MWAHA WOOHUSERYA 2
‘Mutitelele Otoroka Mukhalelo Anyu wa Wuupuwela’
“Mweerihe wi Muluku atoroke mukhalelo anyu wa wuupuwela, wi mweererye meekhiinyu yaphaama, yaweemereryeya ni okhwela wawaakhwanela wa Muluku.”—ARO. 12:2.
NCIPO 88 Mukihusihe iphiro sanyu
YEEYO NNAHAALAAHU OHUSERYA a
1-2. Tiheeni nnaphwanelaahu otitelela weera nimanle opatisiwa? Mutharihe.
MMUKHALELO taani munarehereryaanyu empa anyu? Akhweya nyuwaano muhaakumve othaamelamo, mwaahirehereryamo moomalela. Nyenya tiheeni enahaala weereya waakhala wi nyuwaano hamureherenryemo wanaawiili? Ntoko musuwenlaanyu, nchupi nnamusareyamo nave onamunanaramo mwawaakuveya. Wi empa anyu etitelele okhala yaphaama, munaphwanela orehereryaka moohihiyererya.
2 Moolikana, nnaphwanela tho otitelela otoroka muupuwelo ahu ni omuchu ahu. Mweeparipari, nihaakumve opatisiwa, naahipaka owetha wahu wi nipake matorokelo oochuneya mu okumi ahu, wi “niiseelihe wa sooriipiheya soothene sa mwiili ni sa munepa.” (2 Ako. 7:1) Nyenya hiihaano, nnaphwanela ochariha ekano ya murummwa Paulo ya ‘otitelela orehererya mukhalelo ahu wa wuupuwela.’ (Aef. 4:23) Ntakhara heeni nnaphwanelaahu otitelela orehererya muupuwelo ni omuchu ahu? Nthowa nawi elapo ela yoonanara enanwerya onivolowela mwawaakuveya ni oneeriha okhala ooriipiheya vamiithoni va Yehova. Wi nsepe ovoothiwa ni otitelela omuhakalaliha Yehova, nnaphwanela waalikhela wiiliwiili muupuwelo, omuchu ni soochuna sahu.
MUTITELELE ‘OTOROKA MUKHALELO ANYU WA WUUPUWELA’
3. Enataphulela eheeni ‘otoroka mukhalelo anyu wa wuupuwela’? (Aroma 12:2)
3 Tiheeni nnaphwanelaahu weera wi ntitelele otoroka mukhalelo ahu wa wuupuwela? (Mwaalakhanye Aroma 12:2.) Hannaphwanela pahiru opakaka ichu savakhaani saphaama. Moohiyana, nnaphwanela wuupuwelela mwawiiseela vooloca sa omuchu ahu wa mpuwa ni opaka matorokelo vyakala oochuneya wi niiwelele malakiheryo a Yehova ophiyerya vaavaa nnaweryelaahuvo. Nnaphwanela weerano yeela, ohiya ekwaha emoha, nyenya moohihiyererya.
Apwanne soolakelela sanyu vooloca sa exikola ni muteko sinnooniherya wi munnakuha mu nipuro noopacerya soochuna sa Omwene? (Moone iparakrafo 4-5) c
4. Ti mwawiihai nneeraahu nsepe ovoloweliwa ni mukhalelo yoola wa ichu?
4 Vaavaa nnahaalaahu okhala oophaameya, ichu soothene nneeraahu nipakeke sinahaala omuhakalalihaka Yehova. Nyenya olelo, nnaphwanela otitelela wiilipixeryaka wi nimuhakalalihe Yehova. Moone wi mu Aroma 12:2, Paulo olonce wi nnaphwanela otoroka mukhalelo ahu wa wuupuwela wi nsuwele yeeyo Muluku onachuneiye wi neere. Ohiya weemererya wi mukhalelo yoola wa ichu onivolowele, hiyaano nnaphwanela wiisaalikhela wi noone ophiyerya mweeryo taani nnahiyaahu wi muupuwelo wa Muluku ovolowele soochuna ni soolakelela sahu—ohiya muupuwelo wa elapo.
