1. Ntakhara heeni nihiku na Yawuupuxerya nryaaya noochuneyaxa na va eyaakha? (Luka 22:19, 20)

 WA ACHU a Yehova, nihiku na Wuupuwelela okhwa wa Yesu ti noochuneyaxa na va eyaakha. Ela yaweereya emoha yeeyo Yesu olamulenleiye mooluluwanya wi oohuserya awe yeerekeno. (Mwaalakhanye Luka 22:19, 20.) Ninnawehererya ni murima woothene Yawuupuxerya ni mathowa mancipale. Hankooni nthokororye makina a yaawo.

2. Mathowa taani makina ananeeriha owehererya Yawuupuxerya?

² Yawuupuxerya ennanikhaviherya wuupuwelela ochuneya waya mukucho wa woopola. Eyo ennanuupuxerya mukhalelo nneeraahu nooniherye othamalela wahu mukucho wa Yesu. (2 Ako. 5:14, 15) Ennanivaha tho ekari ya ‘olipihana mukina ni mukhwaawe’ variyari va anna ni arokora ahu. (Aro. 1:12) Eyaakha ti eyaakha, achu ancipale ooceecheya omunepani annaphwanyeya va Yawuupuxerya. Ophiyerya tho akina annamukookela Yehova nthowa na waakheliwa phaama. Nave achu ancipale anooniherya nchuno annaceenyeryeya opacerya omuhuserya Piipiliya wanthowa na yeeyo anoonaaya ni aniiwaaya. Moohikhwa minikwa, Yawuupuserya yookhalano yootaphulela yavameekhaaya mmurimani mwahu!

3. Ti mwawiihai Yawuupuxerya eniiwananihaaya onnaahu wa elapo yoothene? (Moone tho eruku.)

³ Muupuwele tho mukhalelo Yawuupuserya eniiwananihaaya onna ahu wa elapo yoothene. Anamoona a Yehova orukurerya elapo yoothene annathukumana vaavaa nsuwa nnaneelaaya. Oothene ahu ninnawiriyana mwaha yoowo onathariha ochuneya waya woopola. Ninniipa macipo meeli a othamalela, ninnaviriha  ineneeryo, nave mmavekelo maxexe anapakiwa ninnaakhulela ni murima woothene nriki: “Aamen.” Variyari va nihiku nimoha, miloko soothene sinneerano echu emohamoha. Munnawerya waanyiherya mukhalelo Yehova ni Yesu anakhalaaya oohakalala vaavaa ananoonaaya naacicimihaka mwawiiwanana mmukhalelo yoowo?

4. Tiheeni nnahaalaahu othokororya mmwaha yoola?

⁴ Mmwaha yoola, nnahaala othokororya makoho ala: Nni nrehererye hai murima ahu ntakhara Yawuupuxerya? Ti mwawiihai nneeraahu naakhaviherye akina ophura orweela wa yeeyo? Nave nni naakhaviherye hai yaale ari ooceecheya omunepani? Maakhulo a makoho yaala anahaala onikhaviherya okhala ooreheryeya ntakhara elukuluku yeela yavameekhaaya.

NNI NREHERERYE HAI MURIMA AHU NTAKHARA YAWUUPUXERYA?

5. (1) Ntakhara heeni nnaphwanelaahu wuupuwelela esisapo ya woopola? (Salmu 49:7, 8) (2) Tiheeni muhusenryaanyu mu exilema Ntakhara Heeni Yesu Ookhwa?

⁵ Mukhalelo mmoha woochuneyaxa wa orehererya murima ahu ntakhara Yawuupuxerya ori moorweela wa wuupuwela vooloca sa ochuneya waya mukucho wa woopola wa Yesu Kristu. Hiyaano meekhiihu hini niwerye wiisoopola wa yoocheka ni okhwa. (Mwaalakhanye Salmu 49:7, 8; moone tho exilema: Ntakhara Heeni Yesu Ookhwa?) a Mwawiihiiha, Yehova aapaka marehereryo wi Yesu avahe okumi awe wi anivuluxe. Oopiili, Yehova ni Yesu, aapaka mukucho mutokweene. (Aro. 6:23) Vaavaa nnuupuwelelaahu vooloca sa yeeyo Yehova ni Yesu apankaaya ntakhara hiyo, nnahaala othamalela vancipale woopola. Nnahaala othokororya pahiru ichu savakhaani seiho Yehova ni Yesu alimvaaya wi enoopole. Nyenya woopaceryani, tiheeni evolowenle woopola?

