1-2. Ntakhara heeni nnaphwanyeyaahu va Yawuupuxerya eyaakha ti eyaakha?

 WAACAMELA iyaakha 2.000 muculi, Yesu aahivaha okumi awe ntakhara hiyaano, eerihaka okhala wooweryeya wa hiyo okhalano okumi woohimala. Mu ohiyu ahaakumve okhwa, Yesu aahaalamulela oomuchara awe wuupuwelela mukucho awe woosivela moorweela wa opaka yoolya yookhweya yeeyo yaavolowela epaau ni eviinyu.—1 Ako. 11:23-26.

² Hiyaano ninniiwelela nlamulo na Yesu woona wi ninnamusivela vancipale yoowo. (Yoh. 14:15) Iyaakha soothene variyari va isumana ehaakumve ni emanle Yawuupuxerya, ninnooniherya othamalela wahu wa yeeyo owo eenreiye moorweela wa omaliha elukuluku nuupuwelelaka ni ovekela vooloca sa yootaphulela ya okhwa wawe ntakhara achu. Hiyaano tho ninnasiveliwa opaka sincipale mmuteko woolaleerya, wi naawope ancipale wakhala wooweryeya wi ekhale vamoha ni hiyo mu yaweereya yeela yoochuneyaxa. Nave opwaha soothene, nri oolakelela oheemererya wi echu vyakala enihiihe ophwanyeya va Yawuupuxerya.

3. Tiheeni nnahaalaahu othokororya mmwaha yoola?

³ Mmwaha yoola, nnahaala othokororya mikhalelo miraru seiho sinaweeriha achu a Yehova opaka owetha waya wi yuupuwelele okhwa wa Yesu: (1) moorweela wa ochariha yootakiherya yeeyo Yesu otikithenryeiye, (2) moorweela wa waawopa akina ntakhara Yawuupuxerya nave (3) moorweela wa ophwanyeya va Yawuupuxerya naamwi ehoolelaka makacamiho.

4. Makoho taani anaakhuliwa iyaakha soothene va Yawuupuxerya nave ntakhara heeni osuwela maakhulo a makoho yaala oryaaya woochuneyaxa wa hiyo? (Luka 22:19, 20)

⁴ Iyaakha soothene va Yawuupuxerya, ninnawiriyana mwaha wa Mpiipiliyani yoowo onavahererya maakhulo ookwakwaleya a makoho mancipale. Ninnahuserya ntakhara heeni achu anachunaaya woopola nave ti mwawiihai okhwa wa muchu mmoha owenryaaya oliva soocheka sa achu ancipale. Ninnuupuxeryiwa yeeyo eneemelela epaau ni eviinyu nave taani anaphwanela olya epaau ni owurya eviinyu. (Mwaalakhanye Luka 22:19, 20.) Nave ninnuupuwelela mareeliho yaawo yaweereya yeela enahaalaaya oruuha wa yaale arino ewehereryo ya okhala veelaponi yavathi. (Yes. 35:5, 6; 65:17, 21-23) Hannaphwanela woonaka iparipari seiha ntoko ichu nihinahaalaahu oyeleela naahikhalano ekaasoope. Apilyawu a Achu hasuwenle ichu seiha nave awo hanavaha esisapo mukucho wa Yesu. Awo tho hanapaka Yawuupuxerya ya okhwa wawe mwawiiwanana ni yootakiherya yeeyo owo otikithenryeiye. Ntakhara heeni ela enneereya?

5. Tiheeni yeeren’ye ni yootakiherya yaatikitheryiwe ni Yesu arummwa emanle okhwa?

⁵ Arummwa a Yesu emanle okhwa, Akristu oowoka yaahipacerya opaka makupa a muloko. (Mat. 13:24-27, 37-39) Awo ‘yaanakhoromaniha eparipari wi yaalekeche oohuserya wi yaachareke yaawo.’ (Saw. 20:29, 30) Wi ‘ekhoromanihe’ emoha sa iparipari seiha, Akristu yaale oowoka yaahipacerya ohusiha wi Yesu havanhe mwiili awe wi “akuxe soocheka sa ancipale,” ntoko Piipiliya onaloceiye, nyenya wi aaphwanela ovaha wanaawiili mukucho awe. (Ahe. 9:27, 28) Olelo achu ancipale annaroromela mahusiheryo yaala oowoka. Awo annathukumana moohihiyererya mu ikerexa ikwaha sincipale vanihikuni—wi epake echu yeeyo awo aniichanaaya “Mukucho wa Miisa.” b Achu a ikerexa ikina annuupuwelela okhwa wa Yesu mu ikwaha sa vakhaani, nyenya awo haniiwexexa mookwakwaleya yootaphulela yeeparipari ya mukucho wa Yesu. Akina anniikoha: ‘Apwanne chiryene okhwa wa Yesu onneeriha okhala wooweryeya okhurumuweliwa soocheka saka?’ Ntakhara heeni awo anapakaaya nikoho nenla? Nthowa nawi awo aavoloweliwa ni achu yaawo analoca wi soocheka hasinakhurumuweliwa moorweela wa okhwa wa Yesu. Ti mwawiihai oomuchara eeparipari a Yesu anaakhaviheryaaya achu wiiwexexa yootaphulela ya mukucho wa Yesu ni mukhalelo waphaama wa wuupuwelela okhwa wawe?

