Kiyariwe mu 1954, epooma yo Saint Paul, Minnesota, EUA. Kiyariwe mu emusi yeeyo yaari Akatolika, hinaahanwe nave tho hinaari ooreela, miyaano ka mwaana anaawiili a anamwane athanu a asitiithi aka. Kaahihuserya mahusiheryo avasulu mu esikola yo Katolika nave kaanamukhaviherya namukucho. Mwa yeeyo, kaasuwenle sa vakhaani vooloca sa Piipiliya. Naamwi keemereryaka wi Muluku ookhala nave tho wi mpatuxa a ichu soothene, miyaano nkaaroromela ekerexa moomalela.

Mu eyaakha yoopacerya vaavaa kaahuseryaaka mu esikola yavasulu ya malamulo, mutheli mmoha yoowo aari Namoona a Yehova aahiphiya owannyaka. Woona wi kaahiweiwa ni ocapa, kaamveka mutheli ole wi akooke nihiku nikina, mwa ncicimiho owo aaheemererya. Vaavaa mutheli ole aakoonkeiye miyaano kaahikhalano makoho meeli: “Ntakhara heeni achu aphaama hanakhalano sookhumelela saphaama mookumini?” nave “Tiheeni muchu onaphwaneleiye weera wi akhaleno ohakalala?” Nave yaakinnya liivuru A Verdade Que Conduz à Vida Eterna ni Piipiliya mmoha a Tradução do Novo Mundo das Escrituras Sagradas, aarino ekaapa ya ntikwa ni ooreeraxa. Nave kaaheemererya yoohuserya ya Piipiliya. Eyo chiryene yaakeeriha ohuserya  ichu ivyaani. Kaahakalala osuwela wi Omwene wa Muluku tonahaala omaliha makacamiho oothene a achu. Kaahiiwexexa wi olamulelo wa achu honakhumelela phaama nave wi owo woheeriha elapo osareya makacamiho, ohookololowa ni ipahu.

Mu 1982 kaaveleela okumi aka wa Yehova nave kipatisiwa o Muthukumano wa Muceche waarino muru “A Verdade do Reino,” yoowo weeren’ye o Centro Cívico de Saint Paul. Mu esumana yoocharela, kaahikookela o Centro Cívico wi kapake isaami so esikola ya malamulo. Omapacereryo wa mweeri wa Otupuru, kaahisuwela wi kaahikhumelela phaama, nave wi kaahaala okhala mulipa awaakiha milacu.

Kiri o Muthukumano wa Muceche yoole, kaahimusuwela munna Mike Richardson. Owo aalapa opeteli yo Brooklyn, nave aakileela wi yaahaala opaceriha Departamento Jurídico o Nipuro Ntokweene na Anamoona a Yehova. Vaavaa aalonceiye yeela kaahuupuwela masu a Mutiyope anaphwanyeya mu Saweriwa T’arummwa 8:36 nave kaahikoha: ‘Tiheeni enakihiiha olapa mu ekupweete ya waakiha milacu?’ Voocharela kaarepela epetisau opeteli.

Asitiithi aka hiyaasiveliwe nthowa na okhala Namoona a Yehova. Mwa yeeyo yaahiweeriha atiithi aka okikoha waakhanle wi olapa o Torre de Vigia waahaala okiruuhela mphurelo ntakhara mahuseryo aka ntoko mulipa awaakiha milacu. Kaahaaleeliherya wi kaari awiiveleela nave wi naanaakhela ikhorowa sawaakhwana atoolare 75 mweeri ti mweeri, nenlo naari nikhaviheryo mapetelita yaakhelaaya.

Kimanle waakhwaniherya muteko aka mu nipuro noothoriha, kaapacerya orumeela opeteli yo Brooklyn, Nov York, mu 1984. Nave kaarumeela mu Departamento Jurídico. Mavyakelo kaaphwanyaaka omutekoni waka, yaakirehererya ntakhara ichu seiho saahaala weereya muhoolo.

