MASU ataphuleliwe awi “ekaaro” mu Tradução do Novo Mundo ananwerya othoonyerya ikaaro vyakala soohiyanahiyana. (Saw. 8:28, 29, 38) Mwawiihiiha, enakhala wi Mutiyope eeca ni ekaaro etokweenexa ohiya ekaaro vyakala ya ekhoco naari ya mapokha. Muthokororye mathowa avakhaani ananeeriha ophiyerya makuchuwelo yaala.

Mutiyope aari mutokweene avasuluxa yoowo eence mukwaha woorakama. Owo aari “mutokweene a Kantake, mwene amwaamuthiyana o Etiyopiya, yoowo aari mulipa oovareryela muhakhu awe woothene.” (Saw. 8:27) Etiyopiya akhalai aaphitaanyerya Sutau ahiihaano ni makupa makina a Yikuputu ahiihaano. Naamwi mulopwana owo akhweya aheence ni ekaaro emohamoha variyari va mukwaha awe woothene, ti yawooneya wi owo aahikhalano niphuta ntakhara mukwaha woorakama. Ikaaro saaphariheliwa mu nsana noopacerya E.K. seiyo saateexa achu, saakhalano maroota maxexe nave yaanaakhapelela awo orweela wa nsuwa naari epula. Ereferensiya emoha ya Mpiipiliyani yooloca: “Ekaaro ntoko yeela yaahikhalano nipuro ntokweene wi eteexe maphuta mancipale, yaaneeriha mukwaha okhala woopuheya, nave woonaru yaanapharihela mmikwaha mitokweene.”

Mutiyope aamwaalakhanya Vaavaa Filipi aamwaacamenleiye yoowo. Yaweereya ennathariha wi “Filipi aachimakela ekaaro nave aamwiiwa yoowo amwaalakhanyaka moovuwa liivuru a mulipa a miririmu Yesaya.” (Saw. 8:30) Ikaaro seiyo hisaapakeliwe ntakhara mikwaha sawaakuveyaxa. Nthowa na weeca vakhaani-vakhaani, yaaheeriha wi Mutiyope awerye waalakhanya, nave tho yaaheeriha wi Filipi awerye omphwanya ni meco.

Mutiyope “aamveka Filipi wi awele akiraathi vamoha ni yoowo.” (Saw. 8:31) Mu ekaaro yakhoco alipa aweeciha yaamweemela. Nyenya ekaaro yeeyo yaapakeliwe ntakhara mukwaha vyakala, yaahikhalano mapuro wi Mutiyope ni Filipi ekiraathi.

Mwawiiwanana ni masu ooveereliwa anaphwanyeya mu Saweeriwa ti Arummwa ekapitulu 8 ni saweereya inaphwanyeya mu soolaleeryiwa sahu sa hiihaanoru, ennamuloca Mutiyope wi eeca ni ekaaro etokweene ohiya ikaaro vyakala sa anakhoco naari sa mapokha.