1. Ancipale mmahiku ahu anatikitheryeya mu eheeni?

 APWANNE nyuwaano munnoona wi achu ancipale mmahiku ahu anapwacha pahiru sawaya ohiya sa akina? Ntoko yootakiherya, akina annapaka wiilipixerya otokweene mu isaiti sa makhuuru wi yiivuwihe ni wiisooniherya wa miteko anapakaaya. Naamwiihiiha, achu avakhaani annamvaha ncicimiho Yehova Muluku. Mu yoohuserya yeela nnahaala woona enataphulela eheeni omvaha ovuwa Yehova ni tiheeni enahaala onceenyerya weerano yeeyo. Nnahaala ohuserya tho mukhalelo nnahaalaahu omvaha Muluku ovuwa yoowo onamphwanela ni ti mwawiihai owo onahaaleiye ovuwiha nsina nawe omwaahiyu onaacamela.

ENATAPHULELA EHEENI OMVAHA YEHOVA OVUWA?

 2. Ti mwawiihai Yehova oonihenryeiye otokweene awe Omwaako Sinayi? (Moone tho ekaapa.)

² Ovuwa tiheeni? Mpiipiliyani masu awi “ovuwa” enanwerya oloca sa echu vyakala yeeyo enamweeriha muchu okhala ootikhiniha. Yehova aahooniherya ovuwa wawe amanle waataphula Aisarayeli wookapuroni o Ikupitu. Nkaanyiheryani ela: Mamilyawu a Aisarayeli ethukumanne muxerexere mwa Mwaako Sinayi wi ekumane ni Muluku aya. Neeku nooripa naahihuruwela mwaako. Mootutuxa mwaako woothene waanachuwa mwiixi ni waanacikinyeyaxa—nave tho waahikhalawo overunya ni itari nave oruma wa mapeca waanaaceereryeya. (Muk. 19:16-18; 24:17; Sal. 68:8) Mwaanyiherye mukhalelo Aisarayeli yaaryaaya ootikhiniheya vaavaa Yehova uupulunleiye yawooniherya yeela yooweryaxa ya ovuwa wawe.

 3. Enataphulela eheeni omvaha Yehova ovuwa?

³ Nyenya hanka vooloca sa hiyaano? Apwanne chiryene nnanwerya omvaha Yehova ovuwa? Aai, nnanwerya. Mukhalelo mmoha  wa omvaha ovuwa Yehova ori waaleela akina vooloca sa ichu sootikhiniha seiho owo opankeiye ni vooloca sa oreera waya. Ninnamvuwiha Muluku vaavaa nnamvahaahu ncicimiho wa ichu soothene seiho owo onanikhaviheryeiye wi nipake. (Yes. 26:12) Mwene Tavite aari yootakiherya yaphaama ntoko muchu yoowo ovanhe ncicimiho wa Yehova. Mu nivekelo nenlo aapankeiye veeri va muloko wa Aisarayeli, Tavite aahiloca wa Muluku: “Khwoo Yehova, otokweene, owerya, oreera, ovuwa, ni ocicimiheya ti sawinyu woona wi ichu soothene sa wirimu ni sa veelaponi yavathi ti sawinyu.” Voocharela, Tavite amalinhe opaka nivekelo nawe, “muloko woothene waamucicimiha Yehova.”—1 Math. 29:11, 20.

 4. Ti mwawiihai Yesu aamuciciminheiye Yehova?

⁴ Vaavaa Yesu aareiye veelaponi ya vathi, owo aahaacicimiha Atiithi awe aaleelaka achu wi aari Yehova yoowo aamvaha owerya wa opaka sootikhiniha. (Mar. 5:18-20) Yesu tho aahaakhaviherya akina woona mukhalelo Yehova aareiye ootikhiniha. Mu elukuluku emoha, Yesu ahusihaka mu sinakoka. Variyari va yaawo yaamuwiriyana aakhalavo muthiyana mmoha yoowo aaphariwe ni nsololo mu iyaakha 18. Nsololo naaheeriha mwiili awe okhunyanyeya nave ahinawerya wiisookola. Yaari yoothananiha! Aceenyeryiwaka nniphwanya, Yesu aahimwaacamela muthiyana owo ni omulociha mooreera murima, alocaka wi: “Muthiyana, wohoopoliwa mu nanceeche aa.” Owo aahimukuherya muthiyana matata awe nave mwawaakuveya aahookowa ni “apacerya omucicimiha Muluku,” okumi awe waahikookela okhala phaama moomalela! (Luka 13:10-13) Muthiyana yoole aakhalano mathowa aphaama a omvaha ncicimiho Yehova, nave hiyaano tho nookhalano.

