MWAHA WOOHUSERYA 4
NCIPO 18 Othamalela Yawoopola
Woopola Onanihusiha Eheeni?
“Moorweela wa yeela, osivela wa Muluku wohuupululiwa wa hiyo.”—1 YOH. 4:9.
IPONTU SA VASULU
Tiheeni nnahuseryaahu orweela wa okhwa wa Yesu Kristu vooloca sa mikhalelo saphaama seiho Yehova ni Yesu yoonihenryaaya?
1. Nnaphuravo hai orweela wa ophwanyeya va Yawuupuxerya ya vayaakhani ya okhwa wa Kristu?
MWEEPARIPARI nyuwaano munneemererya wi woopola yamahala yoochuneyaxa! (2 Ako. 9:15) Woona wi Yesu ookhwa nthowa na hiyaano, nyuwaano munanwerya okhala nthamwene a Yehova. Nyuwaano tho munanwerya okhalano ewehereryo ya okhalano ekumi yoohimala. Nookhalano mathowa mancipale a omuthamalela Yehova yoowo ovaherenrye woopola, woona wi owo onnanisivela vancipale! (Aro. 5:8) Wi anikhaviherye otitelela othamalela ni ohicuwala yeeyo Yehova ni Yesu apankaaya wa hiyaano, Yesu oonlamulela wi vayaakhani Nuupuweleleke okhwa wawe.—Luka 22:19, 20.
2. Tiheeni nnahaalaahu othokororya mmwaha yoola?
2 Eyaakha yeela nnahaala wuupuwelela okhwa wa Yesu, Nawoorowa, 12 a Apirili a 2025. Moohikhwa minikwa, oothene ahu nrino wiirehererya wi naphwanyeyevo. Yaamukhala phaama wi mmoha ti mmoha a hiyaano waavya elukuluku mu isumana ehaakumve ni emanle Yawuupuxerya wuupuwelela a mwawiixeela vooloca sa yeeyo Yehova ni Mwana awe apankaaya wa hiyaano. Mmwaha yoola, nnahaala woona yeeyo woopola onanihusihaaya vooloca sa Yehova ni Mwanawe. Mwaha onacharela, nnahaala okhaviheryeya wiiwexexa mukhalelo nnahaalaahu ophura mu woopola yoola ni mukhalelo nnahaalaahu wooniherya othamalela wahu ntakhara yoowo.
WOOPOLA ONANIHUSIHA EHEENI VOOLOCA SA YEHOVA?
3. Ti mwawiihai okhwa wa muchu mmoha waahaalaaya oweeriha mamilyawu a achu okhurumuweliwa? (Moone tho eruku.)
3 Woopola onnanihusiha wi Yehova ti Muluku onasivela wookololowa. (Malam. 32:4) Mwawiihai? Muthokororye ela: Vaavaa Atamu aahimwiiwelenleiye Muluku, owo aahikhala mulipa oocheka nave akhwa, woona wi na anamwane awe hiyaano tho na anamacheka nave ninnakhwa. (Aro. 5:12) Wi anitaphule wa yoocheka ni okhwa, Yehova oomurumiha Yesu wi avahererye woopola. Nyenya ti mwawiihai okhwa wa muchu mmoha oophaameya waahaalaaya owoopola achu ancipale wa yoocheka ni okhwa? Murummwa Paulo onnathariha: “Tiwi moorweela wa ohiiwelela wa muchu mmoha [Atamu] ancipale anneeriwa alipa oocheka, hiihaa tho, moorweela wa wiiwelela wa muchu mmoha [Yesu], ancipale enarwa yeeriwa awookololowa.” (Aro. 5:19; 1 Tim. 2:6) Mwawiihiiha, Paulo aachuna oloca wi achu oothene alipa oocheka nave yaanaphwanela okhwa nthowa nawi muchu mmoha oophaameya haamwiiwelenle Muluku. Nave, waari woochuneya wi muchu mmoha oophaameya ni awiiwelela anitaphule.
Muchu mmoha oheeriha wi nikhale akapuro a yoocheka ni okhwa. Mmukhalelo mmohamoha, muchu mmoha oonoopola (Moone eparakrafu 3)
4. Ntakhara heeni Yehova heemerenrye wi anamwane a Atamu amurima wawookololowa ekhale okhala wookhala?
4 Apwanne Yesu chiryene aanaphwanela okhwa wi anoopole? Apwanne Yehova haahaala olakelela weemererya wi achu a murima wawookololowa a muyareryiwo wa Atamu ekhale ni okumi okhala wookhala? Wa achu oohiphaameya, nnanwerya wuupuwela wi waahaala okhala mukhalelo waphaama wa orehererya nikacamiho. Nyenya eyo henapaka makupa mu wookololowa woophaameya wa Yehova. Woona wi Yehova tawookololowa, owo haahaala othanla ohithokororya yaweera yawooneya ene ya ohiiwelela wa Atamu.
