MWAHA WOOHUSERYA 2
NCIPO 132 Vano na ‘Muchu Mmoha’
Mulopwana Amucicimiheke Mwaariye
“Nyuwo alopwana, . . . mwaacicimiheke yaawo.”—1 PET. 3:7.
IPONTU SA VASULU
Nnahaala woona mukhalelo mulopwana onahaaleiye omucicimihaka mwaariye moorweela wa masu awe ni saweera.
1. Tinivi naari nthowa nimoha naamweerinhe Yehova opatuxa othela?
YEHOVA “Muluku oohakalala,” nave owo onachuna wi hiyaano tho nikhaleke oohakalala. (1 Tim. 1:11) Yehova onnanivaha samahala sincipale seiho inanikhaviherya okhala oohakalala mookumini. (Tiy. 1:17) Emoha ya samahala seha othela. Vaavaa mulopwana ni muthiyana anathelanaaya, awo annaroromelihana wooniheryana osivela ni ocicimihana mukina ni mukhwaawe. Mutheli yoowo onatitelela olipiha osivela wawe wa mukina ni mukhwaawe annakhalano ohakalala weeparipari mookumini.—Mas. 5:18.
2. Tiheeni eneereya olelo ni ichoko sincipale?
2 Moothananiha, atheli ancipale olelo, aacuwala soororomeliha seiho yaapankaaya mu nihiku na othela waya. Ela ennooniherya ntakhara heeni olelo sookhalavo ichoko sincipale soohihakalala. Yoolokoha evyaani ya Marehereryo a Okumi ennooniherya wi alopwana ancipale annaahooxa asaaraya mmakupa oomwiilini naari waaphoreiha mmuupuweloni. Alopwana aneerano yeeyo, ananwerya waakhaliha asaaraya mwa ncicimiho variyari va achu akina, nyenya yaphiya owaani yaakhaliheke moonanara. Ohiya yeeyoru, ichoko sincipale sinnakhala soocikinyeya vaavaa mulopwana onakhaleiyeno yookhovelela ya woona epwitikiri.
3. Tiheeni enaweeriha alopwana ancipale waakhaliha asaaraya mmukhalelo woonanara?
3 Ntakhara heeni alopwana akina annaakhaliha moonanara asaaraya? Nthowa nawi alopwana akina aphwiiwale ni asitiithi a nlala nave enoona wi mukhalelo yoowo tiwaweemereryeya. Akina anavoloweliwa ni sookhovelela sa mukuma aya, ntoko yootakiherya, mu sookhovelela ikina wookhalawo muupuwelo wawi “mulopwana lopwana” onaphwanela opharihela ikuru sawe wi awooniherye amwaariye wi taani ori muhooleli. Alopwana akina hahusihiwe ovareryela miyoonelo saya ophitaanyerya isara. Ohiya yeeyoru, alopwana akina aakhalano moonelo wooheseya vooloca sa athiyana ni vooloca sa okonihana wa nthowa na woona wiiliwiili epwitikiri. Mwawaaceererya, soolokoha ikina sinnooniherya wi variyari va epahu ya Koronaviru, alopwana ancipale yaahipacerya waakhaliha moonanaraxa asaaraya. Nyenya, eparipari wi nla tahi nthowa na omweeriha mulopwana okhala mmukhalelo yoowo woonanara.
4. Ephoole taani alopwana yaawo ari Akristu anaphwanelaaya okhalano, nave ntakhara heeni?
4 Mulopwana ori Mukristu onaphwanela wiikasoopa wi ahikhaleno moonelo wooheseya vooloca sa athiyana. a Ntakhara heeni? Nthowa nimoha tinawi, muupuwelo wa muchu ikwaha sincipale onnamweeriha opaka echu. Murummwa Paulo aahiloca wa Akristu oothanliwa o Roma wi yaaphwanela ‘omaala wuupiwa ni elapo yeela.’ (Aro. 12:1, 2) Vaavaa Paulo aarempeiye masu yaala wa Akristu o Roma, muloko owo wiiha otikitheryiwe khalai mu iyaakha sa muculi. Naamwiihiiha, masu a Paulo ennaniiwexexiha wi akina a muloko yoole yaanavoloweliwa ni sookhovelela ni mukhalelo wa wuupuwela wa elapo. Ti nthowa nene Paulo aavanheiye ekano wi etoroke muupuwelo ni mukhalelo aya. Nave tho ekano emohamoha yeela ennaphariheleya wa alopwana athenle yaawo ari Akristu olelo. Moothananiha, alopwana akina annavoloweliwa ni muupuwelo wa elapo, nave eyo ennaweeriha waakhaliha moonanara asaaraya. b Yehova onaweherya wi alopwana yaakhaliheke hai asaaraya? Naakhulo nnaphwanyeya mu yoorepa eri mathipelo a yoohuserya yeela.