NTAKHARA HEENI NINNAMVUWIHA YEHOVA?

 5. Mathowa taani nryaahuno a omucicimiha Yehova?

⁵ Ninnamvuwiha Yehova nthowa nawi ninnamucicimiha mwawiixela. Nookhalano mathowa mancipale a omucicimiha yoowo. Yehova ta ikuru soothene; owo ookhalano ikuru soohikota. (Sal. 96:4-7) Miruku sawe sawiixeela sinnooneya mookwakwaleya mu ichu seiyo opankeiye. Owo oonivaha okumi ni soothene nnachunaahu wi nikhale akumi. (Wup. 4:11) Owo toororomeleya. (Wup. 15:4) Soothene owo onapakeiye sinnakhumelela phaama nave ilukuluku soothene onnaakhwaniherya soororomeliha sawe. (Yos. 23:14) Ti nthowa nene mulipa a miririmu aalonceiye vooloca sa Yehova wi: “Nyuwo Apwiya, haavo mukina munaphwanaphwanaanyuno. Nyuwo mwa mutokotoko nave owerya wa nsina nanyu woovuwasha”! (Yer. 10:6, 7, PMM) Mweeparipari, nookhalano mathowa aphaama a omucicimiha Tiithi ahu a wirimu. Nyenya Yehova ti Muluku oopwahaxa, yoowo nnaphwanelaahu omucicimiha.

 6. Ntakhara heeni nnamusivelaahu Yehova?

⁶ Ninnamvuwiha Yehova nthowa nawi ninnamusivela vancipale. Ninnamusivela Yehova nthowa na mikhalelo sawe mincipale saphaama. Owo ta ikharari ni aniphwanya. (Sal. 103:13; Yes. 49:15) Vaavaa nnahooxeyaahu, owo tho onnahooxeya. (Sak. 2:8) Owo onnanikhaviherya omusuwela yoowo ni oneeriha okhala asinthamwene awe. (Sal. 25:14; Saw. 17:27) Nave owo tawiiyeviha; “owo onnuurama wi avarerye erimu ni elapo, onnamviiha oohasuwa vanchupini.” (Sal. 113:6, 7) Ti mwawiihai muchu aahaaleiye ohichuna omucicimiha Muluku ahu mutokweene?—Sal. 86:12.

 7. Ekari taani yavameekhaaya nryaahuno?

⁷ Ninnamvuwiha Yehova nthowa nawi nnachuna wi akina emusuwele. Ancipale hesuwenle eparipari vooloca sa Yehova. Ntakhara heeni? Nthowa nawi Satana ooruuhela evaasi muupuwelo aya amwaramwaxaka sawootha soonanaraxa vooloca sa Owo. (2 Ako. 4:4) Satana onnaalekecha achu wi Yehova ti Muluku oonyeenyeya, wi owo hananipwacha nave tho  wi owo tonatannya makacamiho mancipale a mweelaponi. Nyenya noosuwela eparipari vooloca sa Muluku ahu! Nookhalano ekari wi naaleele akina mukhalelo Yehova oryeiye ni waakhaviherya wi emucicimiheke tho yoowo. (Yes. 43:10) Mu Salmu 96 onatikitheryeya mu omvaha ovuwa Yehova. Nnahaala ohuserya mu Salmu yoola mukhalelo nnahaalaahu omvaha Yehova ovuwa yoowo onamphwanela.

NNI NIMVAHE HAI YEHOVA OVUWA YOOWO ONAMPHWANELA?

