1. Ntakhara heeni ti yamiruku wiirehererya ntakhara epahu?

 OKHALA ooreheryeya onnavulusa okumi. Ntoko yootakiherya, vaavaa enakhumelelaaya epahu, onnakhala wookhweya okophola wa yaale yiireherenrye ni okhala ooreheryeya waakhaviherya akina. Marehereryo mamoha Anakhaviherya Yakhumelela Epahu annaloca mmukhalelo ola: “Wiirehererya phaama onnavulusa ikumi.”

2. Ntakhara heeni nnaphwanelaahu wiirehererya ntakhara yoohoosa etokotoko? (Mateyu 24:44)

² “Yoohooxa etokotoko” enahaala orwa mootutuxa. (Mat. 24:21) Moohiyana ni ipahu sincipale, yoohooxa etokotoko enahaala waaphwanya achu ancipale ehiireherenrye. Variyari va iyaakha 2.000 muculi, Yesu aahaalopola oomuchara awe wi yaaphwanela wiirehererya ntakhara nihiku nenlo. (Mwaalakhanye Mateyu 24:44.) Wakhala wi nooreheryeya, onanwerya okhala wookhweya wa hiyaano ohoolela elukuluku yeeyo yoovila ni waakhaviherya akina weerano emohamoha.—Luka 21:36.

3. Ti mwawiihai ovilela, niphwanya ni osivela inahaalaaya onikhaviherya okhala ooreheryeya ntakhara yoohoosa etokotoko?

³ Muthokororye mikhalelo miraru seiho sinahaala onikhaviherya okhala ooreheryeya ntakhara yoohoosa etokotoko. Nni naakhulele hai wakhala wi noovekiwa wi nlaleerye michaka soothoriha soolipa nave oohiroromela enanaakaaha? (Wup. 16:21) Nnamuchuna ovilela wi nimwiiwelele Yehova, nroromelaka wi owo onahaala onikhapelela. Tiheeni nnahaalaahu weera wakhala wi annihu aayeleela ichu saya savakhaani naari ichu saya soothene soomwiilini? (Hap. 3:17, 18) Nnahaala ochuna niphwanya wi ninnceenyerye waavaha nikhaviheryo nenlo anachunaaya. Nnahaala waakhulela hai wakhala wi, ohiphela wa Koki a Makoki onnaneeriha  okhala vamoha ni anna ni arokora mu elukuluku yammoori? (Ese. 38:10-12) Onahaala ochuneya osivela woolipa ntakhara yaawo wi onikhaviherye ohoolela elukuluku yeeyo yoovila.

4. Ti mwawiihai Piipiliya onooniheryeiye wi nnaphwanela otitelela wunnuwiha ovilela, niphwanya ni osivela?

⁴ Masu a Muluku annanceenyerya otitelela wunnuwiha mikhalelo ntoko ovilela, niphwanya ni osivela. Luka 21:19 onnaloca: “Moorweela wa ovilela wanyu, munamukhapelela ekumi anyu.” Akolose 3:12 oni: “Muware niphwanya.” Nyenya tho 1 Atesalonika 4:9, 10 onnaloca: “Nyeenyu ene munnahusihiwa ni Muluku wi musivelaneke mukina ni mukhwaawe. . . . Nyenya ninnooceenyeryaani anna wi mutitelele weerano yeela moopwahaxa.” Iversikulu soothesene seiha saarepeliwe ntakhara oohuserya yaawo yooniherya niphwanya osivela ni ovilela. Mwawiihiiha, awo yaanaphwanela otitelela wunnuwiha mikhalelo seiha. Hiyaano tho nnaphwanela weerano emohamoha. Hankooni nthokororye ti mwawiihai Akristu oopacerya yoonihenryaaya mmoha ti mmoha wa mikhalelo seiha. Voocharela, nnahaala woona ti mwawiihai nneeraahu naatakiherye oohuserya yaala, nave ntoko yookhumelela, okhala oolekecheya wi nooreheryeya ntakhara yoohooxa etokotoko.

