1. Mmikhalelo taani Akristu anaphwanelaaya okhala ntoko mwiri? (Moone tho eruku.)

 ACHU akina ani: “Echeku henawerya wintaka mwiri onawerya opucheya.” Nsiposipo nenla ninnooniherya mukhalelo woochuneya oneeriha wi miri mikina ititelele okhala: Waakuveya. Wi yinnuwe omunepani Akristu anaphwanela okhala awaakuveya, oorehereya wi epucheye, ntoko mwiri. Mwawiihai? Nnaphwanela okhala oophimelela, niikhovelelihaka vaavaa mikhalelo sahu inatorokeyaaya, ni ocicimiha miyoonelo ni soolakelela sa akina.

2. Mikhalelo taani inahaala onikhaviherya wiikhoveleliha ni matorokelo a mookumini, nave tiheeni nnahaalaahu othokororya mmwaha yoola?

² Ntoko alapeli a Yehova nnaphwanela okhala oophimelela. Hiyaano nnaphwanela okhala awiiyeviha ni ooreera murima. Mmwaha yoola, nnahaala woona ti mwawiihai mikhalelo seiha saakhavihenryaaya Akristu akina ohoolela matorokelo mookumini. Nnahaala tho woona ti mwawiihai mikhalelo seiha inahaalaaya onikhaviherya. Nto woopaceryani, hankooni nihuserye ni Yehova vamoha ni Yesu, yaawo ari yootakiherya yoophaameya ya ophimelela.

3. Sawooniherya taani nryaahuno sawi Yehova toophimelela?

³ Mpiipiliyani, Yehova onniichaniwa “Mwala.” (Malam. 32:4, BNM) Ntakhara heeni? Nthowa nawi owo toolipa ni oohicikinyeya. Nyenya tho, owo toophimelela. Vaavaa ichu ineereyaaya, Muluku ahu onnatitelela wiikhoveleliha wi yookhwela awe yeereye. Yehova ohaapatuxa achu oophwanaphwana ni yoowo ni owerya wa wiikhoveleliha ni matorokelo a mookumini. Owo oonivaha malakiheryo a Mpiipiliyani ookwakwaleya yaawo ananikhaviherya opaka soolakelela mwamiruku, moohipwacha makacamiho  nnahoolelaahu. Yootakiherya ya Yehova mwaneene ni malakiheryo onivanheiye, sawooniherya sookwakwaleya wi naamwi owo ari “Mwala,” toophimelela naari ooleva.

4. Mvahe yootakiherya ya ophimelela wa Yehova. (Onamukucho 5:7, 11)

⁴ Soothene Yehova onapakeiye ti soophaameya ni soophimelela. Yehova hanaakhinyererya achu opaka echu yammoori. Ntoko yootakiherya, moone mukhalelo Yehova oonihenryeiye ophimelela wa Aisarayeli. Yehova haaweherya wi achu oothene evaheke mukucho woolikana, moohipwacha yaari ooreela naari oohaawa. Mmikhalelo mikina, owo aaneemererya wi muchu avaheke mikucho mwawiiwanana ni mikhalelo sawe.—Mwaalakhanye Onamukucho 5:7, 11.

5. Mvahe yootakiherya ya wiiyeviha nniphwanya na Yehova.

⁵ Wiiyeviha nniphwanya na Yehova ninnamweeriha okhala oophimelela. Ntoko yootakiherya, wiiyeviha wa Yehova waahooneya vaavaa owo aachuneiye waatoloxa achu ootakhala o Sotoma. Moorweela wa ankeelo awe, Yehova aahimuleela mulopwana oororomeleya Loti wi achawele o miyaakoni. Loti aanoova oya weiwo. Owo aahiveka wi yene ni echoko awe echawele o Sowari, epooma ekhaani yeeyo Yehova aalakelenleiye otoloxa. Yehova anwerya omukhinyererya Loti ochariha ohoolela wawe. Ohiya yeeyo, owo aaheemererya yooveka ya Loti, naamwi eyo yaataphulela ohimutoloxa Sowari. (Map. 19:18-22) Iyaakha masana masaneene ohoolo waya, Yehova aahiwooniherya niphwanya achu yaakhala o Ninive. Owo aahimurumiha mulipa a miririmu Yona wi epooma ni achu ootakhala yaakhala mwemmo yahaala otoloxiwa. Nyenya vaavaa Aninive yaacharunwaaya, Yehova aahimoriwa ikharari nave haatolonxe epooma.—Yona 3:1, 10; 4:10, 11.

