1-2. Mmukhalelo taani Mukristu oreiye ntoko epereetiyu yoorakama? (1 Akorintu 15:58)

 MU Eyaakha ya 1978, epereetiyu yoorakamaxa yaahitekiwa o Tokiyu, Xapau. Achu yaavarerya yaanakoha mukhalelo yaahaalaaya okophola nthowa na amwaacikinye yeereya wiiliwiili mu epooma yeele. Wi epereetiyu yeele ekophole, tiheeni alipa ooteka yaapankaaya? Alipa ooteka yaahipaka marehereryo ntakhara epereetiyu yeele wi ekhale yoolipa, yoophwanelela wi evilele ni amwaacikinye. Akristu ari ntoko epereetiyu yeele. Mmukhalelo taani?

² Mukristu onaphwanela okhala oothipeleya ni oolipa. Owo onaphwanela okhala oolipa ni oothipeleya vaavaa onavolowelaaya waakiha meecelo ni malamulo a Yehova. (Mwaalakhanye 1 Akorintu 15:58.) Owo ori ‘oorehereya wiiwelela’ nave haneemererya wi echu vyakala emuhiihe. Mmakupa makina, owo onaphwanela okhala ‘ooleva,’ naari awaakuveya vaavaa mikhalelo ineemereryaaya naari onakhalaaya woochuneya. (Tiy. 3:17) Mukristu yoowo ohusenrye okhalano moonelo woophimelela onahaala osepa okhala muchu ookacamiha naari ootumerya. Mmwaha yoola nnahaala othokororya mukhalelo nneeraahu nikhale oohicikinyeya. Nave tho nnahaala woona mikhalelo mithanu seiho Satana oneereryeiye oceecheiha yoolakelela ahu ya okhala oohicikinyeya nave nnahaala ohuserya mukhalelo nneeraahu nivoothe wiilipixerya wawe.

3. Malamulo taani a Mulamuleli Mutokotoko anaphwanyeya mu Saweeriwa ti Arummwa 15:28, 29?

³ Ntoko Mulamuleli Mutokotoko, Yehova moohihiyererya onnaavaha malamulo achu awe. (Yes. 33:22) Ntoko yootakiherya, nikhuuru noolamulela na mu nsana noopacerya naahithariha  mikhalelo miraru seiho Akristu yaaphwanelaaya wunnuwiha wi yiikhaleleru oohicikinyeya: (1) moorweela wa okhooca soophwaniherya ni omulapelaka pahiru Yehova, (2) ocicimiha weela wa nikhami (3) ni wiiwelela meecelo a Mpiipiliyani wa okhooca opaka mararuwo. (Mwaalakhanye Saweeriwa ti Arummwa 15:28, 29.) Ti mwawiihai Akristu olelo enahaalaaya otitelela okhala oohicikinyeya mmikhalelo seiha miraru ilociwe?

4. Ti mwawiihai nnamvahaahu Yehova malapelo yaawo anamphwanela? (Wupulula 4:11)

⁴ Ninnakhooca soophwaniherya nave ninnamurumeela pahiru Yehova. Owo aahaaleela Aisarayeli wi emulapeleke pahiru yoowo. (Malam. 5:6-10) Vaavaa eehiweiye ni Musaserya, Yesu aahooniherya mookwakwaleya wi nnaphwanela omurumeelaka pahiru Yehova. (Mat. 4:8-10) Mwawiihiiha, hannalapela iruku soopachiwa iri sawunlaana mmalapelo a ikerexa. Nave tho hannaalapela achu, ntoko yootakiherya, naakhalihaka ahooleli a ikerexa, ahooleli a ipoliitika, alipa omvonya mphirya naari alipa awiipa ntoko amuluku ahu. Ninnakhala mmakupa a Yehova nthanlaka omulapelaka yoowo ‘opatunxe ichu soothene.’—Mwaalakhanye Wupulula 4:11.