5. Ti mwawiihai Akristu oopacerya yaavilenlaaya ni saweeha saya?

⁵ Akristu oopacerya yaaphwanela ovilela. (Ahe. 10:36) Ohiya pahiru ohoolela makacamiho yaawo yaari awunlaana wa achu oothene, awo tho yaahoolela saweeha sawaaceererya. Ancipale a yaawo yaahihoolela wiikariwa, ohiya pahiru ni ahooleli a malapelo a Ayuta naari athoriha o Roma, nyenya tho ni amusi aya. (Mat. 10:21) Nave mpuwa wa muloko, awo yaanaphwanela owaniha ni ovoloweliwa ni mahusiheryo oowoka a alipa oomwaryeya. (Saw. 20:29, 30) Mwawiihiiha, Akristu yaala yaahivilela. (Wup. 2:3) Mwawiihai? Awo yaahuupuwelela vooloca sa yootakiherya ya Mpiipiliyani sa ovilela wa Yupu. (Tiy. 5:10, 11) Awo yaavekela evekaka ikuru. (Saw. 4:29-31) Nave tho awo yaahitikitheryeya mu sookhumelela saphaama sa ovilela wawe.—Saw. 5:41.

6. Tiheeni muhusenryaanyu orweela wa yeeyo Merita opankeiye wi avilele wiiciwa?

⁶ Hiyaano tho nnanwerya ovilela wakhala wi ninnahuserya moohihiyererya sootakiherya sa ovilela sinaphwanyeya Mmasu a Muluku ni mu soolaleeryiwa sahu nave wuupuwelela seiho. Mwa weerano yeeyo, murokora mmoha awiichaniwa Merita, onakhala o Alpaniya, aahiwerya ohoolela wiiciwa woolipa mu emusi awe. Owo aahihooseya vancipale nave haasuwela ti woowi saweeha seiho saarwaayawo. Mwawiihiiha, owo ooloca: “Kaahitannyeya vancipale vaavaa kaahusenryaaka Mpiipiliyani vooloca sa Yupu. Owo aahihooxeya vancipale, nave haasuwela taani aatannya makacamiho awe, nave naamwiihiiha, owo aahiloca: ‘Ophiyerya okhwa waka, nkirwa kihiya okhala oororomeleya.’ (Yupu 27:5, PMM) Kaahuupuwela wi saweeha saka saari ikhaani vaavaa kaalikanyihaaka ni sa Yupu. Moohiyana ni yoowo, miyaano kaanasuwela ti woowi saweeha saka saakhumaayawo.”

7. Naamwi nihihoolelaka yaweeha yoovila, tiheeni nnaphwanelaahu ohuserya opaka hiihaano?

⁷ Nnanwerya tho olipiha ovilela wahu moorweela wa omuleela Yehova sawuukhula sahu moohihiyererya. (Afi. 4:6; 1 Ate. 5:17) Akhweya nyuwaano hamunahoolela nikacamiho noovila hiihaano. Naamwiihiiha, apwanne munnaavya ohoolela wa Yehova ilukuluku soothene vaavaa munakhalaanyu awuukhuwa, awaakanyereya naari oosarasareya? Wakhala wi munnamuleela Muluku ahu wi ookhaviheryeeni ni makacamiho a nihiku nnihiku hiihaano, hamuhiyererya weerano yeeyo vaavaa muneeraanyu muhoolele makacamiho matokweene omwaahiyu. Munahaala olekecheya wi owo oosuwela chiryeene elukuluku ni mukhalelo wa owaakhulaani.—Sal. 27:1, 3.

8. Ti mwawiihai yootakiherya ya Mira enooniheryaaya wi ovilela saweeha sa mmahiku ahu onanwerya onikhaviherya ovilela saweeha sa omwaahiyu? (Tiyaku 1:2-4) (Moone tho eruku.)

