MWAHA WOOHUSERYA 5
NCIPO 108 Osivela Weeparipari wa Muluku
Mukhalelo Nnaphuraahuvo ni Osivela wa Yehova
“Kristu Yesu oorwa mweelaponi wi aavuluxe alipa oocheka.” —1 TIM. 1:15.
IPONTU SA VASULU
Mukhalelo nnaphuraahuvo ni woopola ni mukhalelo nneeraahu nooniherye othamalela.
1. Tiheeni nnaphwanelaahu weera wi nimuhakalalihe Yehova?
MWAANYIHERYE wi nyuwaano moomvaha muchu yoowo munamusivelaanyu yamahala yavameekhaaya yaphaama ni yoophara muteko. Mwaahaala okhala oothanana waakhanle wi muchu owo okunhe yamahala eyo mukaaxani nave ahinuupuwela tho yeeyo! Moohiyana, nyuwaano mwaahaala ohakalala waakhanle wi muchu owo oopharihela phaama yamahala anyu nave ooniherya othamalela wa yeeyo. Ela eniiwanana hai ni yoovaha ya woopola ya Yehova? Yehova oomvaha Mwanawe ntakhara hiyo. Yehova onnatepa ohakalala vaavaa nnooniheryaahu othamalela ntakhara yoovaha yeela yasisapo ni wa osivela wawe, yoowo omuceenyenrye ovahererya woopola!—Yoh. 3:16; Aro. 5:7, 8.
2. Tiheeni nnahaalaahu othokororya mmwaha yoola?
2 Moovira wa iyaakha, nnanwerya ohiya woonaka woopola ntoko yamahala yavameekhaaya. Nyenya wakhala wi hannathamalela woopola, onahaala okhala ntoko okuha yamahala yaphaama ya Muluku mu nipuro nikina nenlo nihinaweryaahu woonawo naari wuupuwelelawo. Wi eyo eheereye, wiiliwiili nnaphwanela othamalelaka wa yeeyo Muluku ni Kristu apankaaya ntakhara hiyo. Mmwaha yoola onahaala onikhaviherya mukhalelo weerano yeeyo. Nnahaala othokororya mukhalelo nnaphuraahu ni woopola hiihaano, ni mukhalelo nnahaalaahu ophura omwaahiyu. Nnahaala othokororya tho yeeyo nnaphwanelaahu weera wi nooniherye wi ninnathamalela ntakhara osivela wa Yehova, xaxaxa variyari va isumana ehaakumve ni evinre Yawuupuxerya.
MUKHALELO NNAPHURAAHU HIIHAANO
3. Taavi ari makhalelo makina nnaphuraahuvo ni woopola hiihaano?
3 Hiihaano ninnaphuravo orweela wa mukucho wa woopola wa Kristu. Ntoko yootakiherya, moorweela wa mukucho, Yehova onnakhurumuwela soocheka sahu. Owo hanakhinyereryiwa onikhurumuwela. Nyenya owo onnachuna. Mulipa oomurepa Salmu athamalelaka aahiipa: “Woona wi nyuwo, khwoo Yehova, muri aphaama nave ilukuluku soothene muri oorehereya olevelela.”—Sal. 86:5; 103:3, 10-13.
4. Yehova ovaherenrye woopola ntakhara taani? (Luka 5:32; 1 Timotiyu 1:15)
4 Akina a hiyo nnanwerya wiisoona wi hannaphwanelela okhurumuweliwa ni Yehova. Mweeparipari, oothene ahu hannaphwanelela. Murummwa Paulo aahiiwexexa wi owo haari “oophwanelela wiichaniwa murummwa.” Nyenya namwiihiiha, owo aahaaceererya: “Moorweela wa mahala matokweene a Muluku kiri yeeyo kiryaaka.” (1 Ako. 15:9, 10) Vaavaa nnacharuwaahu soocheka sahu, Yehova onnanikhurumuwela. Ntakhara heeni? Ohiya wi nrimphwanelela, nyenya nthowa nawi owo onnanisivela. Mwawiihiiha, wakhala wi muri oothanana muupuwelaka wi hamunaphwanelela okhurumuwela wa Yehova, muupuwele wi Yehova havaherenrye woopola wa achu oophaameya naari wa yaawo ahintonko ocheka, nyenya owo ovaherenrye wa achu oohiphaameya yaawo aniisoona ohikhala echu enevo wa soocheka saya nave aneererya otoroka mukhalelo aya.—Mwaalakhanye Luka 5:32; 1 Timotiyu 1:15.
5. Apwanne akina a hiyo ookhala arinono ophwanelela wa wiisoona wi ookhalano owerya wa waakhela ikharari sa Yehova? Mutharihe.