6. Mutharihe mukhalelo Yesu oonihenryeiye ophimelela wa Yehova.

⁶ Yesu aahitakiherya ophimelela wa Yehova. Owo aarummwale veelaponi wi alaleerye wa “ipucepuche soorimeela sa nloko na Aisarayeli.” Nyenya owo aahooniherya ophimelela vaavaa aakhwaaniheryeiye murici yoola. Mu ekwaha emoha, muthiyana yoowo ahaari Muisarayeli aahimveka wi owo ampenuxe mwanawe amwaamuthiyana yoowo ‘aatepa ohooxiwa ti nsololo.’ Yesu aahooniherya niphwanya nave aahimpenusa mwanawe. (Mat. 15:21-28) Muthokororye yootakiherya ekina. Omapacereryo wa orummwa awe, Yesu aahiloca: “Yoole oni akikhooce . . . , miyo tho kinahaala omukhooca.” (Mat. 10:33) Apwanne owo aahimukhooca Petru, yoowo aamukhoonce ikwaha raru? Hooye. Yesu aanasuwela wi Petru aacharuwa wa yeeyo aapankeiye nave wi aari muchu oororomeleya. Amanle ooviihiwa mookhwani, Yesu aahooneya wa Petru nave mwawooneya owo aahimuroromeliha wi aahimukhurumuwela nave aanamusivela.—Luka 24:33, 34.

7. Mwawiiwanana ni Afilipi 4:5, ti mwawiihai nnachunaahu wi akina enooneke?

⁷ Nohoona wi Yehova ni Yesu Kristu toophimelela. Hanka vooloca sa hiyo? Yehova onaweherya wi nikhale oophimelela. (Mwalakhanye Afilipi 4:5.) Eversikulu yeela yootaphuleliwa tho  mmukhalelo ola: “Musuweliwe ntoko muchu oophimelela.” Nnaphwanela wiikoha: ‘Apwanne achu anakoona ntoko muchu oophimelela, oohaakeelela miyaha ni ootumerya? Naari wi achu anakoona ntoko muchu ookhinyererya, awiikusererya naari awiikhoma? Apwanne kinnaakhinyererya akina weera ichu mmukhalelo yoowo kinuupuwelaaka? Naari wi kinnaawiriyana akina ni weerano soochuna saya vaavaa inakhalaaya soophwanelela?’ Vaavaa nnooniheryaahu ophimelela, nnamutakiherya Yehova ni Yesu. Vano hankooni nthokororye makupa meeli nnaphwanelaahu okhala oophimelela: Vaavaa mikhalelo sahu inatorokeyaaya ni vaavaa soolakelela ni miyoonelo sa akina inakhalaaya soohiyana ni sawihu.

8. Tiheeni enahaala onikhaviherya okhala oophimelela vaavaa mikhalelo sinatorokeyaaya? (Moone tho enoota.)

⁸ Ophimelela onaphitaanyerya okhala awaakuveya vaavaa mikhalelo sahu sinatorokeyaaya. Matorokelo yaala ananwerya weereya moohiwehereryeya. Nnanwerya wiiceliwa moohiweheryeya. Naari wi makacamiho oohiwehereryeya a ophwanya ikhorowa naari makacamiho a ipoliitika mmapuro nnakhalaahuwo inanwerya waakanyerya okumi ahu moomalela. (Ekl. 9:11; 1 Ako. 7:31) Ophiyerya wi matorokelo a murici mmarehereryo ananwerya oneeha. Moohipwacha matorokelo, hiyaano nnanwerya wiikhoveleliha ni mikhalelo mivyaani wakhala wi ninnachariha ichu xexe inacharela: (1) weemererya wi ichu sootorokeya, (2) otikitheryeya mu omwaahiyu, ohiya mu ichu sivinre, (3) woona ichu soothene saphaama mu okumi anyu, nave (4) opaka ichu ntakhara akina. b Hankooni nthokororye sootakiherya seeparipari seiho sinooniherya wi ochariha ichu seiha sinanwerya okhaviherya.