5. Nni naalikhele hai muupuwelo ahu vooloca sa waacamela wa nihiku na Yehova? (Moone eruku.)
5 Muthokororye yootakiherya emoha. Yehova onachuna wi hiyaano ‘nikhaleno mmuupuweloni orwa wa nihiku na Yehova.’ (2 Pet. 3:12) Mwiikohe: ‘Apwanne mukhalelo aka wa okumi onnooniherya wi kinniiwexexa wi elapo yeela yootakhala ehanle vakhaani otoloxiwa? Apwanne soolakelela saka vooloca sa ohuserya ni muteko sinnooniherya wi omurumeela Yehova echu yoochuneyaxa mu okumi aka? Apwanne kinnaroromela wi Yehova onahaala okivakulela ni ovakulela emusi aka, naari wiiliwiili kinnakhala awuukhuwaxa ni ichu soomwiilini?’ Muupuwele mukhalelo Yehova onakhaleiye oohakalala vaavaa onanooneiye neereryaka okhala mwawiiwanana ni yookhwela awe.—Mat. 6:25-27, 33; Afi. 4:12, 13.
6. Tiheeni nnaphwanelaahu otitelela weera?
6 Nnaphwanela waalikhela muupuwelo ahu wiiliwiili nave voocharela opaka matorokelo vyakala oochuneya. Paulo aahiloca wa Akorintu: “Mutitelele wiivarerya mwaari mu nroromelo; mutitelele wiisaalikhela nyuwo aneene.” (2 Ako. 13:5) Okhala “mu nroromelo” onaphitaanyerya opaka sincipale opwaha ophwanyeya mmithukumano Seekristu ni olaleerya wiiliwiili. Ela tho enavolowela muupuwelo ahu, mathitimanelo ahu ni yeeyo enanceenyerya weera ichu. Mwawiihiiha, nnaphwanela otitelela otoroka mukhalelo ahu wa wuupuwela moorweela wa waalakhanya Masu a Muluku, ohuserya wuupuwela mmukhalelo owo onuupuweleiye nave, voocharela opaka yeeyo eri yoochuneya wi nimuhakalalihe Yehova.—1 Ako. 2:14-16.
“MUNAPHWANELA OWARA OMUCHU OVYAANI”
7. Mwawiiwanana ni Aefesu 4:31, 32, tiheeni nnaphwanelaahu weera nave ntakhara heeni ela enanwerya okhala nikacamiho?
7 Mwaalakhanye Aefesu 4:31, 32. Ohiya pahiru opaka matorokelo mmuupuwelo ahu, nnaphwanela tho “owara omuchu ovyaani.” (Aef. 4:24) Onnachuneya wiilipixerya wi neereno yeela. Mwa ichu ikina, nnaphwanela opaka owetha wahu wi nsepe mikhalelo soonanara ntoko esara ni owali. Ntakhara heeni ela enanwerya okhala nikacamiho? Woona wi onanwerya okhala woovila otoroka mikhalelo mikina soonanara. Ntoko yootakiherya, Piipiliya onnaloca wi achu akina ‘toonyeenyeya’ ni “eesara.” (Mas. 29:22, PMM) Muchu yoowo aarino mikhalelo soonanara onaphwanela otitelela wiilipixerya otoroka seiho, naamwi amanle opatisiwa. Ela ti yeeyo enahaala wooniheryiwa mu yaweereya enacharela.
8-9. Ti mwawiihai yaweereya ya Estefani enooniheryaaya wi ti woochuneya otitelela ohiya omuchu wakhalai?
8 Munna mmoha awiichaniwa Estefani aahikhalano nikacamiho na ovareryela esara awe. Owo ooloca: “Naamwi kaapatisiwe, kaanaphwanela otitelela ovareryela mukhalelo aka. Ntoko yootakiherya, mu ekwaha emoha vaavaa kaayaaka mmuteko woolaleerya empa ni empa, kaahimwiikara mpava mmoha yoowo aamwiiyale raatiyu mu ekaaro aka. Kihalaka vakhaani omphara, owo aahimuhiya raatiyu nave achawa. Vaavaa kaaleenlaaka akina mukhalelo kaamukunxaaka raatiyu aka, mutokweene mmoha a mu nikhuuru aahikikoha: ‘Estefani, waakhanle wi woomphara owo, tiheeni waahaalaawe omweerela?’ Nikoho nenla naahikeeriha wuupuwela nave naahikiceenyerya otitelela opaka owetha waka wi kikhale a murecele.” b
9 Yootakiherya ya Estefani ennanooniherya wi nnanwerya wooniherya mukhalelo woohiphwanelela moohiwehereryeya, naamwi nuupuwela wi noohiya yoowo. Wakhala wi eyo yoheereya ni nyuwaano, muhiceecheye nave muhuupuwele wi mwa Mukristu oohiphwanelela. Ophiyerya wi murummwa Paulo aaheemererya: “Kaachunaka weera yaphaama, yoonanara tenaphwanyeya mwa miyo.” (Aro. 7:21-23) Akristu oothene oohiphaameya aakhalano mikhalelo soohiphwanelela seiho sinakookela mmuupuweloni mwaya ntoko ikokhola sinakookela vaate nimanle ovelavo. Nnaphwanela otitelela opaka owetha wahu wi ntitelele okhala aweela. Nni neereno hai yeela?