5 Haavo ahiyo onaphwanela woona wi ookhalano oophwanelela wi aakhele ikharari sa Yehova naamwi nimalinhe iyaakha sincipale mmuteko awe. Eparipari wi Yehova onnuupuwela soothene nipankaahu ntakhara yoowo. (Ahe. 6:10) Owo oonivaha mukucho wa Mwanawe ntoko yamahala nihilivenle echu, ohiya wi anilive wa ichu saphaama nnapakaahu ntakhara yoowo. Mwawiihiiha, yaahaala okhala yoonanara wuupuwela wi moorweela wa opaka ichu sincipale ntakhara Yehova, ninnaphwanelela okhurumuwela wawe wakhala wi noheemererya yeeyo enataphulela wi hiwaari woophwanelela Yesu okhwa ntakhara hiyo.—Mulikanyihe ni Akalatiya 2:21.
6. Ntakhara heeni Paulo aahilapa mwakuru mmuteko wa Yehova?
6 Paulo aanasuwela wi haaphwanelela mahala a Muluku. Ntakhara heeni iisooneiye hiiha eeraka alampe mwakuru mmuteko wa Yehova? Owo aaherano yeeyo wi ooniherye wi aanathamalela nthowa na Yehova okhala ooreera murima ni aikharari ni yoowo. (Aef. 3:7) Hiiha ntoko Paulo, ninnatitelela omurumeela mwa mvai ohiya wi niphwanelele ikharari sa Yehova, nyenya wi nooniherye othamalela wa yoowo.
7. Tuuvi ori mukhalelo mukina wa ophuravo woopola hiihaano? (Aroma 5:1; Tiyaku 2:23)
7 Mukhalelo mukina nneeraahu niphurevo ni woopola hiihaano ori okhalano onthamwene wawaacameleya ni Yehova ni wa muchu mukhateiye. a Ntoko etharihiwaaya mmwaha ovirale, vaavaa naayariwaahu hinaarinono onthamwene ni Muluku. Nyenya moorweela wa woopola, nnanwerya opuha “murecele ni Muluku” nave nnanwerya tho omwaacamela yoowo.—Mwaalakhanye Aroma 5:1; Tiyaku 2:23.
8. Ntakhara heeni nnaphwaneelaahu omuthamalela Yehova ntakhara ekari ya nivekelo?
8 Muthokororye pahiru mukhalelo mmoha wa onthamwene ahu ni Yehova, ekari ya nivekelo. Yehova onniiwa ohiya pahiru mavekelo a vanlakani a achu awe vaavaa anathukumanaaya, nyenya tho mavekelo a muchu mukhateiye a mmoha ti mmoha a hiyo. Vaavaa nnavekelaahu, ninniisoona okhala oomaleleya, nyenya ola tahi mphurelo mmoharu wa nivekelo. Nnanwerya olipiha onthamwene ahu ni Muluku. (Sal. 65:2; Tiy. 4:8; 1 Yoh. 5:14) Ari veelaponi yavathi, Yesu aanavekela moohihiyererya nthowa nawi aanasuwela wi Yehova aanamwiiwa nave tho wi nivekelo naahaala olipiha onthamwene awe ni Atiithi awe. (Luka 5:16) Ninnatepa othamalela nthowa nawi moorweela wa mukucho wa Yesu, nnanwerya okhala asinthamwene a Yehova ni ophiyerya tho oloca ni yoowo mu nivekelo!
TI MWAWIIHAI NNAHAALAAHU OPHURAVO OMWAAHIYU?
9. Ti mwawiihai woopola oneeraaya waaphurihe alapeli oororomeleya omwaahiyu?
9 Ti mwawiihai alapeli oororomeleya a Yehova anahaalaaya ophura moorweela wa woopola omwaahiyu? Yehova onahaala waavaha okumi woohimala. Achu ancipale anuupuwela wi eyo tahi yooweryeya nthowa nawi achu annakhwa ovinyerya mu iyaakha macikhwi macikhweene. Nyenya woopaceryani yookhwela ya Yehova yaari wi achu ekhaleke okhala wookhala. Waakhanle wi Atamu haacenke, haavo aahaala wuupuwelaka ekumi yoohimala okhala echu yaphaamaxa ni yootikhiniha. Nyenya naamwi okhalaka woovila waanyiherya hiihaano okhala ni okumi okhala wookhala, nnanwerya weemererya wi chiryene enahaala weereya, nthowa nawi noosuwela wi Yehova ooliva ni ekumi ya esisapo yoowalamelaxa ya Mwanawe mmoharu, wi eerihe okhala wooweryeya.—Aro. 8:32.