5. Mwawiiwanana ni 1 Petru 3:7, ti mwawiihai mulopwana onaphwaneleiye waakhalihaka amwaariye?
5 Mwaalakhanye 1 Petru 3:7. Yehova oolamulela wi alopwana yaacicimiheke asaaraya. Ncicimiho onaahiiwa mukhalelo nnamukhalihaahu muchu yoowo nnamucicimihaahu. Mulopwana yoowo oonaacicimiha amwaariye, onnaakhaliha mooreera murima ni moosivela. Mu yoohuserya yeela, nnahaala woona mukhalelo mulopwana onahaaleiye wooniherya wi onnaaciciha amwaariye. Nyenya voopacerya, nnahaala woona mukhalelo yoowo onooniherya ohikhalano osivela ni ncicimiho wa muthiyana.
MUHIPAKE ECHU YEEYO ENAHAALA WOONIHERYA OHIMUCICIMIHA MWAARINYU
6. Yehova onamoona hai mulopwana yoowo onaahooxa omwiilini amwaariye? (Akolose 3:19)
6 Mulopwana hanaphwanela owuuliha muru amwaariye naari waahooxa omwiilini. Yehova onnamwiica muchu a nlala. (Sal. 11:5) Nave Piipiliya onnaathoriha xaxaxa alopwana yaawo anaakhaliha asaaraya mmukhalelo woonanara. (Mal. 2:16; mwaalakhanye Akolose 3:19.) Mwawiiwanana ni yoorepa yeeyo eri mathipelo a yoohuserya yeela, 1 Petru 3:7, vaavaa mulopwana ohinaakhaliheiye phaama amwaariye, onthamwene awe ni Yehova onnapahuwa. Yehova onanwerya olakelela ophiyerya ohiwiriyanaka mavekelo awe.
7. Mwawiiwanana ni Aefesu 4:31, 32, okhaliha taani woonanara orweela mmasu mulopwana onaphwaneleiye osepa? (Moone tho “Masu Atharihiwe.”)
7 Mulopwana hanaphwanela waakhulana ni amwaariye naari waalocela masu oophuca. Alopwana akina annaakhulana ni asaaraya naari waalocela masu oophuca ni oonyeenyeiha. Nyenya Yehova onniica “esara, onanariwa, waakhulana, ni masu oophuca”. c (Mwaalakhanye Aefesu 4:32.) Yehova onniiwa soothene. Wa nthowa na yeeyo, owo onnuukhuwa ni mukhalelo mulopwana onaloceiye ni amwaariye, naamwi eriwo mukhataaya. Mulopwana yoowo onaloca mmukhalelo woonanara ni amwaariye onnapahula ohiya pahiru othela wawe, nyenya tho onthamwene awe ni Yehova.—Tiy. 1:26.
8. Yehova onoona hai vooloca sa epwitikiri, nave ntakhara heeni?
8 Mulopwana hanaphwanela woona epwitikiri. Yehova onoona hai vooloca sa epwitikiri? Owo onniica. Mwawiihiiha, mulopwana yoowo onoona iruku soohiphwanelela onnapahula onthamwene awe ni Yehova nave tho onnooniherya ohaacicimiha amwaariye. d Yehova onaweherya wi mulopwana atitelele okhala oororomeleya wa amwaariye ohiya pahiru mu saweera, nyenya tho mmuupuweloni. Yesu ooloca wi mulopwana yoowo onanweha muthiyana ni yoolakela yoohiphwanelela “ooraruwano mmurimani mwawe.” e—Mat. 5:28, 29.
9. Ntakhara heeni Yehova onniica vaavaa mulopwana onamukhinyereryeiye mwaariye opaka echu yeeyo owo ohinasiveliweiyeno elukuluku ya okonihana?