5. Ntakhara heeni nnaakihaahu nlamulo na Yehova vooloca sa okumi ni weela wa nikhami?

⁵ Ninnaakiha malamulo a Yehova vooloca sa weela wa nikhami. Ntakhara heeni? Nthowa nawi Yehova ooloca wi nikhami nneemelela okumi, yamahala yaphaama owo onivanheiye. (Onam. 17:14) Vaavaa woopaceryani Yehova eemerenryeiye wi achu ekhuureke inama, owo aahaalamulela wi ehilyeeke nikhaani. (Map. 9:4) Owo aahuuluulela nlamulo nimohamoha wa a Aisarayeli vaavaa aavanheiye Nlamulo na Mose. (Onam. 17:10) Owo aahihoolela nikhuuru noolamulela na mu nsana noopacerya wi yaatharihele Akristu ‘otitelela othanya . . . nikhami.’ (Saw. 15:28, 29) Ninniiwelela moohicikinyeya nlamulo nenla vaavaa nnapakaahu soolakelela vooloca sa oloola. b

6. Wiilipixerya taani nnapakaahu wi nikhale mwawiiwanana ni meecelo avasulu a Yehova?

⁶ Ninnachara meecelo avasulu atikitheryiwe ni Yehova. (Ahe. 13:4) Murummwa Paulo oonceenyerya wi ‘niiphe’ minkhela sa mwiili ahu, eyo enataphulela wi, nnaphwanela opaka owetha wahu wi nihipake yoonanara. Ninnasepa woona naari opaka echu vyakala yeeyo yaahaala oneeriha opaka mararuwo. (Ako. 3:5; Yupu 31:1) Vaavaa nnahoolelaahu saweeha ninnakhooca mwawaakuveya wuupuwela naari opaka echu vyakala yaahaala onanariha onthamwene ahu ni Muluku.

7. Tiheeni nnaphwanelaahu olakelela weera nave ntakhara heeni?

⁷ Yehova onaweherya wi nikhale ‘awiiwelela ni murima woothene.’ (Aro. 6:17) Ichu seiho onanleeleiye ti samphurelo wa hiyaano, nave hiniwerya otoroka malamulo awe. (Yes. 48:17, 18; 1 Ako. 6:9, 10) Hiyaano ninniilipixerya wi nimuhakalalihe Yehova nooniheryaka mukhalelo mmohamoha yoowo mulipa oomurepa salmu olonceiye: “Koolakana ni murima aka weerano malamulo anyu.” (Sal. 119:112, PMM) Nyenya, Satana onahaala weererya oceecheiha yoolakelela ahu. Miraakho taani owo onaphariheleiye?

8. Ti mwawihai Satana onaphariheleiye muteko yaweeha ya wiikariwa wi aceecheihe yoolakelela ahu?

⁸ Wiikariwa. Musaserya onnapharihela nlala ni okhinyererya wi aceecheihe yoolakelela ahu. Yoolakelela awe ori ‘onikhuura’ ni onanariha onthamwene ahu ni Yehova. (1 Pet. 5:8) Akristu a mu nsana noopacerya yaahoopopihiwa, omaniwa, ni wiiphiwa nthowa na  yoolakelela aya ya okhala oohicikinyeya. (Saw. 5:27, 28, 40; 7:54-60) Mmahiku ahu, Satana onnatitelela opharihela muteko wiikariwa. Ela ti yawooneya mu okhalihiwa moonanara wa annihu ni arokorahu o Rusiya nave tho mu ilapo ikina vamoha ni ohipheliwa ni achu awaakaaha.

9. Mutharihe ochuneya waya wa okhalano ekaasoope wa yaweeha yoovitheya.

⁹ Saweeha soovitheya. Ohiya pahiru opharihela ohiphela wawooneya, Satana onnapharihela “mavyakelo” oovitheya wi anihiphele. (Aef. 6:11) Moone yootakiherya ya munna oniichaniwa Poopi, yoowo aahaala opakiwa operasau oovila. Owo aahaaleela matotore wi variyari wa operasau vyakala haahaala weemererya ovahiwa nikhami. Totore aahaala omooperaara aahicicimiha yoolakelela ya munna. Nyenya ohiyu yoole amanle wooperaariwa nave emusi awe ekookenle owaani, totore mukina aahimuxekurya Poopi. Owo aahimuleela wi variyari wa operasau owo haaheliwe nikhami, nave waakhanle woochuneya, nikhami naari nookhaleene. Awo yuupuwela wi Poopi aahaala otoroka muupuwelo awe woona wi emusi awe hiyaari vakhiviru. Nyenya Poopi, aahititelela okhala oohicikinyeya, alocaka wi haahaala waakhela nikhami mu operasau vyakala.