 ⁸ Ti yawooneya wi nnanwerya ovilela mu yoohooxa etokotoko omwaahiyu wakhala wi ninnavilela saweeha sahiihaano. (Aro. 5:3) Ntakhara heeni nnalocaahu yeela? Anna ancipale ahoona wi yaweeha ti yaweeha ya nroromelo awenryaaya ovilela, yaahaakhaviherya ovilela ni makacamiho yaaruule muhoolo. Ovilela wohaakhaviherya olipiha nroromelo naya wi Yehova ori ooreheryeya nave onnachuna waakhaviherya. Nroromelo naahaakhaviherya ovilela saweeha saakhumelenle ohoolo waya. (Mwaalakhanye Tiyaku 1:2-4.) Mira, Piyoneera mmoha o Alpaniya, aahoona wi ovilela wawe woopacerya waahimukhaviherya otitelela ovilela. Owo onneemererya wi mu ikwaha sincipale onniisoona wi ori mukhateiye ahoolelaka makacamiho mancipale. Nyenya owo onnuupuwelela ichu Yehova opankeiye mu iyaakha 20 muculi wi amukhaviherye, nave onnaloca wa yene: ‘Khala oororomeleya. Ohihiye wi iyaakha soothene ni makacamiho oothene ovonthaawe nnikhaviheryo na Yehova ikhale sa siiyo.’ Nyuwaano tho munanwerya wuupuwelela vooloca sa mukhalelo Yehova ookhavihenryeiyeni wi mvilele. Muroromele wi owo onniiwexexa vaavaa munahoolelaanyu saweeha ni onahaala wooreelihaani. (Mat. 5:10-12) Mwawiihiiha, vaavaa yoohooxa etokotoko enapaceryaaya, muni mweereke muhusenrye okhala oovilela nave munahaala okhala oolakelela otitelela ovilela.

9. Ti mwawiihai muloko wo Antiyokeya o Siriya woonihenryaaya niphwanya?

⁹ Muthokororye yeeyo yeeren’ye ni Akristu o Yuteya, yaawo yaahoolenle etala etokweene. Vaavaa muloko wo Antiyokeya o Siriya wiiwalaaya sa etala yeela, awo moohikhwa minikwa yaahikhalano niphwanya ntakhara anna o Yuteya. Mwawiihiiha, awo yaahooniherya niphwanya naya mu saweera. Awo yaahilakelela wi “mmoha ti mmoha mwawiiwanana ni owerya wawe, eveleele nikhaviheryo wa anna yaakhala o Yuteya.” (Saw. 11:27-30) Naamwi anna yaavoloweliwe ni etala ekhalaka ocaiwene, Akristu o Antiyokeya yaari oolakelela waakhaviherya yaawo.—1 Yoh. 3:17, 18.

10. Mmikhalelo taani nneeraahu nooniherye niphwanya vaavaa anna ni arokora ahu anahoolelaaya ipahu? (Moone tho eruku.)

¹⁰ Hiyaano tho nnanwerya wooniherya niphwanya olelo vaavaa nniiwaahu wi annihu akina aavoloweliwa ni ipahu. Ninnaakhulela mwawaakuveya naakohaka atokweene a mmuloko waakhanle wi nnanwerya okhaviherya muteko, naari opaka sooveleela ntakhara muteko wa elapo yoothene naari moorweela wa waavekelela yaawo avoloweliwe. b (Mas. 17:17) Ntoko yootakiherya, mu 2020, makhuuru oopwaha 950 Anakhaviherya Yakhumelela Epahu, yaahirehereryiwa mu elapo yoothene wi yaakhaviherye achu yaawo yaavoloweliwe ni epahu ya Koronaviru. Yaale anarumeela ntoko nikhuuru nookhaviherya annaphwanela ncicimiho nahu noothene. Eceenyeryiwaka nniphwanya ntakhara anna ni arokora aya, awo yaahivahererya nikhaviheryo noomwiilini, noomunepani, nave mmikhalelo mikina, yaahirehererya ipa ni mapuro a malapelo.—Mulikanyihe ni 2 Akorintu 8:1-4.

11. Ti mwawiihai saweera sahu sa niphwanya sinamucicimihaaya Tiithi ahu a wirimu?

¹¹ Vaavaa nnooniheryaahu niphwanya emanle okhumelela epahu, akina annawerya woona wiilipixerya nnapakaahu. Ntoko yootakiherya, mu 2019, echeku yawoopiha yawiichaniwa Dorian yaahinyaanya Empa ya Omwene o Pahama. Vaavaa annihu yaatekaaya wanaawiili Empa ya Omwene, awo yaahimveka mulopwana mmoha aahiri namoona a Yehova, yoowo aarino empresa awe wi aaleele epereesu sa miteko seiho saari  soochuneya. Owo aahiloca wa yaawo: “Kinniivaha . . . wi kikhaviherye mahaleene ni maakina, achu anahaala oteka, vamoha ni ikaruma. Miyaano pahiru kinachuna weerano yeeyo ntakhara marehereryo anyu. Yootepa okitannya murima mukhalelo nyuwaano munaasivelaanyu asinthamwene anyu.” Achu ancipale mweelaponi hamusuwenle Yehova. Nyenya ancipale a yaawo annawoona Anamoona a Yehova. Ekari etokweene osuwela wi miteko sahu sa niphwanya sinanwerya owaacameliha achu wa Yehova, yoowo ori ‘awaaca ikharari!’—Aef. 2:4.

