1. Tiheeni Yehova opankeiye wa nyuwo?

MWAAKHANLE hai Namoona a Yehova? Woopaceryani, nyuwaano mwaahiiwa “michaka yaphaama”—akhweya moorweela wa asitiithi anyu, nthamwene anyu o mutekoni, nthamwene anyu ooxikola naari mmuteko wa olaleerya empa ni empa. (Mar. 13:10) Voocharela, muchu mukina aaniilipixerya ni omaliha elukuluku eecihaka yoohuserya ya Piipiliya ni nyuwaano. Variyari va yoohuserya yeela, nyuwaano mwaapacerya omusivela Yehova nave mwaahihuserya wi owo onnoosivelaani. Yehova aahookerihaani mu eparipari, nave vano, ntoko oohuserya a Yesu Kristu, nyuwaano mookhalano ewehereryo ya okhala wookhala. (Yoh. 6:44) Moohikhwa minikwa munnamuthamalela Yehova woona wi aamuceenyerya muchu woohusihani eparipari nave Owo aaweemereryaani okhala mmoha a alapeli Awe.

2. Tiheeni nnahaalaahu othokororya mmwaha yoola?

² Vano vaavaa nsuwenlaahu eparipari, nookhalano ekari ya waakhaviherya akina weeca vamoha ni hiyaano mu ephiro enakeriha wookumini. Nnanwerya okhala ootaphuwa olaleerya empa ni empa, nyenya nnamukhala nikacamiho wa hiyo opaceryiha ni weeciha soohuserya sa Piipiliya. Apwanne munoona hiihaa? Waakhanle wi ti hiihaa, akhweya mwaha yoola onahaala wookhaviheryaani ophwanya sooleeliherya ikina. Nnahaala othokororya yeeyo enanceenyerya ni onikhaviherya wi naapake oohuserya. Nnahaala tho othokororya mukhalelo nneeraahu nivoothe makacamiho yaawo ananeeriha woovelela weeciha soohuserya sa Piipiliya. Woopaceryani, hankooni nthokororye ntakhara heeni hinnaphwanela okhala pahiru alaleeryi nyenya tho ahusiha a michaka yaphaama.

3. Ntakhara heeni ninnalaleerya?

³ Vaavaa Yesu aareiye veelaponi yavathi, aahaavaha oomuchara awe miteko miili soochuneya. Yoopacerya, owo ahaaleela olaleerya  michaka yaphaama ya Omwene, nave aahiwooniherya mukhalelo wa weerano. (Mat. 10:7; Luka 8:1) Ntoko yootakiherya, Yesu aahaaleela oohuserya awe echu yaaphwanelaaya weera wakhala wi achu aheemererya michaka ya Omwene ni yeeyo yaaphwanelaaya weera wakhala wi hiyeemerenrye. (Luka 9:2-5) Owo tho aathariha wi oomuchara awe yaahaala olaleerya wa achu ancipale ni mapuro mancipale vaavaa owo aalonceiye ariki: “Iweerele onamoona maloko oothene.” (Mat. 24:14; Saw. 1:8) Moohipwacha mukhalelo achu yaahaalaaya waakhulela muteko woolaleerya, Yesu aahaalamulela oohuserya oya waaleela achu sa Omwene wa Muluku ni yeeyo onahaalaaya waakhwaniherya.

4. Mwawiiwanana ni Mateu 28:18-20, echu taani ekina nnaphwanelaahu weera ohiya pahiru olaleerya vooloca sa Omwene?

⁴ Echu taani yanaawiili Yesu aalamulenleiye oohuserya awe opaka? Owo aahaaleela oomuchara awe wi yaahusiheke achu wiiwelelaka ichu soothene owo aalamulenleiye. Achu akina ananwerya oloca wi Yesu aalamulenle olaleerya ni ohusiha pahiru Akristu a nsana noopacerya. Apwanne ela eparipari? Hooye, Yesu aahooniherya wi muteko yoola woochuneya waahaala otitelela ophiyerya mmahiku ahu, “ophiyerya makuchuwelo a ilukuluku.” (Mwaalakhanye Mateu 28:18-20.) Mwawooneya Yesu aavanhe nlamulo nenla vaavaa oonen’yeiye wa oohuserya awe opwaha 500. (1 Kor. 15:6) Nave mu wuupulula yoowo aamooninheiye Yohani, Yesu aahooniherya mookwakwaleya wi onachuna wi oomuchara awe yaakhaviheryeke akina ohuserya vooloca sa Yehova.—Wup. 22:17.