10. Echu taani oothanliwa ni ipucepuche ikina enaweheryaaya?
10 Naamwi ekumi yoohimala ori mphurelo wa omwaahiyu, Yehova onachuna wi nuupuweleleke vooloca sa yeeyo hiihaano. Oothanliwa annaweherya ekumi yootikhiniha wirimu vaavaa enahaalaaya olamulelaka elapo yavathi ni Kristu. (Wup. 20:6) Ipucepuche ikina sinnaweherya okhala Mparataiso veelaponi yavathi, ohirimo sawiicela ni othanana. (Wup. 21:3, 4) Apwanne mwa mmoha a ipucepuche ikina ni ewehereryo ya okhala veelaponi yavathi okhala wookhala? Mweeparipari nla tahi nchuwelo nikhaani opwaha ekumi wirimu! Yehova aapatunxe achu ni yoolakelela ya okhala veelaponi yavathi. Mwa yeeyo, okhala veelaponi yavathi onahaala oneeriha okhala oohakalalaxa.
11-12. Mareeliho taani makina a Mparataiso nnaphwanelaahu wuupuwelelaka? (Moone tho iruku.)
11 Mwaanyiherye mukhalelo okumi anyu onahaalaaya okhala Mparataiso veelaponi yavathi. Nyuwaano hamukhalaka wuukhuwa wa ireca naari okhwa. (Yes. 25:8; 33:24) Yehova onahaala waakhwaniheryaka soochuna sanyu soothene soophwanelela, seiyo munahaalaanyu ochunaka. Ichu taani munachunaanyu ohuserya mwemo? Omwiipa viyola? Owoona axinama mukhalelo aryaaya? Wiipa? Oteka ipa? Chiryene Mparataiso, nnamwaachunaka achu arino mavyakelo a oteka ipa ni ichu ikina. Nave achu tho anahaala ochuneya wi elimeke soolya ni waapeya, opaka ikaruma ni omwaala kapinka ni omukhapela yoowo. (Yes. 35:1; 65:21) Vaavaa muneeraanyu mukhaleke okhala wookhala, munahaala okhalano elukuluku wi muhuserye ichu sincipale seiyo munachunaanyu ni ichu ikina sincipalexa.
12 Enahaala okhala yoohakalalihaxa waahaiha yaawo anahaala oviihiwaka mookhwani! (Saw. 24:15) Mwaanyiherye tho mukhalelo nyuwaano munahaalaanyu osiveliwaxa ni Yehova mvareryaka soopatuxiwa sawe soohiyanahiyana. (Sal. 104:24; Yes. 11:9) Echu yaphaamaxa wa soothene seiya, tiyawi nyuwaano hamurya mucheka nave munahaala omurumeelaka Yehova ohiri woochuneya omveka nikhurumuwelo! Nyuwaano mwaahaala oraceeliha mareeliho yaala oomwaahiyu ni “opuha wa elukuluku vakhaani wa yoocheka”? (Ahe. 11:25) Mweeparipari hooye! Ekumi yootikhiniha nneeraahu nikhaleno enahaala okhala yaphaamaxa opwaha echu vyakala nneeraahu niwerye okhalano hiihaano mu elapo yeela. Muupuwele wi Parataiso tahi wi ilukuluku soothene enahaala okhala ewehereryo ya muhoolo. Moohilekela nnahaala okhala nipuro mwemmo nneeraahu nikhalekemo mahiku oothene. Mweeparipari eyo hiyaahaala okhala yooweryeya waakhanle wi Yehova hananisivela mwawaakhwanela wi amvahererye Mwanawe!
Mareeliho taani mparataiso yaawo nyuwaano munaweheryaanyu vancipale? (Moone iparakrafu 11-12)
MWEEMERERYE OSIVELA WA YEHOVA
13. Nni nooniherye hai othamalela ntakhara osivela wa Yehova? (2 Akorintu 6:1)
13 Nni nooniherye hai othamalela wahu wa Yehova ntakhara ovahererya woopola? Moorweela wa ovaha esisapo omulapela mu okumi ahu. (Mat. 6:33) Tiwi Yesu okhwile, “ntakhara achu oothene wi yaale ari akumi ehikhale tho akumi wa yaawo aneene, nto wa yoowo aakhwenle nave aviihiwa mookhwani.” (2 Ako. 5:15) Ilukuluku soothene Yehova tooreera murima wa hiyo nave oonilevelela soocheka sahu, moorweela wa weerano soothene wi nimurumeele, ninnooniherya mukhalelo owo opakeiye sincipale ntakhara hiyo nave wi chiryene ninnathamalela.—Mwaalakhanye 2 Akorintu 6:1.