Empa yo Stanley, enakhala mmuceche wo Jersey City, Nov Jersey, nave yaathummwale mu Novempuru a 1983. Anna yaaveka weemereryiwa wi ereherye makeesi, ipa soorapamo, itumpusi ni ituupu sa maahi. Vaavaa anna yaathukumannaaya ni alamuleli a vanipuroni, awo yaahaatharihela alamuleli wi yaachuna ephariheleke empa yo Stanley wi epakekemo mithukumano sa Anamoona a Yehova. Mwaha owo waahitannya nikacamiho. Mwawiiwanana ni malamulo a mukhalelo wa omaka vapooma, yaaloca wi ipa sa malapelo saaphwanela okhala mmukuma yoowo achu yaakhalaayawo. Nyenya empa yo Stanley yaakhala mukuma wa alipa maroca, veeri va epooma. Nthowa na yeeyo alamuleli hiyaaweemerenrye yooveka ya anna. Anna yaahaaveka alamuleli wi ethokororye wanaawiili mwaha, nyenya alamuleli hiyaatoronke muupuwelo aya.

Mu esumana aka yoopacerya Opeteli, marehereryo yaakeriha mwaha owo mmapuro oothoriha.  Woona wi yaavinrevo elukuluku yavakhaani kimanle waakhela ovyakiha mu iyaakha piili mu nipuro noothoriha o Saint Paul, Minnesota, kaanasuwela phaama miyaha ntoko seiha. Mmoha a alipa a waakiha milacu sahu aahiloca wi empa yo Stanley yaahiphariheliwa ikwaha sincipale wi opakiwemo muthukumano, ophiyerya wi saanooniwamo ixilema vamoha ni alipa awiipa. Vano ntakhara heeni hiyaahaala okhala yoophwanelela opakiwamo mithukumano sa malapelo? Nikhuuru noothoriha naahoona wi nikhuuru na Jersey City naahichekela otaphuwa wahu wa malapelo. Alipa oothoriha yaahilamulela wi achu a epooma yeele elive musokho yoowo waachuneya. Kaapacerya woona wi Yehova aanaareeliha muteko wa Departamento Jurídico wa marehereryo ahu. Kaatepa ohakalala opaka makupa mmuteko yoola!

Anna yaahipacerya muteko wa orehererya empa. Mu 8 a Setempuru a 1985, ehaakumve oviravo eyaakha emoha ovinyerya vaavaa empa yaapacenryaaya orehereryiwa, waari wooweryeya opakiwa esikola ya Kiliyati o Stanley etuuruma 79. Wa miyaano yaari ekari etokweene opaka makupa a othoriha wi kikhaviherye soothowa sa Omwene. Saweereya seiya, soopwaha sookhumelela ikina kaaryaakano kihaakumve orwa Opeteli. Nkaasuwela phaama wi Yehova aahaala okipharihela mu miyaha mikina sa othoriha.

Mu iyaakha sa 1980, yaari yawunlaana matotore ohaacicimiha Anamoona a Yehova awunnuwelavo vaavaa yaavekaaya oloola nihiphariheliwe nikhami. Xaxaxa wa athiyana oorupala, naari nikacamiho ntokweene, nthowa nawi alipa oothoriha yaaloca wi hiwaari woophwanelela athiyana okhooca waakhela nikhami. Awo yaaloca wi hiyaahaala okhala yaphaama ohiya nikwiya nihirino mai nthowa na okhooca oheliwa nikhami.

Mu 29 a Tesempuru a 1988, murokora Denise Nicoleau aahikhalano nikacamiho na ovuuva nikhami amanle oyara. Eyo yaaheeriha wi ayeleele nikhami nawaaca, nave totore aahimveka murokora ole wi amuhele nikhami. Nyenya murokora Denise heemerenrye. Mu nihiku noocharela, matotore yaaheererya ophwanya nlamulo wa alipa oothoriha nenlo naahaala oweemererya omuhela murokora nikhami, ntoko meerelo yaawo yoonaaya okhala oochuneya. Awo yaapaka yoolakelela ehimulenle murokora Denise naari iyawe, mulipa oothoriha aahaalamulela matotore wi emuhele nikhami murokora.

