1. Enataphulela eheeni omoova Muluku, nave ntakhara heeni oryaaya woochuneya wa yaale anamusivela Yehova?

AKRISTU annamusivela Muluku, navetho annamoova. Wa akina ti woovila wiiwexexa eyo. Nyenya, tahi wi nnaloca mukhalelo wa woova yoowo onawoopopihaani. Nnahaala othokororya mukhalelo wa woova wavameekhaaya. Achu arino mukhalelo yoowo wa woova annamucicimiha Muluku nave annamusivela vancipale. Woona wi aakhalano onthamwene ni Tiithi aya a wiirimu awo hanachuna omuthananiha.—Sal. 111:10; Masi. 8:13.

2. Mwawiiwanana ni masu a Mwene Tavite anaphwanyeya mu Salumu 86:11, ichu taani piili nnahaalaahu othokororya?

² Mwaalakhanye Salumu 86:11, NN. Vaavaa munuupuwelaanyu vooloca sa masu yaala, munanwerya woona wi Mwene Tavite aahisuwela okhweleya waya omoova naari omucicimiha Yehova. Hankooni nthokororye mukhalelo nneeraahu nipharihele masu ooveereliwa a Tavite. Yoopacerya, nnahaala waalikhela mathowa anooniherya okhweleya waya woova nsina na Muluku. Yanawiili, nnahaala othokororya mukhalelo nneeraahu nooniherye wi ninnoova nsina na Muluku mu okumi ahu wa nihiku ti nihiku.

3. Yaweereya taani yaamukhavihenrye Mose otitelela ocicimiha mwawiiseela nsina na Muluku?

³ Muupuwele mukhalelo Mose aakhanleiye vaavaa iipintheiye onikhukuni nave oona eneneeryo ya ncicimiho na Yehova niviraka. “Ela akhweya yaari yaweereya yootikhinihaxa Mose onneiye Yesu ahaakumve orwa veelaponi yavathi.” Mose aahiiwa masu anacharela, mwawooneya elociwaka orweela wa munkeelo: “Yehova, Yehova, Muluku a ikharari ni ooreera murima, oohaakuvela  onanariwa nave oosareya ni osivela woohimala ni eparipari, onnooniherya osivela woohimala wa macikhwi, akhurumuwelaka soohesa ni ohiiwelela nlamulo ni soocheka.” (Muk. 33:17-23; 34:5-7, TNM) Akhweya Mose aanuupuwelela yaweereya yeela vaavaa aaphariheleiye nsina na Yehova. Hisaavo minikwa wi ohoolo waya Mose aahaalopola Aisarayeli wi “emutxitximiheke yoole orino nsina n’ovuwa ni nawopiha.”—Malam. 28:58, BNM.

4. Tiheeni eni enikhaviherye omucicimiha Yehova moopwaha?

⁴ Vaavaa nnuupuwelaahu vooloca sa nsina Yehova, nnamweerano phaama omuupuwelela mwaneene a nsina. Nnaphwanela wuupuwela mikhalelo sawe, ntoko owerya, miruku, ekhaikhai, ni osivela. Wuupuwelela mikhalelo seiya ni mikina, enamuniceenyerya omucicimiha owo moopwaha.—Sal. 77:11-15.

5-6. (1) Nsina na Muluku nnataphulela eheeni? (2) Mwawiiwanana ni Mukwaha 3:13, 14 ni Isaiya 64:8, mmikhalelo taani Yehova oneeriheiye wi ichu seereyeke?

⁵ Tiheeni nsuwenlaahu vooloca sa yootaphulela ya nsina na Muluku? Alipa oohuserya ancipale anneemererya wi nsina Yehova, nnataphulela “Owo Onnakhala Soothene Onachuneiye.” Yootaphulela yeela ennanuupuserya wi hiyaavovo enahaala omuhiiha Yehova waakhwaniherya yeeyo onachuneiye opaka. Mwawiihai?

⁶ Yehova onneeriha ichu moorweela wa weerano ntoko onachuneiye wi akhwaaniherye yoolakelelaawe. (Mwaalakhanye Mukwaha 3:13, 14.) Mu soolaleeryiwa sahu, wiiliwiili ninnuupuseryiwa wuupuwela nikupa nenla nootikhiniha na omuchu wa Muluku. Yehova tho onnaweeriha akapuro awe oohiphaameya okhala yeeyo onachuneiye wi emurumeele nave ekhwaaniherye yoolakelelaawe. (Mwaalakhanye Isaiya 64:8.) Mmikhalelo seiya, Yehova onneeriha wi yookhwelaawe ekhwaaniheryiwe. Hiyaavo enahaala omuhiiha okhwaaniherya yoolakelelaawe.—Isa. 46:10, 11.

