1. Ntakhara heeni Yehova hananilikanyiha ni akina?

YEHOVA hanachuna wi ichu soothene ni achu oothene ekhale oolikana. Ninnasuwela yeela woona wi owo oopaka mikhalelo soohiyanahiyana sa miri, axinama ophiyerya tho achu. Haavo muchu onalikana ni nyuwo. Yehova hanoolikanyihaani ni akina. Owo onaalikhela murima anyu ni omuchu anyu wa mpuwa. (1 Sam. 16:7) Owo tho onnasuwela echu yeeyo munaweryaanyu weera phaama, yeeyo muhinaweryaanyu weera ni mukhalelo mphwiwalaanyu. Nave owo hanaweherya wi mpakeke sincipale opwaha seiho munaweryaanyu opaka. Nnaphwanela wiisoonaka mmukhalelo Yehova onanooneiye. Neerano hiihaa nnahaala okhalano “miruku,” nihiisuupuwelelaka vancipale naari vakhaani.—Aro. 12:3.

2. Ntakhara heeni tahi yaphaama wiilikanyiha ni akina?

² Mweeparipari, nnanwerya ohuserya orweela wa sootakiherya saphaama sa akina. Ntoko yootakiherya, akhweya noomusuwela munna naari murokora yoowo onakhumelela phaama mmuteko woolaleerya. (Ahe. 13:7) Nnanwerya ohuserya ni yaawo mukhalelo nneeraahu naaceererye mavyakelo ahu mmuteko woolaleerya. (Fil. 3:17) Nyenya wookhalavo ohiyana variyari va ochariha yootakiherya yaphaama ya muchu ni opharihela eyo wi niilikanyihe ni yoowo. Wakhala wi ninniilikanyiha ni akina, nnanwerya okhala a nrima, ooceecheya, naari wiisoona ohikhala echweenevo. Nyenya wakhala wi ninneererya wiisoona okhala aphaama waapwaha anna ni arokora ahu, eyo enanwerya onanariha onthamwene ahu ni Yehova, hiihaa ntoko nihusenryaahu mmwaha ovirale. Yehova moosivela onnanlopola: “Muchu ni muchu avareryeke mwaneene miteko sawe, vaavanto, wiithamalela wawe onii okhale wa muteko awe ohiya wa mukina.”—Gal. 6:4.

3. Matorokelo taani mpankaanyu yaawo anooruuhelaani ohakalala?

³ Yehova onachuna wi muhakalaleke ni ichu seiho munaweryaanyu  opaka wi mmulapele yoowo. Ntoko yootakiherya, vaavaa mwaapatisiwaanyu, mwaahakalala woona wi mwaahaakhwaniherya yoolakelela yeela! Yoolakelela ela mwaapanke mukhatiinyu. Mweenreno yeela nthowa na omusivela wanyu Muluku. Muupuwele ichu soothene munapakaanyu ovinyerya vaavaa mwaapatisiwaanyu. Ntoko yootakiherya, omwaalakhanya wanyu Piipiliya ni yoohuserya ya muchu mukhateiye sinnaaceereryeya? Apwanne mavekelo anyu tookhumela vathi va murima? (Sal. 141:2) Apwanne munnapaceryiha phaama vaavaa munalaleeryaanyu nave munnapharihela phaama ikaruma sahu ntakhara muteko woolaleerya? Nave waakhanle wi mookhalano echoko, apwanne Yehova ohookhaviheryaani okhala mulopwana aphaama, muthiyana aphaama, naari tiithi aphaama? Munanwerya ohakalala vancipale nthowa na matorokelo oothene yaawo mpankaanyu.

4. Tiheeni nneeraahu nthokororye mmwaha yoola?

⁴ Nnanwerya waakhaviherya akina okhala oohakalala wa yeeyo anaweryaaya weera wi yaaceererye omulapela waya Yehova. Nnanwerya tho waakhaviherya awo ohiilikanyihaka ni akina. Mmwaha yoola, nnahaala woona mukhalelo asitiithi eneeraaya yaakhaviherye anamwane aya, mukhalelo atheli aneeraaya ekhaviheryane mukina ni mukhwaawe, nave mukhalelo atokweene ni akina mmulokoni aneeraaya yaakhaviherye anna ni arokora aya. Wookuchula, nnahaala othokororya malakiheryo makina a Mpiipiliyani yaawo eni enikhaviherye otikitherya soolakelela mwawiiwanana ni mavyakelo ahu ni mikhalelo sahu.

