MWAHA WOOHUSERYA 3
NCIPO 35 “Musuwele Othalela Eri Yaphama”
Mpakeke Soolakelela Mwa Miruku, Eyo Ennamuhakalaliha Yehova
“Omoova Yehova ti mapacereryo a miruku, nave omusuwela Aweelaxa ori osuwelaxa.”—MAS. 9:10.
IPONTU SA VASULU
Ti mwawiihai nneeraahu nipharihele masuwelelo ni wiiwexexa wi nipake soolakelela mwa miruku?
1. Nikacamiho taani oothene ahu nnahoolelaahu?
MAHIKU oothene ninnaphwanela opaka soolakelela. Ikina hasinakhala soovila opaka, ntoko echu nnayaahu olya wooxiixelo naari elukuluku ya okona. Ichu ikina tisoovilaxa olakelela. Yeeyo nnalakelelaahu enanwerya ovolowela okumi ahu, ohakalala wahu, emusi ahu ni mukhalelo ahu wa omurumeela Yehova. Nnachuna wi soolakelela sahu ikhale samphurelo wa hiyo ni wa emusi ahu. Opwaha soothene, nnachuna wi soolakelela sahu imuhakalalihe Yehova.—Aro. 12:1, 2.
2. Ichu taani sinahaala wookhaviheryaani opaka soolakelela mwa miruku?
2 Akhweya nyuwaano munanwerya opaka yoolakelela mwa miruku wakhala wi (1) mohiiwexexa miyaha soothene, (2) mohuupuwelela hiiha ntoko Yehova onuupuweleleiye ni (3) Wakhala wi mohuupuwelela mweephoole vooloca sa yeeyo. Mmwaha yoola nnahaala othokororya ichu seiya raru nave tho inahaala onikhaviherya woona mukhalelo nnahaalaahu ovyakiha owerya wahu wa wiiwexexa.—Mas. 2:11.
MUSUWELE MIYAHA SOOTHENE
3. Mphwanaphwanihe ntakhara heeni nyuwaano munnaphwanela okhalano sooleeliherya muhaakumve opaka yoolakelela.
3 Echu yoopacerya weera wi nyuwaano mpake yoolakelela yaphaama ori osuwela mwaha woothene. Ntakhara heeni eyo tiyoochuneya? Mwaanyiherye wi muchu oniiceliwa onnamuleela totore vooloca sa nikacamiho ntokweene na ereca. Apwanne totore aahaala olakelela mukhalelo wa oloola ereca eyo ahipacenrye omwaalikhela mureca naari ompakela makoho? Mweeparipari hooye. Nyuwaano tho munanwerya opaka soolakelela saphaama wakhala wi voopacerya moothokororya miyaha soothene seiho inavolowela mukhalelo anyu. Muni mweereno hai yeeyo?
4. Mwawiiwanana ni Masiposipo 18:13, muni muroromele hai wi moosuwela soothene sinavolowelavo? (Moone tho eruku.)
4 Ikwaha sincipale nyuwaano munanwerya osuwela ichu soothene inavolowelavo moorweela wa opaka makoho. Ntoko yootakiherya, mwaanyiherye wi nyuwaano moowompwa ntakhara efesta yammoori. Apwanne mwaahaala oyawo? Waakhanle wi nyuwaano hamusuwenle yeeyo mwaneene a efesta oreherenryeiye ntakhara efesta, nyuwaano munanwerya okoha: “Ti woowi nave nihiku taani enahaalaaya weereya? Achu akavi anahaala okhala weiwo? Taani onahaala okhala muhooleli? Taani anahaala opaka makupa? Ichu taani ilakeleliwe seiho achu anahaalaaya opaka weiwo? Achu anahaala ovahiwaka soowurya soohapaliha?” Maakhulo a makoho yaala enahaala wookhaviheryaani opaka yoolakelela mwa miruku.—Mwaalakhanye Masiposipo 18:13.
