1-2. (1) Ti mwawiihai nniisoonaahu vaavaa nnuupuwelelaahu sa okumi ni orummwa wa Yesu? (2) Tiheeni nnahaalaahu othokororya mmwaha yoola?

 VAAVAA nnamuyeleelaahu osiveliwa ahu mookhwani, ninninkheliwa vancipale ni muchu yoowo! Woopaceryani nnanwerya woona wiiicelaxa vaavaa nnuupuwelaahu ilukuluku naaryaahu ni oosiveliwa ahu xaxaxa wakhala wi owo aahihooxeya ahaakumve okhwa. Nyenya moovira wa elukuluku, nnanwerya okhala oohakalala wanaawiili vaavaa nnuupuwelaahu sa echu emoha onihusinheiye, naari opankeiye naari olonceiye wi anilipihe naari ontheiha.

² Mmukhalelo woolikana, ennanthananiha waalakhanya vooloca sa ohooxeya wa Yesu ni okhwa wawe. Variyari va isumana ehaakumve Yawuupuxerya, hiyaano ninnaavya elukuluku xaxaxa wi nuupuwele ochuneya waya mukucho wa Yesu. (1 Ako. 11:24, 25) Nyenya ninnahakalala vancipale naawuupuwelaka ichu soothene Yesu olonceiye ni opankeiye vaavaa aareiye veelaponi yavathi. Ninnaphwanya tho ohakalala wawaaca vaavaa nnuupuwelaahu yeeyo owo onapakeiye hiihava ni yeeyo onahaaleiye opaka omwaahiyu ntakhara hiyo. Wuupuwelela ichu seiha ni osivela wawe ntakhara hiyo onanwerya onceenyerya wooniherya othamalela wahu mmikhalelo soophara muteko, hiihaa ntoko nnahaalaahu woona mmwaha yoola.

3. Mathowa taani nryaahuno a othamalela mukucho wa woopola?

³ Ninnathamalela vancipale vaavaa nnuupuwelelaahu sa okumi ni okhwa wa Yesu. Vaavaa Yesu aareiye veelaponi yavathi, aahaahusiha achu vooloca sa mareeliho Omwene wa Muluku onahaalaaya oniruuhela. Ninnathamalela vancipale ntakhara iparipari seiha sa Omwene. Ninnathamalela vancipale mukucho wa woopola woona wi onneeriha okhala wooweryeya wa  hiyo opuha onthamwene wawaacameleya ni Yehova vamoha ni Yesu. Yaale anamuroromela Yesu aakhalano tho ewehereryo ya opuha okumi okhala wookhala ni owoona wanaawiili oosiveliwaaya akhwile. (Yoh. 5:28, 29; Aro. 6:23) Hiyaavo nenraahu wi niphwanelele mareeliho yaala; naari mano hiniwerya omuliva Muluku ni Kristu ntakhara ichu seiho anapakaaya wa hiyo. (Aro. 5:8, 20, 21) Nyenya nnanwerya owooniherya othamalela wahu otokweene. Mwawiihai?

