MWAHA WOOHUSERYA 26
“Kookelani wa Miyo”
“Kookelani wa miyo nave miyo tho kinarwa kookookelaani nyuwo.”—MALAK. 3:7.
NCIPO 102 “Wakhaviherya Alipa Óthoiwa”
YEEYO NNAHAALAAHU OHUSERYA *
1. Yehova onoona hai vaavaa epucepuche awe enakookaaya?
HIIHAA ntoko nthokoronryaahu mmwaha ovirale, Yehova mwaneene onniilikanyiha ni mukukhula yoowo onakhapelela epucepuche aye eri yoothene. Nave owo onnamwaavya muchu ti muchu orimeenle. Yehova aahaaleela Aisarayeli yaawo yaamuhin’ye ariki: “Kookelani wa miyo nave miyo tho kinarwa kookookelaani nyuwo.” Hiyo noosuwela wi nlelo Yehova onoona mmukhalelo mmohamoha nthowa nawi ooloca: “Nkinaakakhanya yooloca aka.” (Malak. 3:6, 7) Ophiyerya wi Yesu aaloca wi Yehova ni ankeelo annahakalala vaavaa anamoonaaya mulapeli yoowo aarimenle akookelaka wa Yoowo.—Luka 15:10, 32.
2. Tiheeni nnahaalaahu othokororya mmwaha yoola?
2 Hankooni nthokororye maphwanaphwaniho mararu a Yesu yaawo anooniherya ochuneya waya waakhaviherya yaale amuhin’ye Yehova. Nnahaala othokororya makhalelo mararu avameekhaaya yaawo nnaphwanelaahu okhalano wi nikhaviherye ipucepuche soorimeela okookela wa Yehova. Nave nnahaala woona ntakhara heeni oryaaya woochuneya wiilipixerya wi naakhaviherye yaale ari ooceecheya.
WAAVYA EKHOROWA YOORIMEELA
3-4. Ntakhara heeni muthiyana yoowo onalociwa mu Luka 15:8-10, aahaavya moopwacha ekhorowa awe yeeyo yaarimenle?
3 Nnaphwanela olapa mwakuru wi naaphwanye yaale anachuna okookela wa Yehova. Mu niphwanaphwaniho nnaphwanyeya Mmichaka sa Luka, Yesu oothariha mukhalelo muthiyana onaavyeiye echu yasisapo yaarimenle—ekhorowa ya eparata. Echu yoochuneya mu niphwanaphwaniho nenla ori mukhalelo muthiyana onaavyeiye ekhorowa awe.—Mwaalakhanye Luka 15:8-10.
4 Yesu onnathariha mukhalelo muthiyana aahakalanleiye vaavaa aaphwannyeiye ekhorowa yasisapo yeeyo yaarimenle. Mu elukuluku ya Yesu, asimai yaawo yaari Ayuta yaanamvaha mwanaya mwaamuthiyana ikhorowa khumi mu nihiku na otheliwa wawe. Woonaru, ekhorowa eyo yaari yavameekhaaya nthowa nawi muthiyana owo aavahiwe ni amamaawe mu nihiku na otheliwa wawe. Muthiyana aaroromela wi ekhorowa ele yaamorenle vathi. Mwawiihiiha aapaciha epanthi avarerya moorukurerya, nyenya haawenrye woona. Haawenrye woona ekhorowa nthowa nawi epanthi awe hiyaarya phaama. Vookuchula, aavela mu empa yoothene aavyaka. Vachayani vaavale, owo aahoona ekhorowa awe yoochuneya, yaaryaka ni omwaleela wa epanthi awe. Muthiyana aahihakalala vancipale vaavaa aaphwannyeiye! Owo aawiichana asinthamwene ni amwaacamani wi aaleele muchaka woohakalaliha.