Musuwele soothene inavolowelavo mpakaka makoho (Moone eparakrafu 4) a
5. Tiheeni nyuwaano munaphwanelaanyu weera mmanle osuwela soothene sinavolowelavo?
5 Voocharela, mmanle osuwela soothene inavolowelavo muupuwele moopwacha vooloca sa mukhalelo woothene. Ntoko yootakiherya, hanka wakhala wi moosuwela wi achu akina anahaala okhala weiwo haniiwelela malakiheryo a Yehova, nave musuwela tho wi sinamvahereryikawo soowurya soohapaliha, nave wi haavo onahaala okhala muhooleli wi eeriheke wi achu ehinawurya vawaaca? Apwanne munnoona yawoopiha yawi efesta yeeyo enahaala okhala yoohiphwanelela? (1 Pet. 4:3) Mmukhalelo mukina, tiheeni enahaala weereya wakhala wi elukuluku ya efesta ennalikana ni elukuluku ya mithukumano naari ya okhuma mmuteko woolaleerya? Wakhala wi moosuwela soothene inavolowelavo, eyo enamookhaviheryaani opaka soolakelela saphaama. Nyenya yookhalavo echu ekina munaphwanelaanyu opaka. Nyuwaano moosuwela mukhalelo munoonaanyu mwaha owo; nyenya Yehova onoona hai yeeyo?—Mas. 2:6.
MOONE YEEYO YEHOVA ONUUPUWELEIYE
6. Mwawiiwanana ni Tiyaku 1:5, ntakhara heeni nnaphwanelaahu ovekela nivekaka nikhaviheryo na Yehova?
6 Mumveke Yehova wi ookhaviheryeeni wiiwexexa mukhalelo owo onooneiye mwaha. Yehova onnaroromeliha onivaha miruku wi nipake yoolakelela yeeyo enahala omuhakalaliha. Owo onnavaha miruku seiha wa oothene “ahikhalenle nrima.”—Mwaalakhanye Tiyaku 1:5.
7. Muni musuwele hai yeeyo Yehova onuupuweleiye vooloca sa mwaha wammoori? Mphwanaphwanihe.
7 Mmanle ovekela mvekaka ohoolela wa Yehova, mvareryele moopwacha naakhulo nawe. Wi niphwanaphwanihe: Mwaanyiherye wi nyuwaano moohuwela variyari va mukwahaanyu, nyenya munnaveka nikhaviheryo wa muchu yoowo osuwenle phaama mphiro. Apwanne nyuwaano mwahaala opwaha muchu owo ahaakumve woolelaani? Mweeparipari hooye. Nyuwaano mwaahaala owiriyana moopwacha sooleeliherya sawe. Mmukhalelo mmohamoha, mmanle oveka miruku wa Yehova, mweererye woona naakhulo nawe moorweela wa malamulo ni malakiheryo a Mpiipiliyani yaawo anaphariheleya mmukhalelo anyu. Ntoko yootakiherya, vaavaa munalakelelaanyu oya o efesta yeeyo elociwe wuupaceryani, nyuwaano munanwerya othokororya yeeyo Piipiliya onaloceiye vooloca sa ifesta sootakhala, onthamwene woonanara ni ochuneya waya okuha ohoolo soochuna sa Omwene opwaha soochuna sa muchu mukhateiye.—Mat. 6:33; Aro. 13:13; 1 Ako. 15:33.
8. Tiheeni munaphwanelaanyu weera wi mphwanye nikhaviheryo na sooleeliherya seiho munaavyaanyu? (Moone tho eruku.)
8 Naamwiihiiha, ikwaha ikina nyuwaano munamuchuna nikhaviheryo wi mphwanye sooleeliherya seiho munaavyaanyu. Nyuwaano munanwerya waakhela sooleeliherya wa munna naari murokora amavyakelo. Mwawiihiiha, nyuwaano munahaala ophuravo tho wakhala wi munnapaka otholathola wanyu. Wookhalavo muhakhu wa sooleeliherya mu ikaruma sahu sa ohuseryano, ntoko Yoohoolela ya Otholathola ya Anamoona a Yehova ni Mpharihele Malakiheryo a Mpiipiliyani Mookumini. Muupuwele wi yoolakelela anyu tiyawi: Mpake yoolakelela yeeyo enamuhakalaliha Yehova.
