MWAHA WOOHUSERYA 30
Munnuwihe Osivela Wanyu wa Yehova ni wa Akina
“Wooniherya osivela, . . . mmikhalelo soothene.”—AEF. 4:15.
NCIPO 2 Nsina Nanyu ti Yehova
YEEYO NNAHAALAAHU OHUSERYA a
1. Iparipari taani nyuwaano mwaahusenryaanyu vaavaa mwaapacenryaanyu omuhuserya Piipiliya?
APWANNE munnuupuwela elukuluku mwaapacenryaanyu omuhuserya Piipiliya? Nyuwaano mwaahikhala ootikhiniheya vaavaa mwaasuwenlaanyu wi Muluku ookhalano nsina. Akhweya nyuwaano mwaahikhala ootaphuwa vaavaa mwaasuwenlaanyu wi Muluku hanaahooxa achu mu cukucha a mooro. Nave mwawooneya mwaahitepa osiveliwa osuwela wi munanwerya owoona wanaawiili oosiveliwa anyu akhwile ni okhala ni yaawo mu parataiso veelaponi yavathi.
2. Ohiya pahiru ohuserya iparipari sa Mpiipiliyani, soolakelela taani ikina munachunaanyu waakhwaniherya? (Aefesu 5:1, 2)
2 Vaavaa mwaatitelelaanyu ohuserya Masu a Muluku, osivela wanyu ntakhara Yehova waanannuwa. Osivela owo waahooceenyeryaani opharihela yeeyo mwaahuseryaanyu. Nyuwaano moopaka soolakelela saphaama mwawiiwanana ni malakiheryo a Mpiipiliyani. Mootoroka mikhalelo ni miyoonelo sanyu wi mmuhakalalihe Muluku. Hiiha ntoko mwaana onamutakiheryeiye tiithi oosivela, nyuwaano munnamutakiherya tho Tiithi anyu awirimu.—Mwaalakhanye Aefesu 5:1, 2.
3. Makoho taani nnaphwanelaahu wiipakela yeehu ene?
3 Nnaphwanela wiikoha: ‘Apwanne osivela waka ntakhara Yehova ti woolipaxa hiihaano opwaha nihiku kaapatisiwaaka? Ovinyerya nihiku kipatisiwaaka, apwanne mukhalelo aka wa wuupuwela ni wa weerano ichu ti woolikana ni wa Yehova—xaxaxa vaavaa kinooniheryaaka osivela wa annaka ni arokora?’ Waakhanle wi ‘osivela mwaaryaanyuno woopaceryani’ woovukuwa, muhiceecheye. Yoheereya emohamoha ni Akristu a mu nsana noopacerya. Yesu haanyanyanle, nave tho harwa aninyanyala. (Wup. 2:4, 7) Oosuwela wi nnanwerya olipiha wanaawiili osivela naaryaahuno woopaceryani nriki mpaceryaru ohuserya eparipari.
4. Tiheeni nnahaalaahu ohuserya mmwaha yoola?
4 Mmwaha yoola nnahaala ohuserya mukhalelo nneeraahu naaceererye osivela wahu ntakhara Yehova ni annihu. Voocharela, nnahaala woona mareeliho makina nnaakhelaahu ni akina tho anaakhelaaya vaavaa nnalipihaahu osivela wahu.
MUNNUWIHE OSIVELA WANYU NTAKHARA YEHOVA
5-6. Makacamiho taani Paulo aahoolenleiye variyari va orummwa awe, nave tiheeni yaamukhavihenrye otitelela omurumeela Yehova?
5 Murummwa Paulo aahipuha okumi woohakalaliha mmuteko wa Yehova, nave aahikhalano makacamiho mancipale aaphwaneleiye ovootha. Ikwaha sincipale Paulo aanapaka mikwaha soorakama, nave mikwaha iho hisaari sookhweya mmahiku yaale. Mmikwaha sawe owo aanahoolela “sawoopiha mmihiceni” ni “sawoopiha sa ampava.” Owo aanakhalihiwa moonanara ni alipa awaakaaha. (2 Ako. 11:23-27) Tahi wi ikwaha soothene annawe yaanathamalela wiilipixerya woothene aapakeiye wi aakhaviherye yaawo.—2 Ako. 10:10; Afi. 4:15.
6 Tiheeni yaamukhavihenrye Paulo otitelela mmuteko wa Yehova? Paulo aahuserya ichu sincipale vooloca sa mikhalelo sa Yehova mu soorempwa nave tho mu saweereya sawe. Paulo aalekecheya wi Yehova aanamusivela. (Aro. 8:38, 39; Aef. 2:4, 5) Owo aahipacerya omusivela vancipale Yehova. Paulo aahooniherya osivela wawe wa Yehova “moorweela wa waakhaviherya ni otitelela waakhaviherya aweela murima.”—Ahe. 6:10.