10. Ntakhara heeni mukhalelo wa wuupuwela wa elapo oryaaya wawoopiha? (1 Akorintu 3:19, 20)

¹⁰ Mukhalelo wa wuupuwela wa achu ahinamulapela Yehova. Wakhala wi ninnuupuwela hiihaa ntoko achu ahinamurumeela Yehova, hiyaano nnanwerya ovoloweliwa moomalela. (Mwaalakhanye 1 Akorintu 3:19, 20.) “Miruku sa elapo” ikwaha sincipale sinnaweeriha achu ohimwiiwelela Muluku. Akristu o Perkamu ni o Tiyatira yaahivoloweliwa ni achu yaawo yaarukurenrye, yaawo yaalapela soophwaniherya ni yaapaka mararuwo. Yesu aavaha miloko seiya ekano yoolipa, nthowa nawi yaanatumerya mararuwo. (Wup. 2:14, 20) Olelo, wookhalavo okhinyererya otokweene wi neemererye mukhalelo wa wuupuwela wa elapo. Amusi ahu ni akina ananwerya weererya onlekecha, elocaka wi ninnatepano nave tahi nikacamiho ohiiwelela nlamulo nimoha na Yehova. Awo tho annawerya oloca wi tahi yoohesa opaka echu yeeyo mwiili ahu onachunaaya nave wi meecelo a Mpiipiliyani aavireliwa.

11. Tiheeni nihinaphwanelaahu weera wi ntitelele okhala oolipa?

¹¹ Ilukuluku ikina nnawerya wuupuwela wi sooleeliherya sa Yehova tahi sookwakwaleya. Akhweya nnamweereriwa, ‘opwaha ichu seiho irempwale.’ (1 Ako. 4:6) Ahooleli a mmahiku a Yesu yaaneerano emohamoha. Awo yaanaaceererya masu aya Mmalamulo a Mose, yeerihaka wi okhaleke woovila wa achu wiiwelela. (Mat. 23:4) Yehova onnanivahererya ohoolela wookwakwaleya moorweela wa Masu awe ni marehereryo awe. Tahi woochuneya waaceererya echu mu sooleeliherya owo onanivaheiye. (Mas. 3:5-7) Mwaweerano yeela hannapwaha mweeryo wa ichu irempwale, naari hannatikitherya malamulo wa akhwiihu a munroromelo mu ichu inavolowela soolakelela sa muchu mukhateiye.

12. Ti mwawiihai Satana onavuwiheiye “owoka watheru”?

¹² Soolokoha sawootha. Satana onnapharihela “owoka watheru” ni “ichu soopacerya sa veelaponi” wi aahuwelihe ni waakawanya achu. (Ako. 2:8) Mu nsana noopacerya, eyo yaaphitaanyerya ifilosofiya saathipeleya mu miruku sa achu, mahusiheryo a Ayuta yaawo yahaathipeleya mmasu a Muluku ni mahusiheryo awi Akristu yaaphwanela wiiwelela Malamulo a Mose. Miruku seiha saanaweeriha achu okhala ocai wa Ehime ya miruku yeeparipari, Yehova. Mmahiku ahu Satana onnapharihela ikhankoonya vamoha ni interneti wi amwaramwase michaka soomwaryeya ni michaka sawootha inavuwihiwa ni ahooleli a ipoliitika. Ela yaaheereya  variyari va epahu ya Koronaviru. c Anamoona a Yehova yaawo yaawiriyana sooleeliherya sa marehereryo a Yehova yaasepa okhala awuukhuwa ohiyana ni yaale yaawiriyana michaka sawootha.—Mat. 24:45.