5. Mwawiiwanana ni 1 Korinto 3:6-9, ti mwawiihai Paulo aalikanyinheiye wiiwanana orivovo variyari va muteko woolaleerya ni ohusiha?

⁵ Murummwa Paulo aalikanyiha muteko wa waapaka oohuserya ni olima, ooniheryaka wi nnaphwanela opaka sincipale ohiya pahiru waala mmiso. Owo aahiwuupuxerya Akristu o Korinto: “Miyo kìhala, Apolo òhela mahi . . . nave nyuwo muri ematxa ya Muluku.” (Mwaalakhanye 1 Korinto 3:6-9, BNM.) Ntoko anamalapa a mu “ematxa ya Muluku,” hinnaphwanela pahiru waala mmiso nyenya tho ohela maahi ni woonaka moohihiyererya mukhalelo mmiso owo onannuwaaya. (Yoh. 4:35) Nyenya ninnasuwela wi Muluku toneeriha mmiso owo winnuwa, eyo tiwi, owo tonaaruuha achu wa yene.

6. Muteko ahu wa ohusiha onavolowela eheeni?

⁶ Hiyaano nnawaavya yaawo “yaalakhanyeryiwe waakhela okumi woohimala.” (Saw. 13:48) Wi naakhaviherye achu yaala okhala oohuserya, nnaphwanela waakhaviherya awo (1) wiiwexexa, (2) weemererya, ni (3) opharihela ichu soothene seiho awo anahuseryaaya orweela Mpiipiliyani. (Yoh. 17:3; Kol. 2:6, 7; 1 Tes. 2:13) Oothene mmulokoni ananwerya waakhaviherya oohuserya a Piipiliya moorweela wa otikitherya yootakiherya mu owooniherya osivela avyaani ni oweeriha wiisoona wi ahaakheliwa phaama vaavaa anaphiyaaya mmithukumano. (Yoh. 13:35) Muchu yoowo oneeciha yoohuserya ya Piipiliya onaphwanela tho omalihaka elukuluku yincipale ni ikuru sawe wi amukhaviherye oohuserya otoroka soororomela naari saweera “soolipihiwa.” (2 Kor. 10:4, 5) Inanwerya oviravo miyeeri mincipale wi nimukhaviherye muchu opaka matorokelo mookumi awe wi aphwanelele opatisiwa. Nyenya opaka matorokelo yaala ti wamphurelo.

7. Tiheeni enanceenyerya wiivaha mmuteko woolaleerya ni waapaka oohuserya?

⁷ Ntakhara heeni ninnalaleerya wa achu ni waahusiha yaawo wi ekhale oohuserya? Yoopacerya, nthowa nawi ninnamusivela Yehova. Vaavaa munapakaanyu owetha wanyu wi mwiiwelele nlamulo na olaleerya ni waapaka oohuserya, nyuwaano munooniherya omusivela wanyu Muluku. (1 Yoh. 5:3) Muupuwele ela: Omusivela wanyu Yehova onnooceenyeryaani olaleerya empa ni empa. Apwanne ti wookhweya wiiwelela nlamulo nenla? Mwawooneya hooye. Vaavaa nyuwaano mwaapacenryaanyu  olaleerya empa yoopacerya, apwanne mwaakhala awuukhuwa? Moohikhwa minikwa mwaahoova! Nyenya nyuwaano mwaasuwela wi ola muteko yoowo Yesu onachuneiye wi mweereke, nave mwaahiiwelela nlamulo nenla. Nave moovira wa elukuluku, waanakhala wookhweya wa nyuwo omaliha elukuluku yincipale mmuteko woolaleerya. Vano munoona hai vooloca sa weeciha soohuserya sa Piipiliya? Apwanne munnuukhuwa mwaawuupuwelaka sa yeela? Akhweya. Nyenya, wakhala wi momveka Yehova wi ookhaviheryeeni ovootha woova wanyu ni okhala oolipa murima wi mpaceryihe yoohuserya ya Piipiliya, Yehova onamookhaviheryaani ni olipiha nchuno nanyu na waapaka oohuserya.