7. Nni naaceererye hai omuthamalela wahu Tiithi ahu awirimu?

⁷ Nnanwerya waaceererya omuthamalela wahu Tiithi ahu awirimu moorweela wa wuupuwelela yeeyo opankeiye ni onaneeriheiye opaka.  Ntoko yootakiherya, vaavaa nnuupuwelaahu vooloca sa ichu soothene Yehova opatunseiye, ninnatikhiniheya vancipale ni echu vyakala owo opankeiye. (Sal. 8:3, 4) Nave vaavaa nnuupuwelelaahu mukhalelo Yehova onanikhaviheryeiye wi nikhwaaniherye yookhwelaawe, ninnaceenyeryeya omucicimiha moopwaha. Chiryene nsina Yehova ti nootikhiniha! Nno nnaphitaanyerya ichu soothene Tiithi ahu oreiye, soothene opankeiye, ni soothene onahaleiye opaka.—Sal. 89:7, 8.

8. Mwawiiwanana ni Malamulo 32:2, 3 tiheeni Yehova onachuneiye ni nsina nawe?

⁸ Aisarayeli ehaakumve ovolowa mu Elapo ya Nlakano, Yehova aahimuhusiha Mose masu a ncipo. (Malam. 31:19) Voocharela, Mose aahaahusiha achu ncipo. (Mwaalakhanye Malamulo 32:2, 3.) Vaavaa nnuupuwelelaahu iversikulu 2 ni 3, enakhala yawooneya wi Yehova hanachuna wi nsina nawe nivithiwe, nikhalihiweke ntoko echu yamalavi ehinaphwanela oromoliwa. Owo onachuna wi nsina nawe nsuweliwe ni achu oothene! Yaari ekari etokweene wa Aisarayeli omwiiwa Mose aahusihaka vooloca sa Yehova ni nsina Nawe noocicimiheya! Yeeyo Mose aahusinheiye yaahilipiha nroromelo naya nave yahaaceenyerya, hiiha ntoko epula yoomaaleleya enannuwiha mwiri. Nni nroromele hai wi mukhalelo ahu wa ohusiha ori ntoko yoowo?

9. Nni nikhaviherye hai weeliha nsina na Yehova?

⁹ Elukuluku nnalaleeryaahu empa ni empa naari vanlakani, nnanwerya ompharihela Piipiliya wi niwoonihe achu nsina na Muluku, Yehova. Nnanwerya waavaha soolaleeryiwa ni ixilema saphaama, ni ikaruma inaphwanyeya mu esaiti ahu seiyo inamucicimiha Yehova. Omutekoni, osikola, naari elukuluku nnapakaahu mukwaha, nnamphwanya ikari wi nloce sa Muluku ahu oosivela ni mikhalelo sawe. Nnamwaleela ichu sootikhiniha Yehova onahaleiye opaka ntakhara hiyo ni elapo yavathi. Nave vaavaa aniiwaaya ichu seiyo anamusuwela mu ekwaha yoopacerya mukhalelo Yehova onansiveleiye. Vaavaa nnaaleelaahu akina iparipari vooloca sa Tiithi ahu awirimu, ninnaaceererya weeliha nsina na Muluku. Ninnaakhaviherya achu wiiwexexa wi aahusihiwa sawootha sincipale vooloca sa yoowo. Yeeyo nnaahusihaahu achu orweela Mpiipiliya echu yoohakalalihaxa anaphwanelaaya ohuserya.—Isa. 65:13, 14.

10. Vaavaa nneecihaahu soohuserya sa Piipiliya, ntakhara heeni henaakhwana ohusiha pahiru malamulo eekhaikhai a Muluku?

¹⁰ Vaavaa nneecihaahu soohuserya sa Piipiliya, yoolakelelaahu ori waakhaviherya oohuserya a Piipiliya osuwela ni opharihela nsina, Yehova. Mwawaaceererya, nnachuna waakhaviherya osuwela yeeyo nsina nawe nneemelelaaya. Apwanne nnanwerya waakhwaniherya yeela wakhala wi pahiru nnoona ovahererya mahusiheryo, malakiheryo oomuluku, ni malamulo a meecelo? Oohuserya a Piipiliya aphaama onanwerya ohuserya malamulo a Muluku ophiyerya olekecheya. Apwanne oohuserya a Piipiliya onanwerya omwiiwelela Yehova nthowa na omusivela? Muupuwele wi Eva aahisuwela malamulo a Muluku, nyenya owo haarino osivela weeparipari wa Muluku, emohamoha tho Atamu. (Map. 3:1-6) Mwawiihiiha, nnaphwanela opaka sincipale ohiya pahiru ohusiha malamulo eekhaikhai a Muluku.