5. Mwawiiwanana ni Éfeso 6:4, tiheeni asitiithi anaphwanelaaya osepa?

⁵ Asitiithi enaphwanela okhalano ekaasoope wi ehimulikanyiheke mwaana ni mwaana mukina naari omveka opaka sincipale opwaha seiho owo onaweryeiye opaka. Wakhala wi asitiithi anneerano yeela awo anahaala omuceecheiha mwanaya. (Mwaalakhanye Éfeso 6:4.) Murokora oniichaniwa Sachiko * ooloca: “Ahusiha aka yaachuna wi kipakeke phaama waapwaha anaxikola akina. Mwawaaceererya, amamaaka yaachuna wi kipakeke phaama oxikola wi muhusiha aka ni atiithaaka yaawo yahaari Namoona a Yehova, yuupuweleke wi achu a Yehova taphaama. Awo yaachuna wi kikhumeleleke phaama mu iporova saka, nyenya eyo yaari yoohiweryeya. Sooviravo iyaakha sincipale kimanle okwaasa exikola, nyenya ilukuluku ikina kinnakhwa minikwa waakhanle wi Yehova onnahakalala ni miyaano, naamwi kipakaka owetha waka.”

6. Tiheeni asitiithi anahuseryaaya orweela mu Salumu 131:1, 2?

 ⁶ Nihusiheryo noochuneyaxa wa asitiithi nnaphwanyeya mu Salumu 131:1, 2, BNM. (Mwaalakhanye.) Mwene Tavite aaloca wi owo ‘haasya itxhu itokotoko’ naari weera ichu seiho saari soovila wa yoowo. Wiiyeviha wawe ‘waanammaaliha ni omukurumusha.’ Tiheeni asitiithi anaweryaaya ohuserya orweela wa Masu a Tavite? Asitiithi anaphwanela okhala awiiyeviha, hiihaa ntoko awo ahinaweheryaaya wi epakeke ichu sincipale, hanaphwanela tho oweheryaka sincipale wa anaaya. Asitiithi anaphwanela waakhaviherya anamwane aya wiisoona okhala oochuneya moorweela wa waaleela yeeyo anaweryaaya opaka phaama, ni yeeyo ahinaweryaaya opaka ni waakhaviherya otikitherya soolakelela seiho anahaalaaya owerya okhwaaniherya. Murokora awiichaniwa Marina onnuupuwela: “Amama aka hiyintonko okilikanyiha ni asinnaka araru naari ni anamwane akina. Awo yaakihusiha wi muchu ti muchu okhalano mavyakelo ohiyana nave mmoha ti mmoha a hiyo toochuneyaxa wa Yehova. Kinnaathamalela yaawo, woona wi nkiniilikanyiha ni akina.”

7-8. Ti mwawihai mulopwana othenle onooniheryeiye ncicimiho wa mwaariye?

⁷ Mulopwana Eekristu othenle onaphwanela omooniheryaka ncicimiho mwaariye. (1 Ped. 3:7) Ocicimiha onataphulela wooniherya opwacha weeparipari wa akina. Ntoko yootakiherya, mulopwana othenle onnamooniherya ncicimiho mwaariye moorweela wa omukhaliha owo ntoko muchu ochuneya. Owo hanaweherya sincipale wa yoowo opwaha seiho owo onaweryeiye opaka. Nave owo chiryene hanamulikanyiha ni athiyana akina. Ti mwawiihai muthiyana oniisooneiye wakhala wi aiyawe anneerano yeela? Murokora mmoha awiichaniwa Rosa yoowo aiyawe ehiri Namoona a Yehova, yaanamulikanyiha ni athiyana akina. Masu aya oopwaalu yaanamweeriha murokora Rosa ohiya pahiru wiisoona okhala ohiphwanelela nyenya tho aanakhwa minikwa waakhanle wi muchu ori oothene aanamusivela yoowo. Owo ooloca, “Kinaphwanela wuupuwelelaka ilukuluku soothene wi Yehova onnakoona okhala muchu oochuneya.” Moohiyana, mulopwana Eekristu othenle ookhalano murici wa waacicimiha amwaariye. Owo onnasuwela wi yeeyo owo oneereiye ennavolowela onthamwene awe ni mwaariye vamoha ni Yehova. *