4. Ti mwawiihai Mariya Matalena oonihenryeiye othamalela wa yeeyo Yesu aamweerenleiye? (Moone eruku.)

⁴ Muthokororye yaweereya ya muthiyana mmoha Muyuta awiichaniwa Mariya Matalena. Owo aaneeteteya vancipale nthowa na masololo mathanu nameeli yaawo yaamuhooxa. Akhweya uupuwela wi haavo aahaala owerya omukhaviherya. Mwaanyiherye mukhalelo aathamalenleiye vaavaa Yesu aamooponleiye wa masololo yaale! Othamalela wawe waahimuceenyerya okhala oomuchara a Yesu nave aahipharihela elukuluku, ikuru, ni sookhalano sawe wi amukhaviherye yoowo mmuteko woolaleerya. (Luka 8:1-3) Naamwi Mariya aathamalela vancipale yeeyo Yesu aamweerenleiye, akhweya owo haasuwela wi Yesu aahaala opaka sincipale ntakhara yoowo omwaahiyu. Owo aahaala ovaha okumi awe ntakhara achu, “wi oothene yoole onamuroromela” awerye opuha okumi okhala wookhala. (Yoh. 3:16) Naamwi hiihaa, Mariya aahooniherya omuthamalela wawe Yesu moorweela wa okhala oororomeleya. Vaavaa Yesu aareiye va mwiri woohooxiwavo, Mariya aari vakhiviru vawe amvahereryaka nihakararyo yoowo ni akina. (Yoh. 19:25) Yesu amanle okhwa, Mariya ni athiyana eeli yaahiruuha makhurwa wi ecikichele mwiili awe. (Mar. 16:1, 2) Yehova aahimvaha Mariya nchuwelo ntokweene nthowa na okhala oororomeleya wa Yesu. Owo aahikhalano ekari ya omoona Yesu amanle oviihiwa ni oloca ni yoowo—ekari yeeyo oohuserya ancipale yahaaryaayano.—Yoh. 20:11-18.

5. Ti mwawiihai nneeraahu nooniherye othamalela wahu wa ichu soothene Yehova ni Yesu anapakaaya wa hiyo?

⁵ Hiyaano tho nnanwerya wooniherya othamalela wahu wa ichu soothene Yehova ni  Yesu anapakaaya ntakhara hiyo, moorweela wa opharihela elukuluku, ikuru ni ikhorowa sahu wi nikhaviherye miteko sa Omwene. Ntoko yootakiherya, nnanwerya okhaviherya muteko wa oteka mapuro oomulapelamo Yehova ni orehererya yaawo.

6. Ntakhara heeni nnalocaahu wi mukucho wa woopola yamahala ya Yehova wa mmoha ti mmoha a hiyo?

⁶ Vaavaa nnoonaahu mukhalelo Yehova ni Yesu ananisivelaaya, eyo ennanceenyerya waasivela tho yaawo. (1 Yoh. 4:10, 19) Ninnaasivela moopwaha yaawo vaavaa nniiwexexaahu wi Yesu aakhwile ntakhara mmoha ti mmoha a hiyo. Murummwa Paulo aanasuwela yeela nave aahooniherya othamalela wawe vaavaa aarepenleiye Akalata, ariki: “Mwaana a Muluku. . . okisivenle ni iiveleela wa miyo.” (Aka. 2:20) Woona wi Yesu aakhwile ntakhara hiyo, Yehova onanwerya wooruuhelaani wa yoowo wi nwerye okhala nthamwene awe. (Yoh. 6:44) Apwanne hamunahakalala osuwela wi Yehova ilukuluku soothene onatikitheryeya mu mikhalelo sanyu saphaama nave wi oopaka echu yoovilaxa wi nwerye okhala nthamwene awe? Ela henalipiha osivela wanyu ntakhara Yehova ni Yesu? Mwawiihiiha, nnaphwanela wiikoha: ‘Tiheeni osivela yoola onakiceenyeryaaya opaka?’

7. Ntoko nnoonaahu va eruku, ti mwawiihai oothene ahu nneeraahu nooniherye osivela wahu ntakhara Yehova ni Yesu? (2 Akorintu 5:14, 15; 6:1, 2)

⁷ Osivela wahu ntakhara Muluku ni Kristu onnanceenyerya waasivela tho akina. (Mwaalakhanye 2 Akorintu 5:14, 15; 6:1, 2.) Mukhalelo mmoha wa wooniherya osivela wahu ori moorweela wa okhala amvai mmuteko woolaleerya. Ninnalaleerya wa oothene nnaaphwanyaahu. Hiyaano hanneererya waasepa achu a ikoore soohiyana naari maloko. Nave tho ninnalaleerya wa oothene moohiphwacha yaari ooreela ni oohuserya, naari oohaawa ni oohihuserya. Mmukhalelo yoola, ninnalapa mwawiiwanana ni yookhwela ya Yehova “wi achu a  mukhalelo woothene evuluxiwe ni ophiyerya okhalano masuwelelo awaakhwanela eeparipari.”—1 Tim. 2:4.

