] aahoona epooma eyo anlela.” Anlaka, Yesu aaloca yeeyo yaahaala weereya wa achu o Yerusalemu.—Luka 19:41-44.

11. Ntakhara heeni Yesu aahiwinlela achu o Yerusalemu?

¹¹ Yesu aathanana nthowa nawi owo aasuwela wi naamwi achu yaamwaakhenle phaama, Ayuta ancipale hiyi ewiriyane muchaka wa Omwene yoowo aalaleeryeiye. Wa nthowa na mukhalelo aya, Yerusalemu aahaala otoloxiwa nave Ayuta yaawo yaahaala okophola yaahaala okhala akapuro. (Luka 21:20-24) Masu a Yesu yaahaakhwaniheryeya. Moothananiha achu ancipale yaahikhooca muchaka awe. Apwanne achu  a ekulucu anyu anneemererya muchaka munalaleeryaanyu? Waakhanle wi ancipale haneemererya tiheeni munahuseryaanyu orweela wa yootakiherya ya Yesu? Hankooni nthokororye mahusiheryo makina mararu.

12. Tiheeni nnahuseryaahu vooloca sa Yehova orweela wa winla wa Yesu ntakhara achu o Yerusalemu?

¹²Yehova onnaathokororya achu. Winla wa Yesu onnanuupuxerya mukhalelo Yehova tho onaathokororyeiye achu. Piipiliya oni: “Awo hanachuna wi mmoha a nyuwo atholowe, nto wi oothene ephiyerye woocharuwani.” (2 Ped. 3:9) Hiyaano tho nnanwerya wooniherya wi ninnaasivela akhwiihu moorweela wa wiilipixerya otannya mirima saya ni michaka saphaama.—Mat. 22:39. *

13-14. Ti mwawiihai Yesu oonihenryeiye ikharari wa achu nave ti mwawiihai nneeraahu neereno emohamoha?

¹³Yesu aanapaka owetha wawe mmuteko woolaleerya. Yesu aanaasivela achu, mwa yeeyo, owo aanaalaleerya vaavaa aakhaleiyeno ekari. (Luka 19:47, 48) Ntakhara heeni owo aaneerano yeeyo? Nthowa nawi owo aanaamorela achu ikharari. Ikwaha ikina, yaakhala achu ancipale yaawo yaachuna nikhaviheryo ni yaachuna onwiriyana Yesu, ophiyerya wi owo ni oohuserya awe ehinakhalano “elukuluku yoolya.” (Mar. 3:20) Ophiyerya wi Yesu tho aalaleerya ohiyu, vaavaa mulopwana mmoha aachuneiye owiriyana muchaka awe. (Yoh. 3:1, 2) Eparipari wi achu ancipale hiyaanwiriyanne Yesu naari mano okhala oohuserya awe. Nyenya ti yawooneya wi oothene aya yaahaakhela onamoona waphaama. Hiyaano tho nnachuna wi oothene ekhaleno ekari ya wiiwa michaka saphaama. (Saw. 10:42) Nave wi neereno yeela, nnaphwanela opaka matorokelo makina mmuteko ahu woolaleerya.

¹⁴Mukhale oorehereya opaka matorokelo. Waakhala wi ikwaha soothene nnalaleerya mu elukuluku emohamoha, akhweya hiniwerya waaphwanya achu yaawo anachuna ohuserya eparipari. Piyoneera mmoha awiichaniwa Matilda ooloca: “Aiyaka ni miyaano ninneererya waalaleerya achu mu ilukuluku soohiyana. Wooxiixelo, ninnalaleerya mmapuro a nakoso, othana, vaavaa achu ancipale anakhalaaya mu mphiro, hiyaano nnapharihela ekarinya ya soolaleeryiwa. Nave wookuchulani wa nihiku, ninnawerya waaphwanya achu mmawannyaya.” Ohiya ikwaha soothene olaleerya mu ilukuluku  seiho siri soophwanelela wa hiyaano, nnaphwanela opaka matorokelo wi nlaleerye mu ilukuluku seiho nnahaalaahu waaphwanya achu ancipale. Wakhala wi noheerano yeela, nnaphwanela ororomela wi Yehova onahaala ohakalala.

15. Mwawiiwanana ni Luka 22:39-44, tiheeni yeeren’ye mu ohiyu wookuchula wa okumi wa Yesu veelaponi yavathi?

¹⁵ Wookuchulani wa ohiyu wa nihiku na 14 a Nisani a 33 E.K.,Yesu aahiya o emaca yo Ketsemani. Weiwo, owo aahula murima awe wa Yehova. (Mwaalakhanye Luka 22:39-44.) Yaari elukuluku yeela Yesu ‘aavekenleiye alipihaka nsu ni inlaka.’ (Ahe. 5:7, BNM) Tiheeni Yesu aavakenleiye mu ohiyu yoola ahaakumve okhwa? Owo aavekela avekaka ikuru wi atitelele okhala oororomeleya wa Yehova ophiyerya o makuchuwelo ni weera yoochuna awe. Yehova aahiiwa mavekelo yaawo Yesu aapankeiye nave aahimurumiha munkeelo wi amulipihe.