7. Mukhalelo taani onahaala oneeriha wunnuwiha osivela wahu wa Yehova?
7 Nnanwerya wunnuwiha osivela wahu wa Muluku moorweela wa ohuserya mwawiiseela Masu awe. Vaavaa munamwaalakhanyaanyu Piipiliya, mweererye wiiwexexa tiheeni munahuseryaanyu vooloca sa Yehova. Mwiikohe: ‘Ti mwawiihai makupa yaala anooniheryaaya wi Yehova onnakisivela? Mathowa taani anakeeriha omusivela Yehova?’
8. Ti mwawiihai mavekelo ananikhaviheryaaya wunnuwiha osivela wahu ntakhara Muluku?
8 Mukhalelo mukina nneeraahu naaceererye osivela wahu wa Yehova ori moorweela wa ohula murima ahu wa yoowo wiiliwiili orweela mmavekelo. (Sal. 25:4, 5) Mwawiihiiha, Yehova onahaala waakhula mavekelo ahu. (1 Yoh. 3:21, 22) Kaniya, b murokora mmoha onakhala o Asiya, ooloca: “Osivela waka ntakhara Yehova, woopaceryani waathipelen’ye mmasuwelelo, nyenya waahitepa wunnuwaxa vaavaa konnaaka maakhulo a mavekelo aka. Eyo ennakeeriha opaka ichu seiyo inamusivela Yehova.”
MUNNUWIHE OSIVELA WANYU NTAKHARA AKINA
9. Ti mwawiihai Timotiyu oonihenryeiye wi aahilipiha osivela wawe ntakhara anna ni arokora awe?
9 Mu iyaakha vakhaani amanle okhala Mukristu, Paulo aahimusuwela mmiravo aphaama awiichaniwa Timotiyu. Timotiyu aanamusivela Yehova nave tho aanaasivela achu. Paulo aahiloca ni Afilipi: “Haavo muchu mukina awiiveleela ntoko [Timotiyu] yoowo oni oothokororyeeni moosivela.” (Afi. 2:20) Moone wi va Paulo haalonce sa mavyakelo a Timotiyu ntoko mulipa oorehererya naari ntoko namaloca a miyaha aphaama, nyenya Paulo aakhala ootikhiniheya ni osivela wa Timotiyu ntakhara anna ni arokora. Moohikhwa minikwa miloko seiho Timotiyu aakhaviheryeiye saanaweherya oxekurya wawe moohakalala.—1 Ako. 4:17.
10. Ti mwawiihai Ana ni aiyawe yoonihenryaaya osivela ntakhara anna ni arokora aya?
10 Hiyaano tho ninnaavya mukhalelo wa waakhaviherya annihu ni arokora ahu oomunepani. (Ahe. 13:16) Muthokororye yaweereya ya Ana, yoowo olociwe mmwaha ovirale. Eviraleene epahu ya echeku, owo ni aiyawe yaahixekurya emusi emoha ya Anamoona a Yehova nto yaahoona wi empa aya yaamwaryiwa. Ntoko yookhumelela, emusi hiyaarino soowara saphaama woona wi soothene saasuxaara. Ana ooloca: “Naakuxa soowara saya, ncapa, ninkomaara nave naakookiherya. Wa hiyaano echu neenraahu yaari ekhaani, nyenya yaahipaceryiha onthamwene woolipa ophiyerya olelo.” Osivela wa Ana ni aiyawe ntakhara annaya waahaaceenyerya ovaha nikhaviheryo nawooneya.—1 Yoh. 3:17, 18.
11. (1) Ti mwawiihai wiilipixerya wahu wa wooniherya osivela onaavolowelaaya akina? (2) Mwawiiwanana ni Masiposipo 19:17, ti mwawiihai Yehova onooneiye vaavaa nnooniheryaahu osivela wa akina?