 8. Tuuvi ori mukhalelo mmoha wa omvuwiha Yehova? (Salmu 96:1-3)

⁸ Mwaalakhanye Salmu 96:1-3. Nnanwerya omucicimiha Yehova wa yeeyo nnalocaahu vooloca sa yoowo. Mu iversikulu seiha achu a Yehova annawompwa wi ‘emwiipele,’ wi ‘ecicimihe nsina nawe,’ wi ‘elaleyeke michaka saphaama sa ovuluxa wawe’ nave wi ‘elaleye ovuwa wawe variyari va maloko.’ Soothene seiha mikhalelo nnaphwanelaahu omvuwihano Tiithi ahu Yehova. Ayuta oororomeleya ni Akristu a mu nsana noopacerya, hiyoovelela oloca ni akina vooloca sa ichu soothene saphaama seiho Yehova aapankeiye ntakhara yaawo ni waakiha makhalelo awe. (Tan. 3:16-18; Saw. 4:29) Nni neereno tho hai emohamoha?

9-10. Tiheeni muhusenryaanyu orweela mu yaweereya ya Angelena? (Moone tho eruku.)

⁹ Moone yaweereya ya Angelena, a murokora yoowo onakhala o Estatu Unitu. Owo aari oolipa murima nave aanaloca sa Yehova omutekoni weiwo aalapeiyewo. Woona wi owo aampaceryaru olapa weiwo, owo aahiwompwa ntakhara muthukumano ni achu akina yaawo tho yaampaceryaru olapa weiwo, mmuthukumano yoowo oothene yaanwerya othariha wa akina vooloca sa okumi aya. Angelena aahirehererya iruku wi awoonihe seiho sooniherya ohakalala aryeiyeno nthowa na okhala Namoona a Yehova. Nyenya ehalaka elukuluku vakhaani wi owo aloce, nthamwene awe oomutekoni aahiisooneiha ntoko muchu yoowo aaphwiiwale ntoko Namoona a Yehova. Owo aapacerya oloca ichu soonanara vooloca sa Anamoona a Yehova ni soororomela saya. Angelena ooloca: “Murima aka waanakisoosa vancipale. Nyenya kaahuupuwela: ‘Nkinaphwanela omaala. Kinaphwanela waaleela mukhalelo Yehova oryeiye.’”

¹⁰ Vaavaa nthamwene awe aakwaanxeiye oloca, Angelena aahipaka nivekelo nawaakuveya ni noomaaleleya. Mwawiihiiha, murokora aahiloca wa owo mmukhalelo waphaama, ariki: “Mukhalelo aka onamulikana tho ni wawinyu.  Miyaano tho kiphwiiwale ntoko Namoona a Yehova nave kinnatitelela okhala Namoona ophiyerya olelo.” Naamwi mukhalelo waari woonyeenyeiha, Angelena aahititelela okhala oomaaleleya, owo aahiwooniherya asinthamwene awe oomutekoni iruku sawe ni sa asinthamwene awe emurumeelaka Yehova moohakalala, nave mwa ncicimiho aahithariha soororomela sawe. (1 Pet. 3:15) Tiivi yaari yookhumelela ene? Vaavaa Angelena aamalinheiye oloca, mulopwana ole aamaala oloca. Ophiyerya wi owo aahuupuwelela ichu saphaama wa nthowa na wunnuwa ntoko Anamoona a Yehova. Angelena ooloca: “Yehova onnaphwanela waakihiwa. Ekari etokweene waakiha nsina nawe.” Hiyaano tho nookhalano ekari ya omvuwiha Yehova ni omucicimiha naamwi akina ehimucicimihaka.

