1-2. Makacamiho taani alapeli oororomeleya a Yehova anahaalaaya ohoolela?

 ICHU sawoopiha inanwerya otoroka okumi ahu mwawaakuveyaxa. Ntoko yootakiherya, munna mmoha oororomeleya onichaniwa Luis a aahiphwanyiwano ereca yawoopiha ya Kanser. Totore aahimuleela wi owo orinono miyeeri sa vakhaani sa okumi awe. Monika ni iyawe yaari ooweiwa emurumeelaka Yehova vamoha. Nto nihiku nimoha, Monika aahisuwela wi iyawe yoowo aari mutokweene a muloko, aanapaka yoocheka moovitheya mu iyaakha sincipale. Oliviya, murokora yoowo ori muciye, aahileeliwa wi aaphwanela ovinyavo vaate vawe wanthowa na echeku etokweene yaahaala ovira, vaavaa aakookenleiye owaani, ahoona wi echeku yeele yaahimwarya empa awe. Moohiwehereryeya, okumi wa Luis, Monika ni Oliviya waatorokeya moomalela. Apwanne munnawerya waanyiherya mukhalelo awo yaakhanlaaya? Apwanne moohoolela yaweereya yootutuxa yeeyo yaatoronke okumi anyu?

² Naamwi nri alapeli oororomeleya a Yehova, nlelo ninnahoolela makacamiho ni wiiceliwa yoowo ori wawunlaana wa achu oothene. Nave tho nnanwerya ovilela ni waakaahiwa ni wiikariwa orweela wa yaale anawiica achu a Yehova. Naamwi Yehova ahinikhapelelaka mmakacamiho makina, owo oororomeliha onikhaviherya. (Yes. 41:10) Nnikhaviheryo nawe nnanwerya okhala oohakalala, opaka soolakelela saphaama ni otitelela okhala oororomeleya wa yoowo naamwi nihoolelaka mikhalelo soovila. Mmwaha yoola, nnahaala othokororya mikhalelo mixexe seiyo Yehova onaphariheleiye wi anikhaviherye variyari va ilukuluku  soothene sookacamiha sa okumi ahu. Nnahaala othokororya yeeyo nnaphwanelaahu weera wi niphure orweela wa nikhaviheryo nenlo owo onavahereryeiye.

YEHOVA ONAHAALA WOOKHAPELELAANI

3. Vaavaa nnahoolelaahu nikacamiho ntokweene, tiheeni nnahaalaahu woona okhala woovila weera?

³ Nikacamiho. Vaavaa nnahoolelaahu yaweereya yoovila nnawerya okhalano nikacamiho na wuupuwelela moomaaleleya ni opaka soolakelela. Ntakhara heeni? Nthowa nawi nnanwerya okhala awuukhuwaxa ni oothanana. Nnamwiisoona ntoko nneeca ni mwaaceya nihisuwelaka nnayaahuwo. Moone mukhalelo yiisoonaaya variyari va makacamiho aya arokora eeli yaale elociwe woopaceryani. Oliviya ooloca: “Emanle echeku etokweene omwarya empa aka, kaahikhala oothanana ni awuukhuwa.” Vooloca sa ohiroromeleya wa iyawe, Monika oriye: “Kaari oolamwiheyaxa. Kaahoona wiicela yoowo waakiphoreihale mpuwa. Waari woovila ophara miteko sa nihiku ti nihiku. Miyaano nkintonko wuupuwela wi ele yaahaala weereya ni miyaano. Ti mwawiihai Yehova onaniroromeliheiye onikhaviherya wakhala wi ninnahooseya?

4. Mwawiiwanana ni Afilipi 4:6, 7, tiheeni Yehova oniroromelinheiye?

⁴ Tiheeni Yehova onapakeiye? Owo onnaniroromeliha onivaha yeeyo Piipiliya oniichaneiye “murecele wa Muluku.” (Mwaalakhanye Afilipi 4:6, 7.) Murecele yoowo ti omaaleleya wa mmuupuweloni ni wa mmurimani yoowo onakhala pahiru ni asinthamwene awe. Murecele yoola ‘onnapwaha wiiwexexa woothene’ nave ti wootikhiniha opwaha mummo nnaanyiheryaahu. Apwanne mohintoko wiisoona okhala oomaaleleya mmanle ovekela moohihiyererya wa Yehova? Moonelo yoowo woomaaleleya ti “murecele wa Muluku.”