5. Ntakhara heeni onamukhala woovila waaphwanya yaale ahin’ye muloko?
5 Ntoko nonnaahu mu niphwanaphwaniho na Yesu, onachuneya olapa mwakuru wi niphwanye echu vyakala yeeyo yaarimenle. Moolikana nnaphwanela olapa mwakuru wi niwaavye yaale ahin’ye muloko. Akhweya inamviravo iyaakha ovinyerya vaavaa ahin’yaaya othukumana ni hiyo. Ophiyerya wi ananwerya othaamela mmuceche mukina weiwo anna ahaasuwenlaaya. Nyenya naamwi hiihaa, nnaphwanela ororomela wi ooceecheya ntoko yaawo annachuna okookela wa Yehova. Awo annachuna omurumeela Yehova vamoha ni emusi awe ya alapeli oororomeleya, nyenya annachuna nikhaviheryo nahu.
6. Achu oothene a mmulokoni eni ekhaviherye hai mu owaavya ooceecheya?
6 Taani onaphwanela okhaviherya owaavya ooceecheya? Oothene ahu—atokweene a mmulokoni, mapiyoneero, achu aveemusini, alaleeryi—ananwerya okhaviherya mu owaavya ooceecheya. Apwanne mookhalano nthamwene naari mmusi anyu yoowo ori ooceecheya? Apwanne mohintoko omphwanya ooceecheya mmuteko woolaleerya wa empa ni empa naari mpakaka onamoona wa vanlakani? Mmutharihele muchu owo wi wakhala wi aahaala osiveliwa oxekuryiwa, nyuwaano munamuhakalala waaleela atokweene anyu a vanipuroni weiwo onakhaleiyewo naari numero nawe na telefoni.
7. Tiheeni muhusenryaanyu orweela wa yaweereya ya mutokweene mmoha awiichaniwa Thomas?
7 Atokweene aakhalano murici mutokweene wa waakhaviherya ooceecheya yaawo anachuna okookela wa Yehova. Awo eni yeereno hai? Moone masu a mutokweene mmoha oniichaniwa Thomas. * Owo onakhala o Espanya nave ohaakhaviherya Anamoona opwaha 40 okookela mmulokoni. Thomas ooloca: “Voopacerya, kinnaakoha anna ni arokora oohiyanahiyana yaawo asuwenle mpuro muchu ooceecheya onakhaleiyewo. Naari kinnaakoha alaleeryi waakhanle wi aamusuwela munna naari murokora yoowo ohinaphiya mmithukumanoni. Ancipale mmulokoni annahakalala okhaviherya nthowa nawi anniisoona opaka makupa mu owaavya ooceecheya. Voocharela, vaavaa kinaaxekuryaaka anna naari arokora ooceecheya, kinnaakoha vooloca sa anaaya ni amusi aya. Ooceecheya akina yaanaaruuha anamwane aya mmithukumano, nave anamwane awo akhweya yaari alaleeryi mu elukuluku ekina. Anamwane awotho anaphwanela okhaviheryiwa wi ekookele wa Yehova.”
MWAAKOOKIHE ANAMWANE A YEHOVA YAAWO ARIMEENLE
8. Mu niphwanaphwaniho na mwaana oorimeela, nenlo nnaphwanyeya mu Luka 15:17-24, tiithi aamukhalinhe hai mwanawe yoowo ocharunwe?