⁸ Mulopwana onamucicimiha mwaariye onnamuhakalaliha yoowo, onnamooniherya osivela wawe, nave onnamuthamalela yoowo. (Masi. 31:28) Ela ti yeeyo aiyawe Katerina, yoowo oromoliwe mmwaha ovirale, eneeraaya. Awo annamukhaviherya vaavaa owo oniisooneiye ohikhala echweenevo waapwaha akina. Vaavaa Katerina aareiye mwaana, amama awe yaanamwaakaaha yoowo, nave yaanamulikanyiha ni asimwali akina, ophitaanyerya asinamma awe. Mwawiihiiha Katerina aapacerya wiilikanyiha ni akina nave aatitelela weerano yeeyo naamwi amanle okhala Namoona a Yehova. Nyenya aiyawe yaahimukhaviherya owo ohiya weerano yeeyo ni wiisupuwelelaka mmukhalelo woophwanelela. Owo ooloca: “Awo annakisivela, annakithamalela wa ichu saphaama kineeraka, nave annavekela ni miyaano. Awo tho annakuupuserya mikhalelo sootikhiniha sa Yehova nave annakikhaviherya wookolola moonelo aka wooheseya.”

9-10. Ti mwawiihai atokweene oosivela yaamukhavihenryaaya murokora ovootha moonelo wa wiilikanyiha ni akina?

⁹ Ti mwawihai atokweene a mmulokoni eneereya yaakhaviherye yaale arino moonelo wa wiilikanyiha ni akina? Muthokororye yaweereya ya murokora awiichaniwa Hanuni, yoowo ahaathamaleliwa vaavaa aareiye mwaana. Owo onnuupuwela:  “Kaanuuliheya muru nave koona wi anamwane akina ti yaari aphaama okipwaha miyaano. Kaapacerya wiilikanyiha ni akina ovinyerya kiri mwaana.” Naamwi amanle ohuserya eparipari, Hanuni nivano aatitelela wiilikanyiha ni akina. Mwawiihiiha, owo iisoona wi yeeyo aaweryeiye weera mmulokoni hiyaari yoochuneyaxa. Vano, owo onarumeela ntoko piyoneera oohakalala. Tiheeni yaamukhavihenrye otoroka moonelo awe?

¹⁰ Hanuni olonce wi owo okhaviheryiwe ni atokweene a mmulokoni oosivela. Awo yaanaloca wi owo aari ochuneyaxa mmulokoni nave yaanamuthamalela wa yootakiherya awe yaphaama. Owo oorepa: “Ilukuluku ikina atokweene a mmulokoni yaakiveka wi kaalipiheke arokora akina yaawo yaachuna nikhaviheryo. Murici yoola waakeriha wiisoona okhala oochuneyaxa. Kinnuupuwela vaavaa atokweene oosivela yaakithamalelaaya nthowa na nlipiho nenlo kaavahaaka arokora yaawo ari asimwali. Awo yaahimwaalakhanya 1 Tesalónika 1:2, 3 wa miyaano. Eyo yaatannya murima aka! Nthowa na akukhuli yaala osivela, vano kinnasuwela wi kinnaphariheleya mmulokoni.”

11. Nni naakhaviherye hai “ohosiwa ni òyevihiwa” ntoko etharihiwaaya mu Isaiya 57:15?

¹¹ Mwaalakhanye Isaiya 57:15, BNM. Yehova onnaapwacha “ohosiwa ni òyevihiwa” mwawiiseela. Oothene ahu ohiya pahiru atokweene, nnanwerya waalipiha anna yaala ni arokora oosiveliwa. Mukhalelo mmoha wa waalipiha yaawo ori moorweela wa owooniherya opwacha weeparipari. Yehova onachuna wi niwooniheryeke yaawo mukhalelo owo onaasiveleiye. (Masi. 19:17) Nnanwerya waakhaviherya anna ni arokora ahu moorweela wa okhala awiiyeviha ohiya okhala awiirumiha wa nthowa na mavyakelo ahu. Hannachuna wiiruuhela ncicimiho mukhatiihu wi akina enikhaleleke nrima. Ohiya yeeyo ninnapharihela mavyakelo ahu ni masuwelelo ahu wi nlipihane mukina ni mukhwaawe.—1 Ped. 4:10, 11.