5. Ti mwawiihai murecele wa Muluku onakhapelelaaya murima ahu ni muupuwelo ahu?

⁵ Yoorepa emohamoha ennaloca wi murecele wa Muluku “onarwa okhapelela murima anyu vamoha ni muupuwelo anyu.” Masu awi “okhapelela” yaaphariheliwa ni anakhoco wi eloce sa anakhoco yaawo yaalipelela epooma wi ekhale ookhapeleleya. Achu mu epooma yaakhapeleliwa yanwerya okona mmureceleni esuwelaka wi anakhoco yaanakhapelela milako. Mmukhalelo mmohamoha, vaavaa murecele wa Muluku onakhapelelaaya muupuwelo ni mirima sahu, ninniisoona oomaaleleya nsuwelaka wi nri ookhapeleleya. (Sal. 4:8) Hiihaa ntoko Ana, naamwi mukhalelo ahu ohitoroken’ye mwawaakuveya, nlelo nnanwerya okhalano murecele. (1 Sam. 1:16-18) Vaavaa nniisoonaahu okhala oomaaleleya, ninnoona okhala wookhweya wuupuwelela moomaleleya ni opaka soolakelela mwa miruku.

6. Tiheeni nnaphwanelaahu weera wi niphure murecele wa Muluku? (Moone tho eruku.)

⁶ Tiheeni nnaphwanelaahu weera? Vaavaa munakhalaanyu a wuukhuwa mmwiichane  ‘mukhapeleli.’ Mwawiihai? Mvekele ophiyerya woona murecele wa Muluku. (Luka 11:9; 1 Ate. 5:17) Luis, yoowo olociwe wuupaceryani oothariha mukhalelo owo vamoha ni amwaariye Ana, yaawenryaaya ovootha vaavaa yaasuwenlaaya wi aarino miyeeri savakhaani mu okumi awe. Owo ooloca: “Mu ilukuluku ntoko seiha, ti woovila opaka soolakelela vooloca sa okumi ni miyaha mikina. Nyenya pahiru ninnawerya okhalano murecele variyari va ilukuluku soovila wanthowa na mavekelo.” Luis ni mwaariye aaloca wi awo yaanavekela mu ilukuluku soothene ni mwawuuluulela, emvekaka Yehova wi aavahe murecele wa mmuupuweloni, murima woomaaleleya ni miruku wi ewerye opaka soolakelela saphaama. Nave awo yaahoona nikhaviheryo nawe. Wakhala wi munnavilela ni makacamiho, mutitelele ovekela nave munahaala woona murecele okhapelelaka murima ni muupuwelo anyu.—Aro. 12:12.

YEHOVA ONAMOOTIKITHERYAANI

7. Ti mwawiihai nnaphwanelaahu wiisoona vaavaa nnahoolelaahu yaweeha yoovila?

⁷ Nikacamiho. Vaavaa nnahoolelaahu yaweeha yoovila, mukhalelo ahu wa wuupuwelela, weera ichu onanwerya okhala woohiphimeleleya ntoko neeraahu khalai. Nnanwerya wiisoona ntoko nnavonyiwa ni echeku wu ni wu. Ana, yoowo olociwe wuupaceryani, ooloca wi aahihoolela makacamiho oohiyanahiyana oocharelana iyawe Luis amanle okhwa. Owo ooloca: “Ikwaha ikina kaanakhala oothananaxa nave kaahipacerya wiisoona omeekha. Miyaano tho kaahipacerya onyeenyeya wanthowa na okhwa waya.” Ilukuluku ikina, Ana aaniisoona omeekha ni okhala oonyeenyeya ntakhara opaka soolakelela vooloca sa miyaha seiho Luis aakhapeleleiye phaama. Mu ikwaha ikina, owo aniisoona ntoko aakusiwa ni echeku ya mphareya. Ti mwawiihai Yehova onanikhaviheryeiye vaavaa nnavoloweliwaahu ni miyoonelo ntoko seiho?