14. Nni nooniherye hai nroromelo mu ohoolela wa Yehova?
14 Nave tho nnanwerya wooniherya othamalela osivela wa Yehova moorweela wa ororomela ohoolela wawe. Mwawiihai? Vaavaa nnakhalaahuuno ichu soolakelela, ntoko waaceererya mahusiheryo a vasulu yaawo nnachunaahu naari muteko yoowo nnahaalaahu weemererya, nnaphwanela othokororya wa yeeyo Yehova onaweheryeiye wi hiyaano nipake. (1 Ako. 10:31; 2 Ako. 5:7) Vaavaa nnapharihelaahu muteko nroromelo nahu, echu yootikhiniha enneereya—nroromelo ni onthamwene ahu ni Yehova sinnannuwa, nave ewehereryo ahu ennalipiheya.—Aro. 5:3-5; Tiy. 2:21, 22.
15. Nni nooniherye hai othamalela wahu variyari va elukuluku ya Yawuupuxerya?
15 Wookhalavo tho mukhalelo mukina wa wooniherya othamalela osivela wa Yehova. Ori moorweela wa opharihela elukuluku yeela ya Yawuupuxerya wi nooniherye wa Yehova mukhalelo nnathamalelaahu vancipale woopola. Ohiya pahiru olakelela ophwanyeya mu nihiku na Yawuupuxerya, nnanwerya tho waawopa akina wi yoonele. (1 Tim. 2:4) Mwaaleele alipa oowompwa yeeyo enahaala weereya va Yawuupuxerya. Nyuwaano munamoona okhala yoophara muteko owooniha ixilema mu jw.org Ntakhara Heeni Yesu Ookhwa? ni Wuupuwelela Okhwa wa Yesu. Atokweene a muloko anaphwanela waawopa yaale ari ooceecheya. Mwaanyiherye ohakalala onakhalavo wirimu hiiha ntoko veelaponi yavathi wakhala wi ipuchepuce ikina soorimeela sa Yehova sooceenyeryeya okookela munikholani mwaya! (Luka 15:4-7) Va Yawuupuxerya, nipake soothene wi nxelelihani ohiya pahiru mukina ni mukhwaawe, nyenya xaxaxa wa yaale ari avyaani naari ahin’ye othukumana ovinyerya khalai. Nnachuna wi awo yiisoone okhala awaakheliwa phaama!—Aro. 12:13.
16. Ntakhara heeni nnaphwanelaahu opaka sincipale mmuteko ahu woolaleerya variyari va elukuluku ya Yawuupuxerya?
16 Apwanne nyuwaano mwaanwerya opaka sincipale mmuteko anyu wa Yehova ehaakumve ni emanle Yawuupuxerya? Ola mukhalelo mmoha waphaama wa wooniherya othamalela wanyu wa yeeyo Yehova ni Yesu apankaaya wa nyuwaano. Vaavaa nnapakaahu sincipale mmuteko woolaleerya, nnahaala woona nikhaviheryo nawe nave ntoko yookhumelela ya yeeyo, omuroromela wahu yoowo onahaala olipa. (1 Ako. 3:9) Ohiya yeeyoru, mucharihe waalakhanyiwa wa Piipiliya ntakhara Yawuupuxerya, mu eliista yeeyo enaphwanyeya mu Muthokororye Yoorepa ya Nihiku naari mu yoochariha ya mithukumano. Nyuwaano munanwerya ophiyerya othanla makupa yaawo a Mpiipiliyani ntoko mathipelo a yoohuserya anyu.
17. Tiheeni enamuhakalaliha Yehova? (Moone tho ekaaxa “ Nni Nooniherye Hai Othamalela Wahu wa Yehova?”)
17 Eparipari wi wa nthowa na mikhalelo sanyu, akhweya hanwerya opaka sincipale mmuteko wa Yehova. Muupuwele wi, Yehova hanalikanyiha yeeyo munapakaanyu ni yeeyo akina anapakaaya, owo onnahakalala ni osivela yoowo nyuwaano muryaanyuno ntakhara yene. Owo onnahakalala vancipale vaavaa onooneiye othamalela wahu ni murima woothene ntakhara yamahala awe yasisapo, woopola.—1 Sam. 16:7; Mar. 12:41-44.
18. Ntakhara heeni ninnamuthamalela Yehova ni Yesu Kristu?
18 Ori pahiru moorweela wa woopola nleveleliwaahu soocheka sahu, nryaahuno onthamwene ni Yehova ni ewehereryo ya ekumi yoohimala. Ilukuluku soothene nooniherye othamalela wahu ntakhara osivela wa Yehova, yoowo omuceenyenrye ovahererya mareeliho yaala wa hiyo. (1 Yoh. 4:19) Nnahaala wooniherya tho othamalela wahu wa Yesu, yoowo onisivenle vancipale ophiyerya okhwa ntakhara hiyaano!—Yoh. 15:13.
NCIPO 154 Osivela Honamalaru