11. Ti mwawiihai alapeli eeparipari opacerya khalai echarinhaaya nlakiheryo nenla na Salmu 96:8?

¹¹ Mwaalakhanye Salmu 96:8. Nnanwerya omvuwiha Yehova ni sookhalano sahu. Alapeli eeparipari ilukuluku soothene annamucicimiha Yehova mmukhalelo ene yoola. (Mas. 3:9) Ntoko yootakiherya, Aisarayeli yaanapaka sooveleela ntakhara otekiwa ni orehereryiwa empa ya Muluku. (2 Mam. 12:4, 5; 1 Math. 29:3-9) Akina a oohuserya a Yesu yaanamukhaviherya “ni sookhalano saya” wi owo ni arummwa awe ekhaleno yeeyo yaachunaaya. (Luka 8:1-3) Nave Piipiliya onaloca wi vaavaa Akristu akina yaahooxeyaaya nthowa na etala, anna ni arokora aya yaawo yaakhala mmapuro makina yaanaarumihela ikhorowa. (Saw. 11:27-29) Olelo tho, nnanwerya omvuwiha Yehova moorweela wa sooveleela sahu soochuna.

12. Ti mwawiihai sooveleela sahu inahaalaaya omvuwiha Yehova? (Moone tho eruku.)

¹² Moone yaweereya emoha enooniheryaaya mukhalelo sooveleela sahu inamvuwihaaya Yehova. Yoolokoha emoha ya mu 2020 yaahithariha makacamiho a nsuwa nootitelela o Zimbabwe. Achu ancipale yaahaala okhwa nthowa na ohikhalano yoolya, ophitaanyeryavo murokora mmoha awiichaniwa Prisca. Naamwi mukhalelo yoola waari woovila, Prisca aahititelela mu yookhovelela awe ya olaleerya mu nihiku Naneeraru ni Naneethanu nri noothene, naamwi variyari va elukuluku ya olima. Amwaacamani awe yaanamunyemula nthowa na oya mmuteko woolaleerya ohiya oya olimaka mmacani mwawe, elocaka wi: “Weyaano onamukhwa etala.” Prisca aanakhula moororomela: “Yehova hantonko waahiya alapeli awe.” Ohivinrevo elukuluku yincipale, owo aahaakhela nikhaviheryo na mmarehereryo ahu.  Prisca aahikhalano yoolya ni ichu ikina seiho owo aachuneiye, nthowa na sooveleela seiho mmoha ti mmoha onavaheiye. Amwaacamani a Prisca yaahikhala ootikhiniheya nave yaahiloca wa owo eriki: “Muluku hantonko woohiya, nyenya nnachuna ohuserya sincipale vooloca sa yoowo.” Amwaacamani awe awaakhwana 7 yaahipacerya ophiya mmithukumano.

13. Ti mwawiihai meecelo ahu anahaalaaya omvuwiha Yehova? (Salmu 96:9)

¹³ Mwaalakhanye Salmu 96:9. Nnanwerya omvuwiha Yehova moorweela wa meecelo ahu. Anamukucho yaawo yaarumeela mu empa ya Yehova, yaaphwanela okhalaka aweela omwiilini. (Muk. 40:30-32) Hiyaano tho nnaphwanela okhala aweela, ohiya pahiru weeriha mwiili ahu okhala weesipanti, nyenya moorweela wa osepa opaka echu vyakala yeeyo Yehova oniiceiye. (Sal. 24:3, 4; 1 Pet. 1:15, 16) Nnaphwanela wiilipixerya vancipale wi nirule “omuchu wakhalai”, mikhalelo ni saweera sooriipiheya, ni owara “omuchu ovyaani”, mukhalelo wa wuupuwela ni weerano ichu seiho inavuwiha mikhalelo saphaama sa Yehova. (Ako. 3:9, 10) Nnikhaviheryo na Yehova, naamwi achu yaawo epanke ichu soonanaraxa ananwerya otoroka ni owara omuchu ovyaani.