13. Ntakhara heeni nnaphwanelaahu okhalano ekaasoope ni sawaakanyerya?

¹³ Sawaakanyerya. Hannaphwanela oyeleela “ichu soochuneyaxa.” (Afi. 1:9, 10) Vaavaa nnakhalaahu awaakanyeryeya ninnayeleela vancipale elukuluku ni ikuru seiho naahaalaahu opharihela mu ichu soochuneya. Ichu sawunlaana sa nihiku ti nihiku ntoko yootakiherya, olya, mathatelo, muteko ni ichu ikina inanwerya okhala sawaakanyerya, wakhala wi ninneemererya wi iho sikhale mu nipuro noopacerya mu okumi ahu. (Luka 21:34, 35) Ohiya yeela, ninnaphwanyihiwa ni michaka mincipale soomwaryeya ni miyaha sa epoliitika. Nnaphwanela okhalano ephoole wi nihaakanyeryeye ni miyaha seiha sa epoliitika. Mmukhalelo woohiyana, nnanwerya okhaviherya miyaha seiha mmuupuweloni naari mmurimani mwahu. Satana onnapharihela miraakho seiha ni yoolakelela ya oceecheiha yoolakelela ahu ya weera yeeyo eri yaphaama. Vano hankooni noone mukhalelo nneeraahu nivilele ni wiilipixerya wa Satana ni otitelela okhala oohicikinyeya.

14. Tiheeni enahaala onikhaviherya otitelela okhala oohicikinyeya?

¹⁴ Muupuwele ntakhara heeni nyuwaano mwiiveleenlaanyu ni mpatisiwa. Nyuwaano mwaaheerano yeela nthowa nawi mwaanachuna omuhakalaliha Yehova. Muupuwele yeeyo yoolekencheni wi mwaaphwanya eparipari. Mwaamusuwela Yehova. Nave mwaalakelela omulapa Tiithi anyu a wirimu. Nroromelo nanyu naahunnuwa nave naahiweerihaani ocharuwa. Osivela wanyu ntakhara Yehova waahooceenyeryaani ohiya opaka soonanara nave mpacerya weera ichu seiho sinamusivela Muluku. Mwaahiisoona okhala ootaphuwa vaavaa mwaasuwenlaanyu wi Muluku ohookhurumuwelaani. (Sal. 32:1, 2) Nyuwaano mwapacerya ophwanyeya mmithukumano ni okawana ni akina ichu sootikhiniha seiho mwaahuseryaanyu. Ntoko Mukristu  awiivelela ni oopatisiwa vano munneeca mu ephiro ya okumi, muri oolakelela weecaka mummo okhala wookhala.—Mat. 7:13, 14.

15. Ntakhara heeni ti woochuneya ohuserya ni wuupuwelela Masu a Muluku?

¹⁵ Muhuserye Masu a Muluku nave muupuweleleke. Wakhala wi mitathaari sa mwiri sohiixeela, owo onnakhala woohicikinyeya. Mmukhalelo mmohamoha, vaavaa nnatitelelaahu ohuserya mwawiiseela Masu a Muluku, nroromelo nahu ninnakhala noolipa nave nnanwerya otitelela okhala oohicikinyeya. Vaavaa nnahuseryaahu ni wuupuwelela Masu a Muluku, ninnakhala oolekecheya wi iphiro sa Muluku ti saphaamaxa. (Ako. 2:6, 7) Muupuwele mukhalelo sooleeliherya sa Yehova, ikano ni okhapelela wawe saakhavihenryaaya alapeli awe khalai. Ntoko yootakiherya, mu yawoona emoha, vaavaa munkeelo aaphimeiye empa ya Muluku, Esekiyeli aahikhala oomaaleleya. Yawoona yeele yaahimulipiha Esekiyeli nave ennanivaha mahusiheryo oophara muteko ni mukhalelo nnahaalaahu waakiha ni wiiwelela malakiheryo ni meecelo a Yehova mmalapelo awela. d (Ese. 40:1-4; 43:10-12) Hiyaano tho ninnaphuravo vaavaa nnahuseryaahu ni wuupuwelela mu saweereya ni ichu sawiiseela sa Mmasu a Muluku.

