Apapa aka yaari pastore a ekerexa Unita yo Kanata, mwawiihiiha, a namurunku oothene wooxixelo ekerexa yaanaahusiha anamwane nave awo yaananruma miyaano ni murokora wi nahusihiwe. Voocharela mu elukuluku ya 11:00 naanakhala vamoha wi niwiriyane miisa mu ekerexa. Othana, naanaya mu Empa ya Omwene vamoha ni amama. Waari wookhweya woona mookwakwaleya ohiyana waarivovo variyari va malapelo yaala meeli.

Amama yaahaaleela asinthamwene aya Bob ni Marion Hutcheson yeeyo yaahuseryaaya navetho awo yaaheemererya eparipari. Mu 1958 mutheli owo vamoha ni anaawe araru yaahikikuxa wi noonele muthukumano wa ekulucu ni ilapo ikina wa mahiku mathanu nararu waarino muru Yookhwela Yaweela mu epooma ya o Nova York. Olelo, kinniiwexexa wi kaahaavaha muteko muncipale nthowa na okikuxa mmukwaha yoole, nyenya muthukumano ole waari wavameekhaaya mu okumi aka.

Mu omiravo aka, miyaano kaakhala mpuro yoowo yaaphwanyeyamo axinama ancipale nave kaanasiveliwa waakhapelela yaawo. Nave miyaano kaahuupuwela ohuserya wi kikhale mulipa a waakhapelela axinama. Amama yaaloca sa yeeyo ni mutokweene mmoha a muloko. Owo moosivela aahikuupuxerya wi nnakhala “mmahiku ookuchula”, nave wi oya mu exikola yeeyo enamaliha iyaakha sincipale yaahaala onanariha  onthamwene aka ni Yehova. (2 Tim. 3:1) Mwa yeeyo, kaahilakelela ohiya mu exikola yavasulu.

Miyaano nlelo kaanuupuwela yeeyo kaahaalaaka weera vaavaa keeraka kimmalihe 12 kalaasi. Naamwi kaaya mmuteko woolaleerya isumana soothene, nkaasiveliwa olaleerya, nkiisoona okhala piyoneero. Mwa yeeyo, apapa ni atiiyu yahaari Anamoona a Yehova yaanakiceenyerya wi kilapeke elukuluku yoothene mu kompanyiya a esekuru o Toronto. Atiiyu yaahikhalano muteko woochuneya weiwo nave kaaheemererya muteko.

O Toronto, miyaano kaanalapa vancipale nave kaanamaliha elukuluku yincipale ni achu yaawo yahaari Anamoona a Yehova. Eyo yaahaakanyerya oya waka mmithukumano ni mmuteko woolaleerya. Woopaceryani kaakhala ni avovo yaawo yahaari Namoona a Yehova, nave emanle okhwa, miyaano kaanachuna nipuro nikina wi kikhalekevo.

Mutheli Hutchesons, yoowo aakikunxe mmuthukumano wa 1958, yaari ntoko asitiithi aka. Awo yaahikiwopa wi kikhaleke ni yaawo nave yaahikikhaviherya oya vahoolo mmakupa oomunepani. Mu 1960, miyaano vamoha ni mwanaya Yohani naahipatisiwa. Yohani aahipacerya orumeela ntoko piyoneero, eyo yaakeeriha waaceererya mvai aka mmuteko woolaleerya. Anna a mmulokoni yaahoona oya waka vahoolo, nave moovira wa elukuluku kaathanliwa ntoko Murummwa a Exikola ya Orummwa Woomuluku. a

Mu 1966, kaamuthela Randi Berge, piyoneera amvai yoowo aari ooreheryeya orumeela weiwo waariwo othowa otokweene. Ooweherya ahu a ekulucu aahinilipiha ni onceenyerya wi nithaamele o Oriliya, Ontariyu wi nakhaviherye. Nave naahirehererya maala ahu nave ncimula.

Vaavaa naaphin’yaahu o Oriliya, kaahipacerya orumeela ntoko piyoneero a elukuluku yoothene vamoha ni Randi, mvai awe waahikiceenyerya. Kimanle wiilipixerya wi kikhale piyoneero aphaama, kaapacerya woona ohakalala moorweela wa ompharihela Piipiliya wi kaakhaviherya achu ohuserya eparipari. Yaari ekari etokweene owerya omukhaviherya mutheli mmoha oosiveliwa o Oriliya, opaka matorokelo matokweene mu okumi awe ni okhala mulapeli a Yehova.