6. Tiheeni evolowenlevo woopola?

⁶ Woopola eperesu yeeyo enaliveliwa wi ekookihiwe echu. Mulopwana oopacerya Atamu, aari oophaameya vaavaa aapatuxiweiye. Nto vaavaa aachenkeiye, owo aahiyeleela ewehereryo ya ekumi yoohimala, ohiya pahiru wa yene mukhateiye, nyenya tho wa anamwane awe oothene. Wi akookihe yeeyo Atamu oyeleenleiye, Yesu oovaha mukucho wa okumi awe woophaameya. Variyari va okumi awe woophaameya veelaponi yavathi, Yesu “haapanke yoocheka, naari mano hiwaaphwanyen’ye wootha mwaano mwawe.” (1 Pet. 2:22) Mu elukuluku ya okhwa wawe, ekumi yoophaameya ya Yesu yaaniiwanana ni yeeyo ene Atamu oyeleenleiye.—1 Ako. 15:45; 1 Tim. 2:6.

7. Saweeha taani ikina seiho Yesu ohoolenleiye vaavaa aareiye veelaponi yavathi?

⁷ Yesu aahititelela owiiwelela moophaameya Atiithi awe a wirimu, moohipwacha saweeha sincipale ohoolenleiye vaavaa aareiye veelaponi yavathi. Vaavaa aareiye mwaana, owo aaniiwelela ohoolela wa asitiithi awe yaawo yaari oohiphaameya naamwi owo aari oophaameya. (Luka 2:51) Vaavaa aareiye mmiravo, aanaphwanela ovootha okhinyererya vyakala yoowo waahaala omweeriha okhala oohiiwelela ni oohiroromeleya. Vaavaa aareiye muchu mutokweene, Yesu aaphwanela ovootha saweeha sa Satana, ophitaanyerya ohiphela wawooneya wa ororomeleya wawe wa Muluku. (Mat. 4:1-11) Satana aari oolakelela omweeriha Yesu ocheka wi ahikhale oophwanelela oliva woopola.

8. Saweeha taani ikina Yesu ovilenleiye?

⁸ Variyari va muteko awe veelaponi, Yesu aahivilela saweeha ikina. Amwiicani awe yaanamwiikara ophiyerya wi yaaneererya omwiipha. (Luka 4:28, 29; 13:31) Owo aaphwanela ovilela ni soohesa sa oomuchara awe. (Mar. 9:33, 34) Vaavaa aathorihiweiye, owo aahihooxiwa ni  onyemuliwa. Voocharela, aahiiphiwa mmukhalelo wawiicelaxa ni wawuuliha muru. (Ahe. 12:1-3) Owo aanaphwanela ovilela meekheiye makupa awe ookuchula a saweeha, ohirivo okhapelela wa Yehova. b—Mat. 27:46.

9. Ti mwawiihai nnoonaahu vooloca sa mukucho wa Yesu? (1 Petru 1:8)

⁹ Mweeparipari, Yesu oohooxeya vancipale wi avahererye woopola. Apwanne hannoona osivela wawiixeela wa Yesu vaavaa nnuupuwelaahu mukhalelo olemveiye okumi awe ntoko mukucho wa woopola ntakhara hiyaano?—Mwaalakhanye 1 Petru 1:8.

10. Tiheeni yaavolowela wa Yehova wi avahererye woopola?

¹⁰ Hanka vooloca sa Yehova? Tiheeni owo olemveiye wi Yesu awerye oliva woopola? Yehova ni Yesu aakhalano onthamwene wawaacameleyaxa yoowo onakhalavo variyari va tiithi ni mwanawe. (Mas. 8:30) Pahiru muupuwele mukhalelo Yehova aavoloweliweiye vaavaa aamooneiye Yesu ahoolelaka saweeha soohiyanahiyana veelaponi yavathi. Moohikhwa minikwa, yaahimwiicela vancipale Yehova omoona Mwanawe akhalihiwaka moonanara, akhoociwaka ni eehiwaka.

11. Mpharihele yootakiherya wi mooniherye mukhalelo Yehova iisooneiye vaavaa Yesu iiphiweiye.

¹¹ Tiithi vyakala omuyelenle mwanawe mookhwani, onnasuwela phaameene wiicela ni othanana otokweene onakhalavo. Nookhalano ewehereryo yoolipa ya ovinya mookhwani, nyenya eyo henamaliha wiicela yoowo nnoonaahu vaavaa nnamuyeleelaahu oosiveliwaahu mookhwani. Yootakiherya ela ennanikhaviherya wiiwexexa mukhalelo Yehova aakhanleiye vaavaa aamooneiye Mwanawe oosiveliwa ahooxeyaka ni okhwa mu nihiku nenle na 14 a Nisani a eyaakha ya 33 E.K. c—Mat. 3:17.

