1. Vaavaa munuupuwelaanyu vooloca sa Yehova, tiheeni enoorweelaani mmuupuweloni?

 APWANNE mohintoko waanyiherya mukhalelo Yehova oreiye? Vaavaa munalocaanyu ni yoowo mu nivekelo, tiheeni enoorweelaani mmuupuweloni? Naamwi Yehova ari oohooneya, Piipiliya onnamuloca mmikhalelo soohiyanahiyana. Owo onniichaniwa ntoko ‘omwaleela ni naakiho,’ ni “mooro wootoloxa.” (Sal. 84:11, PMM; Ahe. 12:29) Va munyukhuni vawe yaakhalavo echu yaalikana ni nluku nawaarya, muthipo wawaarya ni ekhwiini yawaarya. (Ese. 1:26-28) Soothariha seiha vooloca sa Yehova inanwerya waaceererya omutikhina wahu Yehova ni ophiyerya okhala oohaleeliheya.

2. Echu taani enaahiiha akina omwaacamela Yehova?

² Woona wi hannawerya omoona Yehova, nnanwerya okhwaaka minikwa waakhanle wi owo onnanisivela. Akina anuupuwela wi Yehova harwa aasivela nthowa na saweera saya sakhalai. Akhweya hiyintonko okhalano tiithi yoowo aasivela. Yehova onniiwexexa mukhalelo yoola achu aniisoonaaya ni mukhalelo eyo enanivolowelaaya. Wi anikhaviherye, owo onnaloca mikhalelo sawe saphaama Mpiipiliyani.

3. Ntakhara heeni nnaphwanelaahu woona osivela wa Yehova vakhiviru?

³ Masu mamoha anathariha omuchu wa Yehova ti osivela. (1 Yoh. 4:8) Osivela onnamusuwanyeiha. Nave onnavolowela ichu soothene onapakeiye. Osivela wa Muluku ti waphaama, wakuru, ophiyerya wi onnawooniherya yaale ahinamusivela. (Mat. 5:44, 45) Mmwaha yoola, nnahaala woona vooloca sa Yehova ni osivela wawe. Vaavaa nnahuseryaahu vancipale vooloca sa Muluku ahu, osivela wahu wa yoowo onnannuwa.

 YEHOVA ONNANISIVELA VANCIPALE

4. Opwacha wa Yehova onaweerihaani wiisoona hai? (Moone tho eruku.)

⁴ “Yehova ookhalano niphwanya ntokweene.” (Tiy. 5:11) Mpiipiliyani, owo onniilikanyiha ni maayi a niphwanya. (Yes. 66:12, 13) Mmwaanyiherye maayi yoowo onakhapelela mooreera murima nikwiya nawe. Owo onnakokhora nave moosivela onnaloca ni yoowo ni nsu nooreeraxa. Vaavaa oninleiye ni onooneiye wiicela, owo onneera soothene wi amuhakararye. Vaavaa nnoonaahu wiicela, nnanwerya ororomela osivela wa Yehova. Mulipa oomurepa salmu aahiloca: “Sancaaya sawuukhula mpuwa mwaka, mwaakihakalaliha.”—Sal. 94:19, PMM.

5. Osivela woororomeleya wa Yehova onataphulela eheeni wa nyuwo?

⁵ Yehova toororomeleya. (Sal. 103:8) Naamwi nipanke yoohesa, owo hananinyanyala. Nloko na Isarayeli naahimuthananiha Yehova mu ikwaha sincipale, naamwiihiiha, owo aahooniherya osivela wawe woohimala wa yaawo yaacharunwe moorweela wa masu ala: ‘Wa ookhweleyaxa vamiithoni vaka, onnacicimiheya nave miyo kinnoosivela.’ (Yes. 43:4, 5, PMM) Osivela wa Muluku hotoroken’ye. Nnanwerya omuroromela yoowo okhala wookhala. Naamwi nipanke soohesa itokweene, Yehova harwa anihiya. Vaavaa nnacharuwaahu nave nimukookela Yehova, ninnaphwanya osivela wawe ntakhara hiyo ohivukunwe. Owo oororomeliha wi onahaala ‘okhurumuwela moomalela.’ (Yes. 55:7, PMM) Piipiliya onnaloca mikhalelo seiho ntoko “ilukuluku sookurumuxa murima sinarweela wa Yehova.”—Saw. 3:19.