10. Ti mwawiihai nneeraahu niwanihe ni mikhalelo soohiphwanelela? (1 Yohani 5:14, 15)
10 Mvekele wa Yehova vooloca sa yeeyo eri yoovila wa nyuwo otoroka nave muroromele wi owo onahaala woowiriyanaani ni wookhaviheryaani. (Mwaalakhanye 1 Yohani 5:14, 15.) Naamwi Yehova ahihaalaka omaliha mootikhiniha mukhalelo yoowo, owo onahaala woolipihaani wi mutitelele owaniha ni yoowo. (1 Pet. 5:10) Mwawiihiiha, mulapeke mwawiiwanana ni mavekelo anyu moorweela wa ohipaka ichu seiho saahaala oweerihaani okookela omuchu anyu wakhalai. Ntoko yootakiherya, mukhaleno ephoole ni ixilema munoonaanyu, aprokrama a mu televisau munawoonaanyu naari saweereya munaalakhanyaanyu sinavuwiha mikhalelo seiho muneereryaanyu omaliha. Nave muheemererye wi muupuwelo anyu otikitheryeye mu soochuna soohiphwanelela.—Afi. 4:8; Ako. 3:2.
11. Tiheeni nnaphwanelaahu weera wi ntitelele onwara muchu muvyaani?
11 Naamwi muhin’ye omuchu anyu wakhalai, munaphwanela wunnuwiha omuchu muvyaani. Muni mweereno hai yeela? Ekhale yoolakelelaanyu omutakiherya Yehova vaavaa munahuseryaanyu mikhalelo sawe. (Aef. 5:1, 2) Ntoko yootakiherya, vaavaa munaalakhanyaanyu yaweereya Mpiipiliyani yeeyo enooniherya wi Yehova tookhurumuwela, mwiikohe: ‘Apwanne kinnaakhurumuwela akina?’ Vaavaa munaalakhanyaanyu vooloca sa niphwanya na Yehova wa yaale ari oothoiwa, mwiikohe: ‘Apwanne kookhalano mukhalelo woolikana wa akhwaaka a munroromeloni yaawo ari oothoiwa nave kinnooniherya mu saweera saka?’ Mutitelele otoroka mukhalelo anyu wa wuupuwela moorweela wa onwara muchu muvyaani ni okhala oopisa murima ni nyuwaano vaavaa munapakaanyu yeeyo.
12. Ti mwawiihai yaweereya ya Estefani enooniheryaaya wi Piipiliya ookhalano owerya wa otoroka ikumi sa achu?
12 Estefani, yoowo olociwe woopaceryani, aahoona wi vakhaani vakhaani aahiwerya onwara muchu muvyaani. Owo ooloca: “Kimanle opatisiwa, kaahihoolela mikhalelo mincipale seiho kaaphwanelaaka ovareryela esara aka. Kaahihuserya waasepa achu yaawo yeererya okiroxa ni mikhalelo makina saakinyeenyeiha. Achu ancipale, ophitaanyerya amwaaraka, yaanakileela mukhalelo kaakhalaaka oomaaleleya mmikhalelo seiho. Ela yaahikitikhiniha vancipale! Nkinaphwanela wiirumiha ntakhara matorokelo yaala mu omuchu aka. Moohiyana, kinnaroromela wi eyo yawooniherya yawi Piipiliya ookhalano owerya wa otoroka ikumi sa achu.”