12. Ntakhara heeni achu oohaawa yaanasiveliwa ni Yesu? (Moone eruku va ekaapa.)

¹² Nnanwerya ohuserya sincipale vooloca sa mukhalelo wa waakhaliha akina moorweela wa othokororya mukhalelo Yesu aakhaliheiye oomuchara awe. Owo aari mulopwana mutokweene aakhanle. Naamwi hiiha, owo aari “ooreera murima ni awiiyeviha.” (Mat. 11:28-30) Owo hantonko wiirumiha nthowa na miruku aareiyeno naari ichu seiyo aasuwenleiye. Owo aanapharihela masu ookhweya ni maphwanaphwaniho yaawo yaatannya mirima sa achu yooniwa okhala oohaawa. (Luka 10:21) Moohiyana ni ahooleli a malapelo awiirumiha, Yesu hantonko oweeriha akina wiisoona ohikhala echweenevo vamiithoni va Muluku. (Yoh. 6:37) Ohiya yeeyo, owo aanaacicimiha achu vyakala.

13. Ti mwawiihai oreera murima ni osivela wa Yesu wooniheryen’yaaya mmukhalelo aakhaliheiye oohuserya awe?

¹³ Oreera murima ni osivela wa Yesu waahooniheryeya mmukhalelo owo aasiveleiye oohuserya awe. Owo aanasuwela wi awo yaakhalano mavyakelo ni mikhalelo soohiyana. Mwawiihiiha, awo hiyaapaka ichu imohamoha; nave hiyaarino sookhumelela imohamoha mmuteko woolaleerya. Owo aanathamalela yeeyo mmoha ti mmoha aapakeiye. Yesu aahooniherya yeela vaavaa aalonceiye niphwanaphwaniho na italento. Mu niphwanaphwaniho nenla pwiya aahimvaha kapuro ti kapuro muteko “ntoko muchu ni muchu owerya wawe.” Mmoha wa akapuro awe apiili yiilipisenrye aahiphwanya sincipale ompwaha mukina. Nyenya pwiya aahaathamalela ooweeli ni masu ala: “Phaama sene! Wa namuteko aphaama.”—Mat. 25:14-23.

14. Nni nimutakiherye hai Yesu mmukhalelo onaakhaliheiye akina?

¹⁴ Oreera murima ni osivela wa Yesu onnooniheryeya mmukhalelo onanikhaliheiye. Owo oosuwela wi mavyakelo ni mikhalelo sahu ti soohiyana, nave owo onnahakalala ni yeeyo nnaweryaahu opaka. Nnaphwanela omutakiherya Yesu.  Nihirweru nimweerihe munna naari murokora wiisoona ohikhala echweenevo naari omuuliha muru nthowa nawi hanawerya opaka sincipale waapwaha akina. Moohiyana hankooni nipake owetha wahu wi naathamalele anna ni arokora ahu wa yeeyo anaweryaaya opaka wi emurumeele Yehova.

15-16. Ti mwawiihai murokora mmoha ophunreiye orweela wa otikitherya soolakelela?

¹⁵ Vaavaa nnakhalaahuno soolakelela mmuteko wa Yehova okumi ahu onnakhalano yootaphulela. Nyenya nnaphwanela otikitherya soolakelela seiyo nnahaalaahu owerya waakhwaniherya. Hannaphwanela otikitherya soolakelela soolikana ni sa achu akina. Wakhala wi noheerano yeela nnanwerya okhala ooceecheya. (Luka 14:28) Muthokororye yootakiherya ya murokora yoowo ori piyoneera oniichaniwa Midori.

¹⁶ Atiithi awe Midori, yaawo ahiri Namoona, yaanamuuliha muru vaavaa aareiye mwaana moorweela wa omulikanyiha ni asimwali akina ni anasikola akhweiye. Midori ooloca, “Kaaniisoona ohikhala echweenevo.” Nyenya vaavaa innunweiye owo aahipacerya wiisoona mmukhalelo woophwanelela. Owo ooloca, “Kinnamwaalakhanya Piipiliya mahiku oothene nthowa nawi onnakikhaviherya okhalano murecele mmuupuweloni ni woona wi Yehova onnakisivela.” Mwawaaceererya, owo aatikitherya soolakelela, nave aanavekela wa Yehova wi amukhaviherye okhwaaniherya seiyo. Ntoko yookhumelela, eyo ennamukhaviherya Midori okhala oohakalala wa seiyo onaweryeiye opaka ntakhara Yehova.