Mu elukuluku naamuxekuryaahu Toronto, naahikumana ni munna Arnold MacNamara, yoowo aari mmoha a anna yaahoolela o Peteli. Owo aahikikoha waakhanle wi naamusiveliwa orumeela ntoko mapiyoneero avameekhaaya. Mu elukuluku ene yeeyo kaahaakhula: “Mu nipuro nri noothenene ohiya o Kepeki.” Miyaano kaahivoloweliwa ni nthalu nenlo achu o Kanata yaawo yaaloca Enklesi, yaaraayano ni achu o Kepeki yaawo yaaloca Efransa. Mu elukuluku yeele, waahikhalawo waakanyeryeya wa epoliitika yeeyo yaachuna wi eprovinsiya yo Kepeki ekhale yoovalaanyeya ni Kanata.

Munna Arnold aahaakhula: “Nipuro nimoha efiliyale enaarumihelaayawo mapiyoneero avameekhaaya mu elukuluku yeela ti o Kepeki.” Miyaano kaaheemererya mwawaakuveya oyawo. Nave kaasuwela wi Randi aakhalano nchuno ntokweene na orumeela weiwo. Voocharela, kaahoona wi ela yaari yoothanla yaphaama mweekumini mwahu!

Nimanle ohuserya Efransa variyari va isumana thanu, miyaano ni Randi vamoha ni mutheli mukina, naahiya o Rimouski, yoowo orakamelanne ni Montreal mastatiya awaakhwana 540. Nlelo niiso nihaakhwanihaka oloca phaama Efransa, ela yaahooneya vaavaa kaalakhanyaaka yoolokoha mmithukumano. Kilokohaka muthukumano wa muceche woocharela, kaahaakanyerya masu, ohiya oloca wi naahaala owaakhela “anna o Australiya,” kaalonce wi, naahaala “oxekuryiwa ni mipisa.”

O Rimouski, naahaakhela nikhaviheryo na arokora axexe yaawo yaari aciye ni amvai navetho echoko Huberdeaus, yaawo yaarino anamwane eeli aasithiyana. Mutheli Huberdeaus yaahaalukaara empa etokweene yeeyo mapiyoneero oothene yahaalaaya okhalakamo. Mapiyoneero yaanakhaviherya olivela empa. Hiyaano naaniichana Empa Yaweela, nthowa nawi empa yoothene yaapintaariwe ni ekoore yaweela. Achu naakhala mwemmo naari variyari va 12 ni 14. Ntoko mapiyoneero avameekhaaya, miyaano ni Randi naanalaleerya wooxiixelo, othana, ni osekuwa, mwawiihiiha, naanathamalela vancipale nthowa nawi ilukuluku soothene naanakhalano muchu yoowo aanihoola mmuteko woolaleerya, naamwi mu ilukuluku sooriiryaxa oxekuwa.

Naahikhala asinthamwene awaacameleya ni mapiyoneero yaawo, nave ophiyerya wi awo yaahikhala ntoko emusi ahu. Ikwaha ikina naanakiraathi vamoha nooraka mooro naari naanathanla nihiku wi naapeye vamoha. Munna mmoha aanasuwela omoopa viyola nave a Nawoorowa ohiyu naakhala vamoha wi niipe ni wiina.

Achu ancipale o Rimouski yaanooniherya nchuno vooloca sa Piipiliya. Mu iyaakha thanu naahikhalano ekari ya owoona oohuserya a Piipiliya ancipale eyaaka vahoolo ni opatisiwa. Muloko waahunnuwa ophiyerya okhalakano alaleeryi awaakhwana 35.

O Kepeki, naahaakhela ovyakiha waphaama ntakhara muteko woolaleerya. Nohoona mukhalelo Yehova onikhavihenryeiye mmuteko woolaleerya ni mu soothowa sahu soomwiilini. Ohiya yeeyoru naahihuserya tho waasivela achu a mukuma yoole, sookhovelela saya ni elocelo aya ya Efransa. Eyo yaahinikhaviherya tho osivelaka sookhovelela sa ilapo ikina.—2 Ako. 6:13.

Mu elukuluku nahaawehereryaahu, efiliyale yaahiniveka wi nthaamele o epooma yo Trakatiye, enakhala oxerexerye wa ephareya ya o Nova Brunswick. Weerano yeeyo naari nikacamiho, woona wi hiyaano, niiso nimanle waalukaara empa, nave miyaano, kaahaasinaara ekontaraatu wi kilapeke mu iwora savakhaani mu esumana ntoko purusoore mu exikola yammoori. Ohiya yeeyoru, akina a oohuserya ahu a Piipiliya yiiso emanle okhala alaleeryi oohipatisiwa, nave hiyaano naari veeri va oteka Empa ahu ya Omwene.