MUTITELELE OWANIHA NI SOOCHUNA SOOHIPHWANELELA
13. Tiheeni enahaala onikhaviherya wunnuwiha soochuna soophwanelela? (Akalatiya 5:16)
13 Mwaalakhanye Akalatiya 5:16. Wi anikhaviherye ovootha mu owaniha ntakhara weera yeeyo eri yaphaama, Yehova mwa mahala onnanivahererya munepa awe waweela. Vaavaa nnahuseryaahu Masu a Muluku, ninneemererya wi munepa wa Muluku onivolowele. Hiyaano ninnaakhela tho munepa waweela vaavaa nnaphiyaahu mmithukumano sahu. Mmithukumano seiha Seekristu, ninnamaliha elukuluku ahu vamoha ni anna ni arokora yaawo ntoko hiyaano, anapaka owetha waya wi epake yeeyo eri yaphaama nave eyo ti yoolipiha. (Ahe. 10:24, 25; 13:7) Vaavaa nnamwaacamelaahu Yehova moorweela wa nivekelo na vathi va murima nave nimveka yoowo nikhaviheryo ntakhara mukhalelo vyakala woohiphwanelela, owo onahaala onivaha munepa awe waweela wi onivahe nlipiho na otitelela owaniha. Naamwi meerelo yaala ehihaalaka omaliha soochuna soohiphwanelela, awo anahaala onikhaviherya ohipaka ichu mwawiiwanana ni soochuna seiho. Ntoko Akalatiya 5:16 onaloceiye, oothene yaale aneeca mwa munepa ‘heni yaakhwaniherye soochuna soothene sa mwiili.’
14. Ntakhara heeni ti woochuneya otitelela wunnuwiha soochuna soophwanelela?
14 Wakhala wi noopacerya opaka ichu seiho sinanikhaviherya okhalano onthamwene waphaama ni Yehova, ti yoochuneya otitelela weerano yeeyo ni otitelela wunnuwiha soochuna soophwanelela. Ntakhara heeni? Nthowa nawi mwiicani ahu harwa ahiya owana ni hiyaano. Mwiicani yoowo tonaneeha wi nipake yeeyo eri yoonanara. Naamwi nimanle opatisiwa hiyaano nnanwerya okhalano nchuno na weerano ichu sincipale seiho nnaphwanelaahu osepa, ophitaanyerya axooku oohiphwanelela, ohapaliwa naari woona epwitikiri. (Aef. 5:3, 4) Munna mmoha yoowo ori mmiravo onneemererya: “Echu emoha yoovilaxa kiwaninhaakano naari nchuno naka na okonihana ni achu a mwiikho woolikana. Kuupuwela wi nchuno nenlo naahimala nyenya ikwaha ikina kinnakhalano nchuno nimohamoha.” Tiheeni enahaala wookhaviheryaani wakhala wi mookhalano nchuno noohiphwanelela nenlo nri noovilaxa ovootha?
Wakhala wi mookhalano nchuno noohiphwanelela, nikacamiho nanyu tahi wi hanimala; akina aawaniha ni soochuna imohamoha nave evootha (Moone iparakrafo 15-16)
15. Ntakhara heeni ti yoolipiha osuwela wi soochuna soohiphwanelela ti ‘sawunlaana wa achu?’ (Moone eruku.)
15 Wakhala wi munnawaniha ni yoochuna yoohiphwanelela yeeyo eri yoovila, muupuwele wi hamuri mukhatiinyu. Piipiliya ooloca: “Hiyoophwannyeeni yaweeha emoharu mano, yoohikhala yeeyo eri yawunlaana wa achu.” (1 Ako. 10:13) Otaphuleliwa okina wa eversikulu yeela eni: “Saweeha inoorweelaani ti sa achu oothene.” Ela yaarempwe wa alopwana ni athiyana yaari Akristu yaakhala o Korintu. Akina a yaawo ehaakumve okhala Akristu yaari acapaheya, oorarusana alopwanaru ni oohapaliwa. (1 Ako. 6:9-11) Apwanne munuupuwela wi awo emanle opatisiwa hiyi ekhalenoru yoochuna yoohiphwanelela wi ewanihe? Tahi yeeyo yeeren’ye. Mweeparipari oothene yaari Akristu oothanliwa naamwi awo yaari achu oohiphaameya. Moohikhwa minikwa awo yaanawaniha ni soochuna soohiphwanelela wiiliwiili. Ela ennanilipiha. Ntakhara heeni? Woona wi ela ennooniherya wi moohipwacha nchuno noohiphwanelela munawanihaanyu, akina aavootha nenlo. Mwawiihiiha, nyuwaano munanwerya otitelela okhala “oothipeleya mu nroromelo, musuwelaka wi masooso mamohamoha yaawo munahoolelaanyu, anninyu a elapo yoothene annahoolela masooso mamohamoha yaawo.”—1 Pet. 5:9.