9 Mulopwana hanaphwanela omukhinyererya mwariye opaka echu yeeyo owo ohinachuneiye variyari va okonihana. Alopwana akina annaakhinyererya naari waapharela asaaraya opakaka meerelo a okonihana awuuliha muru, naari mukhalelo yoowo akhweya onahaala omweeriha mwaariye wiisoona okhala ooriipiheya, naari mukhalelo yoowo onahaala ophoreiha yawuupuxerya ya murima awe. Nyenya Yehova onniica mukhalelo yoola wootakhala ni woohooniherya osivela. Yehova onaweherya wi mulopwana aasiveleke amwaariye ni ocicimiha miyoonelo saya ni yawuupuxerya ya murima aya. (Aef. 5:28, 29) Hanka wakhala wi mulopwana ori Mukristu onnaakhaliha amwaariye mmukhalelo yoola woonanara naari onnoona epwitikiri? Owo ani atoroke hai mukhalelo awe wa wuupuwela ni meerelo awe?
TI MWAWIIHAI MULOPWANA ONAHAALEIYE OCHARUWA OHAACICIMIHA AMWAARIYE?
10. Ti mwawiihai yootakiherya ya Yesu eneeraaya emukhaviherye mulopwana othenle?
10 Tiheeni enahaala omukhaviherya mulopwana ohiya waakhaliha amwaariye mmukhalelo woohikhala ncicimiho ni wawuuliha muru? Mukhalelo mmoha ori wiilipixerya omutakiherya Yesu. Eparipari wi Yesu hantonko othela, nyenya mukhalelo aakhaliheiye oohuserya awe yootakiherya yaphaama ya mukhalelo mulopwana onaphwaneleiye waakhalihaka amwaariye. (Aef. 5:25) Ntoko yootakiherya, nnahaala woona yeeyo mulopwana oneereiye ahuserye ni mukhalelo Yesu aakhaliheiye oohuserya awe ni mukhalelo aaloceiye ni yaawo.
11. Ti mwawiihai Yesu aakhaliheiye arummwa awe?
11 Ilukuluku soothene Yesu aanaakhaliha oohuserya awe mooreera murima ni mwa ncicimiho. Owo hantonko okhala awuuma murima naari oolamula. Naamwi owo aari Pwiya ni Kapara aya, owo hantonko opharihela owerya wawe wi aweerihe oohuserya awe wiisoona okhala akhaanixa ni omoova yoowo. Ohiya yeeyo, owo aanapaka miteko sawiiyeviha wa oohuserya awe. (Yoh. 13:12-17) Mu ekwaha emoha owo aahi: “Huseryani wa miyo, woona wi kiri ooreera murima ni awiiyeviha, nave munarwa mphwanya wiichuwa wa okumi anyu.” (Mat. 11:28-30) Moone wi Yesu aari awiiyeviha. Muchu ooreera murima tahi ooceecheya, moohiyana owo toolipa mwawaakhwanela wi awerye wiivareryela. Naamwi anyeenyeihiwe, muchu ooreera murima onnatitelela omaala nave onnavareryela miyoonelo sawe.
12. Mmukhalelo taani Yesu aaloceiye ni achu?
12 Yesu aanapharihela masu awe wi aahakararye ni waalipiha achu. Owo haaloca moowali ni oomuchara awe. (Luka 8:47, 48) Ikwaha ikina, amwiicani awe yaanamuruwana nave yaaneererya omunyeenyeiha, nyenya “owo haakhula mooruwana.” (1 Pet. 2:21-23) Mu ikwaha ikina, Yesu aanoona okhala yaphaama omaala ohiyana waakhula mmukhalelo woonanara. (Mat. 27:12-14) Mweeparipari ela yootakiherya yaphaama wa alopwana athenle yaawo ari Akristu!
13. Hiiha ntoko onooniheryeiye Mateyu 19:4-6, ti mwawiihai mulopwana onahaaleiye ‘ophitaana ni mwaariye’? (Moone tho eruku.)
13 Yesu ooloca wi alopwana anaphwanela okhala oororomeleya wa asaaraya. Owo aahipharihela masu a Atiithi awe wi aloce wi mulopwana onaphwanela ‘ophitaana ni mwaariye.’ (Mwaalakhanye Mateyu 19:4-6.) Masu Eekiriki ataphuleliwe mu yoorepa yeela awi “ophitaana” enataphulela “opataana naari olucelelana.” Eyo enooniherya wi osivela yoowo orivovo wa mulopwana ni muthiyana onaphwanela okhala woolipa ntoko wi awo arimpataana. Waataana yoola hiwaahaala ocuphuwa oopiili ehihooxen’ye. Mulopwana yoowo orino onthamwene wawaacameleya ni amwaariye onahaala okhooca mukhalelo woothene wa epwitikiri. Ahuupuwelenle ikwaha piili, owo onahaala orapeliha miitho awe ‘wa yeeyo eri yatheru.’ (Sal. 119:37) Hiiha ntoko Yupu, owo onnapaka nlakano ni miitho awe nave onnalakelela wi ahirwe anwehe muthiyana mmukhalelo woohiphwanelela yoowo ohiri mwaariye.—Yupu 31:1.