Hiyaano naahivekela vancipale omakuchuwelo wa esumana nave naahixekurya epooma yo Trakatiye, yeeyo yaari yoohiyana ni Rimouski. Naahuupuwela wi, woona wi Yehova onachuna wi niye weiwo, nnahaala oyawo. Hiyaano naahimweererya Yehova nave  naahoona mukhalelo owo aaviihaleiye sawuukhula mu okumi ahu. (Mal. 3:10) Woona wi Randi aahikhalano onthamwene woolipa ni Yehova, aanachuna orumeela, nave aari muchu ootheya, othaama waari wookhweya.

Muloko ahu muvyaani waarino mutokweene a mmulokoni mmoha nave iichaniwa Robert Ross. Owo aahirumeela weiwo ntoko piyoneero ni mwaariye Linda, nave awo yaahilakelela okhala weiwo emanle omuyara mwanaya oopacerya. Naamwi emphuwaka mwanaya mukhaani, awo yaahititelela okhala amvai mmuteko woolaleerya, nave yaari achu oowaakhela aleco, eyo yaari echu yaanilipinhe vancipale.

Nimanle orumeela ntoko mapiyoneero o Trakatiye mu iyaakha piili, yaaheereya echu ekina yootikhiniha—naahiwompwa orumeela mmuteko wa weeceeca. Mu iyaakha thanu napiili, naahirumeela mu ikulucu soohiyanahiyana sa elocelo ya Enklesi, nave voocharela, naahithanliwa wi narumeele mu ekulucu ya elocelo ya Efransa, o Kepeki. Ooweherya ahu a etistritu o Kepeki, Léonce Crépeault, wiiliwiili aanathamalela miyaha saka. Nyenya ohoolo waya owo wiiliwiili aanakikoha: “Mmukhalelo taani mwaahaalaanyu weeriha mwaha anyu okhala wootannyaxa murima?” b Nchuno nawe na okikhaviherya naahitoroka soothene wi keerihe wi miyaha saka sikhalekeno yootaphulela ni wi sikhaleke sookhweya wiiwexexa.

Emoha ya itisikinasawu kinuupuwelaaka wiiliwiili moopwacha, yaari yeeyo kaaraakano o Muthukumano wa Elapo Yoothene, “Nroromelo Noovootha,” o Montreal mu 1978. Miyaano kaalapa mu etepartamentu yeeyo yaarehererya yoolya. Naanaawehererya achu awaakhwana 80.000, nave niiso nimanle waakhela sooleeliherya ivyaani vooloca sa mukhalelo wa ophara muteko yoola. Soothene saari ivyaani, ntoko ikaruma, yeeyo naahaalaahu orehererya, ni mukhalelo wa orehererya. Hiyaano naahikhalano akonxelatore 20 atokweene, nave ikwaha ikina hiyaalapa phaama. Wa nthowa na poola aavonyiwawo, hiyaano pahi naawenrye ovolowa ostaatiyu wi nrehererye soothene, oyaaka nuuxa wa nihiku na muthukumano wa muceche. Naaphwanela wiiseela mooro nsuwa nihaakumve okhuma wi nimurehererye chaaya. Hiyaano naahivelavela nyenya miyaano kaahuserya vancipale ni alipa awiiveleela awiichwelavo yaawo yaalapa vancipale ni yooniherya otheya. Asinthamwene naapankaahu o muthukumano yoole wa muceche aaphiyerya olelo. Wa hiyaano yaari yoohakalalihaxa ophwanyeya mmuthukumano yoole wa muceche wa vameekhaaya o Kepeki, muceche yoowo waariwo wiikariwa otokweene mu iyaakha sa 1940 ni 1950!

Ni anna oohiyanahiyana yaawo yaakhapelela ikupweete sa mithukumano mitokweene sa miceche. Mu eyaakha emoha, munna David Splane, yoowo vano  onarumeela mu Nikhuuru Noolamulela, aari ooweherya a muthukumano wa muceche. Mmuthukumano mukina wa muceche, vaavaa kaathanliwaaka wi kikhapelele makupa yaawo, munna David aahivahererya nikhaviheryo noothene.