12. Tiheeni nnaphwanelaahu weera variyari va esumana ya Yawuupuxerya?

¹² Opacerya hiihava ophiyerya nihiku na Yawuupuxerya, munoona hai opaka marehereryo a otholathola vooloca sa woopola variyari va yoohuserya anyu ya muchu mukhateiye naari Malapelo a Echoko? Mpharihele Yoohoolela ya Otholathola ya Anamoona a Yehova naari soolaleeryiwa ikina wi mphwanye sooleeliherya sincipale vooloca sa mukucho wa woopola. d Ohiya yeeyoru, mwiilipixerye wi mpharihele yoochariha ya waalakhanyiwa wa Piipiliya ntakhara Yawuupuxerya, yeeyo enaphwanyeya mu Okumi ni  Muteko Ahu Weekristu—Yoochariha ya Mithukumano. Nave mu nihiku na Yawuupuxerya, muhicuwale woona Malapelo a Wooxiixelo avameekhaaya. Vaavaa nnarehereryaahu murima ahu ntakhara Yawuupuxerya, nnahaala okhala ooreheryeya waakhaviherya akina ophura va Yawuupuxerya.—Estr. 7:10.

MWAAKHAVIHERYE AKINA WI EPHWANYE MPHURELO

13. Echu taani nnaphwanelaahu weera wi naakhaviherye akina ophura va Yawuupuxerya?

¹³ Nni naakhaviherye hai akina ophwanya mphurelo va Yawuupuxerya? Mweeparipari, echu yoopacerya ori waawopa. Ohiya pahiru olocano achu yaawo nnaaphwanyaahu mmuteko woolaleerya, nnanwerya opaka elista ya achu yaawo nnachunaahu waawopa. Eyo enanwerya ophitaanyerya amusi ahu, asinthamwene oomuteko naari ooxikola ni akina. Naamwi nihirino nwopelo wawimpirimiiriwa, nnanwerya waavonyerya linkhi onahaala waakeriha mu nwopelo ori mu esaiti ahu. Taani osuwenle achu akavi anahaala waakhulela!—Ekl. 11:6.

14. Mphwanaphwanihe owerya wa nwopelo onavahiwa ethoi ni ethoi.

¹⁴ Wakhala wi nyuwaano munnanwopa muchu ethoi ni ethoi wi aphiye va Yawuupuxerya, owo onanwerya oceenyeryeya ophiya va muthukumano. Nihiku nimoha, murokora mmoha yoowo iyawe ohiri Namoona a Yehova aahitikhiniheya vaavaa awo yaaloncaaya wi aahaala woonela Yawuupuxerya. Ntakhara heeni owo aahitikhiniheya? Nthowa nawi ikwaha sincipale khalai, owo aanamuceenyerya wi aphwanyeye va Yawuupuxerya, nyenya owo hantonko oyawo. Vano tiheeni etoroken’ye mu ekwaha ela? Owo ooloca: “Kaahaakhela nwopelo ethoi ni ethoi,” atharihaka wi mutokweene a vanipuroni yoowo aamusuwenleiye taanwompe. Aiyawe yaahoonela Yawuupuxerya eyaakha yeele ni iyaakha sincipale soocharela.

15. Tiheeni nnaphwanelaahu okhalano mmuupuweloni vaavaa nnaawopaahu achu ntakhara Yawuupuxerya?

¹⁵ Muupuwele wi achu nnaawopaahu ananwerya okhalano minikwa, xaxaxa wakhala wi hantonko ophwanyeya mmithukumano sahu. Mwawiihiiha, nnanwerya wuupuwelelaka sa makoho yaawo awo anahaalaaya opakaka. (Ako. 4:6)  Ntoko yootakiherya, akina ananwerya wiikoha: ‘Tiheeni enahaala weereya va Yawuupuxerya?’ ‘Enahaala omaliha iwora kavi?’ ‘Tiheeni kinaphwanelaaka owara?’ ‘Honaliveliwawo?’ ‘Kinahaala opaka sooveleela?’ Vaavaa nnanwopaahu muchu ntakhara Yawuupuxerya, mookhweya nnanwerya omukoha: “Apwanne mookhalano minikwa?” Nave voocharela mwaakhule makoho yaawo oreiyeno. Nave tho nnanwerya opharihela ixilema ntoko Wuupuwelela Okhwa wa Yesu ni Tiheeni Eneereya mu Empa ya Omwene? Wi mmukhaviherye muchu owo wiiwexexa mukhalelo mithukumano sahu ineecaaya, mwaha 28 wa liivuru Mpuhe Okumi Okhala Wookhala! sookhalamo sooleeliherya sincipale.

