Mweeparipari Yehova onachuna wi achu apiili athelanne ekhale oohakalala ni epuhe onthamwene woohimala ni woolipa mukina ni mukhwaawe. (Mat. 19:4-6) Waakhanle wi munnachuna othela, muni mumphwanye hai oothelanano oophwanelela? Woona wi Yehova Mpatuxa ahu, owo oosuwela yeeyo nnaphwanelaahu weera wi nikhaleno othela woohakalala. Mwawiihiiha, wakhala wi munnapharihela malakiheryo yaawo onanivaheiye, munahaala okhalano sookhumelela saphaama. Muthokororye makina a malakiheryo yaawo.

Woopaceryani, nnaphwanela wiiwexexa ela mu okumi ahu: “Murima onnatepa wòtotha opwaha etxhu ekina: honalakeya.” (Yer. 17:9, BNM) Vaavaa achu apiili yaawo anachuna othelana, anasuwelanaaya nave epacerya wuuryana, awo annakhalano miyoonelo soolipa wa mukina ni mukhwaawe. Wakhala wi ela yoheereya, onamukhala woovila wa yaawo opaka soolakelela mwa miruku. Wakhala wi achu athelanne pahiru nthowa na nchuno nenlo aryaayano wa mukina ni mukhwaawe, awo ananwerya okhalano ekeerelani ohoolo waya. (Masi. 28:26) Ti nthowa nene ehiryaaya ya miruku wa achu eeli yaawo anuuryana oleelana miyoonelo sawiiseela seiho aryaayano wa mukina ni mukhwaawe ni opaka soororomeliha ehaakumve osuwelana phaama.

Masiposipo 22:3 oni: “Awiisuumaaliha, oona yawoopiha, onnasepa; nto oolosowa oona, onnapwaherawo iisoonela meekheiye.” Ntakhara heeni eryaaya yawoopiha opharihela isaiti sa ompwana? Moothananiha, ancipale annasuwelana mu isaiti, epacerya wuuryana, nave voocharela yoona wi muchu owo aamwaawoka. Nave tho, achu oohiroromeleya annapharihela sooleeliherya soowoka wi yaawoke akina ni yoolakelela ya owiiyerya ikhorowa. Ilukuluku ikina, achu yaala oohiroromeleya ananwerya oloca wi Anamoona a Yehova.

Muthokororye yawoopiha ekina. Isaiti ikina sa ompwana sinnapharihela meerelo a mu komputatore, yaawo anamooneiha muchu yoowo onapakaweno ompwana. Naamwi hiiha, ela tahi yawooniherya yawi meerelo yaala toophwanelela. Tahi ya miruku ororomela meerelo a komputatore yaawo apakiwe ni achu wi nipake yoolakelela vooloca sa echu yoochuneyaxa ntoko omwaavya oothelanano oophwanelela. Meerelo a mu komputatore herwa ekhala oororomeleya ntoko malakiheryo a Mpiipiliyani.—Masi. 1:7; 3:5-7.

Nlakiheryo nnaphwanyeya mu Masiposipo 14:15 nni: “Muchu oohisuwelano onnaakhulela soothene inalociwa, nto awiisuumaaliha onnavarerya meecelo awe.” Muhaakumve olakelela waakhanle wi muchu mukina onahaala okhala oothelanano oophwanelela,  nyuwaano munaphwanela osuwela phaama omuchu awe. Nyenya ela enanwerya okhala yoovila wakhala wi muneerano eyo moorweela mu isaiti. Naamwi okhanle wi munnavonyerana sooleeliherya mukina ni mukhwaawe, naari omaliha elukuluku yincipale muchekulaka mu interneti, apwanne munanwerya ororomela chiryene wi moomusuwela phaama muchu owo? Akina yaawo yuupuwela wi aamphwanya oosiveliwa aya eeparipari yaatuthuwa vaavaa wookuchulani yoonannaaya ni muchu owo.

Mulipa a masalumu ooloca: “Nkineeca ni yaawo aneera itheru sene naari waataana ni oowoka.” (Sal. 26:4) Achu ancipale anoona wi ti woophwanelela ohela iruku sawootha mu isaiti sa ompwana wi yiisooneihe wi tooreeraxa. Awo ananwerya ovitha mikhalelo saya soonanara nave iho hisiwerya wooniheryeya vaavaa anavonyaaya michaka mu interneti wa akina. Waakhanle wi achu akina anniisooneiha wi Anamoona a Yehova, apwanne chiryene awo Akristu oopatisiwa? Apwanne tawiichwelavo omunepani? Apwanne aakhalano onthamwene waphaama ni Yehova? Apwanne awo annacicimihiwa mmuloko aya? Naari annapaka ichu soohiphwanelela ophiyerya tho okhalano “onthamwene woonanara”? (1 Kor. 15:33; 2 Tim. 2:20, 21) Nave waakhanle wi awo yaathela, apwanne aamwalana mwawiiwanana ni malakiheryo a Mpiipiliyani? Munaphwanela osuwela maakhulo a makoho yaala. Nyenya onanwerya okhala woovila ophwanya maakhulo wakhala wi hamulonce ni Anamoona akina yaawo amusuwenle phaama muchu yoowo. (Masi. 15:22) Nave, mweeparipari, mulapeli oororomeleya a Yehova haahaala wuupuwela othelana ni muchu oohiroromela nave voocharela ‘amakiwe’ ni muchu yoowo.—2 Kor. 6:14, NN; 1 Kor. 7:39.

Woona wi ti yawoopiha opharihela isaiti sa ompwana, aakhalavo meerelo aphaama a omwaavya ni omusuwela phaama muchu yoowo onahaala okhala oothelanano oophwanelela. Muni nwerye hai omphwanya muchu yoowo onahaala okhala oothelanano oophwanelela? Waakhanle wi ninnawerya othukumana vamoha, nnanwerya waasuwela akina moorweela wa mmithukumano sa muloko, sa ekulucu, sa muceche, ni mithukumano mikina.

Waakhanle wi hannawerya othukumana, ntoko variyari va epahu ya Koronaviru, ninnapharihela ikhankoonya wi niphiye mmithukumano sa muloko, mwemmo nnaweryaahu waasuwela Anamoona akina yaawo ari aciye. Nyuwaano munanwerya owiriyana mwaha yoowo anaperekhaaya mmithukumano ni wooniherya nroromelo naya moorweela wa ovaha maakhulo mmithukumano. (1 Tim. 6:11, 12) Munanwerya tho ochekula mukina ni mukhwaawe mmakhuuru anapakiwa imanle mithukumano. Variyari va ochekula yoola ni makhuuru a Anamoona, nyuwo munanwerya woona mukhalelo muchu owo munamuchunaanyu onaakhaliheiye akina. Mmukhalelo yoola, munanwerya woona mikhalelo saphaama owo oreiyeno. (1 Ped. 3:4) Mu elukuluku emohamoha, vaavaa munamusuwelaanyu phaama muchu owo, munanwerya woona waakhanle wi mookhalano soolakelela imohamoha ni waakhanle wi oopiili anyu munamukhalano othela waphaama.

Vaavaa achu yaawo ari aciye anapharihelaaya malakiheryo a Mpiipiliyani wi emwaavye oothelanano, ti yawooneya wi anamukhalano othela woohakalaliha hiiha ntoko Masiposipo olonceiye: “Onamuthela muthiyana aphaama [naari mulopwana aphaama] òphwanya muhakhu; Apwiya t’amukhavihenrye.”—Masi. 18:22, BNN.