16. Ti mwawiihai okhalano murima woohicikinyeya waamukhavihenryaaya Poopi? (Salmu 112:7)

¹⁶ Mulipihe murima anyu. Mwene Tavite aahiloca wi harwa ahiya omusivela Yehova, nave aahiipa: Oo Muluku aka “murima aka wootikitheryeya.” (Sal. 57:7, PMM) Hiyaano tho nnanwerya okhalano murima woohicikinyeya, nimuroromelaka moomalela Yehova. (Mwaalakhanye Salmu 112:7.) Moone yeeyo yaamukhavihenrye Poopi, yoowo olociwe woopaceryani. Vaavaa matotore yaamuleenlaaya wi yaahaala omvaha nikhami waakhanle woochuneya variyari va operasau, ahuupuwenle ikwaha piili, owo aahaakhula: Waakhanle wi orivo pahiru mukhalelo mmoha wa oloola yoowo ori opharihela nikhami, kaahaala okhuma o exipitali yeela kihilekenleru. Voocharela Poopi aaloca: “Miyaano nkaarinono minikwa wi ti yeeyo kaachunaaka weera, nave nkuukhuwa ni yeeyo yaahaala okeera ohoolo waya.”

17. Tiheeni nnahuseryaahu orweela wa yaweereya ya Poopi? (Moone tho eruku.)

¹⁷ Poopi aahiwerya okhala oohicikinyeya  nthowa nawi aahilakelela yeeyo aahaaleiye weera ahaakumve oya oxipitale. Yoopacerya, owo aachuna wi yoolakelela awe emuhakalalihe Yehova. Yanaawiili, owo aahihuserya mwawiiseela yeeyo Piipiliya ni soolaleeryiwa sahu inalocaaya vooloca sa weela wa ekumi nnikhami. Yaneeraru, owo aahilekecheya wi ochariha sooleeliherya sa Yehova waari waphaama wa yene. Hiyaano tho nnanwerya okhalano murima woohicikinyeya, moohipwacha makacamiho nnahoolelaahu.

18. Ti mwawiihai yootakiherya ya Paraki enanihusihaaya vooloca sa omuroromela Yehova? (Moone eruku ya ekaapa.)

¹⁸ Mmuroromele Yehova. Moone mukhalelo Paraki aakhumelenleiye phaama nthowa na ororomela ohoolela wa Yehova. Mu elukuluku yeele, achu o Isarayeli hiyaari ooreheryeya ntakhara owana, ophiyerya tho wi hiyaawaarino ikaruma sa owana. Nyenya Yehova aaloca ni Paraki wi awane ni muhooleli a anakhoco o Kanani, Sisera, yoowo aarino ikaruma sincipale sa owana. (Amut. 5:8) Mulipa a miririmu amwaamuthiyana Tepora aaloca wa Paraki wi aye mmakupa mammoori a mureyareya wi akumane ni Sisera ni ikaaro sawe sakhoco sawaakhwana 900. Waamukhala wookhweya wa Akanani owana va nipuro nenle na mureyareya nthowa na ikaaro saya, naamwiihiiha, Paraki aahiiwelela. Vaavaa yaakhuruwaaya o Mwaako Tevori, Yehova aamoriha epula etokweene. Ikaaro sakhoco sa Sisera, saacora vancokwani nave Yehova aahimweeriha Paraki ovootha. (Amut. 4:1-7, 10, 13-16) Mmukhalelo mmohamoha, Yehova onahaala oneeriha ovootha wakhala wi ninnaroromela sooleeliherya sawe seiho onanivaheiye orweela mmarehereryo awe.—Malam. 31:6.

19. Ntakhara heeni munachunaanyu otitelela okhala oohicikinyeya?

¹⁹ Owaniha wahu wi ntitelele okhala oolipa onahaala otitelela vaavaa nnakhalaahu omakuchuwelo wa mukhalelo yoola wa ichu. (1 Tim. 6:11, 12; 2 Pet. 3:17) Nnaphwanela okhala oolakelela ohihuwelihiwa ni wiikariwa,saweeha soovitheya, mukhalelo wa wuupuwela wa yaale ahinamulapela Yehova, soolokoha sawootha ni sawaakanyerya. (Aef. 4:14) Ohiya yeeyo, hankooni ntitelele okhala oolipa, oohicikinyeya, nimusivelaka Yehova ni wiiwelela ohoolela wawe. Nave tho nnaphwanela okhala ooleva. Mmwaha onacharela, nnahaala woona mukhalelo Yehova ni Yesu aryaaya yootakiherya yoophaameya ya oleva.