11. Vaavaa nnaahusihaahu oohuserya a Piipiliya malamulo ni malakiheryo a Muluku, nni naakhaviherye hai omusivela mwaneene a Malamulo?

¹¹ Malamulo ni malakiheryo a Yehova ilukuluku soothene taphaama wa hiyo. (Sal. 119:97, 111, 112) Nyenya oohuserya ahu a Piipiliya heeni yiiwexexe, waahikhala wi ahoona wi Yehova opanke malamulo yaawo nthowa na osivela. Mwawiihiiha nnaphwanela waakoha oohuserya ahu a Piipiliya: “Ntakhara heeni Muluku onnaaveka akapuro awe weera ela ni ohiiha weera  ichu ikina? Ela enanihusiha eheeni vooloca sa yoowo ntoko Muchu?” Wakhala wi ninnaakhaviherya oohuserya ahu a Piipiliya wuupuwela vooloca sa Yehova ni wunnuwiha osivela weeparipari ntakhara nsina nawe noocicimiheya, nnanwerya otannya mirima saya. Tahi wi oohuserya ahu anahaala osivela pahiru malamulo, nyenya tho mwaneene a Malamulo. (Sal. 119:68) Awo anahaala wunnuwiha nroromelo naya, nave eyo enamwaakhaviherya ovilela makacamiho anoorwa.—1 Kor. 3:12-15.

12. Tavite aahense hai okhapelela murima mmoha, nave ni yookhumelela taani?

¹² Masu a Mwene Tavite anaphwanyeya mu Salumu 86:11, NN, tookhweleyasa, awo ani: “murimáka okhale mmoha.” Mu okumi awe, owo aahoona wi ti wookhweya weemererya murima okhala wookawanyeya. Mu ekwaha emoha, owo ari vasulu va empa awe aahimoona mwaara a mwaneene arapaka. Mu elukuluku yeele, apwanne murima wa Tavite waari mmoha naari waahikawanyeya? Owo aahisuwela nlamulo na Yehova: “Ohimukhalele nrima mwaara a mukhwaa.” (Muk. 20:17) Naamwiihiiha, owo aahititelela onweha. Murima awe waahikawanyeya variyari va omuchuna wawe Patesepa, ni nchuno nawe na omuhakalaliha Yehova. Naamwi Tavite aamusivenle ni omoova Yehova elukuluku yincipale, owo aaheemererya nchuno nawe noonanara. Wa nthowa na yeeyo, Tavite aahipaka ichu soonanara. Tavite tho aanyemuliha nsina na Yehova. Aahaaruhela tho makacamiho achu yahaarino nthowa, ophitaanyerya echoko awe.—2 Sam. 11:1-5, 14-17; 12:7-12.

13. Nnasuwela hai wi murima wa Tavite waahikookela okhala mmoha?

¹³ Yehova aahimulaka Tavite, nave owo aahirehererya onthamwene awe ni Yehova. (2 Sam. 12:13; Sal. 51:2-4, 17) Tavite aanuupuwela makacamiho ni epahu yaakhumelenle vaavaa eemerenryeiye wi murima awe okawanyeye. Masu a Tavite yaawo anaphwanyeya mu Salumu 86:11 ananwerya oraceeliwa ni masu ala: “Mukivahe murima woohikawanyeya.” Apwanne Yehova aahimukhaviherya Tavite okhalano murima mmoha, naari woohikawanyeya? Aai, woona wi ohoolo waya, Masu a Yehova annamuloca Tavite ntoko muchu yoowo ‘murima awe woothene waari mwa Apwiya Muluku awe.’—1 Mam. 11:4; 15:3.

14. Tiheeni nnaphwanelaahu wiikoha, nave ntakhara heeni?

¹⁴ Yootakiherya ya Tavite ti yoolipiha nave tho ennanlopola. Yoohesa awe yeeyo yaamweerinhe opaka yoocheka, ennaalopola alapeli a Muluku olelo. Moohipwacha waakhanle wi nipacenrye hiihaano naari khalai omurumeela Yehova, nnaphwanela wiikoha: ‘Apwanne kinnakhooca  saweeha sa Satana seiho sinahaala okawanya murima aka?’