Muthokororye mukhalelo Yehova onuupuweleiye (Moone eparakrafu 8) b
9. Nni nroromele hai wi yoolakelela ahu enahaala omuhakalaliha Yehova? (Aefesu 5:17)
9 Nni nroromele hai wi yoolakelela ahu enahaala omuhakalaliha Yehova? Echu yoopacerya, nnaphwanela omusuwela phaama yoowo. Piipiliya oni: “Omusuwela Aweelaxa ori osuwelaxa.” (Mas. 9:10) Aai, wiiwexexa weeparipari onarweela wa osuwela mikhalelo sa Yehova, yoochuna awe ni wa yeeyo onasiveleiye naari oniiceiye. Mwiikohe: ‘Vaavaa kinasuwelaaka wa yeeyo kinapakaaka vooloca sa Yehova, yoolakelela taani kinahaalaaka opaka enahaala omuhakalaliha Yehova?’—Mwaalakhanye Aefesu 5:17.
10. Ntakhara heeni soorepa sa Mpiipiliyani ti soochuneyaxa opwaha mihapo sa emusi naari sookhovelela sa vanipuroni?
10 Wi nimuhakalalihe Yehova, vakina vaya nnaphwanela waalamwiha naari ohiwiiwelela yaale eri vakhiviru vahu. Ntoko yootakiherya, asitiithi yaawo anamuchunela mwanaya saphaama akhweya enanwerya omukhinyererya mwanaya wi atheliwe ni mulopwana yoowo ori ooreela, naari yoowo onahaala waavahaka ikhorowa, naamwi mulopwana owo ahilimpe mmakupa awe oomunepani. Eparipari wi awo anachuna wi mwanaya akhapeleliwe phaama makupa oomwiilini, nyenya awo tho anaphwanela omukhaviherya wunnuwa ntoko muchu oomunepani. Yehova onoona hai mwaha yoowo? Naakhulo nnaphwanya mu Mateyu 6:33. Mu yoorepa yeela, Yesu ohaacenyerya Akristu “waavya woopaceryani Omwene.” Naamwi naacicimihaka asitiithi ahu ni achu a mukuma ahu, wuukhuwa wahu otokweene ori omuhakalaliha Yehova.
MUUPUWELELE MWEEPHOOLE VOOLOCA SA YEEYO
11. Mikhalelo taani inaphwanyeya mu Afilipi 1:9,10 inahaala wookhaviheryaani waalikhela soothanla sanyu?
11 Mmanle othokororya soorepa sa Mpiipiliyani seiyo inavolowela wa yoolakelela anyu, nyuwaano munaphwanela waalikhela vooloca sa yeeyo. (Mwaalakhanye Afilipi 1:9, 10) Mukhalelo wa wiiwexexa onahaala wookhaviheryaani waanyiherya yeeyo enahaala weereya ntoko yookhumelela wa yoothanla vyakala. Ikwaha ikina, onanwerya okhala wookhweya opaka yoolakelela. Nyenya tahi wi soolakelela soothene tisookhweya. Wiiwexexa onahaala wookhaviheryaani opakaka soolakelela mwa miruku, naamwi mmikhalelo soovila.
12-13. Ti mwawiihai wiiwexexa oneeraaya wookhaviheryeeni opaka yoolakelela mwa miruku vooloca sa muteko yoowo munahaalaanyu othanla?
12 Mwaanyiherye yaweereya ela. Nyuwaano munnaavya muteko wi nweryeke ovakulela echoko anyu. Sookhalavo miteko miili. Nyuwaano munnaalikhela soothene sinavolowelavo murepelaka ntoko, mukhalelo wa muteko, elukuluku muteko owo onamalihaaya, elukuluku ya mukwaha ni ichu ikina. Miteko soomiili tisaweemereryeya wa Akristu. Akhweya nyuwaano munahaala osiveliwa othanla muteko wammoori nthowa nawi onnaliva ikhorowa sincipale. Sookhalavo ichu ikina seiho nnaphwanelaahu othokororya nihaakumve opaka yoolakelela.
13 Ntoko yootakiherya, wa miteko seiya miili wookhala yoowo waahaala wiiphelela mithukumano? Wa miteko seiya soomiili, apwanne wookhala waahaala omalihaka elukuluku yeeyo munachunaanyu wi mukhaviherye emusi anyu wiisoona okhala yookhapeleleya, oohakalala ni awaacameleya wa Yehova? Wiipakela makoho yaala, onahaala wookhaviheryaani okuha “ichu soochuneyaxa” mu nipuro noopacerya, eyo tiwi omulapela wanyu Yehova ni soothowa sa emusi anyu ohiya oteteiwa mu waavyaka ichu soomwiilini. Mwawiihiiha, nyuwaano munamphiyerya makuchuwelo a opaka yoolakelela yeeyo Yehova onahaaleiye oreeliha.