8 Makhalelo taani nnaphwanelaahu okhalano wi niwerye waakhaviherya yaale anachuna okookela wa Yehova? Moone echu yoochuneya nnaphwanelaahu ohuserya orweela mu niphwanaphwaniho na Yesu na mwaana oorimeela yoowo aapwanhevo vaate. (Mwaalakhanye Luka 15:17-24.) Yesu oothariha wi mwaana aahisuwela wi aahipaka sa ololo nave aahilakelela okookela owannyawe. Tiithi aachimaka wi akumane ni mwanawe nave aamukhupaarela, ophiyerya wi mwaana aasuwela wi atiithi awe annamusivela. Mwaana aari awuukhuwa nthowa na yeeyo aapankeiye ophiyerya aanuupuwela wi hanaphwanela okhalihiwa ntoko mwaana a vaate. Tiithi aahooniherya niphwanya wa mwanawe, yoowo aalonce mukhalelo ooneiye. Voocharela tiithi aahipaka echu wi amooniherye mwanawe wi aahimwaakhela ohiya ntoko kapuro, nyenya mwaana oochuneya a veechokoni. Wi ooniherye omwaakhela ni omukhurumuwela, tiithi onnarehererya efesta nave onnamvaha yoowara yaphaama mwanawe yoowo ocharunwe.
9. Makhalelo taani nnaphwanelaahu okhalano wi niwerye waakhaviherya ooceecheya okookela wa Yehova? (Moone ekaaxa “ Nni Naakhaviherye Hai Yaale Anachuna Okookela wa Yehova?”)
9 Mu niphwanaphwaniho nenla Yehova ori ntoko tiithi. Owo onnaasivela anna ni arokora ahu yaawo ari ooceecheya nave onachuna wi ekookela wa yoowo. Nimutakiheryaka Yehova, nnanwerya waakhaviherya ooceecheya okookela wa yoowo. Wi neereno yeela, nnaphwanela wooniherya opisa murima, niphwanya, ikharari, ni osivela. Ntakhara heeni nnaphwanelaahu wooniherya makhalelo yaala avameekhaaya, nave nni neereno hai?
10. Ntakhara heeni nnaphwanelaahu okhala oopisa murima wi nimukhaviherye ooceecheya okookela wa Yehova?
10 Ninnaphwanela okhala oopisa murima nthowa nawi ennaviravo elukuluku yincipale wi muchu apenuwe omunepani. Ooceecheya akina aneemererya wi yaakookenle mmulokoni emanle oxekuryiwa ikwaha sincipale ni atokweene vamoha ni akina mmulokoni. Nancy murokora mmoha o Asiya oorepa: “Nthamwene aka awaacameleya a mmulokoni aakikhaviherya vancipale. Owo aanakisivela ntoko murokora awunnuwelavo. Owo aakuupuxerya ilukuluku saphaama naamalihaahu vamoha khalai. Owo aanakiwiriyana moopisa murima vaavaa kaalocaka moonelo aka, nave hoovelela okivaha miruku. Owo aahooniherya wi aari nthamwene eeparipari, ooreheryeya okikhaviherya elukuluku eri yoothene.”
11. Ntakhara heeni nnaphwanelaahu okhala a niphwanya wi nimukhaviherye muchu yoowo ori awuukhuwa?
11 Niphwanya nri ntoko murece yoowo onahaala ovoliha nikhwaca na murima woophoreya. Ooceecheya akina yaahiphuciwa ni muchu a mmulokoni mu iyaakha sa muculi nave nlelo ari awuukhuwa ni oonanariwa. Wa nthowa na yeeyo awo hanachuna okookela wa Yehova. Akhweya akina anuupuwela wi aakhalihiwa moohookololowa. Awo anammuchuna muchu yoowo onahaala waawiriyana ni wiiwexexa moonelo aya. (Tiy. 1:19) Mariya yoowo aari ooceecheya mu elukuluku ekina ooloca: “Kaanamuchuna muchu aarino maaru wi akiwiriyane, muchu wi akikhaviherye, ni muchu yoowo aahaala opharela ntata naka wi akeecihe.”