8. Nni nooniherye hai wi ninnaasivela anna ni arokora ahu?

⁸ Hiyaano tho ninnooniherya osivela wahu ntakhara Muluku ni Kristu moorweela wa waasivela anna ni arokora ahu. (1 Yoh. 4:21) Ninnooniherya opwacha wa yaawo nave ninnaakhaviherya variyari va makacamiho aya. Ninnaahakararya yaawo vaavaa anamuyeleelaaya oosiveliwa aya mookhwani, ninnaaxekurya vaavaa aniiceliwaaya nave ninnapaka owetha wahu wi naalipihe vaavaa anakhalaaya ooceecheya. (2 Ako. 1:3-7; 1 Ate. 5:11, 14) Ninnatitelela waavekelela yaawo nsuwelaka wi “Nivekelo na vathi va murima na muchu awookololowa nookhalano ikuru sa okhaviherya.”—Tiy. 5:16.

9. Mukhalelo taani mukina wa wooniherya osivela ntakhara anna ni arokora ahu?

⁹ Hiyaano tho ninnooniherya osivela wa anna ni arokora ahu moorweela wa opaka owetha wahu wi nikhapelele murecele ni yaawo. Ninneererya ochariha yootakiherya ya Yehova ya waakhurumuwela akina. Waakhanle wi Yehova aari ooreheryeya omurumiha Mwanawe wi akhwe ntakhara soocheka sahu, apwanne hannaphwanela tho okhala ooreheryeya waakhurumuwela anna ni arokora ahu vaavaa ananchekelaaya? Hiyaano hannaphwanela okhala ntoko kapuro yoole oonanara murima olociwe mu nimoha na maphwanaphwaniho a Yesu. Naamwi pwiya awe aalevelenle evaale etokweene owo aapankeiye, kapuro yoole haamulevelenle kapuro mukhwaawe yoowo arino evaale ekhaani. (Mat. 18:23-35) Waakhanle wi wookhumelela ohiiwanana ni muchu mmulokoni, apwanne mwanwerya opacerya opaka murecele ehaakumve Yawuupuxerya? (Mat. 5:23, 24) Mweerano yeeyo munahaala wooniherya wi munnamusivela vancipale Yehova ni Yesu.

10-11. Ti mwawiihai atokweene enooniheryaaya wi annamusivela Yehova ni Yesu? (1 Petru 5:1, 2)

¹⁰ Ti mwawiihai atokweene a mmulokoni eneeraaya yooniherye wi annamusivela Yehova ni Yesu? Mukhalelo mmoha woochuneya, ori moorweela wa okhapelela muhuwo wa Yesu. (Mwaalakhanye 1 Petru 5:1, 2.) Yesu oohiya eyo mookwakwaleya wa murummwa Petru. Amanle omukhooca Yesu mu ikwaha raru, mwawooneya Petru aanachunaxa wooniherya wi aanamusivela Yesu. Amanle oviihiwa mookhwani, Yesu aamukoha Petru: “Simoni mwaana a Yohani, onnakisivela miyo?” Ninnaroromela wi Petru aahaala opaka echu eri yoothene wi ooniherye wi aanamusivela Pwiyawe. Yesu aahi wa Petru: “Olyiheke ipucepuche saka.” (Yoh. 21:15-17) Nave mu ekumi awe yoothene, Petru aanathokororya muhuwo wa Apwiya, ooniheryaka wi aanamusivela Yesu.