6. Mu eyaakha ya 1872, tiheeni nikhuuru nimoha na oohuserya a Piipiliya niiwexenxaaya?

⁶ Omakuchuwelo wa nsana 19, nikhuuru nimoha na oohuserya a Piipiliya nenlo naahooleliwa ni Charles Taze Russell naahipacerya ohuserya Soorepa mwawiiseela. Awo yaachuna osuwela yootaphulela yeeparipari ya mukucho wa Yesu ni mukhalelo okhwa wawe waaphwanelaaya wuupuweleliwaka. Mu eyaakha ya 1872, awo yaahiiwexexa chiryene wi Yesu aahivahererya woopola ntakhara achu oothene. Awo yaahoona wi hiyaaphwanela otitelela okhapelela mukhataaya yeeyo yiiwexenxaaya. Mwawiihiiha, awo yaaheererya waasuweliha akina moorweela wa aliivuru, iyornaale ni soolaleeryiwa. Mwawaakuveya, yaatakiheryaka Akristu a mu nsana noopacerya, awo yaahipacerya othukumana mu ekwaha emoha vayaakhani ntakhara Yawuupuxerya.

7. Ti mwawiihai nnaphuraahu orweela wa otholathola yoowo weeriweno ni oohuserya a Piipiliya oopacerya?

⁷ Olelo, ninnaphura orweela wa otholathola yoola weeriweno ni Akristu yaala oororomeleya  mu iyaakha sincipale muculi. Mwawiihai? Yehova onnanikhaviherya wiiwexexa yootaphulela ya mukucho wa woopola wa Yesu ni yeeyo owo onahaaleiye weera ntakhara hiyo vamoha ni achu oothene. (1 Yoh. 2:1, 2) Hiyaano tho noohuserya soororomeliha piili ntakhara yaawo anamuhakalaliha Muluku seiho Piipiliya onavahereryeiye—okumi woohikhwa wa yaale anahaala oya wirimu ni okumi woohimala wa amilyawu a achu yaawo anahaala okhala veelaponi yavathi. Ninnamwaacamela Yehova vaavaa nnuupuwelelaahu osivela otokweene oonihenryeiye wa hiyo aneene ni mukhalelo nnaphuraahu orweela wa mukucho wa Yesu. (1 Pet. 3:18; 1 Yoh. 4:9) Moolikana ni annihu yaale oororomeleya akhalai, hiyaano ninnasiveliwa waawopa akina wi nikhale vamoha va Yawuupuxerya mwawiiwanana ni yootakiherya yeeyo etikitheryiwe ni Yesu.

8. Tiheeni achu a Yehova aneeraaya wi yaawope akina ntakhara Yawuupuxerya? (Moone eruku.)

⁸ Achu a Yehova annaawopa akina ntakhara Yawuupuxerya mu iyaakha sincipale. Mu eyaakha ya 1881, anna ni arokora o Estatu Unitu yaahiwoompwa wi yathukumane mu empa ya munna mmoha o Alexeniya, Pensilvaniya, ntakhara yaweereya yeela yoochuneya. Voocharela, muloko ti muloko waanapaka Yawuupuxerya. Mu Marsu a 1940, alaleeryi yaahileeliwa wi yaaphwanela onwopaka muchu vyakala yoowo aahaala wooniherya nchuno mu ekulucu aya. Mu 1960, Epeteli yaahivahererya miwopelo sawimpirimiiriwa mmilokoni mu ekwaha yoopacerya. Ovinyerya vaavaa, miwopelo sincipale ntakhara Yawuupuxerya sinnakaiwa. Ntakhara heeni nnamalihaahu elukuluku yincipale ni olapa  moowetha wi naawope akina ntakhara Yawuupuxerya?