9. Ti mwawiihai mutheli mmoha ori misiyonaariyo aahoolenleiye nikacamiho noohiwehereryeya?

⁹ Mweemererye wi ichu sootorokeya. Emanuele ni Francesca yaahithanliwa wi yarumeele mu elapo ekina ntoko mamisiyonaariyo. Vaavaa awo yaapacenryaaya ohuserya elocelo evyaani ni waasuwela phaama anna ni arokora aya, epahu ya Koronaviru yaahipacerya nave awo yaanaphwanela wiivalaanya. Moohilekela amama awe Francesca yaahikhwa. Owo aanachuna vancipale okhala vamoha ni emusi awe, nyenya nthowa na epahu ya koronaviru, haaphwanela opaka mukwaha. Tiheeni emukhavihenrye Francesca ohoolela nikacamiho nenla? Yaari mavekelo yaawo Emanuele aapankeiye avekaka miruku wi awerye otikitheryeya mu ichu sa nihiku ti nihiku. Yehova aahaakhula mavekelo aya orweela wa yoolya yoomunepani mu elukuluku yoophwanelela. Ntoko yootakiherya, awo yaahikhala oolipiheya mwa yeeyo munna mmoha aalonceiye mu exilema ya okoha ni waakhula: “Vaavaa nnaakuvelaahu weemererya mikhalelo sahu, onnakhala wookhweya okookela okhala oohakalala nave nnahaala ophura phaama mikhalelo sahu mivyaani.” c Yanaawiili, awo yaahipaka yoolakelela ya wunnuwiha mavyakelo aya a ovaha onamoona mu telefone ophiyerya wi yaahipaceryiha yoohuserya emoha ya Piipiliya. Ohiya yeeyoru, awo yaaheemererya nikhaviheryo na anna a vanipuroni nave yaahithamalela vancipale wa yeeyo. Ntoko yootakiherya, mahiku oothene murokora mmoha oosivela, aanaarumihela michaka ni eversikulu emoha ya Mpiipiliyani. Owo aaheerano yeeyo mahiku oothene mu eyaakha yanteero. Wakhala wi noheemererya wi matorokelo anneereya mu okumi ahu, nnahaala wiisoona okhala oohakalala vaavaa nnapakaahu yeeyo nnaweryaahu mwawiiwanana ni mikhalelo sahu.

10. Ti mwawiihai murokora iikhovelelinheiye ni matorokelo yeeren’ye mu okumi awe?

 ¹⁰ Mutikitheryeye mu omwaahiyu ni mu ichu soophwanelela. Kristina, murokora mmoha o Romaniya nave onakhala o Xapau, aahikhala oothanana vaavaa aasuwenleiye wi muloko yoowo aathukumaneiye wa Enklesi, waahaala owaliwa. Nyenya owo haatitelenle okhala awuukhuwa ni yeeyo. Ohiya yeeyo, owo aalakelela opaka owetha wawe mmuloko wa va nipuroni wa elocelo ya Exapau moorweela wa olaleerya mwamvai mu ekulucu yeele. Owo aahimveka nthamwene awe akhalai oomutekoni wi amukhaviheryeke ohuserya Exapau ni oloca phaama elocelo yeele. Owo aahimveka nthamwene awe wi ampharihele Piipiliya ni eproxura Mpuhe Okumi Okhala Wookhala! wi amuhusihekeno Exapau, nave owo aaheemererya. Yookhumelela hiyaari wi pahiru Kristina aahusenrye oloca Exapau, nyenya tho nthamwene awe aahipacerya wooniherya nchuno ntakhara eparipari. Vaavaa nihinakhalaahu ootikitheryeya mu ichu sakhalai nave ntikitheryeya mu ichu saphaama, nnanwerya wiiwexexa wi matorokelo oohiwehereryeya ananwerya onruuhela mareeliho yaawo nihintonkaahu waanyiherya.

11. Ti mwawiihai mutheli mmoha owenryeiye ohoolela nikacamiho na othowa ikhorowa?

¹¹ Mpakeke ichu ntakhara akina. Mutheli mmoha yoowo onakhala mu elapo yeeyo muteko ahu onawatiihiwaaya yaahipacerya othoiwa ikhorowa vaavaa elapo yeeyo yaahoolelaaya nikacamiho nimohamoha. Awo yiikhovelelinhe hai? Yoopacerya, awo yaahikhweiha okumi aya. Voocharela, ohiya otikitheryeya mmakacamiho aya, awo yaalakelela omaliha elukuluku yincipale mmuteko woolaleerya yaakhaviheryaka akina. (Saw. 20:35) Munna ooloca: “Okhala ooweiwa mmuteko woolaleerya onnanikhaviherya ohiyeeha elukuluku nuupuwelelaka ichu soohiphwanelela, nyenya ennanikhaviherya okhala ootikitheryeya mu yookhwela ya Yehova.” Vaavaa mikhalelo sahu inatorokeyaaya, ninnaphwanela wuupuwelela wi ti woochuneyaxa otitelela waakhaviherya akina, xaxaxa oorweela mmuteko woolaleerya.