5. Ntakhara heni nnaphwanelaahu ororomela wi ilukuluku soothene Yehova onahaala opaka yeeyo eri yaphaama?
5 Nyenya, tiheeni yaahaala weereya waakhanle wi Yehova haavaherenrye woopola, nave tho waakhanle wi oohiya okhwipi wookololowa moorweela wa weemererya wi anamwane aasilopwana ni aasithiyana oohiphaameya a Atamu ekhale ni okumi okhala wookhala? Akhweya achu yaanwerya wiikohaka waakhanle wi Yehova aahaala ohithokororyaka wookololowa mmiyaha tho mikina. Ntoko yootakiherya, achu yaanwerya okhwaaka minikwa waakhanle wi Yehova aahaala waakhwaniherya soororomeliha sawe soothene. Nyenya hannaphwanela okhala awuukhuwa ni yeeyo yeeren’ye. Ntakhara heeni? Nthowa nawi Yehova oopaka yeeyo eri yawookololowa, naamwi eyo yaavolowenle okhwa Mwana awe mmoharu, wi niwerye okhalano ororomela wi owo ilukuluku soothene onahaala opaka yeeyo eri yawookololowa.
6. Mukhalelo taani mukina waamuceenyenrye Yehova omurumiha Mwanawe? (1 Yoh. 4:9, 10)
6 Naamwi woopola onikhaviheryaka wiiwexexa wi Yehova tawookololowa, onnanikhaviherya tho wiiwexexa osivela wawe wawiixeela. (Yoh. 3:16; mwaalakhanye 1 Yohani 4:9, 10.) Yehova oomurumiha Mwanawe wi akhwe ntakhara hiyaano nthowa nawi onachuna wi nikhaleno okumi okhala wookhala nave tho onachuna wi nipake makupa a emusi awe. Muupuwele ela: Vaavaa Atamu aachenkeiye, Yehova aahimwiikaramo mu emusi ya alapeli Awe. Ntoko yookhumelela ene, hiyaano tho hinaapaka makupa a emusi ya Muluku vaavaa naayarinwaahu. Nyenya woona wi woopola wooliviwa, achu oothene yaawo erino nroromelo mwa Muluku ni omwiiwelela ananwerya opaka makupa a emusi Awe. Naamwi hiihaano nnanwerya okhalano onthamwene waphaama ni Yehova ni wa annihu. Mweeparipari, Yehova onnanisivela!—Aro. 5:10, 11.
7. Ti mwawiihi ohooxeya wa Yesu onanikhaviheryaaya wiiwexexa ophiyerya mweeryo taani Yehova onanisiveleiye?
7 Nnanwerya wiiwexexa phaama mukhalelo Yehova onanisiveleiye vaavaa nnuupuwelaahu mukhalelo aahooxen’yeiye mu omoona Mwanawe ahooxeyaka. Satana ooloca wi haavo mulapeli a Muluku onahaala otitelela okhala oororomeleya vaavaa onakhalaaya woovila weerano yeeyo. Wi ooniherye wi Satana nawoothe, Yehova aaheemererya wi Yesu ahooxeye ahaakumve okhwa. (Yupu 2:1-5; 1 Pet. 2:21) Yehova aanawoona achu emunyemulaka Yesu, anakhoco enwaxulaka nave voocharela emukhomela vamwirini. Mwawiihiiha, Yehova aahimoona Mwanawe akhwaaka mmukhalelo wawiicelaxa. (Mat. 27:28-31, 39) Yehova aanwerya weeriha wi soothene seiha siheereye. Ntoko yotakiherya vaavaa alipa awaakaaha yaalocaaya eriki: “Wi [Muluku] amvuluxe hiihaano aarimwi amukhwelaka,” Yehova aanwerya weerano yeeyo. (Mat. 27:42, 43) Mwawiihiiha, waakhanle wi Muluku aahivolowelavo eerihaka wi Mwanawe ahiiphiwe, hiwaavo woopola waahaala oliveliwa nave hinaahaala okhalano ewehereryo. Nyenya, Yehova aaheemererya wi Mwanawe avilele ohooxiwa yoole ophiyerya okhwa.