16. Ntakhara heeni Yesu aareiye awuukhuwaxa vaavaa aavekeleiye mu emaca yo Ketsemani?

¹⁶ Nivekelo nenlo Yesu aapankeiye mu emaca yo Ketsemani owo aahinla nthowa nawi aari awuukhuwa wi achu yaahaala wuupuwelaka wi owo haacicimiha nsina na Muluku. Owo tho aasuwela wi aakhalano murici mutokweene—otitelela okhala oororomeleya ni okhaviherya otokweene wa Yehova. Waakhanle wi munnahoolela nikacamiho noovila, nenlo nneeha ororomeleya wanyu wa Yehova, tiheeni muneeraanyu muhuserye orweela wa winla wa Yesu? Moone mahusiheryo mararu yaawo anahaala wookhaviheryaani.

17. Tiheeni nnahuseryaahu orweela wa mukhalelo Yehova aakhunleiye mavekelo a Yesu?

¹⁷Yehova onnawiriyana mavekelo ahu. Yehova aahiwiriyana mavekelo a Yesu. Ntakhara heeni? Nthowa nawi wuukhuwa otokweene wa Yesu waari otitelela okhala oororomeleya wa Atiithi awe ni waakiha nsina naya. Wakhala wi wuukhuwa wahu ori otitelela okhala oororomeleya wa Yehova ni waakiha nsina nawe, owo onahaala waakhula mavekelo ahu vaavaa nnavekaahu nikhaviheryo.—Sal. 145:18, 19.

18. Mmukhalelo taani Yesu oreiye ntoko nthamwene yoowo onaniiwexexa?

¹⁸Yesu onniiwexexa mukhalelo nniisoonaahu. Vaavaa nnahoolelaahu nikacamiho noovila, ti yaphaama ochekula ni nthamwene yoowo onaniiwexexa,  xaxaxa yoowo ohoolenle nikacamiho noolikana. Yesu nthamwene ntoko yoola. Owo oosuwela oceecheya tiheeni ni ochuna nikhaviheryo tiheeni. Owo onniiwexexa oceecheya wahu nave onahaala opaka soothene wi anikhaviherye “mu elukuluku yoophwanelela.” (Ahe. 4:15, 16) Yesu aaheemererya nikhaviheryo na munkeelo vaavaa aareiye mu emaca yo Ketsemani. Hiyaano tho nnaphwanela weemererya nikhaviheryo na Yehova moohipwacha waakhanle wi nnarweela mu yoolaleeryiwa, mu exilema, mmwaha naari orweela wa nthamwene awiichwelavo naari mutokweene a mmulokoni.

19. Tiheeni enahaala onikhaviherya ovilela ni mikhalelo soovila seiho sineeha ororomeleya wahu wa Muluku? Mvahe yootakiherya.

¹⁹Munahaala waakhela “murecele wa Muluku.” Vaavaa nnavekelaahu wa Yehova, owo onahaala onivaha ikuru seiho nnachunaahu. Nnahaala okhalano “murecele wa Muluku, yoowo opwanhe wuupuwela wahu woothene.” (Fil. 4:6, 7) Murecele yoola onahaala okurumuxa murima ni wookhaviheryaani okhalano muupuwelo woophwanelela. Ti yeeyo yeeren’ye ni murokora awiichaniwa Luz. Owo ooloca: “Miyaano kinniisoona omeekha nave kinnahooxeya nthowa na yeeyo. Ikwaha ikina kinniisoona mmukhalelo woohiphwanelela ophiyerya kinoona wi Yehova hanakisivela. Nyenya vaavaa kiniisoonaaka mmukhalelo yoola, kinnamaala nave mwawaakuveya kinnamuleela Yehova mukhalelo kiniisoonaaka. Nivekelo ninnakikhaviherya ovareryela miyoonelo saka.” Masu a murokora Luz annooniherya mookwakwaleya wi nivekelo nnanwerya onivaha murecele.

20. Winla wa Yesu onanihusiha mahusiheryo taani?

²⁰ Ohuserya vooloca sa winla wa Yesu onnanihakararya vancipale nave noohuserya mahusiheryo oophara muteko mu yoohuserya yeela! Nohoona wi nnaphwanela waakhaviherya yaale yaayeleenle oosiveliwa aya mookhwani, nave tho wi nnaphwanela ororomela wi Yehova ni Yesu anahaala onikhaviherya wakhala wi nookumanano nikacamiho nimohamoha. Noohuserya tho wi nnaphwanela waalaleerya akina ni okhala oosivela woona wi Yehova ni Yesu aanihusiha weerano yeeyo. Nave osuwela wi Yehova ni Mwanawe anniiwexexa miyoonelo sahu ni sooceecheya sahu, ennanihakararya nave enahaala onikhaviherya ovilela. Vano hankooni ntitelele opharihela yeeyo nihusenryaahu mmwaha yoola ophiyerya nihiku nenlo Yehova onahaaleiye waakhwaniherya yoororomeliha awe ya ‘ovuta miithori oothene wiithoni [wahu]!’—Wup. 21:4.