6. Tiheeni Sakariya 2:8 onanihusiheiye vooloca sa Yehova?

⁶ Mwaalakhanye Sakariya 2:8. Nthowa na onisivela, Yehova onniiwexexa mukhalelo nniisoonaahu nave ori awuukhuwa wi anikhapelele. Owo onnoona wiicela vaavaa nnakhalaahu awuukhuwa. Ntoko yookhumelela, nnanwerya ovekela ni nroromelo nriki: “Mukikhapelele ntoko mwaana a mmiithoni [mwanyu.]” (Sal. 17:8, BNM) Niitho echu yoochuneyaxa mmwiili ahu nave nnaphwanela okhapeleliwa. Mwawiihiiha, vaavaa Yehova onanilikanyiheiye ni mwaana a mmiithoni mwawe, eri ntoko wi owo onaloca ariki: ‘Yoowo onaahooxa achu aka, onahooxa yeeyo eri yoochuneya wa miyo.’

7. Ntakhara heeni nnaphwanelaahu olipiha ororomeleya wahu mu osivela wa Yehova?

⁷ Yehova onachuna wi nlekecheye wi owo onnamusivela mmoha ti mmoha a hiyo. Nyenya  owo oosuwela wi nthowa na saweera sahu sakhalai, nnanwerya okhwa minikwa waakhanle wi onnanisivela chiryene. Naari akhweya ninnahoolela nikacamiho nenlo nneeriha okhala woovila wa hiyo ororomela wi Yehova onnanisivela. Vano tiheeni enahaala olipiha omuroromela wahu yoowo? Ohuserya mukhalelo Yehova onooniheryeiye osivela wa Yesu, oothanliwa ni oothene hiyo.

YEHOVA ONOONIHERYA HAI OSIVELA WAWE?

8. Ntakhara heeni Yesu aareiye oolekecheya mu osivela wa Tiithi awe?

⁸ Mu iyaakha masana masaneene, Yehova ni Mwanawe oosiveliwa Yesu yaahooniheryana opwacha ni osivela wawiixeela. Onthamwene aya ti wakhalaixa opwaha soothene. Yehova aahooniherya mookwakwaleya osivela wawe wa Yesu, hiihaa ntoko nnaalakhanyaahu mu Mateyu 17:5. Yehova aanwerya oloca mookhweya: ‘Ola ti mwanaka kinamweemereryaaka.’ Mwawiihiiha, owo aachuna wi nsuwele ophiyerya mweeryo taani onamusiveleiye Yesu, nthowa na yeeyo, owo aahimwiichana ‘Mwanaka oosiveliwa.’ Yehova aaniirumiha ni Yesu vamoha ni yeeyo aahaaleiye opaka muhoolo. (Aef. 1:7) Nave Yesu hintonko okhwa minikwa vooloca sa osivela wa Atiithi awe ntakhara yoowo. Osivela wa Yehova waari wawooneya wa Yesu ophiyerya owo aanawerya woona mwawiixeela osivela yoowo. Owo aahiloca mwawuuluulela ni nroromelo wi Apapa awe yaanamusivela.—Yoh. 3:35; 10:17; 17:24.

9. Masu taani a Yehova anooniherya osivela wawe ntakhara oothanliwa? Mutharihe. (Aroma 5:5)

⁹ Yehova ohooniherya osivela wawe wa oothanliwa. (Mwaalakhanye Aroma 5:5.) Mvarerye masu awi “woomiineliwa.” Ereferensiya emoha ennathariha ntoko “murwe wa hiyaano ntoko muhice.” Ola mukhalelo wakuru wi otharihiwe waaca wa osivela wa Yehova ntakhara oothanliwa! Oothanliwa aasuwela wi ‘annasiveliwa ni Muluku.’ (Yuta 1) Murummwa Yohani aahooniherya mukhalelo iisooneiye vaavaa aarempeiye: “Moone osivela yoowo Atiithi ansivenlaayano, ophiyerya weeriwa anamwane a Muluku!” (1 Yoh. 3:1) Apwanne Yehova onaasivela pahiru oothanliwa? Hooye, Yehova onnansivela oothene ahu.