Naneethanu, 30 a Tesempuru, nikhuuru na matotore naahimuhela nikhami murokora Denise. Awo yaapaka yoolakelela yeela naamwi iyawe vamoha ni amusi awe yaahin’ye mookwakwaleya wi hiyaahaala weemererya wi murokora aheliwe nikhami. Mu ohiyu yoole amusi a murokora Denise, vamoha ni atokweene eeli yaawaleliwa mukariposo. Awo yaahootheryiwa wi yaanampaka namvutuka wi murokora Denise ahaakhele nikhami. Wooxixelo mu nihiku nawoorowa, 31 a Tesempuru, ekaripooso yeeyo anna yaawaleliwaayawo, yaanalokohiwa mu miyaha so Nov York ni so Long Island.

 Noomorela muteko wooxixelo, kaahiloca ni Milton Mollen, mutokweene a alipa oothoriha milacu. Kaapacerya omutharihela mwaha, nave kaahiloca wi mulipa oothoriha yoowo aarumme matotore ovaha nikhami haapacenrye okoherya moonelo. Muthoriha Mollen aahikiveka wi kikookele okupweete wawe elukuluku ekina wi nivaanele vooloca sa mwaha ni othokororya malamulo aniiwanana ni mwaha yoowo. Mu ohiyu yoole miyaano vamoha ni mukhaviheryi aka, Philip Brumley, naahiphiya okupweete ya muthoriha Mollen. Muthoriha aahinwopa tho mulipa awaakiha mulacu o exipitali wi nikhale vamoha vaavaa naahaalaahu othokororya mwaha yoole. Mwaha waahipacerya wunnuwa. Mu elukuluku yeele mwaha wunnuwaaya munna Philip aakirepela muchaka wookhuveya waaloca wi: “Opise murima.” Muchaka yoola waaphin’ye mu elukuluku yoophwanelela woona wi, kaahitepa onyeenyeya vaavaa keereryaaka waakhula masu a mulipa a waakiha milacu o exipitali.

Evinrevo ewora emoha, muthoriha Mollen aaloca wi mulacu yoole waahaala okhala woopacerya wa milacu saahaala othokororyiwa nihiku noocharela. Vaavaa naakhummaahu okupweete, muthoriha Mollen aaloca wi: “Mulipa a waakiha milacu a oxipitali ahaala okhalano muteko mutokweene mu nihiku noocharela.” Eyo yaataphulela wi aahaala okhalano muteko olokoha ntakhara heeni aamukhinyerenryeiye murokora wi avahiwe nikhami. Mu elukuluku yeele, kaahoona wi Yehova aanakileela wi naahikhalano owerya wa ovootha mulacu. Yaari yoohakalaliha osuwela wi Yehova aahinipharihela wi aakhwaniherye yookhwela awe.

Naahilapa ophiyerya ohiyu eriyari wi niirehererye ntakhara waakiha mwaha naahaalaahu okhalano mu nihiku noocharela. Woona wi empa ya othoriha yaakhala waacamela Opeteli yo Brooklyn, anna ancipale a nikhuuru na Departamento Jurídico yaahiyawo. Nikhuuru na alipa oothoriha axexe naahiiwa waakiha wahu, nave naapaka yoolakelela ntakhara murokora Denise. Awo yaaloca wi mulipa oothoriha oopacerya, haaphwanela okumiha malamulo analoca sa okhinyereryiwa oheliwa nikhami, nave wi okumiha malamulo ahiiwale moonelo wa akina ni ohaaleeliherya achu yaavoloweliwe, waari ochekela malamulo a elapo.