8. Apwanne Yehova aahithanana vaavaa amooneiye Mwanawe ahooxeyaka? Mutharihe. (Moone tho eruku.)
8 Hannaphwanela wuupuwela wi woona wi Muluku ta ikuru soothene, owo hanasooseya! Owo ohaapatuxa achu ni mavyakelo a okhalano miyoonelo hiiha ntoko yoowo, nave Piipiliya onaloca wi owo onipatunxe moolikana ni yoowo, eyo enataphulela wi owo tho onnasooseya. Piipiliya onaloca wi “yaamuhiciha” ni “emuthananiha.” (Sal. 78:40, 41) Muthokororye yaweereya ya Aparahamu ni Isaki. Nyuwaano munnanwerya wuupuwela wi Aparahamu aahaakhela nlamulo na omvaha mwana awe mmoharu ntoko mukucho. (Map. 22:9-12; Ahe. 11:17-19) Mwaanyiherye mmikhalelo soothene Aparahamu aaryeiye oothanana ni oosooseya vaavaa iireherenyeiye wi amwiiphe mwana awe mmoharu. Mwaanyiherye mukhalelo Yehova aaryeiye oothananaxa ni oosooseya vaavaa aawooneiye achu emuhooxaka Mwana awe ophiyerya tho omwiipha!—Moone exilema mu jw.org Imite a Sua Fé—Abraão, Nikupa 2.
Yehova aahoona wiicela vaavaa aamooneiye Mwanawe ahooxeyaka (Moone eparakrafu 8)
9. Ti mwawiihai Aroma 8:32, 38, 39 onookhaviheryeiyeeni wiiwexexa vooloca sa osivela wawiixeela wa Yehova ntakhara nyuwaano ni anninyu?
9 Woopola onanihusiha wi haavo muchu onanisivela vancipale ompwaha Yehova—naari mano mmusi ahu oosiveliwaxa naari nthamwene ahu aphaama. (Mwalaakhanye Aroma 8:32, 38, 39.) Moohikhwa minikwa, Yehova onnanisivelaxa opwaha mukhalelo hiyaano nniisivelahaahu mukhatiihu. Apwanne munnachuna okhalano okumi okhala wookhala? Yehova onnachuna vancipale eyo yeeren’ye. Apwanne munnachuna okhurumuweliwa soocheka sanyu? Yehova onnachuna vancipale wookhurumuwelaani. Echu owo onaweheryeiye wi neere ori wooniherya othamalela yamahala yoochuneya ya woopola, okhalano nroromelo wa yoowo ni omwiiwelelaka. Woopola yamahala yoochuneya yeeyo enooniherya osivela otokweene wa Yehova ntakhara hiyaano. Mu elapo evyaani nlelo nnahaala ohuserya sincipale vooloca sa osivela wa Yehova.—Ekl. 3:11.
WOOPOLA ONANIHUSIHA EHEENI VOOLOCA SA YESU?
10. (1) Echu taani yaatempexa omuthananiha Yesu vooloca sa wootheriwa wawe? (2) Mmikhalelo taani Yesu aakinheiye nsina na Yehova? (Moone tho ekaaxa “ Ororomeleya wa Yesu Waahaakiha Nsina na Yehova.”)
10 Yesu onnuukhuwaxa ni yeeyo achu anuupuwelaaya vooloca sa Atiiti awe. (Yoh. 14:31) Yesu aahithananaxa nthowa na wootheryiwa wi owo aahimunyemula Muluku, nthowa nawi achu yaanwerya owuupuwelelaka moonanara Atiithi awe, woona wi Yesu aahaala othoriheliwa okhwa ntoko muchu yoowo aahimucicimiha Muluku, naari tho ntoko muchu awoopiha. Ti nthowa nene owo aavekenleiye: “Tiithi, wakhala wooweryeya, mweerihe wi koopho ola apwahevo wa miyo.” (Mat. 26:39) Nyenya, woona wi Yesu aahititelela okhala oororomeleya wa Yehova ophiyerya okhwa, owo ohooniherya moomalela wi sawootha seiho Satana aalonceiye vooloca sa Atiithi awe hisaari seeparipari.