12. Mphwanaphwanihe mukhalelo osivela wa Yehova oryaaya ntoko mukoi.
12 Piipiliya onnaloca osivela wa Yehova ntakhara achu awe ntoko mukoi. Mmukhalelo taani osivela wa Muluku oryaaya ntoko mukoi? Muthokororye niphwanaphwaniho nla: Mwaanyiherye wi mmorenle mphareya. Macumuca aatepa nave maahi tooriryaxa. Nyenya annoohuruwelaani. Voocharela muchu yoowo ori mmwaaceya mmwaacamenlaanyu onnoovahereryaani echu ya opharela wi muhimiriwe mmaahini. Nyuwaano munnathamalela. Nyenya nlelo munnachuna nikhaviheryo nikina wi mvuluwe. Nyuwaano munnachuna okhumamo mmaahini. Mwawiihiiha munnachuna wi achu ari mmwaaceya yooruuheeleeni mukoi ni wookhaviheryaani owela mmwaaceya. Yehova aahiloca sa Aisarayeli yaawo yaarimenle ariki: “Muloko aka kaaheepesa, kimakelela ni mikoyi soosivela.” (Ose. 11:4) Olelo Muluku onoona mmukhalelo woolikana vooloca sa yaawo ahin’ye omurumeela nthowa na makacamiho ni wuukhuwa. Muluku onachuna wi awo esuwele wi owo onnaasivela nave onnachuna waakhaviherya okookela wa yoowo. Nave Yehova onanwerya woopharihelani nyuwo wi mooniherye osivela yoola wa yaawo.
13. Muloce yaweereya yeeyo enooniherya ikuru sa osivela wa onnaahu.
13 Ti woochuneya waaroromeliha ooceecheya wi Yehova onnaasivela nave wi hiyotho ninnaasivela. Munna Pablo yoowo oromoliwe mmwaha ovirale, aari ooceecheya mu iyaakha 30. Owo ooloca: “Nihiku nimoha wooxiixelo, kikhumaka vaate vaka, kaahikumana ni murokora awunnuwelavo yoowo aari ooreera murima, nave aahiloca ni miyaano moosivela. Kaahipacerya ohihimerya ntoko mwaana. Kaahimuleela wi yaakhala ntoko wi Yehova taamurumme wi aloce ni miyaano. Yaari elukuluku ene yeele kaalakelenlaaka okookela wa Yehova.”
MWAAKHAVIHERYE OOCEECHEYA MOOSIVELA
14. Mwawiiwanana nniphwanaphwaniho nnaphwanyeya mu Luka 15:4, 5, tiheeni mukukhula onapakeiye vaavaa onaphwanyeiye epucepuche yoorimeela?
14 Hiyaano ninnaphwanela waakhaviherya moohihiyererya ooceecheya. Moolikana ni mwaana oorimeela onalociwa mu niphwanaphwaniho na Yesu, ooceecheya annoona wiicela mmurimani mwaya. Woona wi yaari mu elapo ya Satana, woonaru awo hari vakhiviru va Yehova ntoko khalai. Nnaphwanela waakhaviherya yaawo olipiha nroromelo naya mwa Yehova. Mu niphwanaphwaniho na epucepuche yoorimeela, Yesu onnathariha mukhalelo mukukhula onateexeiye mmakhatani mwawe ni okookiherya veeri va muhuwo. Mukukhula oomaliha elukuluku ni ikuru wi aphwanye epucepuche yeeyo yaarimenle. Nyenya mukukhula onnasuwela wi onaphwanela oteexa woona wi epucepuche hiyaano ikuru wi yeece mukhataaya.—Mwaalakhanye Luka 15:4, 5.
15. Nni naakhaviherye hai ooceecheya yaawo anachuna okookela wa Yehova? (Moone ekaaxa “ Ekaruma Yoochuneyaxa.”)
15 Nnaphwanela omaliha elukuluku ni ikuru sahu wi naakhaviherye ooceecheya okookela omurumeela Yehova. Nyenya nnikhaviheryo na munepa wa Yehova, Masu awe, ni soolaleeryiwa nnaakhelaahu mmulokoni, nnanwerya waakhaviherya ooceecheya okhala oolipa omunepani wanaawiili. (Aro. 15:1) Nni neereno hai eyo? Mutokweene mmoha amavyakelo ooloca: “Ooceecheya ancipale yaawo alakelenle omurumeela Yehova wanaawiili, annachuna yoohuserya ya Piipiliya.” * Mwawiihiiha, wakhala wi moovekiwa ohuserya ni ooceecheya munaphwanela weemererya moohakalala. Mutokweene owotho ooloca: “Mulaleeryi yoowo onahaala weecihaka yoohuserya onaphwanela okhala nthamwene aphaama, yoowo mulipa ooceecheya onahaaleiye omuroromelaka.”