10. Teevi eri yawooniherya etokweene ya osivela wa Yehova ntakhara nyuwo?

¹⁰ Teevi eri yawooniherya etokweene ya osivela wa Yehova? Mukucho wa woopola. Moorweela wa yoowo, Yehova ohooniherya osivela wawaaca opwaha echu ekina! (Yoh. 3:16; Aro. 5:8) Yehova omvaha Mwanawe oosiveliwa, eerihaka wi akhwe ntakhara achu oothene wi nikhurumuweliwe soocheka sahu ni okhala asinthamwene Awe. (1 Yoh. 4:10) Vaavaa nnuupuwelelaahu mwawiiseela eperesu yeeyo Yehova ni Yesu alimvaaya, ninniiwexexa mwawiixeela ophiyerya mweeryo taani awo ananisivelaaya oothene ahu. (Aka. 2:20) Mukucho wa woopola hovahiwe nthowa nawi Yehova aarimukhinyereryiwa weerano. Nyenya ela yoovaha yoosivela. Yehova ohooniherya osivela wawe ntakhara hiyaano moorweela wa ovaha yeeyo eri yoochuneyaxa wa yene, Yesu. Yehova aaheemererya wi Mwanawe ahooxeye ni okhwa ntakhara okhala wahu phaama.

11. Tiheeni nnahuseryaahu mu Yeremiya 31:3?

¹¹ Ntoko nonnaahu, Yehova hanakhuwa mukhalelo oniisooneiye, nto onnooniherya mookwakwaleya osivela wawe. (Mwaalakhanye Yeremiya 31:3.) Yehova oonikeriha wa yene nthowa nawi onnanisivela. (Mulikanyihe ni Malamulo 7:7, 8.) Echu vyakala naari muchu harwa animwalanya mu osivela yoola. (Aro. 8:38, 39) Ni osivela yoola, nyuwaano muniisoona hai? Mmwaalakhanye Salmu 23 nave moone mukhalelo osivela nniphwanya na Yehova namvolowenlaaya Tavite ni mukhalelo enanivolowelaaya oothene ahu.

 MUNIISOONA HAI NI OSIVELA WA YEHOVA?

12. Ti mwawiihai mwaahaalaanyu opaka mukwasu wa Salmu 23?

¹² Mwaalakhanye Salmu 23:1-6. Salmu 23 nri ncipo nnooniherya nroromelo mu osivela nniphwanya na Yehova. Tavite, mulipa oomurepa salmu yoola oothariha wiiwanana orivovo wa yene ni mukukhula awe, Yehova. Tavite aaniisoona ookhapeleleya vaavaa aamuhiyeiye wi Yehova amuhooleleke, nave aanamuroromela Yoowo. Owo aanasuwela wi osivela wa Yehova waahaala okhala ni yoowo mmahiku oothene a ekumi awe. Tiheeni yaamweerinhe omuroromela Yehova?

13. Ntakhara heeni Tavite aanaroromela opwacha wa Yehova?

¹³ ‘Nkithoiwaru.’ Tavite aaniisoona okhala ookhapeleleya nthowa nawi Yehova aanamvaha ichu soothene aachuneiye mu ilukuluku soothene. Owo tho aanapuha onthamwene ni weemereryiwa wa Yehova. Ti nthowa nene aareiyeno nroromelo nawi, moohipwacha yeeyo yaahaala weereya omwaahiyu, Yehova aahaala otitelela okhapelela soothowa sawe. Nroromelo Tavite aareiyeno mu osivela woohimala wa Yehova waari otokweenexa opwaha sawuukhula sawe nave waanamvaha ohakalala wawaaca ni wawaakhwanela.—Sal. 16:11.