12. Ti mwawiihai yootakiherya ya murummwa Paulo enahaalaaya onikhaviherya opaka matorokelo mmuteko woolaleerya?

¹² Mmuteko woolaleerya nnaphwanela okhala awaakuveya. Mmuteko woolaleerya ninnaaphwanya achu a mapuro oohiyanahiyana yaawo arino sookhovelela ni malapelo oohiyanahiyana. Murummwa Paulo aahisuwela wiikhoveleliha, nave hiyaano nnanwerya ohuserya vancipale ni yootakiherya awe. Yesu aamuthanla Paulo ntoko “murummwa a maloko.” (Aro. 11:13) Paulo aahaalaleerya Ayuta, Akriki, achu yaahusenryexa ni achu oohihuserya, alamuleli ni mamwene. Wi atannye murima wa achu oothene, Paulo aahikhala “ichu soothene wa achu a mukhalelo woothene.” (1 Ako. 9:19-23) Paulo annathokororya sookhovelela ni yeeyo awo yaaroromelaaya, mwawiihiiha, owo aaniiwananiha ni mukhalelo aalaleeryeiye. Hiyaano tho nnanwerya okhumelela phaama mmuteko woolaleerya wakhala wi ninniiwananiha ni soochuna sa achu.

13. Yawoopiha taani enatharihiwa mu 1 Akorintu 8:9 nnaphwanelaahu osepa wakhala wi ninnacicimiha miyoonelo sa akina?

¹³ Okhala oophimelela onahaala onikhaviherya ocicimiha miyoonelo sa akina. Ntoko yootakiherya, arokora akina annasiveliwa wiimakeyaara, nyenya akina, hooye. Anna akina annalakelela owurya mwa mphimo, nyenya akina annathanla ohiwuryaru. Nyenya oothene ahu ninnachuna okhalano ekumi yaphaama, nave ninnathanla mikhalelo soohiyana sa okhapelela okumi. Wakhala wi ninniisoona wi ilukuluku soothene nnapaka soolakelela saphaama nave nnaalekecha akina weererya opaka yeeyo nnapakaahu, nnanwerya waakwaculiha akina ni otannya okawanyeya mmulokoni. Mweeparipari  hinnachuna wi eyo yeereye. (Mwaalakhanye 1 Akorintu 8:9; 10:23, 24) Vano hankooni nthokororye makupa meeli anahaala wooniherya wi wakhala wi ninnapharihela malakiheryo a Mpiipiliya, nnanwerya okhala oophimeleleya ni otikitherya mmurecele.

14. Echu taani nnaphwanelaahu okhalano mmuupuweloni vooloca sa mukhalelo wa owara ni wiirehererya?

¹⁴ Soowara ni mukhalelo wa orehererya miihi. Yehova hananleela mukhalelo wa owara, nyenya owo onnanivaha malakiheryo wi nichareke. Hiyaano nnaphwanela owaraka mmukhalelo onamucicimiha Muluku, nikhalaka oophimelela, oocicimiheya ni “amiruku.” (1 Tim. 2:9, 10; 1 Pet. 3:3) Hiyaano hinnachuna wi achu yiitikitheryeke mmukhalelo nnawaraahu. Malakiheryo a Piipiliya ananwerya tho waakhaviherya asitokweene a muloko ohitikitherya malamulo vooloca sa mukhalelo wa owara naari orehererya miihi. Ntoko yootakiherya, asitokweene a muloko mmoha yaanachuna waakhaviherya amiravo yaapacenrye opharihela mukhalelo wa orehererya miihi yoowo waari wawunlaana, yaawo yaari ookhuveya nave tho oonyaapuruwa. Ti mwawiihai asitokweene yaahaalaaya waakhaviherya amiravo yaala ehitikithenrye malamulo aya? Ooweherya a ekulucu aahaakhaviherya asitokweene wi eloce mmukhalelo ola: “Wakhala wi muri o tripuna mpakaka mwaha nave alipa oowiriyana etikitheryeya wa nyuwaano ohiya wa yeeyo munalocaanyu, eyo enooniherya wi nookhalavo nikacamiho mmukhalelo wa owara ni wiirehererya.” Mukhalelo yoola wookhweya wa othariha waahirehererya nikacamiho ohichunen’ye otikitherya malamulo. d