12. Ti mwawiihai wunnuwiha niphwanya olelo onanrehereryaaya ntakhara yoohooxa etokotoko? (Wupulula 13:16, 17)

¹² Ntakhara heeni onamuchuneya wooniherya niphwanya variyari va yoohooxa etokotoko? Piipiliya onnaloca wi yaale ahinakhaviherya ipoliitika anahaala ohoolela makacamiho hiihaano ni variyari va yoohoosa etokotoko. (Mwaalakhanye Wupulula 13:16, 17.) Anna ni arokora ahu ananwerya ochuna nikhaviheryo wi yaakhwaniherye soothowa saya soochuneya. Vaavaa Mwene ahu, Yesu Kristu, onarweiye wi athorihe, onaphwanela oniphwanya nooniheryaka niphwanya wi aniwope ‘ovolowa mu Omwene.’—Mat. 25:34-40.

13. Ntoko etharihiwaaya mu Aroma 15:7, ti mwawiihai Akristu oopacerya yaalipinhaaya osivela waya mukina ni mukhwaawe?

¹³ Osivela yaari eneneeryo yeeyo yaasuwanyeiha Akristu oopacerya. Apwanne wa yaawo waari wookhweya wooniherya osivela? Muthokororye ohiyana waarivo mmuloko wo Roma. Variyari va yaawo hiyaariwo pahiru Ayuta, yaawo yaaphwiiwale wi yiiweleleke Nlamulo na Mose, nyenya tho yaahikhalavo achu a maloko oohiyanahiyana. Mwawooneya, Akristu akina yaari akapuro, akina yaari achu ootaphuwa, akhweya tho akina yaahikhalano anamalapaaya. Ti mwawiihai Akristu ene yaala yaahaalaaya ovootha ohiyana yoola waarivovo ni olipiha osivela waya? Murummwa Paulo aahaaceenyerya yaawo wi ‘yaakhelaneke mukina ni mukhwaawe.’ (Mwaalakhanye Aroma 15:7.) Tiheeni owo aachuneiye oloca? Masu ataphuleliwe ntoko ‘waakhela’ enataphulela owaakhela achu moosivela naari okhala oowaakhela aleco, owaani naari mu nikhuuru na asinthamwene. Ntoko yootakiherya, Paulo aahiloca ni Filemoni mukhalelo wa omwaakhela Onesimu, yoowo aari kapuro oochawa, alocaka: ‘Omwaakhele yoowo.’ (File. 17) Nave Akila ni Priskila yaahimwaakhela Apolu, yoowo aasuwenle vakhaani vooloca sa mahusiheryo Eekristu waapwaha yaawo nave “yaamukuxa.” (Saw. 18:26) Ohiya weemererya wi ohiyana waya waakawanye, Akristu yaala yaahivootha ohiyana waya nave yaakhelana mukina ni mukhwaawe.

14. Ti mwawiihai Ana ni aiyawe yoonihenryaaya osivela?

¹⁴ Hiyaano tho nnanwerya wooniherya osivela wa anna ni arokora ahu moorweela wa okhala oonthamwene ni yaawo. Mu ikwaha sincipale awo anahaala waakhulela yooniheryaka osivela ntakhara hiyo. (2 Ako. 6:11-13) Muthokororye yaweereya ya Ana ni iyawe. Elukuluku vakhaani emanle othaamela o Afrika yaakhenle etisikinasawu evyaani ntoko mamisiyonaariyo, epahu ya Koronaviru yaakhumelela. Ntoko aleco, awo hiyaawenrye othukumana ni Muloko aya yoonanaka. Ti mwawiihai mutheli aahaaleiye wooniherya osivela waya? Awo yaahipharihela ikhankoonya wi eloce ni anna ni arokora aya a vanipuroni ni waaleela wi yaanachuna waasuwela phaama. Ichoko saatannyeya murima nthowa na olikaareliwa ni waakhela michaka seiho yaarumiheliwaaya moohihiyererya. Ntakhara heeni mutheli aalakelela waakhaviherya? Ana ooloca: “Saweera soosivela sooniheryiwe wa miyaano ni emusi aka mu ilukuluku saphaama ni sookacamiha, soothipeleya mmurimani mwaka, mmuupuweloni nave sinnakiceenyerya wooniherya osivela.”