Mahiku oocharela, nikhuuru ntokotoko na othoriha no Nov York naahipaka yoolakelela ntakhara murokora Denise, woona wi aahikhalano ophwanelela wa ovahiwa oloola nihiphariheliwe nikhami. Ovinre mwaha wa murokora Denise, kaahikhalano ekari ya okhaviherya ovootha miyaha miraru saavolowela  mukhalelo wa opharihela nikhami seiho saathorihiwa mu mapuro matokotoko a othoriha o Nov York. (Moone ekaaxa “ Ovootha Mmapuro Matokotoko a Othoriha.”) Kaakhaviherya tho miyaha mikina ni alipa awaakiha milacu Opeteli seiho saavolowela mukhalelo wa waakhapelela anamwane, omwalana, muhakhu ni mukhalelo wa omaka vapooma.

Vaavaa kaamusuwenlaaka mwaaraka Dawn, owo eera amwalanne ni iyawe. Owo aanaaphuwa anaawe araru, aanalapa nave tho aari piyoneera. Dawn aahihoolela makacamiho mancipale mookumini mwawe, nave miyaano kaatepa otikhiniheya ni yoolakelela awe ya omurumeela Yehova. Mu eyaakha ya 1992, naaya o Muthukumano wa Muceche waarino muru “Portadores de Luz,” nave kaahimveka wi naakamelane. Evinrevo eyaakha emoha naapaka othela. Dawn yoovaha ya Yehova. Ookhalano muupuwelo woomunepani nave toosivelaxa. Kinanwerya oloca wi owo ookeerela saphaama mahiku oothene a ekumi ahu.—Masi. 31:12.

Nimanle opaka othela anamwane a Dawn yaarino iyaakha 11, 13, ni 16. Kaanachuna okhala tiithi aphaama wa yaawo, nave kaahihuserya moopwacha soolaleeryiwa sahu saaloca sa mukhalelo wa waaphuwa anamwane a waaphwanya. Moovira wa iyaakha naahihoolela makacamiho, nyenya kinnakhala oohakalala woona wi anamwane awo yaakoona ntoko nthamwene ororomeleya ni tiithi oosivela. Ilukuluku soothene naanawaakhela phaama asinthamwene a aniihu. Nave naanasiveliwa okhala vamoha ni amiravo yaawo oohakalala!

Mu 2013, miyaano ni Dawn naathaamela o Wisconsin wi naakhapelele asitiithi ahu yaawo yaari awuuluvala. Kaahitikhiniheya osuwela wi kaahaala otitelela orumeela Opeteli. Kaahiwompwa wi kititelele okhaviherya mareheryo ahu mu milacu soohiyanahiyana.

Mu Setempuru a 2018, kaahoona wi kaanatepa okothomola kihaakumve oloca. Totore aka aakivarerya nave haawenrye woona echu yaatannya nikacamiho. Voocharela totore mukina aakileela wi kimwaavye totore ooloola ereca ya mmuupuweloni. Mu Yaneru a 2019, totore ooloola ereca ya mmuupuweloni aakileela wi akhweya kaarino ereca eniichaniwa paralisia supranuclear progressiva (PSP).

Evinrevo mahiku mararu, kaaya ochimaka mpuro yoowo eriwo exeelo nave kaathoowa kihorokonyeya makupa onakumanavo nwono ni ntata, moono woolopwana. Kaanachimaka mahiku oothene a okumi aka nave eyo yaari yookhovelela aka. Mwawiihiiha kaahisuwela wi kaanayelela ikuru saka. Ovinyerya vaavaa ereca aka yaanatepa. Kaahipacerya okhalano makacamiho a owerya oloca, weeca ni omirya echu.

Kinnahakalala nthowa na opharihela mavyakelo ntoko mulipa a waakiha milacu wi kiwerye okhaviherya soothowa sa Omwene. Kinnatepa ohakalala nthowa na okhalano ekari ya orepa irevista vooloca sa muteko aka ni operekha miyaha inaavolowela alipa ooloola a elapo yoothene. Mu elukuluku yeeyo, koowerya waakiha ophwanelela wa achu a Yehova vooloca sa yoolakelela ya othanla oloola nihiphariheliwe nikhami. Mwawiihiiha, kinneemererya masu anaphwanyeya mu Luka 17:10 BNM: ‘Kiri namalapa asiyo; miyo kenre yeyo yakhweleya weriwa.’