16. Muupuwelo taani wawoopiha nnaphwanelaahu osepa nave ntakhara heeni?
16 Musepe muupuwelo wawoopiha wawi haavo onahaala wiiwexexa makacamiho yaawo munahoolelaanyu. Wuupuwela mmukhalelo yoola onahaala oweerihaani ophiyerya makuchuwelo awi nikacamiho nanyu hanrwa nimala nave wi himwaano owerya wi mvoothe soochuna soohiphwanelela. Piipiliya onnaloca mmukhalelo woohiyana. Owo onnathariha: “Muluku toororomeleya, owo hoohiyaani wi mweehiwe opwaha munaweryelaanyuvo; nyenya mwakumanano yaweeha, owo onamookhaviheryaani wi nwerye ovilela.” (1 Ako. 10:13) Mwawiihiiha, naamwi nchuno noohiphwanelela nikhalaka noolipa, nnanwerya otitelela okhala oororomeleya wa Yehova. Nnikhaviheryo na Yehova, nnanwerya otitelela owaniha ni nchuno noohiphwanelela.
17. Naamwi nihiweryaka osepa moomalela soochuna soohiphwanelela, nni niwerye hai ovareryela seiho?
17 Ilukuluku soothene muupuweleke ela: Woona wi naachu oohiphaameya, haniwerya osepa moomalela okhalano soochuna soohiphwanelela. Nyenya vaavaa nnakhalaahuno soochuna soohiphwanelela, nnanwerya okhooca iho mwawaakuveya, hiihaa ntoko Yosefe eenreiye vaavaa aamuchanweiye mwaara a Potifare. (Map. 39:12) Nyuwaano hamunaphwanela weera ichu mwawiiwanana ni soochuna soohiphwanelela!
MUTITELELE OPAKA OWETHA WANYU
18-19. Makoho taani nnaphwanelaahu wiipakela wi ntitelele otoroka mukhalelo ahu wa wuupuwela?
18 Otitelela otoroka mukhalelo ahu wa wuupuwela onavolowela opaka owetha wahu wi neerihe muupuwelo ni saweera sahu ikhaleke mwawiiwanana ni yoochuna ya Yehova. Mwawiihiiha nnaphwanela wiisaalikhela akaneenaahu ni wiikoha: ‘Apwanne saweera saka sinnooniherya wi nnakhala mmahiku ookuchula? Apwanne kinnaya vahoolo mu onwara muchu muvyaani? Apwanne kinneemererya wi munepa wa Yehova ohooleleke okumi aka wi kiwerye ovootha weera ichu mwawiiwanana ni soochuna soonanara?’
19 Vaavaa muniisaalikhelaanyu, muhiweherye okhala oophaameya, nyenya muhakalale ni matorokelo mpankaanyu. Wakhala wi mohoona wi munaphwanela opaka matorokelo, muhiceecheye. Ohiya yeeyo, mucharihe ekano enaphwanyeya mu Afilipi 3:16: “Moohipwacha oya wahu vahoolo, nititelele ochara meecelo yaala mamohamoha.” Vaavaa muneeraanyuno yeela, muroromele wi Yehova onahaala oreeliha wiilipixerya wanyu wa otitelela otoroka mukhalelo anyu wa wuupuwela.
NCIPO 36 Nilipeleleke Murima Ahu
a Murummwa Paulo aahaaveka akhweiye a munroromeloni oheemererya wi yuupiwe ni mukhalelo wa elapo yeela. Mweeparipari ela ekano yaphaama wa hiyaano olelo. Nnaphwanela opaka owetha wahu wi mikhalelo sa elapo yeela sihinivolowele mmukhalelo vyakala. Wi neereno yeela, nnaphwanela otitelela otoroka mukhalelo ahu wa wuupuwela vaavaa nniiwexexaahu wi hori mwawiiwanana ni yookhwela ya Muluku. Mmwaha yoola, nnahaala othokororya mukhalelo wa weerano yeela.
b Moone mwaha “Minha Vida ia de Mal a Pior” mu Mulipeleli, 1 a Yulyu a 2015.
c ERUKU VA EPAAXINA: Munna yoowo ori mmiravo uupuwelelaka waakhanle wi onahaala oya mu exikola ya vasulu naari opacerya muteko wa opiyoneero.