OHAKALALA WIRIMU NI VEELAPONI YAVATHI
16. Nnasuwela hai wi ankeelo ananwerya onikhaviherya hiyaano?
16 Saweereya sincipale sinnooniherya wi ankeelo annalapa vamoha ni hiyo wi enikhaviherye waaphwanya ooceecheya yaawo anachuna okookela wa Yehova. (Wup. 14:6) Ntoko yootakiherya Silvio o Ekwatore, aahimveka Yehova wi amurumihele muchu yoowo aahaala omukhaviherya okookela mmulokoni. Avekelaka hiiha, atokweene a muloko eeli yaaphiya vaate vawe. Variyari va oxekurya yoole, atokweene awo yaahihakalala vaavaa yaapacenryaaya omvaha nikhaviheryo nenlo aachuneiye.
17. Mareeliho taani nnaakhelaahu vaavaa nnaakhaviheryaahu ooceecheya omunepani?
17 Nnahaala ophwanya ohakalala otokweene vaavaa nnaakhaviheryaahu ooceecheya omunepani okookela wa Yehova. Moone yeeyo Salvador, piyoneero yoowo onaapwacha ooceecheya onaloceiye: “Kaawuupuwelaka vooloca sa ooceecheya yaawo akoonke, kinnatepa ohakalala vancipale. Kinnahakalala vancipale woona wi kinnalapa vamoha ni Yehova, omukhaviherya mmoha a alapeli awe okhuma mu elapo ya Satana ni okookela mmulokoni.”—Saw. 20:35.
18. Wakhala wi mwa muchu ooceecheya omunepani, tiheeni munaphwanelaanyu ororomela?
18 Waakhanle wi nyuwaano moohiya othukumana ni achu a Yehova munaphwanela ororomela wi nlelo owo onnoosivelaani. Yehova onachuna wi mukookele wa yoowo. Nyuwaano munaphwanela wiilipiserya wi mukookele wa Yehova. Nyenya moolikana ni tiithi olociwe mu niphwanaphwaniho na Yesu, Yehova onaweherya wi mukooke, nave owo onahaala owaakhelaani moohakalala mu emusi awe.
NCIPO 103 Asitokweene a Muloko—Yoovaha ya Yehova
^ par. 5 Yehova onachuna wi yaale ahin’ye othukumana naari olaleerya ekookele wa yoowo. Nnanwerya opaka sincipale wi naakhaviherye yaale anachuna weemererya nwopelo wa Yehova wawi: “Kookelani wa miyo.” Mmwaha yoola, nnahaala othokororya mukhalelo nneeraahu naakhaviherye yaawo.
^ par. 7 Masina makina aatorokiwa.
^ par. 15 Ooceecheya akina ananwerya okhaviheryiwa moorweela wa ohuserya makupa a liivuru Mutitelele Omusivela Muluku, nave akina ananwerya okhaviheryiwa moorweela wa wuuluulela ikapitulu sa liivuru Achegue-se a Jeová. Nikhuuru na Muteko na muloko nnahaala olakelela taani ori oophwanelela weeciha yoohuserya ntoko yeeyo.
^ par. 68 IRUKU VA IPAAXINA: Anna araru oohiyana annamukhaviherya munna mmoha yoowo onachuna okooka. Awo anneerano orweela mu telefoni, emuroromelihaka wi annamusivela, omuwiriyana ni omwiiwexexa.