17. Tiheeni enahaala onikhaviherya otoroka muupuwelo ahu, nave teevi enahaala okhala yookhumelela?

¹⁷ Ennaviravo elukuluku yincipale wi ntoroke mukhalelo nniisoonaahu. Mwawiihiiha Yehova onnanlopola: “Mutatushiwe mmuupuwelo ahihano mwa Munepa.” (Éfe. 4:23, 24) Wi neereno yeela, nnaphwanela ovekela, ohuserya Masu a  Muluku ni wuupuwelela. Mwawiihiiha mutitelele weerano ichu seiha, nave mumveke Yehova wi oolipiheeni. Munepa awe waweela onamookhaviheryaani ovootha moonelo wa wiilikanyiha ni akina. Yehova onamookhaviheryaani tho woona waakhanle wi moopacerya okhala a nrima naari awiirumiha, nave owo onamookhaviheryaani opaka matorokelo mwawaakuveya.

18. Ti mwawiihai masu anaphwanyeya mu 2 Matharihelo 6:29, 30, anoolipihaayaani?

¹⁸ Mwaalakhanye 2 Matharihelo 6:29, 30. Yehova oosuwela murima anyu. Owotho oosuwela wi ninnawaniha ni ovolowela woonanara wa elapo yeela ni soohesa sahu. Vaavaa Yehova onooneiye mukhalelo nniilipiseryaahu owaniha ni ichu seiya, owo onnanisivela vancipale.

19. Ti mwawiihai Yehova onaphwanaphwaniheiye mukhalelo owo onooneiye vooloca sa hiyo?

¹⁹ Wi aphwanaphwanihe mukhalelo onooneiye vooloca sa hiyo, Yehova aahipharihela osivela onakhalavo variyari va mai ni mwanawe. (Isa. 49:15) Muthokororye yootakiherya ya mai oniichaniwa Rachel. Owo ooloca: “Mwanaka Stephanie aayariwe ahaakhwanenle miyeeri. Vaavaa kaamonnaaka woopaceryani, owo aatepa oyeva nave haarino ikuru. Totore aakileela wi kimphareleke mahiku oothene vaavaa owo aareiye oxipitale variyari va mweeri woopacerya wa okumi awe. Variyari va elukuluku yeele miyaano ni mwanaka naahitepa okhovelelana. Owo vano orino iyaakha thanu nammoha nave mukhaani waapwaha anamwane akina a iyaakha sawe. Naamwi hiihaa, kinnamusivela vancipale nthowa nawi oowaniha wi owo akhale, nave owo onnakihakalaliha vancipale mookumini mwaka!” Ennanihakalaliha osuwela wi Yehova onnanisivela vancipale vaavaa owo onanooneiye niilipiseryaka wi nipake owetha wahu ntakhara yoowo!

20. Ntoko mulapeli awiiveleela a Yehova, mathowa taani anaweerihaani ohakalala?

²⁰ Woona wi mwa mulapeli a Yehova, nyuwaano mwa muchu oochuneyasa mu emusi ya Yehova nave haavo onlikana ni nyuwo. Yehova hookerinheeni wa yene nthowa nawi mwa muchu oochuneya waapwaha akina. Owo aahookerihaani wa yene nthowa nawi aavarerya mmurimani mwanyu, oona wi mwa muchu awiiyeviha nave munnachuna ohuserya orweela wa yoowo ni opaka matorokelo. (Sal. 25:9) Muroromele wi owo onnathamalela vaavaa nyuwaano munapakaanyu owetha wanyu wi mmurumeele yoowo. Ovilela wanyu ni ororomeleya wanyu yaawooniherya yawi mookhalano “murima waphaama.” (Luka 8:15) Mutitelele omvaha Yehova owetha wanyu. Mweerano yeela munahaala okhalano mathowa aphaama a ‘wiicicimiha mukhatiinyu.’