¹¹ Atokweene, variyari va isumana ehaakumve ni emanle Yawuupuxerya, muni mooniherye hai wi masu a Yesu wa Petru toochuneya wa nyuwo? Munanwerya wooniherya mukhalelo munamusivelaanyu Yehova ni Yesu, moorweela wa oweiwa mmuteko wookukhula moohihiyererya ni moorweela wa opaka yeeyo moowetha xaxaxa wi mwaakhaviherye achu ari oocecheya omunepani omukookela Yehova. (Ese. 34:11, 12) Nyuwaano tho munanwerya waalipiha oohuserya a Piipiliya ni achu akina anaphiya va Yawuupuxerya. Nnachuna owaakhela phaama yaawo woona wi ninnaweherya wi enamukhala oomuchara a Yesu.

12. Ntakhara heeni wuupuwelela masu Yesu aalonceiye mu ohiyu ahaakumve okhwa enanivahaaya olipa murima? (Yoh. 16:32, 33)

¹² Mu ohiyu ahaakumve okhwa, Yesu aahiloca wa oohuserya awe: “Mweelaponi munarwa mukhalano makacamiho, nyenya mulipe murima!  Miyo koovootha elapo.” (Mwaalakhanye Yohani 16:32, 33.) Tiheeni yaamukhavihenrye Yesu okhala oolipa murima vaavaa amwiicani awe yaamoopopihaaya, ni otitelela okhala oororomeleya ophiyerya okhwa wawe? Owo aanamuroromela Yehova. Woona wi owo aahisuwela wi oomuchara awe yaahaala ohoolelaka makacamiho mamohamoha, Yesu aahimveka Yehova wi aakhapeleleke yaawo. (Yoh. 17:11) Ntakhara heeni ela ennanivaha olipa murima? Nthowa na wi Yehova tooweryaxa ompwaha mwiicani ahu vyakala. (1 Yoh. 4:4) Yehova onnoona ichu soothene. Noolekecheya wi waakhala wi ninnamuroromela Yehova, nnanwerya ovootha woova wahu ni wooniherya olipa murima.

13. Ti mwawiihai Yosefe o Arimateiya oonihenryeiye olipa murima?

¹³ Muthokororye yootakiherya ya Yosefe o Arimateiya. Owo aanacicimihiwa vancipale ni Ayuta. Aari mmoha a alipa oothoriha o Sineetriyu, etripunaale etokweene ya Ayuta. Nyenya, variyari va orummwa wa Yesu veelaponi yavathi, Yosefe aahikhalano ichu soothene, nto haarino olipa murima. Yohani aahiloca wi owo aari “oohuserya a Yesu nto moovitheya nthowa na owoova wawe Ayuta.” (Yoh. 19:38) Naamwi Yosefe aarino nchuno mu muchaka Woomwene, owo hiisooneihale wa akina yaawo yaarino nroromelo mwa Yesu. Moohikhwa minikwa aanoova oyeleela murici awe woocicimiheya. Nyenya, Piipiliya onnanleela wi Yesu amanle okhwa, Yosefe “aahooniherya olipa murima, aya wa Pilatu nave aveka muruchu wa Yesu.” (Mar. 15:42, 43) Nikhaviheryo Yosefe amvanheiye Yesu vano hinaari noovitheya.

14. Tiheeni munaphwanelaanyu weera wakhala wi mookhalano nikacamiho na owoova achu?

¹⁴ Apwanne munnawoova achu hiihaa ntoko Yosefe? Oxikola naari omuteko apwanne ilukuluku ikina munnoova waaleela achu akina wi mwa Namoona a Yehova? Apwanne munnoovelela okhala mulaleeryi oohipatisiwa naari opatisiwa nthowa na woova yeeyo achu anahaalaaya wuupuwelaka vooloca sa nyuwo? Muheemererye wi miyoonelo ntoko seiho soohiiheni weera yeeyo musuwenlaanyu wi ti yaphaama. Mvekeleke wa Yehova ni murima woothene. Mumveke owo wi oovaheeni olipa murima wi nwerye weerano yookhwela awe. Vaavaa munoonaanyu mukhalelo Yehova onaakhuleiye mavekelo anyu, munamukhalano owerya ni olipa murima otokweene.—Yes. 41:10, 13.