11. Ti mwawiihai Yesu oonihenryeiye osivela wawiixeela ntakhara achu? (Yohani 13:1)
11 Woopola onnanihusiha tho wi Yesu onnaapwacha vancipale achu, xaxaxa oohuserya awe. (Mas. 8:31; mwaalakhanye Yohani 13:1.) Ntoko yootakiherya, Yesu aanasuwela wi ichu ikina seiho aahaaleiye opaka veelaponi yavathi saahaala okhala soovilaxa, xaxaxa okhwa wawiicelaxa. Nyenya Yesu aahipaka ichu soothene seiha soovila, ohiya pahiru nthowa nawi waari murici aavahiweiye ni Yehova wi apake, nyenya waari nthowa na waasivela achu. Ohiya yeeyo, Yesu ohooniherya osivela otokweene wa achu aalaleeryaka, aahusihaka ni waakhaviherya. Naamwi mu nihiku na okhwa wawe, Yesu aahaavya elukuluku wi arapihe inaani sa oomuchara awe ni waalaanya vamoha ni masu oolipiha ni mahusiheryo makina. (Yoh. 13:12-15) Voocharela, naamwi ahooxeyaka ni wiicela otokweene yoowo ooneiye ni okhwa vamwirini, Yesu aahimvaha ewehereryo mulipa aweera soonananara yoowo aari mmakupa awe, amuleelaka wi aahaala okhala mparataiso, nave tho aahooniherya wuukhuwa wa amama awe nave amveka Yohani wi aakhapeleleke yaawo. (Luka 23:42, 43; Yoh. 19:26, 27) Yesu aahooniherya osivela wawe wa wiixeela ntakhara achu ohiya pahiru okhwa ntakhara yaawo, nyenya moorweela wa waakhaliha moosivela ni mooreera murima.
12. Mmukhalelo taani Yesu onatiteleleiye ovaha mikucho ntakhara hiyo?
12 Naamwi Kristu akhwile “ekwaha emoha wa ilukuluku soothene,” owo nlelo onnavaha mikucho ntakhara hiyaano. (Aro. 6:10) Mwawiihai? Owo onnatitelela olapa wi anivahe ichu sincipale saphaama seiho hiihaano siri sooweryeya wa nthowa na woopola. Muthokororye yeeyo onapakeiye hiihano. Owo onarumeela ntoko Mwene ahu, Mulipa a Mukucho Mutokweene ni muhooleli a muloko. (1 Ako. 15:25; Aef. 5:23; Ahe. 2:17) Owo oovahereryiwa muteko wa waathukumanya oothanliwa ni muloko mutokweene, muteko yoowo onahaala omalihiwa ehaakumve makuchuwelo a yoohooxa etokotoko. b (Mat. 25:32; Mar. 13:27) Owo tho onnampharihela kapuro oororomeleya ni amiruku, wi atitelele onivaha yeeyo nnachunaahu wi ntitelele omurumeele Yehova moororomeleya. (Mat. 24:45) Variyari va Olamulelo Awe wa Iyaakha Ncikhwi, owo onahaala otitelela opaka ichu ntakhara hiyaano. Mweeparipari, Yehova oomvaha mwanawe ntakhara hiyo!
MUHIRWE MUHIYERERYE OHUSERYA
13. Ti mwawiihai wuupuwelela oneeraaya wookhaviheryeeni otitelela ohuserya vooloca sa osivela wa Muluku ni wa Kristu yoowo aryaayano ntakhara hiyo?
13 Nyuwaano munanwerya otitelela ohuserya vooloca sa osivela yoowo Yehova Muluku ni Yesu Kristu aryaayano wa hiyo, wakhala wi mootitelela owuupuwelela yaawo. Akhweya variyari va elukuluku ya Yawuupuxerya ya eyaakha yeela, nyuwaano munanwerya omwaalakhanya mwawiichaalela liivuru mmoha naari ancipale a Michaka. Muhaalakhanyeke ikapiitulu sincipale mu elukuluku emoha. Ohiya yeeyo, mvukule nave mwaavye mathowa makina yaawo ananeeriha omusivela Yehova ni Yesu. Nave mwaaleele akina yeeyo mphwannyaanyu variyari va waalakhanya wanyu.
14. Mwawiiwanana ni Salmu 119:97 ni enoota, ti mwawiihai otholathola oneeryaaya wookhaviheryeeni otitelela ohuserya vooloca sa woopola ni mahusiheryo makina? (Moone tho eruku.)