8. Mwawiiwanana ni Marko 6:34, echu taani ekina ennanceenyerya waahusiha akina?

⁸ Yanaawiili, waasivela amwaacamani ahu onnanceenyerya waahusiha awo eparipari. Mu ekwaha emoha, Yesu ni oohuserya awe emanle olaleerya yaahikoma. Awo yaanachuna nipuro wi yiichuuwevo, nyenya muloko wa achu waahaaphwanya yaawo. Aceenyeryiwaka nniphwanya, Yesu aapacerya waahusiha achu “itxhu sintxipale.” (Mwaalakhanye Marko 6:34, BNM.) Owo aahilapa mwakuru naamwi aakomme. Ntakhara heeni? Yesu aahiihela mu nipuro na muloko yoole wa achu. Owo ahoona mukhalelo achu awo yaahooxeyaaya—mukhalelo yaachunaaya ewehereryo—nave owo aanachuna waakhaviherya. Achu olelo tho ari mmukhalelo mmohamoha. Olelo tho achu aakhalano makacamiho nave annachuna ewehereryo, naamwi ekhalaka ntoko wi awo annahakalala nave annaakhwaneliwa wa seiho aryaayano mookumini. Awo ari ntoko ipuchepuche soorimeela, nave sihirino mukukhula wi aahooleleke. Murummwa Paulo aathariha wi achu ntoko yaala ari ociiwene ni Muluku nave hiyaano ewehereryo. (Éfe. 2:12) Awo ari mu ‘mphiro mutokweene onakeriha wootoloxiwani’! (Mat. 7:13) Vaavaa nnuupuwelaahu mukhalelo achu a ekulucu ahu anachunaaya osuwela vooloca sa Muluku, osivela ni omoriwa ikharari onnanceenyerya waakhaviherya yaawo. Nave mukhalelo waphaama wa waakhaviherya yaawo ori moorweela wa opaceryiha yoohuserya ya Piipiliya ni yaawo.

9. Mwawiiwanana ni Filipi 2:13, Yehova oni ookhaviheryeeni hai?

⁹ Akhweya munnoovelela opaceryiha yoohuserya ya Piipiliya nthowa nawi moosuwela wi munahaala omalihaka elukuluku yincipale murehereryaka ni weeciha yoohuserya yeela. Waakhanle wi ti hiihaa, mmuleele Yehova mukhalelo muniisoonaanyu. Mumveke owo wi ookhaviheryeeni okhalano nchuno na omphwanya muchu yoowo munahaalaanyu omuhuseryakano Piipiliya. (Mwaalakhanye Filipi 2:13.) Murummwa Yohani oonileela wi Muluku onahaala waakhula mavekelo yaawo aniiwanana ni yoochuna Awe. (1 Yoh. 5:14, 15) Mwawiihiiha munaphwanela ororomela wi Yehova onahaala wookhaviheryaani wunnuwiha nchuno na waapaka oohuserya.

10-11. Ntakhara heeni nnanwerya woovelela weeciha yoohuserya ya Piipiliya?

¹⁰ Noosuwela wi muteko wa ohusiha ti woochuneyaxa, nyenya onanwerya okhala woovila wa hiyo opaka sincipale ntoko naachunelaahu mmuteko wa waapaka oohuserya. Vano hankooni nthokororye makina a makacamiho yaawo ni mukhalelo nneeraahu niwerye ovootha.

¹¹ Nnanwerya wiisoona okhala ookotakota nthowa na mikhalelo sahu. Ntoko yootakiherya, alaleeryi akina tawunnuwelavo naari hiyaano okumi waphaama. Apwanne nyuwaano muri mmukhalelo yoola? Waakhanle wi ti hiiha, muthokororye nimoha na mahusiheryo yaawo nihusenryaahu orweela wa epahu ya Koronaviru. Noohuserya wi nnanwerya weeciha soohuserya sa Piipiliya nimpharihelaka telefoni ahu naari ikhankoonya ikina! Mwawiihiiha nyuwaano munanwerya opaceryiha ni weeciha yoohuserya muri owaani, wakhala woophwanelela. Nave tho wookhalavo mukhalelo mukina. Achu akina annachuna omuhuserya Piipiliya, nyenya anakhala ooweiwa mu  elukuluku yeeyo anna analaleeryaaya. Akhweya, ananwerya okhala ooreheryeya wooxiixelo naari ohiyu. Apwanne munanwerya omuhuseryaka Piipiliya ni muchu ntoko yoowo mu ilukuluku seiha? Yesu aahichekula ni Nikotemu ohiyu, mu elukuluku yeeyo yaari yoophwanelela wa yoowo.—Yoh. 3:1, 2.