15. Tiheeni munahuseryaanyu orweela wa yootakiherya ya Vanessa vooloca sa waasivela anna ni arokora ahu oothene? (Moone tho eruku.)

¹⁵ Ancipale a hiyo nnakhala mmiloko seiho arimo  anna ni arokora a mapuro oohiyanahiyana nave arino omuchu woohiyanahiyana. Nnanwerya olipiha osivela wahu ntakhara oothene yaawo, ntikitheryeyaka mmikhalelo saya saphaama. Murokora mmoha awiichaniwa Vanessa onarumeela o Nova Selantiya, aanoona okhala woovila wiiwanana ni anna mmuloko awe. Ohiya waasepa yaale yaarino mikhalelo soonyeenyeiha, owo aanamaliha elukuluku ni yaawo. Eyo yaahimukhaviherya woona mikhalelo saya seiho saamuhakalaliha Yehova. Owo ooloca: “Ovinyerya vaavaa aiyaka ekhanlaaya ooweherya a ekulucu, ni variyari va anna ni arokora ancipale yaawo arino omuchu woohiyanahiyana, kinnoona okhala wookhweya okhalihana phaama ni yaawo. Vano kinnasivela eparipari. Yehova tho onnasivela yeeyo nthowa nawi owo oonikeriha mu nikhuuru na achu oohiyanahiyana.” Vaavaa nnahuseryaahu owoona akina ntoko Yehova onawooneiye, ninnooniherya wi ninnaasivela.—2 Ako. 8:24.

16. Ntakhara heeni osivela onahaala okhala woochuneyaxa variyari va yoohooxa etokotoko? (Moone tho eruku.)

¹⁶ Osivela onahaala okhala woochuneya variyari va yoohooxa etokotoko. Vaavaa yoohooxa etokotoko enahaalaaya opacerya, ti woowi nnahaalaahu ophwanya okhapelela? Muthokororye mukhalelo Yehova aahusiheiye achu awe weera vaavaa yaaryaaya awuukhuwa nthowa na ohipheliwa ni Apaapulu: “Muloko aka nyu, haweni mwiipithe, mwiiwalele mpa mwanyu! Mukhale mwemmo elukuluku tonto, ophiyerya evinre esara ya Apwiya.” (Yes. 26:20, PMM) Enakhala wi masu yaala annaphariheleya tho wa hiyaano nnahaala ohoolela yoohoosa etokotoko. ‘Ipa sahu sawiipithamo’ inanwerya okhala miloko sahu. Variyari va yoohooxa etokotoko, nnanwerya ophwanya okhapelela yoowo Yehova oniroromelinheiye, wakhala wi ninnatitelela okhala awiiwanana ni annihu. Mwawiihiiha, nnaphwanela wiilipixerya hiihava wi nunnuwihe osivela wahu ntakhara anna ni arokora ahu. Ovuluxiwa wahu onanwerya okhala moorweela wa yeeyo!

17. Wakhala wi nohiirehererya hiihaano, tiheeni nnahaalaahu owerya opaka mu yoohooxa etokotoko?

¹⁷ “Nihiku ntokotoko na [Yehova]” nnahaala oruuha wuukhuwa otokotoko wa achu a mweelaponi. (Sof. 1:14, 15, PMM) Achu a Yehova anahaala tho ohoolela makacamiho. Nyenya wakhala wi nohiirehererya nnahaala okhala oomaaleleya ni waakhaviherya akina. Nnanwerya ovilela makacamiho oothene anahaala okhumelela mu okumi ahu. Vaavaa annihu a munroromeloni anahooseyaaya nnanwerya opaka yeeyo nnaweryaahu wi naavahe nikhaviheryo ni wooniheryaka niphwanya nave naakhwaniheryaka soothowa saya. Nnahaala otitelela okhala awaacameleya ni anna ni arokora ahu yaawo nihusenryaahu waasivela ovinyerya khalai. Yehova onahaala onireeliha ni ekumi yoohimala mu elapo yeeyo makacamiho oothene ni soohooxa inahaalaaya ocuwaliwa.—Yes. 65:17.