16. Makoho taani makina anahaalaaya okhalano yaale anahaala ophiya va Yawuupuxerya?

¹⁶ Emanle ophiya va Yawuupuxerya, ale avyaani arino nchuno ananwerya okhalano minikwa mincipale. Ntakhara heeni haavo olyile epaau ni owurya eviinyu, naari ntakhara heeni pahiru achu avakhaani talyile epaau ni owurya eviinyu. Awo tho ananwerya wiikoha vooloca sa ikwaha kavi nnapakaahu Yawuupuxerya. Nave tho ananwerya ochuna osuwela waakhanle wi mithukumano soothene sa Anamoona a Yehova ineeriwano mmukhalelo mmohamoha. Naamwi ipontu seiyo imanle otharihiwa mmwaha wa Yawuupuxerya, ale avyaani anamuchuna othariheliwa phaama. Mmwaha wa mu jw.org orino muru wawi: “A Ceia do Senhor—Porque as Testemunhas de Jeová Celebram de Modo Diferente?” onanwerya onikhaviherya waakhula makoho aya makina. Nnaphwanela opaka eri yoothene nnaweryaahu ehaakumve, variyari, ni emanle Yawuupuxerya wi naakhaviherye yaale ‘arino nchuno’ wi ephure ni yaweereya yeela.—Saw. 13:48.

WAAKHAVIHERYA OOCEECHEYA

17. Ti mwawiihai atokweene anahaalaaya waakhaviherya yaale ari ooceecheya? (Esekiyeli 34:12, 16)

¹⁷ Variyari va elukuluku ya Yawuupuxerya, ti mwawiihai atokweene aneeraaya yaakhaviherye yaale ari ooceecheya? Mooniherye wi munnaapwacha yaawo. (Mwaalakhanye Esekiyeli 34:12, 16.) Ehaakumve Yawuupuxerya, Muhihiyererye waawopa achu ancipale wakhala wooweryeya. Mwaaleele wi munnaapwacha yaawo  nave wi munnachuna waakhaviherya yaawo wakhala wooweryeya. Mwaawope wi ephwanyeye va Yawuupuxerya. Wakhala wi aaphiya, nwaakhele phaama. Emanle Yawuupuxerya, mutitelele waaxekurya anna yaawo ni arokora ni waavahererya nikhaviheryo noochuneya noomunepani wi awo ewerye omukookela Yehova.—1 Pet. 2:25.

18. Ti mwawiihai oothene ahu nneeraahu naakhaviherye ooceecheya? (Aroma 12:10)

¹⁸ Oothene mmulokoni ananwerya waakhaviherya ooceecheya yaawo aniilipixerya ophiya va Yawuupuxerya. Mwawiihai? Mwaakhaliheke moosivela, mooreera murima ni mwa ncicimiho. (Mwaalakhanye Aroma 12:10.) Muupuwele wi ipucepuche seiha inanwerya woovelela okookela othukumana. Akhweya annoovelela yuupuwelaka wi hiyaakheliwa phaama. e Mwawiihiiha, musepe opaka makoho yaawo yaahaala owaakanyerya naari echu yeeyo yaahaala waakwaculiha. (1 Ate. 5:11) Anna yaala ni arokora akhwiihu a munroromeloni. Ninnahakalala omulapela Yehova vamoha ni yaawo wanaawiili!—Sal. 119:176; Saw. 20:35.

19. Miphurelo taani inakhumelela orweela mu wuupuwelela okhwa wa Yesu?

¹⁹ Ninnathamalela nthowa na Yesu onileela wi nuupuweleleke okhwa wawe eyaakha ti eyaakha, nave ninniiwexexa ntakhara heeni eyo ti yoochuneyaxa. Vaavaa nneeraahuno yeeyo, ninnaphura hiyo mukhatiihu ni akina tho mmikhalelo mincipale. (Yes. 48:17, 18) Ninnannuwiha osivela wahu wa Yehova ni wa Yesu. Ninnooniherya othamalela wahu otokweene wa yeeyo awo apankaaya ntakhara hiyaano. Ninnalipiha wiiwanana wahu ni anna ni arokora. Nave nnanwerya waakhaviherya achu akina ohuserya mukhalelo anahaalaaya opuha mareeliho yaawo woopola weerinhaaya okhala wooweryeya. Mwawiihiiha, nipake soothene nnaweryaahu wi nikhale ooreheryeya ophwanyeya va Yawuupuxerya mu eyaakha yeela nenlo nri nihiku noochuneyaxa na eyaakha!