8. Ntoko etharihiwaaya mu Yesaya 33:6, tiheeni Yehova onaniroromeliheiye?

⁸ Tiheeni Yehova onapakeiye? Owo oororomeliha onipharerela. (Mwaalakhanye Yesaya 33:6.) Vaavaa pophoro onaphwanyeiye echeku yawoopiha mphareya, owo onanwerya opacerya othekuwaka mwawoopiha akerihiwaka wu ni wu. Wi pophoro atitelele okhala ookhapeleleya, owo onanwerya okhalano maseese ootikhiniha yaawo anakhala mu iparari sawe. Maseese yaala ananwerya omukhaviherya pophoro ohithekuwaka vancipale. Mwawiihiiha, maseese yaala annalapa phaama vaavaa pophoro oneeceiye. Yehova onahaala okhaviherya vaavaa nnatitelelaahu omurumeela yoowo moororomeleya mu ilukuluku sookacamiha.

9. Ti mwawiihai ikaruma sahu sa otholathola sinahaalaaya onikhaviherya okhala oophimelela? (Moone tho eruku.)

⁹ Tiheeni nnaphwanelaahu weera? Vaavaa munahoolelaanyu echeku yoosiphela, mutitelele  ovekela, ophwanyeya mmithukumano ni mmuteko woolaleerya. Eparipari wi nyuwaano hamuwerya opaka yeeyo mwaaweryaanyu opaka khalai, nyenya muupuwele wi Yehova hanawehererya yeeyo nihinaweryaahu opaka. (Mulikanyihe ni Luka 21:1-4.) Nave tho munaphwanela otikitherya yoohuserya ya muchu mukhateiye ni wuupuwelela. Ntakhara heeni? Moorweela wa marehereryo awe, Yehova onnavahererya sooleeliherya sinathipeleya Mpiipiliyani seiho sinahaala onikhaviherya otitelela okhala oororomeleya. Wi mphwanye yeeyo munachunaanyu, munanwerya opharihela ikaruma sa otholathola sinaphwanyeya mu elocelo anyu, ntoko aplikativu JW Library^®, Índice das Publicações da Torre de Vigia, vamoha ni Yoohoolela ya Otholathola ya Anamoona a Yehova. Monika, yoowo olociwe woopaceryani ooloca wi aahipacerya opharihela soohoolela sa otholathola seiha vaavaa muupuwelo woohooxa wamphwanyaaya. Ntoko yootakiherya, owo aahitholathola vooloca sa “Esara.” Mu ilukuluku ikina, aahitholathola vooloca sa “ohiroromeleya mu othela” naari “ororomeleya.” Aanaalakhanya ophiyerya okhala phaama. Owo ooloca: “Vaavaa kaapaceryaaka otholathola, kaaniisoona okhala awuukhuwa. Nyenya vaavaa kaatitelelaaka waalakhanya kaanoona wi Yehova aaniiwexexa moonelo aka woothene, nave aanakikhaviherya.” Opwacha yoowo wa Yehova onanwerya tho wookhaviheryaani okhala oophimelela ophiyerya okhala oomaaleleya.—Sal. 119:143, 144.

YEHOVA ONAMOOKHAVIHERYAANI

10. Mmukhalelo taani nnahaalaahu wiisoona emanle weereya echu yawoopiha?

¹⁰ Nikacamiho. Nimanle weereya nikacamiho noovila mu okumi anyu, akhweya annakhalavo mahiku yaawo munakhalaanyu ooceecheya omwiilini ni mmuupuweloni. Nnanwerya wiisoona ntoko mulipa oochimaka ohorokonyen’ye, yoowo aakhovelenle ochimaka mwawaakuva, vano oneeca ootuthunyeene. Nnanwerya woonaka ichu seiho naakhoveleenlaahu opaka okhala soovila naari wi nnanwerya ohikhalano nchuno na opaka ichu seiho naaweryaahu opaka. Ntoko Eliya nnamoonaka okhala woovila ovinya nave nnahaala ochunaka okona pahi. (1 Mam. 19:5-7) Tiheeni Yehova onaniroromeliheiye vaavaa nnakhalaahu ooceecheya?