12. Ichu taani sinanlekecha wi nnanwerya okhala ahusiha aphaama?

¹² Nnanwerya wiisoona wi hinaanono mavyakelo a weeciha yoohuserya ya Piipiliya. Akhweya nnanwerya wuupuwela wi nnaphwanela okhalano masuwelelo awaakhwanela naari okhala muhusiha aphaama nihaakumve opacerya ohuserya ni muchu. Waakhanle wi muniisoona hiiha, muthokororye ichu raru sinahaala wookhaviheryaani olekecheya wi nyuwaano munanwerya weeciha yoohuserya ni muchu. Yoopacerya, Yehova onnawoonaani okhala oophwanelela wi mwaahusihe akina. (2 Kor. 3:5) Yanaawiili, Yesu yoowo orino ‘owerya woolamula wirimu ni veelaponi ya vathi,’ ohoorumaani wi mwahusihe. (Mat. 28:18) Nave yaneeraru, muroromele wi akina anamookhaviheryaani. Yesu aanaroromela yeeyo Atiithi awe yaamuhusihaaya ni yaamuleelaaya, nave nyuwo munanwerya weerano. (Yoh. 8:28; 12:49) Mwawaaceererya, munanwerya oomveka muhooleli a nikhuuru nanyu na muteko woolaleerya, piyoneero oophwanelela, naari mulaleeryi a mavyakelo wi ookhaviheryeeni opaceryiha ni weeciha yoohuserya ya Piipiliya. Mukhalelo mmoha muneeraanyu muhuserye okhala muhusiha aphaama ori moorweela wa okhala vamoha ni alaleeryi yaala vaavaa aneecihaaya soohuserya saya sa Piipiliya.

13. Ntakhara heeni ninnaphwanela wiikhoveleliha?

¹³ Onanwerya okhala woovila wa hiyo wiikhoveleliha meerelo mavyaani ni ikaruma ivyaani. Mukhalelo neecihaahu soohuserya sa Piipiliya vano wootorokeya. Yoolaleeryiwa ahu ya omuhuseryano Piipiliya, Mpuhe Okumi Okhala Wookhala!, enachuna wi niirehereryeke ntakhara yoohuserya ni weeciha yoohuserya eyo mmukhalelo woohiyana ni yoowo neerelaahu khalai. Nnaalakhanya iparakrafo vakhaani nyenya ninnavaanela vancipale ni oohuserya. Vaavaa nnahusihaahu, ninnapharihela vancipale ixilema ni ikaruma sa mukhankoonya, ntoko JW Library^®. Waakhanle wi hamusuwenle mukhalelo wa opharihela ikaruma seiha, muloce ni muchu yoowo onahaala woohusihaani opharihela. Hiyaano achu na soopatuxiwa sinasiveliwa saaweeraka ichu mmukhalelo sikhovelenlaaya. Mwawiihiiha honakhala wookhweya wiikhoveleliha weera ichu mmikhalelo mivyaani. Nyenya nnikhaviheryo na Yehova ni na akina, onanwerya okhala wookhweya wa nyuwaano wiikhoveleliha ophiyerya tho osiveliwa ohuserya ni achu. Hiihaa ntoko piyoneero mmoha olonceiye, mukhalelo ola wa ohuserya “ti woopuheya wa ooweeli, muhusiha ni oohuserya.”

14. Tiheeni nnaphwanelaahu wuupuwela wakhala wi nnalapa mu ekulucu yeeyo achu ahineemereryaaya muchaka ahu, nave ti mwawiihai 1 Korinto 3:6, 7 onanlipiheiye?