Mulopwana yoowo ori oororomeleya wa amwariye onnakhooca woona epwitikiri (Moone eparakrafu 13) g
14. Ti mwawiihai mulopwana yoowo onaakhaliha amwaariye mmukhalelo woonanara ooneereiye arehererye onthamwene awe ni Yehova ni wa amwaariye?
14 Mulopwana yoowo onaahooxa amwaariye omwiilini ni mmuupuweloni, onaphwanela opaka ichu ikina wi arehererye onthamwene awe ni Yehova vamoha ni amwaariye. Tiheni xaxaxa owo onaphwaneleiye weera? Yoopacerya, owo onaphwanela wiiwexexa wi nla nikacamiho ntokweene. Hiyaavo yeeyo owo onaloceiye naari onapakeiye eri yoovitheya vamiithoni va Yehova. (Sal. 44:21; Ekl. 12:14; Ahe. 4:13) Yanaawiili, owo onaphwanela ohiya mukhalelo awe woonanara wa waakhaliha amwaariye. (Mas. 28:13) Yaneeraru, owo onaphwanela oveka nikhurumuwelo wa amwaariye ni wa Yehova ni opaka soothene wi akhurumuweliwe ni yaawo. (Saw. 3:19) Owo tho, onaphwanela omveka Yehova wi akhaleno nchuno na otorokeya hiiha ntoko ikuru seiyo onachuneiye wi avareryeleke muupuwelo awe, masu awe ni meerelo awe. (Sal. 51:10-12; 2 Ako. 10:5; Afi. 2:13) Yaneexexe, owo onaphwanela okhalaka mwawiiwanana ni mavekelo awe ni ohuserya wiicaka mukhalelo woothene wa nlala ni masu oophuca. (Sal. 97:10) Yaneethanu, owo onaphwanela waavya mwawaakuveya nikhaviheryo na atokweene a muloko. (Tiy. 5:14-16) Yaneethanu nammoha, owo onaphwanela olakelela echu onahaaleiye weera muhoolo, wi ahuuluule waakhaliha mmukhalelo woonanara amwaariye. Wakhala wi mulopwana onnoona epwitikiri, owo tho onaphwanela ochariha mikhalelo seiha mithanu nammoha. Yehova onahaala oreeliha wiilipixerya wawe wi atoroke mukhalelo awe. (Sal. 37:5) Nyenya hoonaakhwana pahiru mulopwana ohiya opaka ichu seiyo sihinamucicimiha mwaariye. Owo tho onaphwanela ohuserya omucicimihaka yoowo. Ani awerye hai weerano yeeyo?
MUKHALELO WA WAACICIMIHA AMWAARINYU
15. Mulopwana oni ooniherye hai wi onnaasivela amwaariye?
15 Mooniherye wa amwaarinyu wi munnaasivela. Alopwana akina yaawo arino ichoko soohakalaliha, aakhalano yookhovelela mahiku oothene owooniherya asaaraya wi annaasivela. (1 Yoh. 3:18) Mulopwana onanwerya wooniherya osivela wawe wa amwaariye naamwi mu sawooniherya ikhaani, ntoko yootakiherya, moorweela wa opharela ntata naya naari omukhupaarela moosivela. Variyari va nihiku, akhweya munanwerya omurepela michaka mulocaka wi: “Wootepa okinkhela” naari omukoha: “Nihiku naa nneeca hai?” Mu ikwaha ikina, owo onanwerya olakelela orepa ekaarata alocaka mukhalelo onaasiveleiye vancipale amwaariye. Vaavaa mulopwana onereiyeno ichu seiya, owo onnaacicimiha amwaariye nave onnalipiha othela waya.
16. Ntakhara heeni mulopwana onaphwaneleiye waathamalelaka amwaariye?
16 Mwaaleele amwaarinyu mukhalelo awo aryaaya oochuneyaxa wa nyuwo. Mulopwana yoowo onaacicimiha amwaariye onnaloca ichu seiho inaweeriha wiisoona okhala phaama. Ntoko yootakiherya, owo onnuupuwelela waathamalela amwaariye wa ichu soothene anapakaaya wi emukhaviherye. (Ako. 3:15) Vaavaa mulopwana onaathamaleleiye amwaariye ni waaleela ntakhara heeni owo onaasiveleiye, awo anniisoona okhala ookhapeleleya, oosiveliwa ni oocicimiheya.—Mas. 31:28.