11 Vaavaa nnaakhalihaahu moosivela ni mooreera murima akina, awo ikwaha sincipale annoona wiilipixerya wahu wi ntakiherye mukhalelo wa Yehova wa wuupuwela ni weera ichu. Nave awo ananwerya ovaha esisapo oreera wahu murima opwaha vaavaa nnuupuwelaahu. Kaniya, yoowo olociwe woopaceryani, onnawuupuwela moosivela yaale amukhavihenrye. Owo ooloca: “Kinnaathamalela arokora oothene yaakikuxa wi nalaleerye. Awo yaanakiwopa wi nalye echu vyakala naari almosu nave yaanakihoola owaani mookhapeleleya. Vano kaahoona wi waanachuneya wiilipixerya otokotoko. Awo yaaheerano yeeyo moosivela.” Eparipari wi tahi wi oothene nnahaala othamaleliwa wa seiho niweerenlaahu akina. Kaniya onnaloca wa yaale amukhavihenrye: “Miyaano kaanachuna waakookiherya ichu soothene saphaama akeerenlaaya, nyenya nkinasuwela mapuro anakhalaayawo. Nto, Yehova onnaakookiherya, nave miyaano kinnavekela wi apwahiherye waakookiherya mwa seiyo akeerenlaaya.” Kaniya ookhalano mathowa aphaama. Yehova onnasuwela ophiyerya echu ekhaani nnaweerelaahu akina mooreera murima. Owo onnoona yeeyo ntoko mukucho wasisapo ni evaale yeeyo owo onahaaleiye oliva.—Mwaalakhanye Masiposipo 19:17.
Vaavaa muchu onayeiye vahoolo omunepani, owo onnaavya mikhalelo sa waakhaviherya akina (Moone eparakrafu 12)
12. Ti mwawiihai anna anahaalaaya wooniherya osivela ntakhara muloko? (Moone tho eruku.)
12 Waakhanle wi mwa munna, ti mwawiihai muneeraanyu mooniherye osivela wa anna ni okhala ooreheryeya wi mwaakhaviherye? Mmiravo mmoha awiichaniwa Xortani aahimukoha mutokweene a mmulokoni echu taani aaphwaneleiye weera wi akhaviherye mulokoni. Mutokweene yoole aahimuthamalela ntakhara oya vahoolo aapankeiye, nave voocharela aahimvaha malakiheryo sa ichu aaphwaneleiye weera. Ntoko yootakiherya, aahimvaha malakiheryo wi aphiyeke woosiilo o Empa ya Omwene ni waamwenyerya akina, apakeke makupa mmithukumanoni, olaleerya mookilaatheya nnikhuuru nawe na muteko woolaleerya ni aaxeke mikhalelo sawooneya sa waakhaviherya akina. Nyenya vaavaa Xortani aaphariheleiye malakiheryo yaala, owo haamoona ohuserya mavyakelo mavyaani, nyenya tho aanaaceererya osivela wawe ntakhara anna ni arokora awe. Xortani oohuserya wi vaavaa munna onathanliweiye okhala murummwa oorumeela, tahi wi onampaceryaru waakhaviherya akina, ohiya yeeyo, owo onamutitelela weerano yeeyo.—1 Tim. 3:8-10, 13.
13. Ti mwawiihai osivela omukhavihenryaaya munna awiichaniwa Kristiani okookela orumeela ntoko mutokweene?
13 Hanka waakhanle wi nyuwaano moorumeela ntoko mutokweene naari murummwa oorumeela khalai? Yehova onnuupuwela muteko yoowo mphanraanyu khalai ni osivela yoowo wooceenyenryeeni weera. (1 Ako. 15:58) Owo onnoona osivela munatitelelaanyu wooniherya. Munna mmoha awiichaniwa Kristiani aahitepa onyeenyeya vaavaa aahin’yeiye orumeela ntoko mutokweene. Naamwiihiiha, owo ooloca: “Kaahilakelela opaka soothene kaaweryaaka wi kimurumeele Yehova moosivela, moohipwacha kaarino murici naari hooye.” Moovira wa elukuluku, owo aahithanliwa wanaawiili okhala mutokweene a mmulokoni. Kristiani onneemererya: “Miyaano kaarino nchuno navakhaani na ochuna okookela orumeela. Nyenya kaahilakelela wi waakhanle wi Yehova moorweela wa ikharari sawe, ookeemererya orumeela ntoko mutokweene, miyaano kaahaala opaka eyo wa nthowa na waasivela waka anna ni arokora.”
14. Tiheeni muhusenryaanyu moorweela wa yaweereya ya murokora onakhala o Xorxiya?
14 Nave tho alapeli a Yehova annooniherya osivela waya wa amwaacamani aya. (Mat. 22:37-39) Ntoko yootakiherya, Elena, murokora o Xorxiya, ooloca: “Wuupaceryani, echu emoha yaakiceenyerya olaleerya waari omusivela waka Yehova. Nyenya mu elukuluku yeeyo osivela waka ntakhara Tiithi aka a wirimu wunnunwaaya, osivela wa achu waahunnuwa tho. Nyenya kaaheererya wuupuwelela makacamiho ahoolenlaaya ni mwaha taani waahaala otannya murima aya. Elukuluku kuupuwelelaka sa yaawo mmukhalelo yoola, kaanaavya mukhalelo wa waakhaviherya.”—Aro. 10:13-15.