¹⁴ Akhweya nnakhala mu ekulucu yeeyo ori woovila opaceryiha soohuserya sa Piipiliya. Achu akina hiyaano nchuno wa muchaka ahu naari annanaakaaha. Tiheeni enahaala onikhaviherya otitelela okhalano moonelo woophwanelela mu ekulucu ntoko yeeyo? Muupuwele wi mikhalelo sa achu inanwerya otorokeya mwawaakuveya mu elapo yeela yookacamiha, nave yaale yaakhala wi hiyaano nchuno anampacerya wuupuwela wi annachuna ohoolela wa Muluku. (Mat. 5:3) Akina yaawo yaakhooca soolaleeryiwa sahu khalai ananwerya weemererya yoohuserya ya Piipiliya. Hiyaano tho noosuwela wi Yehova, Mwaneene a soohepha. (Mat. 9:38) Owo onachuna wi ntitelele waala ni ohela maahi, nyenya Owo torino owerya wa winnuwiha. (1 Kor. 3:6, 7) Nave ti yoolipiha wuupuwela wi naamwi niheecihaka yoohuserya ya Piipiliya hiihaano, Yehova onnareeliha wiilipixerya wahu, ohiya sookhumelela! *

15. Ti mwawiihai Yehova onooneiye vaavaa muchu oneemereryeiye yoohuserya ya Piipiliya ni opharihela yeeyo onahusereiye?

¹⁵ Yehova onnasiveliwa aamoonaka muchu eemereryaka eparipari ya Mpiipiliyani nave aalaleeryaka wa akina yeeyo ohusenryeiye. (Masi. 23:15, 16) Yehova onnahakalala vancipale vaavaa onooneiye yeeyo eneereya hiihaano! Ntoko yootakiherya, moohipwacha variyari va epahu ya elapo yoothene, eyaakha ya muteko ya 2020, soheecihiwa soohuserya sa Piipiliya 7.705.765, nave aakhaviheryiwa achu 241.994 oveleela ikumi saya wa Yehova ni opatisiwa. Oohuserya yaala avyaani, anneeciha soohuserya sa Piipiliya nave annaapaka oohuserya ancipale. (Luka 6:40) Moohikhwa minikwa, ninnamuhakalaliha Yehova vaavaa nniivelelaahu mmuteko wa waapaka oohuserya.

16. Yoolakelela taani yaphaama nnaphwanelaahu otikitherya?

¹⁶ Muteko wa waapaka oohuserya ti woovila, nyenya nnikhaviheryo na Yehova nnanwerya opaka makupa mu waahusiha avyaani omusivela Tiithi ahu a wirimu. Apwanne nnanwerya otikitherya yoolakelela ya opaceryiha ni weeciha yoohuserya ya Piipiliya ni muchu yoowo nnahaalaahu omphwanya? Hiyaano nnahaala okhala ootikhiniheya wa yeeyo enahaala weereya wakhala wi noopharihela elukuluku vyakala wi nimveke muchu yoowo nikumannaahuno waakhanle wi aahaala osiveliwa ohuserya ni hiyo. Wakhala wi noheerano yeela Yehova onahaala oreeliha wiilipixerya wahu.

17. Yookhumelela taani nnahaalaahu okhalano wakhala wi noowerya weeciha yoohuserya ya Piipiliya?

¹⁷ Ekari etokweene nryaahuno ya olaleerya ni waahusiha akina eparipari! Muteko ola onnanivaha ohakalala weeparipari. Murummwa Paulo, yoowo aakhavihenrye ancipale o Tesalónika okhala oohuserya, aahooniherya moonelo awe mmukhalelo ola: “Apwiyaahu Yeesu yaarwaaka, taani nnamuwehereryaahu omperekha? Taani anii akhale ohakalala wahu, nari yoochuwela ahu ya ncicimiho? Tahi nyeenyu? Aayi chiri, nyuwo mwa ncicimiho nahu ni ohakalala wahu!” (1 Tes. 2:19, 20; Saw. 17:1-4) Ancipale olelo anniisoona mmukhalelo mmohamoha. Murokora mmoha awiichaniwa Stéphanie, vamoha ni aiyawe, yaawo yaakhavihenrye achu ancipale ophiyerya opatisiwa ooloca, “Hiwaavo ohakalala otokweene onapwaha waakhaviherya achu wiiveleela wa Yehova.”