Mukhalelo itixolo saapakiwaaya khalai sinnakhaviherya soorepa sa Piipiliya
Ti mwawiihai itixolu saaphwanyiwe mu Papulu akhalai ni mukhalelo saapakiwaaya inakhaviheryaaya miyaha sa Mpiipiliyani?
ALIPA ootholathola miyaha yaahoona wi mu Papulu akhalai yaahiphwanya itixolu sincipale sawooxiwa seiho saaphariheliwe wi etekiweno epooma ni cukucha. Mwawiiwanana ni Robert Koldewey itixolu seiha sooxiwe “ocai wa epooma” weiwo echaya eri yaphaama ni ikhuuni. . . sawaaca.
Alipa ootholathola alonce wi aaphwanya sawooniherya inavaha onamoona wi anamuteko oomwene wo Papulu yaanampharihela cukucha yoola wi epake ichu sawoopiha. Paul-Alain Beaulieu muhusiha mmoha a Assiriologia a Exikola ya Vasulu o Toronto, ooloca: “Soorepa so Papulu sinnooniherya wi mwene aahilamulela wi yaale yaahiiwelela naari yooniherya ohicicimiha ichu saweela yaaphwanela ovonyeriwa mu cukucha wi evye mwemmo.” Muchaka mmoha wa mmahiku a mwene Napukotonosori yaanaphwanyeya masu ala: “Mwaatoloxe, nweeyele, nwoose, mwiisi aya ene orukureryeke. Nwoseke ntoko mulipa awoosa inama oneereiye, muruuhe makuchuwelo aya oovarela ntoko makalume awoopiha.”
Ela ennawuupuxerya alipa oomwaalakhanya Piipiliya vooloca sa saweereya inaphwanyeya mu Taniyeli ekapitulu 3. Mwawiiwanana ni soorepela seiha sa miyaha, Mwene Napukotonosori aahitikitherya eruku etokweene yeeyo yaapakiwe ni ewooro va mureyareya wo Tura, ocai wa epooma yo Papulu. Vaavaa amiravo araru yaari Ahepri yiichaniwa Satraki Mesaki ni Apitineku yaakhoncaaya olapela eruku, Napukotonosori aatepa onyeenyeya, alamulela wi atitheeriwe cukucha waaceereriwe mooro mucukuchani “ikwaha thanu napiili opwaha mahiku makina.” Aalamulela wi amiravo yaala ‘yariheliwe mu mucuchani yoole oovihaxa.’ Nave munkeelo akuru aahaavuluxa.—Tan. 3:1-6, 19-28, PMM.
© The Trustees of the British Museum. Licensed under CC BY-NC-SA 4.0. Source
Etixolu yawooxiwa nrempwevo nsina na Napukotonosori
Itixolu so Papulu sinnavaha onaamoona soorepa sa Mpiipiliyani. mu itixolu sene seiho sinnaphwanyeyamo masu oorempwa emucicimihaka mwene. Masu mamoha a soorepa seiho ani: “Napukotonosori Mwene o Papulu . . . Vaate va mwene, nipuro nenlo kinakhalaakavo, ovuwa yoowo kitenkaaka . . . Wi muyareriwo aka olamulele okhala wookhala.” Masu yaala annaphwanaphwana ni masu yaawo anaphwanyeya mu Taniyeli 4:27, PMM; 4:30, TNM, vaavaa Napukotonosori iirumiheiye: “Epooma ela ya oPaapulu yootepa winnuwa! Kooteka yeeyo ni owerya waka wi ekhale epooma yoomwene aka wi kiwoonihe achu ikuru saka ni ncicimiho naka.”