11. Mukhalelo taani mukina Yehova onanikhaviheryeiye? (Salmu 94:18)

¹¹ Tiheeni Yehova onapakeiye? Owo oororomeliha onikhaviherya. (Mwaalakhanye Salmu 94:18.) Hiihaa ntoko mulipa oochimaka oohorokonyowa onachuneiye nikhaviheryo wi awerye weeca, nnamuchuna nikhaviheryo wi ntitelele okhala amvai mmuteko wa Yehova. Mu ilukuluku seiha, Yehova onnaniroromeliha ariki: “Miyo Apwiya Muluku  aa, kinamoopharela ntata naa noolopwana, kiriki: ‘Ohoove, yoomi ene kinamookhaviherya!’” (Yes. 41:13, PMM) Mwene Tavite ohoona nikhaviheryo nenlo. Variyari va saweeha, ni wiiciwa, owo aaloca wa Yehova: “Munnakipharela ni ntata nanyu noolopwana.” (Sal. 18:35, PMM) Nyenya ti mwawiihai Yehova onavahereryeiye nikhaviheryo?

12. Taani Yehova onahaaleiye ompharihela wi anikhaviherye vaavaa nnakhalaahu ooceecheya?

¹² Yehova mu ilukuluku yincipale onnaapharihela achu akina wi enikhaviherye. Ntoko yootakiherya, mu ekwaha emoha vaavaa Tavite iisooneiye ooceecheya, nthamwene awe Yonata aahimuxekurya wi amvahe nikhaviheryo na mmuupuweloni ni omulipiha yoowo. (1 Sam. 23:16, 17) Moolikana Yehova aahimuthanla Eliseu wi avahererye nikhaviheryo noophara muteko wa Eliya. (1 Mam. 19:16, 21; 2 Mam. 2:2) Olelo, Yehova onanwerya waapharihela amusi, asinthamwene naari atokweene wi enikhaviherye. Nyenya vaavaa nnakhalaahu oonyeenyeya nnanwerya ochunaka okhala ocai wa achu akina. Pahiru nnachuna okhala mukhatiihu. Owo moonelo wawunlaana. Tiheeni nnaphwanelaahu weera wi naakhele nikhaviheryo na Yehova?

13. Tiheeni nnaphwanelaahu weera wi niphure nikhaviheryo na Yehova?

¹³ Tiheeni nnaphwanelaahu weera? Mwiilipixeryeke wi muhiivalaanyeke. Vaavaa nniivalaanyaahu, ikwaha sincipale ninnapacerya wuupuwela pahiru wa hiyo mukhatiihu ni wa makacamiho yaawo nnahoolelaahu. Miyoonelo sene seiya inanwerya ovolowela soolakelela seiho nnapakaahu. (Mas. 18:1) Eparipari wi oothene ahu ninnachuna elukuluku ya okhala mukhatiihu, xaxaxa vaavaa nnahoolelaahu mikhalelo soovilaxa. Wakhala wi ninniivalaanya mu elukuluku yincipale, eyo enahaala oneeriha okhooca nikhaviheryo na anna yaawo Yehova onaaphariheleiye wi enikhaviherye. Naamwi muri mu ilukuluku soovilaxa, mweemereryeke nikhaviheryo na amusi anyu, asinthamwene ni atokweene. Mooneke wi eyo yoovaha ya Yehova, yeeyo owo onaphariheleiye wi ookhaviheryeeni.—Mas. 17:17; Yes. 32:1, 2.