MAREELIHO YAAWO ANARWA MU WOONIHERYA OSIVELA WA AKINA
Eneneeryo vyakala ya wooniherya osivela enanwerya oruuha mphurelo wa achu ancipale (Moone iparakrafu 15-16)
15-16. Ntoko enooniheryiwaaya va eruku, mareeliho taani enakhalavo moorweela wa waasivela akina?
15 Vaavaa nnawooniheryaahu osivela annihu, tahi wi awo anaphura meekhaaya. Vaavaa yaapacenryaaya epahu ya Koronaviru munna mmoha awiichaniwa Paulo ni mwaariye yaahaakhaviherya arokora awunnuwelavo opharihela ikhankoonya saya wi evahe onamoona. Murokora mmoha woopaceryani aarino makacamiho a opharihela ekhankoonya awe wuukuchulani aahiwerya opharihela. Yene aari ooreheryeya opharihela ekhankoonya awe wi aawope amusi awe ntakhara Yawuupuxerya. Akina a yaawo awaakhwana 60 yaahoonela moorweela mu vitiyu-konferensiya! Murokora yoola vamoha ni emusi awe yaahiphura vancipale ntakhara wiilipixerya wa munna Paulo ni mwaariye. Ohoolo waya, owo aahimurepela Paulo: “Kinnathamalela onihusiha wanyu hiyo awunnuwelavo. Nkirwa kicuwala opwacha wa Yehova ni wiilipixerya mpankaanyu.”
16 Saweereya ntoko seiha soomuhusiha Paulo nihusiheryo noochuneya. Eyo yaahimuupuxerya wi osivela, echu yoochuneyaxa opwaha masuwelelo naari mikhalelo sooyariwano. Owo onnuupuwela: “Miyaano kaanalapa ntoko ooweherya a ekulucu. Hiihaano, kinnaroromela wi, naamwi alaleeryi ecuwanle miyaha kaapakaaka, awo annatitelela wuupuwelela nikhaviheryo nawooneya kaavanhaaka.”
17. Taani tho anahaala ophura vaavaa nnooniheryaahu osivela?
17 Vaavaa nnooniheryaahu osivela wa akina, hiyaano ninnaphura mukhatiihu mmukhalelo yoowo naahaanyiheryaahu. Yonatani yoowo onakhala o Nova Zelândia, onneemererya yeeyo. Waari othana wa nihiku Nooworowa oviha otempe, aamoona piyoneero mmoha avahaka onamoona mmuxeweni. Yonatani aahilakelela olapa vamoha ni piyoneero yoole mu othana wa nihiku Nooworowa noocharela. Mu elukuluku yeeyo owo haasuwela mukhalelo owo aahaaleiye ophura ni yamahala yeela ya osivela. Yonata onneemererya: “Mu elukuluku yeele ya okumi aka, miyaano nkaasiveliwa ni muteko woolaleerya. Nyenya vaavaa kiiwaaka mukhalelo wa ohusiha wa piyoneero yoole, kaanoona wi ohusiha wawe waanakumiherya sawiima, nave ela yaahikikhaviherya okhalano osivela weeparipari mmuteko yoola. Koophura moorweela wa okhalano nthamwene yoowo okikhavihenrye wunnuwa omunepani, opuha muteko woolaleerya ni okhala awaacameleya ni Yehova.”
18. Tiheeni Yehova onachuneiye wi neere?
18 Yehova onachuna wi oothene ahu ninnuwihe osivela wa yoowo nave tho ni wa akina. Ntoko nihusenryaahu, nnanwerya olipiha osivela wahu wa Yehova moorweela wa waalakhanya Masu awe ni wuupuwelela vooloca sa yeeyo naalakhannyaahu ni oloca ni yoowo moohihiyererya mu nivekelo. Nnanwerya winnuwiha osivela wahu wa annihu ni arokora, moorweela wa waakhaviherya mmukhalelo wawooneya. Vaavaa osivela wahu onannuwaaya, nnahaala okhala awaacameleyaxa ni Yehova vamoha ni emusi ahu yoomunepani. Nnahaala opuha onthamwene okhala wookhala!
NCIPO 109 Osivela Onarweela Vathi va Murima
a Moohipwacha waakhanle wi na avyaani mu eparipari naari nnamurumeela Yehova mu iyaakha sincipale, oothene ahu nnaphwanela otitelela wunnuwa omunepani. Mwaha ola onahaala oloca sa mukhalelo woochuneya wi neere: Winnuwiha osivela wahu wa Yehova ni wa akina. Vaavaa munuupuwelelaanyu sa mwaha yoola, muthokororye wunnuwa wanyu mu osivela, nave yeeyo munaphwanelaanyu weera wi munnuwihe.
b Masina makina aatorokiwa.