14. Ti mwawiihai opharihela wiiwexexa ni wooniherya osivela onahaala onikhaviherya osepa waakwaculiha akina?
14 Wiiwexexa tho onnaniceenyerya othokororya mukhalelo soolakela sahu ineeraaya saavolowele achu akina, wi niwerye osepa “waakwaculiha akina.” (Afi. 1:10) Eyo ti yoochuneya vaavaa nnapakaahu soolakelela sa muchu mukhateiye mmikhalelo ntoko mukhalelo wa owara ni wiirehererya. Ntoko yootakiherya, nnanwerya ochuna mukhalelo wooluluwanya wa yoowara naari wiireeriha. Nyenya hanka wakhala wi akina mmulokoni ni achu akina anawoonaani annakwaculeya ni yeeyo? Wiiwexexa onahaala onikhaviherya ocicimiha miyoonelo saya. Osivela onnaniceenyerya waavya mphurelo “wa mukina” ni okhala oophimelela. (1 Ako. 10:23, 24, 32; 1 Tim. 2:9, 10) Voocharela nnahaala opaka yoolakelela yeeyo enooniherya osivela wa achu akina.
15. Echu taani munaphwanelaanyu weera vaavaa munapakaanyu yoolakelela yoochuneya?
15 Wakhala wi nyuwaano munapaka yoolakelela yoochuneya, muupuwele wa yeeyo nyuwaano munahaalaanyu opaka wi mukhale mwawiiwanana ni yoolakelela yeeyo. Yesu oonihusiha ‘ovareryela ichu.’ (Luka 14:28) Mwawiihiiha, muthokororye waaca wa elukuluku, mikhalelo ni wiilipixerya yoowo nyuwaano munaphwanelaanyu opakaka wi mwaakhwaniherye yoolakelela anyu. Mmikhalelo mikina, munanwerya okoha emusi anyu wi elakelele wa yeeyo mmoha ti mmoha aahaaleiye ochuna opaka wi akhaviherye yoolakelela. Ntakhara heeni mukhalelo yoola wa wiirehererya ooryaaya woochuneya? Eyo enanwerya wookhaviheryaani woona naari wiiwexexa wi yoolakelela anyu ennachuneya matorokelo ammoori naari wi, meerelo mamoha oohiyana teri aphaamaxa. Nave wakhala wi munnaaphitaanyeravo achu a veemusini vanyu ni owiriyana miyoonelo saya, awo anahaala okhala ooreheryeya okhaviherya wi yoolakelela ekhumelele phaama.—Mas. 15:22.
MPAKE YOOLAKELELA YEEYO ENAHAALA OKHUMELELA PHAAMA
16. Sooleeliherya taani seiho sinahaala wookhaviheryaani opaka yoolakelela yeeyo enahaala okhumelela phaama? (Moone tho ekaaxa “ Mukhalelo wa Opaka Soolakelela Mwa Miruku.”)
16 Wakhala wi moochariha sooleeliherya soothene seiyo itharihiwe woopaceryani, munahaala okhala ooreheryeya wi mpake yoolakelela mwa miruku. Nyuwaano moohuserya soothene sinavolowelavo nave moothokororya soorepa seiho sinahaala wookhaviheryaani opaka yoolakelela yeeyo enahaala omuhakalaliha Yehova. Vano nyuwaano munanwerya omveka Yehova wi ookhaviheryeeni opaka yoolakelela yeeyo enahaala okhala yaphaama.
17. Teevi eri yoohulela ya opaka soolakelela saphaama?
17 Naamwi khalai mwaapanke soolakelela sincipale nave mukhumelela phaama, muupuwele wi yoohulela ya opaka soolakelela saphaama ori ororomela miruku sa Yehova, ohiya masuwelelo anyu naari nthowa nawi mohintoko weerano. Pahiru owo tonahaala woovahaani masuwelelo eeparipari ni wiiwexexa—mathipelo a miruku. (Mas. 2:1-5) Yehova onanwerya wookhaviheryaani opaka soolakelela seiyo inamuhakalaliha.—Sal. 23:2, 3.
NCIPO 28 Okhala Nthamwene a Yehova