14. Ti mwawiihai Yehova onahaaleiye onikhapelela oothene ahu?

¹⁴ Yehova onnanikhapelela phaama, xaxaxa vaavaa ichu soonanara ineereyaaya mookumini mwahu. Klaire, a yoowo orumeenle Opeteli mu iyaakha 20 aahiisoona ohikhala echweenevo vaavaa aahiwenryeiye okhaviherya emusi awe mu elukuluku yeeyo yaakumannaaya ni makacamiho matokweene. Apapa awe yaahimpaka asitenti yoowo aavolowenle muupuwelo, murokora awe aahihiya okhala Namoona a Yehova,  nakoso a emusi awe aahipwata nave epanku yaahiwaakha empa aya nthowa na evaale. Ti mwawiihai Yehova oonihenryeiye osivela ni okhapelela wa yaawo? Klaire ooloca: “Yehova aaheeriha wi emusi aka ekhalekeno yeeyo yaachunaaya nihiku ti nihiku. Yeeyo Yehova aavahereryeiye yaari echu yeeyo kahintonkwaaka waanyiherya! Mu ikwaha sincipale kinnuupuwela ilukuluku seiho keerenryaaka osivela woohimala wa Yehova nave kinnavaha esisapo. Wuupuwela seiho yaahikikhaviherya variyari va saweeha.”

15. Ti mwawiihai Tavite iisooneiye oolipiheya? (Moone tho eruku)

¹⁵ ‘Annakilipiha.’ Ikwaha sincipale, Tavite aanasooseya murima nthowa na makacamiho ni saweeha aahooleleiye. (Sal. 18:4-6) Mwawiihiiha, osivela woohimala ni okhapelela wa Yehova waahimulipiha. Yehova aahimukuxa nthamwene awe ooceecheya nave amukeriha “onikhuwani na munyepu” vamoha ni nipuro oriwo ‘maahi ooriirya.’ Ntoko yookhumelela, Tavite aahiphwanya ikuru sawe wanawiili nave aatitelela omurumeela Yehova moohakalala.—Sal. 18:28-32.

16. Osivela wa Yehova onoolipihaani hai?

¹⁶ Mmukhalelo mmohamoha, olelo ‘nthowa na osivela woororomeleya wa Apwiya hannuukhuwa’ vaavaa nnahoolelaahu saweeha ni ochimaka ntakhara okumi. (Wiik. 3:22; Ako. 1:11) Moone yootakiherya ya Rakeli. Owo aahikhala oohaleeliheya vaavaa aiyawe yaamuhin’yaaya variyari va epahu ya Koronaviru. Tiheeni Yehova aapankeiye ntakhara yoowo? Owo ooloca: “Yehova aaheeriha wi kiisooneke okhala oosiveliwa. Owo aahikivaha asinthamwene awaaca yaawo yaamaliha elukuluku yincipale ni miyaano, ekiruuhelaka yoolya, nave yaanakirumihela ikaarata ni soorepa wi kuupuweleleke, yaanatheya ni miyaano nave yaatitelela okuupuxerya wi Yehova aanakikhapelela. Kinnamuthamalela moohihiyererya Yehova wanthowa na okivaha emusi etokweene yoosivela.”

17. Ntakhara heeni Tavite ‘hoovaru yoonanara’?

¹⁷ “Nkoovaru yoonanara, ntakhara nyuwo muri ni miyaano.” Ilukuluku sincipale okumi wa Tavite waari va yawoopiha nave owo aahikhalano amwiicani ancipale oowerya. Mwawiihiiha, osivela wa Yehova waahimweeriha okhala ookhapeleleya. Tavite aanawerya woona wi Yehova aari ni yoowo ilukuluku soothene nave eyo yaanamuhakararya. Mwawiihiiha, owo aanwerya omwiipela Yehova: ‘Ookaakiha mu woova waka woothene.’ (Sal. 34:4) Woova wa Tavite waari weeparipari, nyenya osivela wa Yehova waari woolipaxa opwaha woova wawe.