17. Mulopwana oni ooniherye hai ncicimiho wa amwaariye?
17 Mwaakhaliheke amwaarinyu mooreera murima ni mwa ncicimiho. Mulopwana yoowo oonaasivela amwaariye onnawoona ntoko yamahala yootikhiniha ya Yehova. (Mas. 18:22; 31:10) Mwa yeeyo, owo ilukuluku soothene tooreera murima ni a ncicimiho ni yaawo, ophitaanyerya mu ilukuluku sa okonihana. Mwa yeeyo, owo haakhinyererya opaka echu vyakala yeeyo yaahaala omukhulumula, naari onooneiye wi tiyoonyemuwa, naari enahaala wuukhula yawuupuxerya ya murima awe. f Ohiya yeeyo, owo onahaala wiilipixerya wi atikitherye yawuupuxerya ya murima awe wi ekhale yaweela vamiithoni va Yehova.—Saw. 24:16.
18. Tiheeni alopwana athenle anaphwanelaaya olakelela? Moone tho ekaaxa “ Mikhalelo Mixexe sa Waakhaliha Amwaarinyu Mwa Ncicimiho.”)
18 Nyuwo alopwana muthenle, muroromele wi Yehova onnahakalala vancipale vaavaa onooneiye wiilipixerya wanyu wi mwaacicimihe amwaarinyu moorweela wa mmasu ni mu saweera. Ekhale yoolakelelaanyu waacicimiha amwaarinyu. Muhipake echu eri yoothene enahaala ophoreiha muupuwelo aya. Moohiyana ni yeeyo, mukhale ooreera murima, a ncicimiho ni waakhaliha moosivela. Mweerano yeeyo, awo anahaala woona mukhalelo nyuwaano munaasivelaanyu ni waapwacha yaawo. Mwaacicimiheke amwaarinyu nave nyuwaano munahaala okhapelela onthamwene yoowo ori woochuneyaxa muryaanyuno—ni Yehova.—Sal. 25:14.
NCIPO 131 “Yeyo Muluku Ophitànnyeiye”
a Mwaha onii: “Apwanne Munnaakhaliha Athiyana Hiiha Ntoko Yehova?” mu Mulipeleli a Yaneru a 2024, toochuneyaxa wa alopwana athenle.
b Achu yaawo anakhalihiwa moonanara mu ichoko, mwawooneya anahaala osiveliwa waalakhanya mwaha onii: “Ajuda Para as Vítimas de Violência Doméstica” makupa anii: “Outros Assuntos” mu jw.org ni mu aplikatiivu JW Library®.
c MASU ATHARIHIWE: Nsu nawi “masu oophuca” enavolowela oloca ichu soonanara wa muchu ni yoolakelela ya omunyeenyeiha naari omweeriha wiisoona moonanara. Ennavolowela tho omusamela ilukuluku soothene naari omulocela ichu seiho nyuwaano muhinasiveliwaanyuno mwa yoowo. Mwawiihiiha, soothene mulopwana onaloceiye eniiha eri masu awuuliha muru, oophuca naari yaawo anahaala omphoreiha mwaariye ananwerya othokororyiwa ntoko ophoreiha wa mmuupuweloni.
d Moone mwaha “A pornografia Pode Destruir Seu Casamento” mu jw.org ni mu JW Library.”
e Muthiyana yoowo aiyawe anoona epwitikiri, onahaala ophuravo ni mwaha onii: “Tiheeni Munaphwanelaanyu Weera Wakhala Wi Iyanyu Onnoona Epwitikiri?” mu Mulipeleli a Akosto a 2023.
f Piipiliya hanavahererya sooleeliherya sookwakwaleya vooloca sa mukhalelo wa okonihana yoowo waahaala wooniwaka okhala waweela naari wooriipiheya variyari va okonihana wa mulopwana ni mwaariye. Mmiyaha seiyo, mutheli onaphwanela opaka yoolakelela awe, nyenya awo anaphwanela opaka yeeyo mmukhalelo yoowo onahaala wooniherya ncicimiho wa Yehova, yoowo waahaala omuhakalaliha mukina ni mukhwaawe ni okhalano yawuupuxerya ya murima yaphaama. Mwa soothene, mutheli haanaphwanela olocaka ni akina vooloca sa miyaha seiya soovitheya sa moothelani mwawe.
g OTHARIHIWA WA ERUKU: Asinthamwene o mutekoni a munna annamuceenyerya woona erevista enooniherya sa epwitikiri.