14 Waakhanle wi nyuwaano muri mu eparipari ovinyerya mu iyaakha sincipale, akhweya munanwerya wiikoha waakhanle wi tiwooweryeya ophwanya wiiwexexa ovyaani vooloca sa miyaha isuweliweexa, ntoko ekhaikhai ya Muluku, osivela ni woopola. Mweeparipari, ilukuluku soothene nnamukhalano ichu ivyaani wi nihuserye vooloca sa miyaha seiha. Mwa yeeyo, tiheeni nyuwaano munaphwanelaanyu weera? Mphurevo vancipale muhakhu wa sooleeliherya yoowo onaphwanyeya mu soolaleeryiwa sahu. Wakhala wi moophwanya makupa yaawo muhiniiwexexaanyu moomalela, mutholathole. Variyari va nihiku, muupuwelele wa yeeyo mphwannyaayu vooloca sa Yehova mwanawe ni osivela yoowo aryaayano ntakhara nyuwo.—Mwaalakhanye Salmu 119:97 ni enoota.
Naamwi nimalinhe iyaakha sincipale mu eparipari, nnanwerya wunnuwiha othamalela wahu ntakhara woopola (Moone eparakrafu 14)
15. Ntakhara heeni nnaphwanelaahu otitelela waavyaka muhaku wa Mpiipiliyani?
15 Muhiceecheye wakhala wi hamphwannye echu evyaani naari yootikhiniha ikwaha soothene munaalakhanyaanyu naari munapakaanyu otholathola. Mmukhalelo mukina, nyuwaano muri ntoko muchu yoowo onamwaavya ooru. Moopixa murima, alipa oomwaavya ooru annamaliha iwora sincipale ophiyerya tho mahiku mancipale ehiphwannye naari mano nipasuwela na ooru. Mwawiihiiha, awo annatitelela nthowa nawi nipasuwela nri noothene na ooru tinoochuneyaxa wa yaawo. Echu eri yoothene evyaani nnahuseryaahu Mpiipiliyani, ti yasisapoxa ompwaha ooru! (Sal. 119:127; Mas. 8:10) Mwawiihiiha, mutitelele omwaalakhanya Piipiliya ni waavya ichu ivyaani wi muhuserye ni seiho.—Sal. 1:2.
16. Ti mwawiihai nneeraahu nimutakiherye Yehova ni Yesu?
16 Vaavaa munahuseryaanyu, mwaavye mikhalelo sa opharihela muteko seiho muhusenryaanyu. Ntoko yootakiherya, mutakiherye ekhaikhai ya Yehova, moorweela wa waakhaliha akina moohikhala nthalu. Mutakiherye osivela wa Yesu wa Atiithi awe ni wa akina, mukhalaka ooreheryeya ohooxeya ntakhara nsina na Yehova ni wiiveleela ntakhara anninyu. Nave tho mmutakiherye Yesu moorweela wa ovaha onamoona wa akina, wi awo tho ekhaleno ekari ya weemererya yoovaha yoohithariheya.
17. Tiheeni nnahaalaahu othokororya mmwaha onacharela?
17 Natitelela ohuserya vooloca sa woopola ikwaha soothene nnahaala omusivelaka vancipale Yehova ni Yesu. Wakhala wi ninnaasivela vancipale awo tho anahaala onisivelaka vancipale. (Yoh. 14:21; Tiy. 4:8) Mwawiihiiha, nipharihele soovaha sa Yehova wi ntitelele ohuserya vooloca sa woopola. Mmwaha onacharela, nnahaala othokororya mikhalelo mikina nnaphurahuvo ni woopola, ni mukhalelo wa wooniherya othamalela ntakhara osivela wa Yehova.
NCIPO 107 Yootakiherya ya Muluku ya Osivela
a MASU ATHARIHIWE: “Wuupuwelela” onataphulela otikitherya muupuwelo mmwaha wammoori ni othokororya yoowo mwawiixeela.
b Othukumanyeryiwa wa “ichu wirimu” yoowo olociwe ni Paulo, mu masu yaawo anaphwanyeya mu Aefesu 1:10, ti woohiyana ni othukumanyiwa wa “oothanliwa” yaawo alociwe ni Yesu, ntoko masu yaawo enaphwanyeya mu Mateyu 24:31 ni Marku 13:27. Paulo onaloca sa elukuluku yeeyo Yehova onaathanleiye anamwane awe oomunepani, aathanlaka ni munepa waweela. Yesu onaloca sa elukuluku yeeyo oothanliwa oohalela a veelaponi yavathi anahaalaaya othukumanyiwa wirimu variyari va yoohooxa etokotoko.