15. Malamulo taani ni malakiheryo a Mpiipiliyani anahaala onikhaviherya vaavaa nnachunaahu opaka soolakelela vooloca sa okumi ahu? (Aroma 14:5)

¹⁵ Okhapelela okumi. Mukristu ori oothene onaphwanela olakelela mukhalelo onahaaleiye okhapelela okumi awe. (Aka. 6:5) Vaavaa  Mukristu onayeiye olakelela mukhalelo wa oloola okumi awe, malamulo mamoha a Mpiipiliyani onayeiye opharihela ti yaawo analoca sa othanya nikhami ni onamulosiwe. (Saw. 15:20; Aka. 5:19, 20) Nto naamwiihiiha, Mukristu onaphwanela olakelela meekheiye mukhalelo wa oloola onahaaleiye weemererya. Akina annaavya oloola pahiru oxipitale nave akina annaavya mikhalelo mikina sa oloola. Hiyaano nnaphwanela ocicimiha ophwanelela munna ti munna oreiyeno wa olakelela oloola taani onahaaleiye opharihela, moohipwacha naaweemereryaka naari hooye. Mmukhalelo yoowo nnaphwanela okhalano mmuupuweloni ipontu inacharela: (1) Pahiru Omwene wa Muluku tonahaala omaliha ireca soothene. (Yes. 33:24) (2) Mukristu ori oothene onaphwanela ‘okhala oolekecheya’ moomalela wa yeeyo eri yaphaama wa yene. (Mwaalakhanye Aroma 14:5.) (3) Muhaathorihe akina wa soolakelela anapakaaya, naari okhala nluku nookwaculiha wa yaawo. (Aro. 14:13) (4) Akristu annooniherya osivela nave aasuwela wi wiiwanana wa muloko ti woochuneya opwaha miyoonelo saya. (Aro. 14:15, 19, 20) Wakhala wi ilukuluku soothene ninnuupuwela ipontu seiha, nnahaala owerya okhalano onthamwene woolipa ni annihu nave nnahaala okhaviherya wi muloko okhaleno murecele.

16. Ti mwawiihai atokweene anooniheryaaya wi toophimelela vaavaa anaakhalihaaya atokweene akina? (Moone tho iruku.)

¹⁶ Atokweene anaphwanela otikitherya yootakiherya yaphaama ya okhala oophimelela. (1 Tim. 3:2, 3) Ntoko yootakiherya, mutokweene hanaphwanela owehererya wi miyoonelo sawe ilukuluku soothene seemereryiweke akhweya nthowa nawi owo tawunnuwelavo waapwaha atokweene akina. Owo oosuwela wi munepa wa Yehova onanwerya ompharihela mutokweene vyakala wi aloce echu yeeyo enahaala okhaviherya opaka yoolakelela yaphaama. Nave wakhala wi atokweene ancipale aheemererya yoolakelela yeeyo eniiwanana ni malakiheryo a Mpiipiliyani, mutokweene ori oophimelela onahaala okhaviherya yoolakelela yeeyo, naamwi owo aachuna echu yoohiyana.

17. Mareeliho taani anaakhelaaya Akristu ari oophimelela?

¹⁷ Akristu ari oophimelela annaakhela mareeliho mancipale. Ntoko yootakiherya, ninnakhalano onthamwene woolipa ni anna ni arokora ahu, nave eyo ennannuwiha murecele mmulokoni. Nookhalano ohakalala ni ekari ya waasuwela achu, sookhovelela ni omuchu woohiyanahiyana, nave ti yootikhiniha osuwela wi, naamwi nri oohiyana mmikhalelo mincipale, oothene ahu ninnamulapela Yehova mwawiiwanana. Opwaha soothene, yoohakalaliha ti yawi nnamutakiherya Yehova, Muluku yoowo ilukuluku soothene ori oophimelela ni awaakuveya.