YEHOVA ONAMOOHAKARARYAANI

14. Ichu taani saahaala oneeriha okhala awoova?

¹⁴ Nikacamiho. Nnanwerya ohoolela ilukuluku seiho inahaala oneeriha okhala awoopopiheya. Mpiipiliyani, alapeli oororomeleya a Muluku annaloca sa ilukuluku seiyo yaaryaaya awuukhuwa ni oothukumela nthowa na amwiicani aya naari okhinyererya okina. (Sal. 18:4; 55:1, 5) Moolikana tho nnanwerya ohoolela waakaaha oxikola, omutekoni, wa amusi ahu naari tho wa alamuleli. Ophiyerya tho nnanwerya  ohala vakhaani okhwa nthowa na nikacamiho nammoori. Variyari va ilukuluku seiya, nnanwerya wiisoona ohikhapeleleya ntoko nikwiya. Ti mwawiihai Yehova onanikhaviheryeiye mu ilukuluku seiho soovila?

15. Yoororomeliha taani Salmu 94:19 onavahereryeiye?

¹⁵ Tiheeni Yehova onapakeiye? Owo onnanihakararya ni onimaaliha. (Mwaalakhanye Salmu 94:19.) Salmu yoola onanwerya onuupuweliha sa mwaana yoowo ori ootuthuwa ahinawerya okona nthowa na echeku etokweene ni yawoopiha. Nnanwerya waanyiherya apapaawe ephin’ye, emukuxaka ni emukhupaarelaka ophiyerya akonne. Naamwi echeku eri etokweene ni yawoopiha, owo onniisoona okhala ookhapeleleya ni oohakararyeya mmatani mwa apapaawe. Vaavaa nnahoolelaahu saweeha sawoopiha, akhweya nnamuchuna wi Tiithi ahu awirimu anipharele ophiyerya saweeha sivinre. Nni niwerye hai waakhela ohakararya yoowo wa Yehova?

16. Tiheeni nnaphwanelaahu weera wi niphure ohakararya wa Yehova? (Moone tho eruku.)

¹⁶ Tiheeni nnaphwanelaahu weera? Mmaliheke elukuluku yincipale ni Yehova, mvekelaka wa yoowo nave tho mwaalakhanyaka Masu awe. (Sal. 77:1, 12-14) Wakhala wi mookhalano yookhovelela ene yeela, echu yoopacerya akhweya munahaalaanyu weera vaavaa munakhalaanyu onyeenyeya ori waavya nikhaviheryo na Tiithi anyu awirimu. Mmuleele Yehova yeeyo munoovaanyu nave tho yeeyo enaweerihaani okhala awuukhuwa. Voocharela munwiriyane yoowo moorweela wa waalakhanya masu awe, nave munahaala woona mukhalelo owo onoohakararyeiyeni. (Sal. 119:28) Vaavaa munakhalaanyu awoova akhweya munanwerya wuupuwela wi makupa makina a Mpiipiliyani hanoohakararyaani. Ntoko yootakiherya, munanwerya ophwanya nlipiho mu aliivuru a Yupu, Salmu ni Masiposipo, hiihaa ntoko masu a Yesu anaphwanyeya mu Mateyu ekapitulu 6. Vaavaa munavekelaanyu wa Yehova ni waalakhanya masu awe, munamphwanya nihakararyo.

17. Ororomela taani nnaphwanelaahu okhalano?

¹⁷ Nnanwerya ororomela wi Yehova onahaala onikhaviherya vaavaa nnahoolelaahu makacamiho oovila mu okumi ahu. Hanrwa nikhala mukhatiihu. (Sal. 23:4; 94:14) Yehova ooniroromeliha onikhapelela, onitikitherya, onikhaviherya ni onihakararya. Vooloca sa Yehova, Yesaya 26:3, PMM oni: “Muchu awiivelela mwa Apwiya, nyuwo munnamuthokororya, mumvaha murecele-murecele, ntakhara onnoororomelaani.” Mwawiihiiha, mmuroromele Yehova nave mpake echu eri yoothene munaweryaanyu wi mphure wa nikhaviheryo noothene owo onavahereryeiye. Mweerano yeela munamphwanya ikuru naamwi muri mu ilukuluku soovila.