18. Ti mwawiihai olekecheya mu osivela wa Yehova onahaalaaya woolipihaani vaavaa munakhalaanyu a woova?

 ¹⁸ Ti mwawiihai ororomela osivela wa Yehova onanilipihaaya vaavaa nnahoolelaahu mikhalelo sawoopiha? Piyoneera mmoha oniichaniwa Susi onnaloca mukhalelo yene ni iyawe yiisonnaaya vaavaa mwanawe iisiiphaleiye: “Epahu yoohiwehereryeya ennatepa wiicela nave ennamweeriha muchu okhala awuukhuwaxa ni oothanana. Nyenya osivela woopwacha wa Yehova onnaneeriha wiisoona okhala oomaaleleya ni ookhapeleleya.” Rakeli, yoowo olociwe muculi, onnuupuwelela: “Ohiyu, vaavaa murima waakiicelaaya, ni vaavaa yaakhalaaya awuukhuwa ni awoova, kaakhuwela wa Yehova ni masu oovuwa. Mu elukuluku yeeyo, kaahoona wi owo aahimaaliha murima aka ni okihakararya hiihaa ntoko maayi oneereiye nnikwiya nawe nave kaahiwerya ophwanya ikhove. Nkirwa kicuwala elukuluku yeele.” Mutokweene mmoha oniichaniwa Taso aahimaliha iyaakha xexe mukariposo nthowa na okhooca okhala mukhoco. Ti mwawiihai owo olawinheiye osivela ni okhapelela wa Yehova? Owo ooloca: “Yehova aahikhapelela soothowa saka ni ichu ikina sawaaceererya. Eyo yaahilipiha nroromelo naka wi kinanwerya omuroromela owo moomalela. Ohiya yeeyoru, orweela wa munepa awe, Yehova aahikivaha ohakalala, moohipwacha okhala mu elukuluku ya wiiniwa murima. Eyo yaahikivaha yoororomeliha wi vaavaa kinalapaaka vakhiviru ni yoowo, kinnaphura vancipale oreera wawe murima. Nave kaahipacerya orumeela ntoko piyoneero a elukuluku yoothene naamwi kaari mukariposo.”

MMWAACAMELE MULUKU ANYU OOPWACHA

19. (1) Osuwela wi Yehova onnanisivela, ti mwawiihai enahaalaaya ovolowela yeeyo nnalocaahu mmavekelo ahu? (2) Masu taani ootannya murima anathariha osivela wa Yehova? (Moone ekaaxa “ Masu Ananikhaviherya Woona Osivela Woohimala wa Yehova.”)

¹⁹ Saweereya nimanlaahu othokororya sinnooniherya wi Yehova, “Muluku a osivela” ori ni hiyo! (2 Ako. 13:11) Owo onnakhala awuukhuwa ni mmoha ti mmoha a hiyo. Ninnalekecheya wi ‘nri ooriciwa mu osivela wawe woororomeleya.’ (Sal. 32:10, PMM) Vaavaa nnuupuwelaahu vooloca sa mukhalelo owo onooniheryeiye osivela wawe ntakhara hiyo, ninniisoona awaacameleya wa yoowo. Nnanwerya omwaacamela owo mootaphuwa ni oloca mukhalelo nnachunaahu osivela wawe. Nnanwerya omuleela sawuukhula sahu soothene nroromelaka wi owo onnaniiwexexa nave ori oorehereya wi anikhaviherye.—Sal. 145:18, 19.

20. Ti mwawiihai osivela wa Yehova onanaacamelihaaya wa yene?

²⁰ Hiihaa ntoko mooro onanikhaviheryaaya mu nihiku nooriirya, osivela tho wa Yehova onnanikhaviherya. Naamwi osivela wa Yehova ori wooweryaxa, owo tho ti wawiikhalelaru. Mwawiihiiha, munnaakheliwa mu osivela woohimala wa Yehova. Nave voocharela nnaphwanela waakhulela osivela wawe nlocaka: “[Kinnaasivela] Apwiya” Yehova!—Sal. 116:1, PMM.