Mu 2011, nimalinhe iyaakha 36 mmuteko ahu woohakalaliha wa weeceeca, voocharela kaawompwa wi kikhale muhusiha a Exikola ya Atokweene a Muloko. Mu iyaakha piili, mu etisikinasawu yeela, miyaano ni Randi naahikona mu ikaama sawaakhwana 75 soohiyanahiyana, nyenya wiilipixerya wahu waakhalano mphurelo. Omakuchuwelo wa isumana soothene sa exikola, atokweene a muloko yaanatannyeya murima nave yaari oothamalelaxa va woona mukhalelo Nikhuuru Noolamulela nuukhuwaaya ni mukhalelo aya woomunepani.

Ohoolo waya, kaakhala Muhusiha a Exikola ya Alaleeryi a Omwene. Ikwaha sincipale anaskoola yaanakhala oovelavela ni awuukhuwa wa nthowa na okhala ooweiwa: Awo yaanamaliha iwora thanu napiili mahiku oothene ehuseryaka, iwora raru empakaka t.p.c oxekuwa ti oxekuwa, ni orehererya makupa maxexe naari mathanu va esumana. Miyaano ni muhusiha mukina naahithariha wi awo hiyaahaala owerya weerano yeeyo ehirino nikhaviheryo na Yehova. Miyaano ilukuluku soothene kinahaala wuupuwelaka mukhalelo oohuserya yaatikhiniheyaaya mu osuwela wi moorweela wa omuroromela Yehova, awo yaanawerya opaka sincipale opwaha mummo yuupuwelaaya.

Opwacha yoowo amama yooniheryaaya wa akina, waaheeriha wi oohuserya aya akina oya vahoolo omunepani ophiyeryatho wi yaaheeriha wi apapa etoroke mukhalelo yoonaaya eparipari. Mahiku mararu ohoolo waya amama emanle okhwa, naahikhala ootikhiniheya apapa woonela mwaha wa achu oothene mu Empa ya Omwene, nave awo yaahititelela woonela mithukumano mu iyaakha 26 soocharela. Naamwi apapa aka yahaapatisiwe, atokweene yaakileela wi awo ilukuluku soothene yaakhala oopacerya ophiya mmithukumano esumana ti esumana.

Amama aka tho yaari yootakiherya yaphaama wa miyaano ni arokora aka araru. Awo ni asiiyaya annamurumeela Yehova moororomeleya. Apiili a yaawo anarumeela opeteli, mmoha o Portukale nave mukina o Haiti.

Miyaano ni Randi nnarumeela ntoko mapiyoneero avameekhaaya o Hamilton, Ontariyu. Vaavaa naalapaahu mmuteko wa weeceeca, naanasiveliwa waahoola akina mu sooxekurya saya ni soohuserya saya sa Piipiliya. Vano ninnahakalala owoona oohuserya ahu eyaaka vahoolo mmakupa oomunepani. Mmuloko ahu muvyaani, hiyaano ninnakhala awaacameleya ni anna, nave ninnalipiheya woona mukhalelo Yehova onaakhaviheryeiye yaawo, mu ilukuluku saphaama ni sookacamiha.

Naawehaka muculi, ninnathamalela vancipale opwacha yoowo achu yoonihenryaaya wa hiyaano. Wa nthowa na yeela, ninneererya wooniherya “wuukhuwa . . . weeparipari” ntakhara akina, naalipihaka yaawo nthowa na wiilipixerya waya mmuteko wa Yehova. (2 Ako. 7:6, 7) Ntoko yootakiherya, mu emusi emoha, maayi, mwanawe mmoha amwaamulopwana ni amwaamuthiyana yaari mmuteko wa elukuluku yoothene. Miyaano kaahimukoha mutheli waakhanle wi owo aahuupuwela okhala piyoneero. Nave owo aaloca: “Miyaano kinnaakhaviherya mapiyoneero araru.” Miyaano kaamukoha: “Apwanne nikhaviheryo munaavahaanyu ti naphaamaxa opwaha na Yehova?” Kaahimuceenyerya wi owo aaphwanela okhalano ohakalala yoowo awo yaaraayano. Miyeeri mithanu nammoha ohoolo waya, owo aahipacerya orumeela ntoko piyoneero.

Miyaano ni Randi nnahaala otitelela oloca saweereya ni mareeliho a Yehova wa anamwane ahu a muhoolo nave ninnaweherya wi awo anahaala okhalano ohakalala wawaaca mu omurumeela Yehova hiihaa ntoko hiyaano nryaahuno.—Sal. 71:17, 18.