14. Tiheeni nyuwaano muhusenryaanyu orweela mu yaweereya ya Jack? (Moone tho eruku.)

¹⁴ Muthokororye yaweereya ya Jack, mulopwana a nlala ni awoopiha yoowo iichaniwa Nsololo. Nthowa na milacu sawe, Jack aahithoriheryiwa okhwa. Nyenya, vaavaa Jack aaweheryeiye wiiphiwa, munna mmoha yoowo aaxekunrye ekaripooso yeele aahimvaha yoohuserya ya Piipiliya, nave Jack aahipacerya omuhuserya Piipiliya. Naamwi Jack aapanke ichu sincipale soonanara, owo aahitoroka nave moovira wa elukuluku owo aahipatisiwa ntoko Namoona a Yehova. Jack aahitorokeya vancipale ophiyerya wi nihiku aahaaleiye wiiphiwa, makwaarta a ekaripooso yaahimoriha miithori mmiithoni mwaya vaavaa yaalaanyanaaya. Mulopwana mmoha yoowo aalapa mukaripooso aaloca: “Jack khalai aari mulipa oophariwa oonanara murima mu nipuro nenla. Vano owo mmoha aachu aphaama.” Esumana yoocharela Jack amanle wiiphiwa, anna yaawo yaarwa yeecihaka muthukumano wa esumana ti esumana mukaripooso, yaahimphwanya mulipa oophariwa mukina yoowo aaphwanyen’ye mmuthukumano mu nihiku noopacerya. Tiheeni yaamweerinhe othukumana? Owo aahikhala ootikhiniheya ni matorokelo a Jack nave aachuna osuwela yeeyo owo aaphwaneleiye weera  wi amulapeleke Yehova. Mweeparipari, meecelo ahu ananwerya omvaha ovuwa Tiithi ahu a wirimu!—1 Pet. 2:12.

TI MWAWIIHAI YEHOVA ONAHAALEIYE OVUWIHA NSINA NAWE OMWAAHIYU ONAACAMELA?

15. Ti mwawiihai Yehova onahaaleiye ovuwiha nsina nawe moomalela omwaahiyu onaacamela? (Salmu 96:10-13)

¹⁵ Mwaalakhanye Salmu 96:10-13. Iversikulu seiha sookuchula sa Salmu 96, sinnamuthariha Yehova ntoko Muthoriha ni Mwene awookololowa. Ti mwawiihai Yehova onahaaleiye ovuwiha nsina nawe omwaahiyu onaacamela? Moorweela wa othoriha wawe. Moohilekela owo onahaala omutoloxa Papulo Mutokotoko, nthowa nawi malapelo atheru annapaka ichu soonanaraxa ni annahusiha sawootha soonanaraxa vooloca sa nsina nawe. (Wup. 17:5, 16; 19:1, 2) Vaavaa Papulo Mutokotoko onahaaleiye otoloxiwa achu akina ananwerya othanla opacerya omulapela Yehova. Wookuchulani, mu Armaketo, Yehova onahaala otoloxa mukhalelo yoola wa ichu wa Satana, aatoloxaka oothene yaawo anamwaakaaha owo ni oriipiha nsina nawe, nyenya onamwaavuluxa oothene yaawo anamusivela ni omwiiwelela, nave tho aniirumiha nthowa na omvaha ovuwa wawe. (Mar. 8:38; 2 Ate. 1:6-10) Evinre yaweeha yookuchula mu Olamulelo wa Kristu wa Iyaakha Ncikhwi, Yehova onahaala weeliha nsina nawe moomalela. (Wup. 20:7-10) Mu elukuluku yeeyo, “ntoko maahi anahuruwelaaya ephareya, hiihaa elapo enarwa esareya osuwela ncicimiho na Apwiya.”—Hap. 2:14, PMM.

16. Tiheeni mulakelenlaanyu weera? (Moone tho eruku.)

¹⁶ Enahaala okhala yoohakalalihaxa vaavaa achu oothene enahaalaaya omvaha ovuwa Yehova yoowo onaphwanela nsina nawe! Nyenya niweheryaka ophiya nihiku nenlo, nnaphwanela opaka owetha wahu nimvuwihaka Muluku ahu mu ikari soothene. Wi enikhaviherye woona ochuneya waya mwaha yoola, Nikhuuru Noolamulela noothanla yoorepa ya Salmu 96:8 ntoko yoorepa ahu ya eyaakha ya 2025: “Mumvahe Yehova ovuwa onaphwanela nsina nawe.”