15. Yesu amanle wiisooneiha wa oohuserya awe, ohakalala waya waaceenyenrye opaka eheeni? (Luka 24:52, 53)

¹⁵ Oohuserya yaari oothananaxa vaavaa Yesu aakhwileiye. Mwaanyiherye muri mu nipuro naya. Tahi wi pahiru yaamuyelenle nthamwene  aya oosiveliwa, nyenya tho yaaniisoona ntoko wi yaahiyeleela ewehereryo aya. (Luka 24:17-21) Mwawiihiiha, vaavaa Yesu iisooneihaleiye wa yaawo, owo aahaavya elukuluku wi awiiwexexihe mukhalelo owo aakhwaanihenryeiye sooloherya sa Mpiipiliyani. Owo tho aahaavaha muteko woochuneya wi epake. (Luka 24:26, 27, 45-48) Elukuluku yeeyo Yesu aawenleiye wirimu emanle mahiku 40, oohuserya yaari oothanana yaahikookela okhalano ohakalala otokweene. Osuwela wi Pwiya aya aakhalano okumi nave ori oorehereya waakhaviherya yaawo waakhwaniherya murici aya muvyaani, waahaavaha ohakalala. Ohakalala waya waahaaceenyerya omurumeela Yehova moohihiyererya.—Mwaalakhanye Luka 24:52, 53; Saw. 5:42.

16. Nni naatakiherye hai oohuserya a Yesu?

¹⁶ Nni naatakiherye hai oohuserya a Yesu? Hiyaano ninnaphwanya ohakalala mmalapelo a Yehova ohiya pahiru variyari va Yawuupuxerya, nyenya mu eyaakha yoothene. Ela enneereya nthowa nawi ninnakuha Omwene wa Muluku mu nipuro noopacerya mu okumi ahu. Ntoko yootakiherya, ancipale annavukula elukuluku ya muteko aya wi ekhaviherye muteko woolaleerya, ophwanyeya mmithukumano ni opaka malapelo a echoko moohihiyererya. Akina aalakelela ohikhalano ichu sincipale soomwiilini seiho achu akina anoonaaya wi ti soochuneya wi ewerye ophariheliwa mmulokoni naari othaamela weiwo oriwo othowa otokweene wa alaleeryi. Naamwi ochuneyaka wiilipixerya wi ntitelele omurumeela Yehova, owo oororomeliha onireeliha vancipale wakhala wi ninnakuha soochuna sa Omwene mu nipuro noopacerya mu okumi ahu.—Mas. 10:22; Mat. 6:32, 33.

17. Tiheeni mulakelenlaanyu weera ntakhara Yawuupuxerya yeela? (Moone eruku.)

¹⁷ Ninnaweherya ni murima woothene ophwanyeya va Yawuupuxerya Nanaawiili, 4 a Apirili. Mwawiihiiha, muhiweherye ophiya nihiku nenlo wi muupuwelele okumi ni okhwa wa Yesu ni osivela owo ni Yehova enooniheryaaya wa hiyo. Mpharihele ikari soothene variyari va elukuluku ya Yawuupuxerya wi muupuwelele ichu seiha. Ntoko yootakiherya, mwaavye elukuluku wi mwaalakhannye ni wuupuwelela saweereya sinacharela, seiho sinaphwanyeya mu Eproxura Yoohoolela ya Ohuseryano Masu a Muluku, 16-B “Esumana Yookuchula ya Yesu Veelaponi Yavathi (Nikupa 2)”. Vaavaa munaalakhanyaanyu vooloca sa okumi wa Yesu, moone makupa a Mpiipiliyani yaawo analipiha othamalela, osivela, olipa murima ni ohakalala wanyu. Voocharela, mweererye wuupuwela mikhalelo sooluluwanya seiho muneeraanyu mooniherye othamalela wanyu weeparipari. Muroromele wi Yesu onahaala othamalela wiilipixerya muneeraanyu mpake wi mmuupuwelele variyari va Yawuupuxerya yeela.—Wup. 2:19.