9-10. Taani anaphura orweela wa wiilipixerya yoowo nnapakaahu wi naawope akina ntakhara Yawuupuxerya? (Yohani 3:16)

⁹ Nthowa nimoha nnaneeriha waawopa akina ntakhara Yawuupuxerya ti nawi nnachuna wi awo ephiye mu ekwaha aya yoopacerya wi ehuserye eparipari vooloca sa yeeyo Yehova ni Yesu anapakaaya ntakhara oothene ahu. (Mwaalakhanye Yohani 3:16.) Hiyaano ninnaweherya wi yeeyo awo anahaalaaya woona ni wiiwa va Yawuupuxerya enahaala waaceenyerya ohuserya sincipale ni okhala alapeli a Yehova. Nyenya akina annaphura phaameene.

¹⁰ Ninnaawopa tho yaale ahin’ye omurumeela Yehova mu iyaakha sincipale. Ninneerano yeela wi niwuupuxerye awo wi Muluku nivano onnaasivela. Ancipale annaakhulela miwopelo sahu nave hiyaano ninnasiveliwa okhala vamoha ni yaawo va Yawuupuxerya. Ophiya va Yawuupuxerya onnawuupuserya awo woona mukhalelo yaaryaaya oohakalala vaavaa yaamurumeelaaya Yehova khalai. Muthokororye yootakiherya ya Monika. c Variyari va elukuluku ya epahu ya Koronaviru, owo aaheemereryiwa okhala mulaleeryi wanaawiili. Amanle ophiya va Yawuupuxerya ya eyaakha ya 2021, owo aahiloca: “Yawuupuxerya yeela yaari yavameekhaaya wa miyaano. Mu ekwaha yoopacerya mu iyaakha 20, kinnawerya waalaleerya achu ni waawopa ntakhara Yawuupuxerya. Kinnapaka soothene kinaweryaaka wi kaawope akina wi kooniherye othamalela waka wa yeeyo Yehova ni Yesu yeenraaya wa miyo.” (Sal. 103:1-4) Moohipwacha mukhalelo achu anaakhulelaaya nwopelo ahu, hiyaano ninnalapa moowetha wi naawope akina ntakhara Yawuupuxerya, nsuwelaka wi Yehova onnavaha esisapo wiilipixerya wahu.

11. Ti mwawiihai Yehova onareeliheiye wiilipixerya yoowo nnapakaahu wi naawope akina ntakhara Yawuupuxerya? (Axeu 2:7)

¹¹ Yehova onnareeliha vancipale wiilipixerya yoowo nnapakaahu wi naawope achu ntakhara Yawuupuxerya. Mu eyaakha ya 2021, naamwi ni nlamulo nenlo naatikitheryiwe nthowa na epahu ya Koronaviru, achu yaaphin’ye va Yawuupuxerya yaari 21.367.603. Nla chiryene numero nawaacaxa opwaha na Anamoona a Yehova ari veelaponi yoothene! Mweeparipari, Yehova hanapwacha pahiru waaca wa achu. Owo onampwacha mmoha ti mmoha ophin’ye va Yawuupuxerya. (Luka 15:7; 1 Tim. 2:3, 4) Nnaphwanela ororomela wi vaavaa nnaawopaahu akina, Yehova onnanikhaviherya waaphwanya yaawo arino murima woophwanelela.—Mwaalakhanye Axeu 2:7, PMM.

12. Mikhalelo taani sinahaala weeriha okhala woovila wa hiyo ophiya va Yawuupuxerya? (Moone eruku.)

¹² Yesu aahiloherya wi variyari va mahiku ookuchula, naahaala ohoolelaka makacamiho mancipale, ntoko wiiciwa veemusini, wiikariwa, ikhoco, ireca vamoha ni makacamiho makina. (Mat. 10:36; Mar. 13:9; Luka 21:10, 11) Mu ikwaha ikina, mikhalelo seiha sinanwerya weeriha okhala woovila wa hiyo wuupuwelela okhwa wa Yesu. Tiheeni anna ni arokora ahu aneeraaya wi evoothe makacamiho yaala oovila nave Yehova onaakhaviherya hai?

13. Ti mwawiihai Yehova aareelinheiye olipa murima ni yoolakelela ya Artem ya ophwanyeya va Yawuupuxerya naamwi ari mukariposo?