15. Omoova wahu Muluku oni onikhapelele hai vaavaa inakhumelelaaya iruku inavuwiha ocapaheya?

¹⁵ Ntoko yootakiherya, vaavaa munoonaanyu eruku yeeyo yaahaala oweerihaani wuupuwela sa ocapaheya, tiheeni muneeraanyu? Onamukhala wookhweya wuupuwela wi eruku naari exilema henaloca xaxaxa sa ocapaheya. Apwanne tahi wi Satana tonapharihela eruku eyo wi akawanye murima anyu? (2 Kor. 2:11) Eruku eyo enanwerya olikana ni muthipo mukhaani woothokolowa yoowo muchu onaphariheleiiye wi athaleno niwuuni ntokotoko. Woopaceryani owo onnathipela va niwuuni anamana ni haamara naari martelu. Vaava muthipo owo onavolowaaya, niwuuni niinnakawanyeya. Apwanne iruku inanwerya okhala ntoko muthipo woothokolowa yoowo onakawanya niwuuni? Echu yeeyo enakhala ntoko wi ekhaani enammweeriha muchu opaka yoocheka yeeyo eni ekawanye murima awe ni onanariha ororomeleya wawe. Mwawiihiiha, muheemererye wi echu eri yoothene yoohiphwanelela evolowe mmurimani mwanyu! Mutitelele okhalano murima mmoha wa woovano nsina na Yehova!

16. Vaavaa nnahoolelaahu saweeha, makoho taani nnaphwanelaahu wiipakela?

¹⁶ Tahi wi Satana onapharihela iruku pahiru, nyenya tho onnapharihela ichu sincipale wi aneehe nave nipake yoocheka. Tiheeni nnaphwanelaahu weera? Ti wookhweya wuupuwela wi ichu seiha tahi soonanaraxa. Ntoko yootakiherya, nnanwerya wuupuwela: ‘Nkini kiikariwe mmulokoni nthowa na weerano yeela, woona wi tahi yoonanaraxa.’ Muupuwelo ntoko yoola ti wawoopiha. Nnamweerano phaama wiipakela makoho ntoko ala: ‘Apwanne Satana onapharihela yaweeha yeela wi akawanye murima aka? Wakhala wi koochariha nchuno naka noonanara, apwanne kinahaala oruuhela munyemu nsina na Yehova? Apwanne meerelo yaala anamukaacameliha  wa Yehova, naari anahaala okirakamihela wa yoowo?’ Muupuwelele makoho ntoko yaala. Mumveke Yehova miruku wi mwaakhule makoho yaala moororomeleya. (Tiy. 1:5) Weerano eyo enahaala onikhapelela. Eyo enamookhaviheryaani okhooca saweeha moolipa murima, hiiha ntoko Yesu eenreiye vaavaa aalonceiye ariki: “Vinyavo Satana”!—Mat. 4:10.

17. Ntakhara heeni tahi yaphaama okhalano murima wookawanyeya? Mphwanaphwanihe.

¹⁷ Tahi yaphaama okhalano murima wookawanyeya. Mwaanyiherye nikhuuru na alipa mapokha yaawo ahiniiwanana. Akina a nikhuuru nenle anachuna ocicimihiwa, akina hanachariha malamulo a mapokha, nave ancipale hanamucicimiha muhusiha aya. Ti woovila nikhuuru ntoko nenla ovootha. Moohiyana, nikhuuru na mapokha nenlo nri nawiiwanana ninnakhumelela phaama. Murima anyu onanwerya okhala ntoko nikhuuru nenla nookhumelela phaama wakhala wi muupuwelo, nchuno, ni moonelo anyu, ti sawiiwanana mu omurumeela Yehova. Muupuwele, Satana aamusiveliwa okawanya murima anyu. Satana onachuna wi muupuwelo ahu, soochuna, ni moonelo ahu, okhala woohiyana ni malakiheryo a Yehova. Mweeparipari, munaphwanela okhalano murima woohikawanyeya wi mmurumeele Yehova. (Mat. 22:36-38) Muheemererye wi Satana akawanye murima anyu!

18. Mwawiiwanana ni masu a Mikeya 4:5, tiheeni mulakelenlaanyu opaka?

¹⁸ Mvekele wa Yehova hiihaa ntoko Tavite eenreiye: “Mupe murimáka okhale mmoha wi woveke nsina nanyu.” Mulakelele opaka ichu mwawiiwanana nnivekelo nanyu. Nihiku ti nihiku mooniherye mu soolakelela sanyu, ikhaani naari itokotoko, wi munnacicimiha nsina naweela na Yehova mwawiixeela. Mweerano yeela, munahaala wooniherya wi mwa Namoona a Yehova yoowo onacicimiha nsina nawe. (Masi. 27:11) Nave oothene ahu nnanwerya oloca hiiha ntoko mulipa a miririmu Mikeya: “Hiyo nnarwa neeca mu nsina na Apwiya [Yehova] Muluku ahu mahiku oothene.”—Mik. 4:5.