¹³ Owaleliwa. Annihu yaawo awaleliwe nthowa na nroromelo naya, annapaka yeeyo anaweryaaya wi yuupuwelele okhwa wa Yesu. Muthokororye yootakiherya ya Artem. Mu eyaakha ya 2020, variyari va isumana ehaakumve ni emanle Yawuupuxerya, owo ari mukariposo ekhaani yeeyo yaarimo achu athanu mu elukuluku  emohamoha. Naamwi aawaleliwe, owo aahiilipixerya wi awerye okhalano epaau ni eviinyu ntakhara Yawuupuxerya, nave aahipaka marehereryo wi aperekhe mwaha wa Yawuupuxerya wa yene mukhateiye. Nyenya, achu akina yaawo yaari mukariposo yaanamulya soona nave yaanaloca masu oohiphwanelela. Vano, tiheeni owo eenreiye? Owo aahaaveka yaawo wi waakhala wooweryeya emaale omulya soona ni oloca masu oohiphwanelela mu ewora emoha pahi. Artem aahitikhiniheya vaavaa asinthamwene awe a mukariposo yahaamulyilaaya soona ni opharihela masu oohiphwanelela variyari va Yawuupuxerya. Artem ooloca: “Kaahiivaha wi kiloce ni yaawo vooloca sa Yawuupuxerya.” Naamwi awo yaalonce wi hiyaachuna wiiwa vooloca sa yaweereya yeeyo, voocharela yaahimoona ni onwiriyana Artem apakaka Yawuupuxerya nave yaahimukoha vooloca sa yeeyo.

14. Ti mwawiihai achu a Yehova yaawenryaaya opaka Yawuupuxerya naamwi mu epahu ya Koronaviru?

¹⁴ Epahu ya Koronaviru. Wa nthowa na epahu yeela, achu a Yehova hiyaawerya opaka Yawuupuxerya yoonanaka. Nyenya ela hiyaaweerinhe awo ohiwerya ophwanyeya va Yawuupuxerya. d Miloko saahiwerya opaka Yawuupuxerya simpharihelaka  videoconferência. Nyenya hanka amilyawu a achu yaawo ahinawerya ompharihela interneti? Mu ilapo ikina, ifiliyale saahipaka marehereryo wi saakhaviherye achu owerya woona mwaha wa Yawuupuxerya mu televisau naari owiriyana mu raatiyu. Mwawaaceererya, ifiliyale saawerya okaravaari mwaha mu ilocelo opwaha 500 wi saakhaviherye yaale anakhala mmakupa oorakamela owiriyana mwaha wa Yawuupuxerya. Nave anna oororomeleya yaahipaka marehereryo wi evahererye miyaha seiha sookaravaariwa wa yaale yaachuna.

15. Tiheeni muhusenryaanyu orweela wa yootakiherya ya oohuserya a Piipiliya mmoha oniichaniwa Sue?

¹⁵ Wiiciwa veemusini. Wa akina, echu eneeriha okhala woovila ophwanyeya va Yawuupuxerya ori wiica yoowo anahoolelaaya veemusini. Muthokororye yootakiherya ya oohuserya a Piipiliya mmoha oniichaniwa Sue. Mu 2021, nihaakumve nihiku na Yawuupuxerya, Sue aahimuleela muhusiha awe a Piipiliya wi nthowa na wiiciwa veemusini owo haahaala owerya ophwanyeya va Yawuupuxerya. Muhusiha awe a Piipiliya aahimwaalakhanyerya yoorepa ya Luka 22:44. Owo aahimutharihela wi vaavaa nnahoolelaahu makacamiho, nnaphwanela ochariha yootakiherya ya Yesu moorweela wa omwaacamela Yehova mu nivekelo ni omuroromela yoowo moomalela. Nihiku noocharela, Sue aahirehererya epaau ni eviinyu ntakhara Yawuupuxerya nave aahoona Malapelo a Wooxixelo avameekhaaya mu jw.org. Mu ohiyu, vaavaa aareiye okwartu wawe mukhateiye, aahiwiriyana mwaha ntakhara Yawuupuxerya orweela mu telefoni. Voocharela, Sue aahimurepela michaka muhusiha awe a Piipiliya, ariki: “Mootepa okilipiha osilo. Kaahipaka soothene kaaweryaaka wi kiphwanyeye va Yawuupuxerya nave Yehova chiryene aahikikhaviherya. Nkinawerya othariha mukhalelo kihakalanlaaka ni kinathamalelaaka!” Waakhanle wi munnahoolela nikacamiho nimohamoha munaphwanela wuupuwela wi Yehova onamookhaviheryaani.

16. Ntakhara heeni nnaroromelaahu wi Yehova onnareeliha wiilipixerya nnapakaahu wi niphwanyeye va Yawuupuxerya? (Aroma 8:31, 32)

¹⁶ Yehova onnavaha esisapo wiilipixerya yoowo nnapakaahu wi nuupuwelele okhwa wa Yesu. Nnaphwanela ororomela yeela woona wi owo onnanreeliha vaavaa nnooniheryaahu othamalela wahu wa yeeyo owo eenreiye ntakhara hiyo. (Mwaalakhanye Aroma 8:31, 32.) Mwawiihiiha, hankooni nikhale oolakelela ophwanyeya va Yawuupuxerya ya eyaakha yeela nave nipake soothene nnaweryaahu wi naaceererye muteko ahu ntakhara Yehova variyari va isumana ehaakumve ni emanle Yawuupuxerya.